Matayɔ 16 - Agɔmɔ ngia wʉ Ɨtakɨ-takɨ

Ɓafalisayɔ nʉ Ɓasadukayɔ ɓakʉta Yeso ɓɔ ʉɓʉpana moni kɔɔ mʉmbangɛ

¹ Ɓafalisayɔ nʉ Ɓasadukayɔ ɓambʉka anambamba ʉ Yeso nayɔ kupindikio lipindi. Ɓambʉmʉta ɓɔ: « Tɨpana‑zʉ kɔkɔ ɔɔ ʉmbangɛ kʉpananiso ɓɔ wa꞉ʉngwa ekoo ʉ ɓisi. »

² Yeso ambuɓutisio ɓɔ: « Inu naasigo nɨpasɨ ɓɔ: ‹ Ɓisi kʉɓa, ɓisi ɓa꞊ya ɓuɗo jʉ ɓisi ekoo ɓa ɓu ngboo. ›

³ Ɨkyɛmɨngana, naasigo kʉɓa ɓɔ: ‹ Ʉgbaa wa꞊nyio nyioni jʉ ɓisi ekoo ɓa kʉnyɨa ɓʉ nzisi. › Inu naambɨa kʉkanganɨa nʉ mbɨa ɓamoni ngiɓa ɓʉ ɓisi ekoo, ɨkyɛmɨngana ya ɓʉkaɨ inu kupimiso ɓakɔkɔ ɓʉ ɨjɨjɨ ngia.

⁴ Ɓombi ngiɓa ɓʉ ɓʉɓʉnɨ ɓa ɓɨɓɨ! Ɓambakakumo Asʉɓɨɨ! Ɓakʉkʉnda tʉkʉ ɓɔ ɓʉɓʉpana kɔkɔ ɔɔ ʉmbangɛ. Ʉna tɔ, ɓambʉkʉɓʉpana kɔkɔ ɔɔ ʉmbangɛ nga kɔmɔ, yambikinye tʉkʉ iya wʉ Yɔna. » Kija Yeso a꞉ɓʉsɨa, ambʉsa yangɔ.

Ɓʉtɨ ɓɔɔ ɓufukise mikati ngiɓa ɓʉ Ɓafalisayɔ nʉ Ɓasadukayɔ

⁵ Ati ngia ɓakpataka ngiɓangɔ ɓa꞉tapʉa‑ɔɔ yapuu yɛɛ ɨja, ɓi꞉nye ɓʉpaeni kʉchɨka mikati tʉkʉ ɓʉ putu.

⁶ Kija Yeso a꞉ɓusigio ɓɔ: « Pɨmɨeni ɓufili ngiɓa ɓʉ Ɓafalisayɔ nʉ Ɓasadukayɔ pɨmɨaa iɓa ɓa ndʉ ɓʉtɨ ɓɔɔ ɓufukise mikati. »

⁷ Ɓakpataka ɓambufaniso yakanaka ati ʉndaɓʉ ɓɔ: « U꞉sigo ɓwanɨ jʉ kʉchɨkakɔmʉ mikati. »

⁸ Ʉna tɔ, Yeso a꞉mbɨa moni ngika ɓi꞉nye kusigo engo tʉkʉ mbɨanɨ. Kʉ ɓwanɨ, ambuɓusigio ɓɔ: « Jʉtanɨ nakʉyakanaka ati ʉndɛnʉ ɓɔ nambʉkɔmʉ nʉ mikati? Ɓombi tɨmanɨ iɓa ɓanʉ baya yɛɛ ɗɛkɛkɛ ɓɔ!

⁹ Ajʉ nambukupimiso sina tiga moni ɓiɛ? Nambʉkɔmʉ tii ɓata kutunguo mikati ɓɔkɔ ngia ɓugue ɛlɛfʉ ɓɔkɔ ɓa꞉ɨdya pongo, nʉ mboi yɨ ɓajaɨ ngia na꞉huikiso ɓiɛ?

