Matayɔ 2 - Agɔmɔ ngia wʉ Ɨtakɨ-takɨ

Ɓombi ɓʉ mbɨmbanaka ekoo ʉ ndata ɓʉka kubibiso Yeso

¹ Yeso a꞉nʉtanɨa anʉ Bɛtɛlɛmʉ, amati ʉ gɨpa ʉ Yudɛa, akʉ ɓɔndɔ ɓʉ ngama Ɛlɔdɛ. Mbise ʉ nʉtanɨa ngiangɔ, ɓombi ɓʉ mbɨmbanaka ekoo ndata ɓa꞉ʉngwa tʉkʉ akʉ ɨpá yaaɓʉa‑ɛɛ, ɓambʉka anʉ Yelusalɛma.

² Kija ɓa꞉ɓukuo ɓɔ: « Mwana ngia ʉ꞉nʉtanɨa kuɓio ngama ʉ Ɓayuda a gbanɨ? Ka꞉na pongo ʉndata nguangɔ kʉjɨa akʉ ɨpá yaaɓʉa‑ɛɛ. Kija isu kʉka tiga nayɔ kʉ kubibiso. »

³ Iya ngama Ɛlɔdɛ a꞉kɔ moni ngikʉnanɨ, ambʉmbambania nadɨndɨ, ɨzɔ nʉ ɓombi ɓʉ Yelusalɛma kʉ ɓuɓomu.

⁴ Ambʉmʉma ɓangama ɓʉ ɓakumu‑kumu kʉ ɓuɓomu, nʉ ɓapananakɨa ɓʉ mapanʉ, naɓɔ kuɓukuo ɓɔ ya꞉kwanana jɛnɛ ɓɔ Klisito ʉnʉtanɨa gbanɨ.

⁵ Kija ɓa꞉mutisio ɓɔ: « Anʉ Bɛtɛlɛmʉ, amati ʉ gɨpa ʉ Yudɛa. Kakʉmbɨa jʉ ɨgbɛ ya꞉tɨndakɨa ɓɔ:

⁶ ‹ Ɔwɛ gʉlʉ ʉ Bɛtɛlɛmʉ ngia wa amati ʉ gɨpa ʉ Ɓayuda, ɔwɛ wambʉkɔmʉ gʉlʉ ʉ ɓatei amati ʉ ɓagʉlʉ ngiɓa ɓʉ Ɓayuda, jʉ amati asɔɔ ngama a꞊nʉtanɨa, iya aɓio kʉkanga Ɓaɨsalaɛlɛ ɓombi ngiɓʉsɛmɛ. › »

⁷ Kija Ɛlɔdɛ a꞉soko ɓombi ɓʉ mbɨmbanaka ngiɓʉnanɨ akʉ ɓaɗi ɓɔ, ɓʉmʉngakɨa‑zʉ tʉkʉ kingono ɓɔ, ʉndata nguʉnanɨ wa꞉ɓʉa pongo ati tɨmanɨ.

⁸ Mbise ɔngɔ, ambʉɓʉtʉma anʉ Bɛtɛlɛmʉ, ambuɓusigio ɓɔ: « Seni, nambupimiso ɨsaʉ yɨ mwana ngiinanɨ iɗo. Ndʉ na꞊mʉna, nambʉka nɛmɛ kʉ kʉɓɨa, ambʉ ɛmɛ mʉsa nayɔ kʉ kubibiso. »

⁹ Iya ɓa꞉kɔ moni ngikʉnanɨ ngama Ɛlɔdɛ a꞉ɓusigio, ɓambʉʉngwa yɨndaɓʉ. Ʉna tɔ, ʉndata nguʉnanɨ ɓa꞉ʉna nʉ wagba ngua ɨpá yaaɓʉa‑ɛɛ, wa꞉ɓʉtɨnganɨa tiga apɛɛ, wambʉsa kʉmaa tʉkʉ ngbingbii akʉ izi ngia mwana i꞉nye‑ɔɔ ɓʉ tɨngbɨ.

¹⁰ Iya ndʉ ɓombi ɓʉ mbɨmbanaka ɓa꞉na ʉndata ɓwanɨ, ɓambʉkwa tiga ɨgyagya nadɨndɨ.

¹¹ Kija ɓa꞉kumunio ambɛnɨ, ɓambʉna mwana ɨzɔ nʉ inye Malɨa. Ɓambʉgbʉkʉmɨa nʉ muwuu kubibiso mwana. Mbise ɔngɔ, ɓambuɓonoko likwe ngilʉndaɓʉ, ɓambumunzo apɛpɛ wʉ ɔlɔ, wadodo nʉ malazi.

¹² Mbise ngiinanɨ, Asʉɓɨɨ ambuɓusigio akʉ ʉtakanaka ɓɔ, ɓɔɔtʉa tii ɓata ɨngbaa ɔɔ Ɛlɔdɛ. Kija ɓa꞉tʉa andaɓʉ tiga nɨngbaa nga yɛmɔ kʉ di.

