Matayɔ 19 - Agɔmɔ ngia wʉ Ɨtakɨ-takɨ

Yeso ʉpanɨa ekoo ʉ tuiso moi

¹ Iya Yeso a꞉pipo sigo moni ngikʉnanɨ ɓʉ gba, ambʉʉngwa anʉ Galilaya, ambʉsa tiga nʉ wagba wʉ gɨpa ʉ Yudɛa, iya a amondu ʉ ɗei ngia ɓa'usoko ɓɔ Yɔlɔdanɨ.

² Ungbutu wʉ ɓombi wi꞉nye ambise angɔ ɓʉ ngboo, ambuhiiso ɓombi ɓʉ ɓakwisikiso nanɨ.

³ Ɓafalisayɔ ngana ngana ɓambʉka nayɔ kukanyo, gʉ ɛɓɔ nayɔ ɓɔ: « Ajʉ yaabayanɨa bayanɨanɨ gue kutuiso moi angɔ, ekoo ʉ lɨngbaa lʉ moni kʉ di di di ɓiɛ? »

⁴ Yeso ambuɓutisio ɓɔ: « Ajʉ nambupopokokɔmʉ sina‑zʉ ɓɔ, akʉ 'ʉkpanganɨa ‹ Asʉɓɨɨ a꞉kyɨa ɔɔ gue nʉ moi? ›

⁵ Asʉɓɨɨ ambusigo ɓɔ: ‹ Ya aka ekoo ʉ moni ngikʉnanɨ, iya gue a꞊ʉngwa‑ɔɔ ɔɔ ɨsɛ nʉ inye, kija ɓa꞊jubunio nʉ moi angɔ, ɓambʉka tii tʉkʉ ndʉtʉ mɨngana. ›

⁶ Iiya ɓɔ, ɛɓɔ ɓambʉkɔmʉ tii ɓata ɓombi ɓapɨnɨ, ɨkyɛmɨngana ɓa tii tʉkʉ ndʉtʉ mɨngana. Kʉ ɓwanɨ, ɓombi ngiɓa Asʉɓɨɨ uɓuɗitinisoo, mombi ɔɔɓʉɗʉkwanisokɔmʉ! »

⁷ Ɓafalisayɔ ngiɓʉnanɨ ɓambumuɓukuo ɓata ɓɔ: « Ɛɛ! Jʉtanɨ‑zʉ Mʉsa a꞉nzo ʉpanʉ ɓɔ gue utuiseni moi angɔ, umunzo ʉbalʉa ngua ɓʉsɨana‑ɔɔ nayɔ? »

⁸ Yeso ambuɓutisio ɓɔ: « Mʉsa a꞉ninzo ʉpanʉ kutuiso ɓoi ɓʉndɛnʉ tʉkʉ aka ekoo ʉ 'ʉtʉ wɔɔ ɓʉmʉ nguʉndɛnʉ. Ɨkyɛmɨngana, kʉʉngwa akʉ 'ʉkpanganɨa ya꞉mbikinye jɛnɛ ɓwanɨ.

⁹ Maninu kusigio ɓɔ gue utuiseni moi angɔ, ambʉchɨka wɔmɔ, ambʉ ʉkyɨa ɨndambʉ kyɨanɨ. Yiɓio tʉkʉ ambʉ ɓʉ꞉mʉfa nʉ gue. »

¹⁰ Kija ɓakpataka ɓa꞉sigio Yeso ɓɔ: « Ndʉ yaɓio ɓɔ ʉɓɨɨ ngua wʉ ɔɔ gue nʉ moi wa ɓwanɨ, ya tʉ nʉ ɨjangɨa tɨmanɨ kʉchɨkana? »

¹¹ Yeso ambuɓutisio ɓɔ: « Chʉkɔmʉ mombi kʉ uɓomu akwanana baya moni ngikʉnanɨ, yambikinye tʉkʉ ɓombi ngiɓa Asʉɓɨɨ a꞉ɓunzo mbɨmbanaka kupimiso engo.