¹⁰ Nʉ nambʉkɔmʉ tii ɓata kutunguo mikati ʉmalɨanɨka ngia ɓugue ɛlɛfʉ ɓʉgɨna ɓa꞉ɨdya pongo, nʉ mboi yɨ ɓajaɨ ngia na꞉huikiso ɓiɛ?

¹¹ Jʉtanɨ na꞉pimisokɔmʉ ɓɔ, mambikinye kʉngaka moni ekoo ʉ mikati ati ngia ma꞉nisigio‑ɔɔ ɓɔ pɨmɨeni ɓʉtɨ ɓɔɔ ɓufukise mikati ngiɓa ɓʉ Ɓafalisayɔ nʉ Ɓasadukayɔ? »

¹² Ɓakpataka ɓambupimiso tiga ɓɔ Yeso ambikinye kusigo ɓɔ ɓʉpɨmɨa ɓʉtɨ ɓɔɔ ɓufukise mikati, ɨkyɛmɨngana moni ngikʉnanɨ ki꞉nye tʉkʉ aka ekoo ʉ mapanʉ ngika kʉ Ɓafalisayɔ nʉ Ɓasadukayɔ.

Pɛtɛlɔ usigo ɓɔ Yeso a Klisito

¹³ Ati ngia Yeso a꞉ɓʉya‑ɔɔ amati ʉ gɨpa ʉ Kaisalia ngia wʉ Filipo, ambuɓukuo ɓakpataka ngiɓangɔ ɓɔ: « Ɓombi ɓaasigo‑zʉ ɓɔ Mwana ngia ʉ Mombi a anɨ ɓʉ kpɛ? »

¹⁴ Ɓambumutisio ɓɔ: « Ɓombi nga ɓɔmɔ, ɓaasigo ɓɔ wa Yʉanɨ ngia aaɓatiso ɓombi, ɓɔmɔ gʉ wa Ɛlɨa, ɓɔmɔ gʉ wa Yelemia, ɓɔmɔ gʉ wa mʉngana ʉ lɨgbɛ lʉ Asʉɓɨɨ. »

¹⁵ Yeso ambuɓuɓukuo ɓɔ: « Andʉ tiga inu, naasigo ɓɔ ɛmɛ ma‑zʉ anɨ ɓʉ kpɛ? »

¹⁶ Simoni Pɛtɛlɔ ambumutisio ɓɔ: « Ɔwɛ wa Klisito, Mwana ʉ Asʉɓɨɨ ngia a kʉkʉʉ! »

¹⁷ Kija Yeso a꞉musigio ɓɔ: « Ɨgyagya nɔwɛ Simoni mwana ʉ Yɔna! Jʉ chʉkɔmʉ mombi gʉkʉ mʉngana iya ʉ꞉nambiiso moni ngikʉnanɨ, yambikinye tʉkʉ Tidoo ngiasɛmɛ a ekoo ʉ ɓisi.

¹⁸ Kʉ ɓwanɨ, ɛmɛ manɔwɛ kʉɓɨa ɓɔ, ɔwɛ wa Pɛtɛlɔ inyi yɛngɔ ɓɔ ikopi. Nʉ ekoo ʉ ikopi ngiinanɨ, ma꞊tɨa kanisa ngiasɛmɛ. Abana tʉkʉ angu ngia wʉ ingyo ambʉkʉkyɨa kanisa ɨkyɛmɛ gʉkʉ ɗɛkɛkɛ.

¹⁹ Ma꞊nanzo ɓafungua ɓʉ Ɓʉngama ngiɓa ɓa ekoo ʉ ɓisi. Moni kʉ muɓomu ngika wa꞊dɨkpa akʉ ɨtaka aka, Asʉɓɨɨ a꞊kʉdɨkpa ekoo ʉ ɓisi kʉ dɨkpanɨ. Nʉ moni kʉ muɓomu ngika wa꞊ɓono akʉ ɨtaka aka, Asʉɓɨɨ a꞊kuɓono ekoo ʉ ɓisi kʉ ɓonoo. »

²⁰ Mbise ɔngɔ, Yeso ambusigio ɓakpataka ngiɓangɔ ɓɔ ɓɔɔɓɨakɔmʉ mombi ɓɔ ɛyɔ kingono a Klisito.