Ɔɔ Yɨjɛfʉ nʉ Malɨa ɓʉsa bangʉ nʉ Yeso anʉ Misili

¹³ Iya ndʉ ɓombi ɓʉ mbɨmbanaka ɓa꞉sa yɨndaɓʉ, malaika wʉ Makʉʉɓɨɨ wambʉɓwanɨa Yɨjɛfʉ amati ʉ ʉtakanaka. Gʉ ɛyɔ nayɔ ɓɔ: « Ʉngwa ɨkʉʉ, chɨka ɔɔ mwana nʉ inye, wambʉsa naɓɔ bangʉ anʉ Misili. Jʉ Ɛlɔdɛ akʉhata ɓɔ awa mwana wanɨ. Ɓieni tʉkʉ nani kʉɓʉya ɓisi ongo tʉkʉ aka ma꞊nisigio sina‑ɔɔ ɓɔ tʉeni tiga tʉaa. »

¹⁴ Tʉkʉ nuɓutu ngiinanɨ, Yɨjɛfʉ ambʉjʉkana, nʉ chɨka ɔɔ mwana nʉ inye, ɓambʉʉngwɨa kɨnda kʉsa anʉ Misili.

¹⁵ Kija ɓi꞉nye tii tʉkʉ nani kʉɓʉya tʉkʉ aka Ɛlɔdɛ a꞉wo‑ɔɔ. Ya꞉mbʉkyananakɨa tʉkʉ ɓwanɨ, kʉkpatanakɨa nʉ moni ngika Asʉɓɨɨ Makʉʉɓɨɨ a꞉sigio jɛnɛ ɨgbɛ ngiangɔ ɓɔ: « Ma꞉soko mwana ngiasɛmɛ ɓɔ ʉʉngwa anʉ Misili. »

Ngama Ɛlɔdɛ unzo ʉpanʉ ɓɔ ɓʉmaa ɓana ɓɔɔ gue

¹⁶ Iya ngama Ɛlɔdɛ a꞉mbɨa ɓɔ ɓombi ɓʉ mbɨmbanaka ɓʉ꞉mʉpɨta pɨtaa, ambuhuo nʉ ʉnganga tʉkʉ ɓʉ fɔ. Ambʉtʉma ɓasʉda ɓɔ ɓʉsa anʉ Bɛtɛlɛmʉ, nʉ akʉ ɓagʉlʉ kʉ ɓuɓomu ngiɓa ɓa anambamba ɔngɔ. A꞉ɓunzo ʉpanʉ ɓɔ ɓʉmaa ɓana ɓɔɔ gue kʉ ɓuɓomu kʉʉngwa nʉtanɨa kʉɓʉya mugo kapɨnɨ. A꞉nzo ʉpanʉ nguʉnanɨ kʉkpatanakɨa nʉ wati ngua ɓombi ɓʉ mbɨmbanaka ɓa꞉na‑ɔɔ 'ʉndata.

¹⁷ Kʉ ɓwanɨ, moni ngika ɨgbɛ Yelemia a꞉sigo jɛnɛ ɨkɔ ɨkʉnanɨ ka꞉kyananakɨa kusigo ɓɔ:

¹⁸ « Iyo yakʉkɔnɨo kʉʉngwa anʉ Lama, ndɨa nʉ ndɨndanaka yɨɓaa angu. Lachɛlɛ iinanɨ akʉndɨa ɓana ɓangɔ, ambʉkɔmʉ tii ɓata kʉkʉnda ɓɔ ɓʉmʉgbʉma, jʉ ɓana ɓangɔ ɓʉdʉka dʉkaa. »

Ɔɔ Yɨjɛfʉ ɓʉtʉa akʉ ɓa꞉sa‑ɛɛ anʉ Misili

¹⁹ Mbise ʉ ingyo yɨ Ɛlɔdɛ, malaika wʉ Makʉʉɓɨɨ wambʉɓwanɨa Yɨjɛfʉ akʉ ʉtakanaka, ɛyɔ‑zʉ gbɛgbɛ tʉkʉ na anʉ Misili.

²⁰ Gʉ ɛyɔ nayɔ ɓɔ: « Ʉngwa ɨkʉʉ, chɨka ɔɔ mwana nʉ inye, tʉeni akʉ ɨkʉmbʉ yɨ Ɨsalaɛlɛ, jʉ ɓombi ngiɓa ɓi꞉nye pongo kʉsagɨa mwana ɓɔ ɓamʉwa tʉkʉ wanɨ, ɓa꞉sio pongo tiga sioo. »

²¹ Kija Yɨjɛfʉ a꞉ʉngwa ɨkʉʉ, ambʉchɨka ɔɔ mwana nʉ inye ɓambʉtʉa anʉ Ɨsalaɛlɛ.

²² Ɨkyɛmɨngana, iya Yɨjɛfʉ a꞉kɔ ɓɔ ɓata tʉkʉ Alɨkɛlaɔ ngia mwana ʉ Ɛlɔdɛ ʉ꞉dya ɓʉngama anʉ Yudɛa mbise ʉ ingyo yɨ ɨsɛ, i꞉nye ɓata tʉkʉ nʉ ʉɓa kʉtʉa nani. Ambʉgʉ pe, Asʉɓɨɨ ʉ꞉mʉɓɨa moni akʉ ʉtakanaka. Kʉ ɓwanɨ, ambʉsa yangɔ anʉ Galilaya.

²³ Nani, ambʉsa kuwulo akʉ gʉlʉ ʉ Najalɛtɛ, kʉkpatanakɨa nʉ moni ngika lɨgbɛ lʉ Asʉɓɨɨ la꞉ngaka jɛnɛ ɓɔ: « Ɓa꞊musoko sina ɓɔ 'Ʉnajalɛtɛ. »