¹² Jʉ yanʉ ɓombi ngiɓa ɓambʉkʉkwanana kʉchɨkana, jʉ ɓa ndʉ lisimo kʉʉngwa tʉkʉ nʉtanɨa ngiindaɓʉ, gʉ yɛmɔ ɓɔ jʉ ɓombi ɓa꞉ɓusimo nʉ tɛlɛ kuɓio tʉkʉ ɓwanɨ. Ɓɔmɔ ɓa꞉napɨanɨa tʉkʉ ɛɓɔ ɓakʉɓɔngɔ kʉka lisimo aka ekoo ʉ Ɓʉngama ngiɓa ɓa ekoo ʉ ɓisi. Mombi ngia aɓio ikanzi ngia abaya moni ngikakɛ, ʉkʉbaya bayanɨ. »

Yeso umbuiso ɓana

¹³ Mbise ngiinanɨ, ɓombi ɓambʉka nʉ ɓana apɛɛ ʉ Yeso ɓɔ ʉnapɨa lɨkɔndɔ ekoo ʉndaɓʉ, ambʉɓʉtɨa Asʉɓɨɨ. Ɨkyɛmɨngana, ɓakpataka ngiɓangɔ ɓambufaniso naɓɔ ngbaakɨa.

¹⁴ Kija Yeso a꞉sigio ɓakpataka ɓɔ: « Sɨeni ɓana ɓɔɔ ɗɛ ɗɛ ɗɛ kʉka ya andɛmɛ. Nɔɔɓunangyokɔmʉ, jʉ Ɓʉngama ngiɓa ɓa ekoo ʉ ɓisi ɓa ekoo ɓombi ngiɓa ɓa ngbanga ndʉ ɛɓɔ. »

¹⁵ Ambʉnapɨa lɨkɔndɔ ekoo ʉndaɓʉ, kija a꞉ʉngwɨa kɨnda nanɨ, ambʉsa yangɔ.

Momɓi ʉ lɨkyɛmɛ uɓukuo Yeso ɨngbaa yɨ moni

¹⁶ Mwana ʉ ɓandambʉ mʉngana, ambʉka apɛɛ ʉ Yeso, ambumuɓukuo ɓɔ: « Mʉpananakɨa! Mʉkwanana kyɨa ɨmanɨ yɛɛ iɗo aka ekoo ngia ɓɔ mʉnyɨa nʉ ʉɓɨɨ wʉ mɨtʉ yɨ ɨpá nʉ mɨtʉ yɨ ɨpá? »

¹⁷ Yeso ambumutisio ɓɔ: « Jʉtanɨ wʉnaɓukuo aka ekoo moni ngika kɔɔ muɗo? Mombi ɔɔ 'uɗo a tʉkʉ mʉngana ɓʉ kpe. Wʉkʉndeni kukumunio amati ʉ Ɓʉngama ngiɓa ɓa ekoo ʉ ɓisi, kyananakɨa tʉkʉ mapanʉ. »

¹⁸ Mwana ʉ ɓandambʉ ngiinanɨ ambumuɓukuo ɓɔ: « Mapanʉ tɨmanɨ? » Yeso ambumutisio ɓɔ: « Wɔɔwakɔmʉ mombi, wɔɔkyɨakɔmʉ ɨndambʉ, wɔɔɓokɔmʉ ɨkyɛmɛ, wɔɔchwiokɔmʉ mangɛ nʉ moni kʉɓʉʉ.

¹⁹ Kumo ɔɔ atɔ nʉ anʉ. Nʉ kʉnda mangɛ ngbanga kʉndʉ waakʉndana ɔwɛ mambɨnyɔngɔ. »

²⁰ Gʉ mwana ʉ ɓandambʉ ngiinanɨ ɓata nayɔ ɓɔ: « Mapanʉ ngikʉnanɨ kʉ muɓomu maakyɨa nakɔ tʉkʉ kʉkyananakɨa. Yɨnatukio tiga ɨmanɨ? »

²¹ Gʉ Yeso nayɔ ɓɔ: « Ndʉ wabaya kuɓio 'ʉkwananakɛ, sa kʉgaba kumbo ngiasɔɔ kʉ 'uɓomu. Falanga ɔngɔ, wambʉɨpakɨa ɓombi ɓʉ ɓanangyɨa. Kʉ ɓwanɨ, wa꞊nyɨa tiga nʉ ɨjangɨa yɛɛ ɨja ekoo ʉ ɓisi, mbise ɔngɔ wambʉnakpata. »

²² Iya mwana ʉ ɓandambʉ ngiinanɨ a꞉kɔ nayɔ moni ngikʉnanɨ, ambʉsa tii tʉkʉ nʉ ikoko ɨja akʉ 'ʉtʉma, jʉ i꞉nye nʉ lɨkyɛmɛ chʉkɔmʉ nʉ imbi.