Yeso akʉɓɨania ingyo ngiangɔ nʉ jʉkana ngiangɔ akʉ ingyo

²¹ Kʉʉngwa isiinanɨ, Yeso a꞉faniso ɓɨakɨa ɓakpataka ngiɓangɔ tii tʉkʉ akʉ ɓʉmba ɓɔ: « Yɨkwanana ɓɔ mʉsa anʉ Yelusalɛma, nʉ nani, ma꞊dya ɓʉka‑ɓʉkaɨ ɓaja akʉ lɨkɔndɔ lʉ ɓʉkʉʉ, nʉ ɓangama ɓʉ ɓakumu‑kumu, nʉ ɓapananakɨa ɓʉ mapanʉ. Kija ɓabi nɛmɛ kʉwa, kija mbise ʉ makwaa kaatʉ ma꞊jʉkana akʉ ingyo. »

²² Kija Pɛtɛlɔ a꞉sa nayɔ kʉgbʉma anambamba ɓɔ: « Chʉkɔɔ Makʉʉɓɨɨ. Asʉɓɨɨ ʉnapɨmakɨa pɨmakɨaa. Moni gikʉnanɨ kambʉkʉkyananakɨa ekoo asɔɔ gʉkʉ ɗɛkɛkɛ! »

²³ Ɨkyɛmɨngana, Yeso ambʉnɨtana ambusigio Pɛtɛlɔ ɓɔ: « Ʉngwa anambamba asɛmɛ ɔwɛ Sɨtanɨ ngia! Wa kʉhata nɛmɛ kukwisiso. Ɔwɛ, itungwio ngiisɔɔ yambʉkɔmʉ iya yɨ Asʉɓɨɨ, ɨkyɛmɨngana ya tʉkʉ iya yɨ iɓombi. »

²⁴ Mbise ngiinanɨ, Yeso ambusigio ɓakpataka ngiɓangɔ ɓɔ: « Ndʉ mombi abaya nɛmɛ kʉkpata, ʉsɨa ʉɓɨɨ nguangɔ, ambufuɓuo mʉsalaba nguangɔ, ambʉnakpata.

²⁵ Jʉ mombi ngia a꞊baya kuhiiso ʉɓɨɨ nguangɔ, a꞊ʉyangiso yangisoo. Ɨkyɛmɨngana, mombi ngia a꞊giso ʉɓɨɨ nguangɔ ekoo asɛmɛ, a꞊uhiiso hiisoo.

²⁶ Yanʉ ɨjangɨa tɨmanɨ, mombi kʉnyɨa nʉ lɨkyɛmɛ kʉ liɓomu ngila lʉ ɨtaka, ambugiso ʉɓɨɨ nguangɔ? Ɨkyɛmɛ tɨmanɨ iya mombi a꞊kwanana kunzo akʉ madanga wʉ ʉɓɨɨ nguangɔ?

²⁷ Jʉ Mwana ngia ʉ Mombi a꞊ka sina ɨzɔ nʉ ɓamalaika ngiɓangɔ amati ʉ ɨbɨba ngia yɨ Ɨsɛ. Kija a꞊nzo mombi kʉ nangana nangana ʉkʉa kʉkpatanakɨa tʉkʉ nʉ ɨkyananakɨa ngiangɔ.

²⁸ Maninu kusigio tʉkʉ kingono ɓɔ, ati ʉndɛnʉ ɓombi ngiɓa na aka, yanʉ ɓombi ngiɓa ɓambʉkʉdʉka ɨsʉkʉɓwanɨ, ɓambʉnenikɔmʉ Mwana ngia ʉ Mombi kʉka amati ʉ ɓʉngama ngiɓangɔ. »