²³ Kija Yeso a꞉sigio ɓakpataka ngiɓangɔ ɓɔ: « Tʉkʉ kingono, maninu kusigio ɓɔ, ya ɓʉkaɨ mombi ʉ lɨkyɛmɛ kukumunio akʉ Ɓʉngama ngiɓa ɓa ekoo ʉ ɓisi.

²⁴ Nʉ ma ɓata kʉmatɨa ninu kusigio ɓɔ, kʉndʉ ya ɓʉkaɨ nama ɔɔ 'ʉja ngia ɓaamusoko ɓɔ ngamia kukumunio akʉ ihoo yɨ ɗipio, ya ɓata kʉ ɓʉkaɨ mombi ʉ lɨkyɛmɛ kukumunio akʉ Ɓʉngama ɓʉ Asʉɓɨɨ! »

²⁵ Iya ɓakpataka ɓa꞉kɔ nayɔ moni ngikʉnanɨ, yambʉɓʉmbangɨa nadɨndɨ, gʉ ɛɓɔ ɓɔ: « Huu! Anɨ tiga a꞊nyɨa nʉ ɓʉhɨa? »

²⁶ Yeso ambʉɓʉkanga ɓʉ gbɔɔ, kija a꞉ɓusigio ɓɔ: « Moni ngika ka ɓʉkaɨ akʉ ɓombi, kambʉkɔmʉ ɓʉkaɨ akʉ Asʉɓɨɨ, jʉ yambʉkɔmʉ nɨngbaa yɨ moni gʉkʉ mɨngana ngia yaakyaka Asʉɓɨɨ. »

²⁷ Kija Pɛtɛlɔ a꞉musigio ɓɔ: « Andʉ tiga isu ɓombi ngiɓa ka꞉sɨa moni kʉ muɓomu nɔwɛ kʉkpata ɔwɛ. Isu ka꞊nyɨa nʉ ɨjangɨa tɨmanɨ? »

²⁸ Yeso ambuɓutisio ɓɔ: « Tʉkʉ kingono, maninu kusigio ɓɔ ati ngia Mwana ngia ʉ Mombi a꞊wulo sina‑ɔɔ akʉ izi yɨ ɓuwei yɨ ɓʉngama ngia yɨ ɨbɨba amati ʉ ʉɓɨɨ ngua wʉ ɨtakɨ‑takɨ, inu ɓombi kumi nʉ ɓapɨnɨ ngiɓa na꞉nakpata, na꞊wulo sina akʉ muweikie kumi nʉ kapɨnɨ, kʉtɨna 'ʉkɔmbɔ wʉ lɨkáa lʉ anza kumi nʉ dyepini ngila lʉ Ɓaɨsalaɛlɛ.

²⁹ Mombi kʉ 'uɓomu ngia a꞉sɨa lɨkáa ngilangɔ, yɛmɔ ɓamanye ɓɔɔ gue, yɛmɔ iɓa ɓɔɔ ɓoi, yɛmɔ ɨsɛ, yɛmɔ inye, yɛmɔ ɓana ɓangɔ, yɛmɔ matɨnɨ aka ekoo asɛmɛ, a꞊nyɨa nʉ kumbo ngiinanɨ nyɨaa kʉɓaa nɨsɨ mɨa mʉngana, nʉ a꞊nyɨa sina tiga kʉ nʉ ʉɓɨɨ ngua wʉ mɨtʉ yɨ ɨpá nʉ mɨtʉ yɨ ɨpá.

³⁰ Ya ɓwanɨ, ɓombi ɓaja ngiɓa ɓʉ ɓʉɓʉnɨ ɓa apɛɛ, ɓaɓio sina tiga ambise. Nʉ ɓombi ɓaja ngiɓa ɓʉ ɓʉɓʉnɨ ɓa ambise, ɓaɓio sina tiga apɛɛ. »