Matayɔ 14 - Agɔmɔ ngia wʉ Ɨtakɨ-takɨIngyo yɨ Yʉanɨ ngia i꞉nye ɓatiso ɓombi ( Mak 6:14-29 ; Luk 9:7-9 ) 1 Ati ngiinanɨ, uduɓa wʉ Yeso wambʉkwa akʉ muchwei kʉ Ɛlɔdɛ Atipasi ngia i꞉nye ngama ʉ gɨpa ʉ Galilaya. 2 Kija a꞉sigio ɓombi ɓʉ kuu ngiɓangɔ ɓɔ: « Mombi ngia ɓakʉyaka moni kangɔ akɛ ya tʉkʉ Yʉanɨ ngia i꞉nye ɓatiso ɓombi iinanɨ a꞉jʉkana bɛ akʉ ingyo! Iikwa a꞉nyɨa bɛ‑ɔɔ nʉ ʉpanʉ wɔɔ kyɨɛ moni kɔɔ mʉmbangɛ. » 3 Ɛlɔdɛ i꞉nye ufisiseni Yʉanɨ, ambutitio ɓɔ ɓʉmʉsanga nʉ nayɔ kugiso akʉ ɨkáa yɨ boloko. A꞉kyɨa moni ngikʉnanɨ tʉkʉ ekoo Elodia moi ʉ Filipo ngia i꞉nye manye ʉ Ɛlɔdɛ. 4 Yʉanɨ i꞉nye kyɨa kʉɓɨa Ɛlɔdɛ ɓʉ ngbɛlɛ ɓɔ: « Yɨkwananakɔmʉ wachɨka moi ʉ mwana ʉ anʉ gʉkʉ ɗɛkɛkɛ! » 5 Ɛlɔdɛ i꞉nye kyɨa tii nayɔ tʉkʉ kʉhata kʉwa. Ɨkyɛmɨngana, i꞉nye tiga kukumo ɓombi jʉ ɓombi ɓi꞉nye chɨka Yʉanɨ ndʉ ɨgbɛ yɨ Asʉɓɨɨ. 6 Ɨkyɛmɨngana, akʉ ɓisi ɓʉ ʉmbɔ wʉ tunguo nʉtanɨa ngia yɨ Ɛlɔdɛ, mwana ʉ Elodia ambuɓuno ʉmbɔ apɛɛ ʉ mubika. Yambukwiso ngama Ɛlɔdɛ ɨgyagya nadɨndɨ. 7 Ambumusigio ɓɔ: « Mʉtɨna silika ɓɔ ɨkyɛmɛ kʉ iɓomu ngia wa꞊nata, ma꞊nanzo ɛyɔ tʉkʉ nzoni. » 8 Kʉkpatanakɨa nʉ moni ngika inye a꞉mʉpʉpɨa, mwana ɔɔ moi ngiinanɨ ambʉsa kusigio ngama ɓɔ: « Nanzo tʉkʉ 'ʉtʉ wʉ Yʉanɨ ngia i꞉nye ɓatiso ɓombi amati ʉ zanɨ wʉ ɨpapɨ. » 9 Moni ngikʉnanɨ kambudyiso ngama ikoko nadɨndɨ akʉ 'ʉtʉma. Ɨkyɛmɨngana, jʉ i꞉nye ʉtɨneni silika apɛɛ ʉ mubika tɨnanɨ, ambutitio ɓɔ ɓumunzo 'ʉtʉ wʉ Yʉanɨ. 10 Ambutitio mombi mʉngana ɓɔ ʉsa kʉtɨna Yʉanɨ 'ʉtʉ akʉ ɨkáa yɨ boloko. 11 Ɓambʉka nʉ 'ʉtʉ wʉ Yʉanɨ amati ʉ zanɨ wʉ ɨpapɨ, ɓambumunzo ɛwɔ mwana ɔɔ moi ngiinanɨ, ambuunzo inye. 12 Ɓakpataka ngiɓa ɓʉ Yʉanɨ ɓambʉka kʉchɨka ndʉtʉ yɨ Yʉanɨ, ɓambʉsa nayɔ kʉhʉna. Mbise ɔngɔ, ɓambʉsa kʉngakɨa Yeso masaʉ kʉ moni kɔɔ maja ngikʉnanɨ ka꞉kyɨanɨa. Yeso ʉdyakakiso ɓombi ɛlɛfʉ ɓɔkɔ ( Mak 6:30-44 ; Luk 9:10-17 ; Yʉa 6:1-14 ) 13 Iya Yeso a꞉kɔ moni ngika ka꞉kyɨanɨa, ambukumunio amati ʉ ɨngbɔɔ ambʉsa ɛyɔ kʉ nangana akʉ mʉa ngua ɓombi ɓambikinye‑ɛɛ. Ɨkyɛmɨngana, iya ɓombi ɓa꞉kɔ ɨsaʉ ngiinanɨ, ɓambufaniso kpata ɨtɛtɛtɛ yɨ yapuu kʉʉngwa akʉ lɨkʉmbʉ lʉndaɓʉ kʉ di di di nayɔ kʉkpata. 14 Ati ngia i꞉nye tiga‑ɔɔ kʉɓʉa akʉ ɨngbɔɔ, ambʉna ungbutu wʉ ɓombi wɔɔ ʉja, ambʉɓʉdyɨa ikoko nadɨndɨ. Kija a꞉faniso hiiso ɓombi ɓʉ ɓakwisikiso ngiɓa ɓi꞉nye ati ʉndaɓʉ. 15 Tiga nɨpasɨ yɛngɔ, ɓakpataka ngiɓangɔ ɓambʉka, gʉ ɛɓɔ nayɔ ɓɔ: « Mʉa ngua ka‑ɔɔ akɛ wa ɨza, nʉ ɓisi ɓuwo tiga kʉ woni. Nanzaniso ɓombi ngiɓa, ɓʉsa kʉkʉa idyo aaɓandaɓʉ andei. » 16 Yeso ambuɓutisio ɓɔ: « Yɨkwananakakɔmʉ ɓʉnanzana. Inu ɓambɨnyɨɓɔngɔ ɓunzeni ɨkyɛmɛ yɛɛ ɨdyɛ! » 17 Gʉ ɛɓɔ nayɔ ɓɔ: « Isu ka aka tʉkʉ nʉ mikati ɓɔkɔ, nʉ sipe kʉ ɓepini ɓʉ kpe. » 18 Yeso ambuɓusigio ɓɔ: « Ikeni nayɔ aka. » 19 Gʉ ɛyɔ nʉ ungbutu wʉ ɓombi ngiɓʉnanɨ ɓɔ ɓuwuloko nanɨ ekoo ʉ lanza. Ambʉchɨka mikati ɓɔkɔ nʉ sipe ɓepini ngiinanɨ, ambʉkanga mesu ekoo ʉ ɓisi, ambutuisio Asʉɓɨɨ ɨbɨba, ambuiɓokoko, ambunzikio ɓakpataka ngiɓangɔ. Kija ɓa꞉ɨpakɨa ɓombi. 20 Kija ɓombi kʉ ɓuɓomu ɓa꞉dyakaka ɓambumotoko. Mbise ɔngɔ, ɓakpataka ɓambʉmʉmaka ɓadudu ɓʉ idyo ngiɓa ɓa꞉tukoko, ɓambʉkwa ɓajaɨ kumi nʉ ɓapɨnɨ ɓuhuoke tʉkʉ ɓʉ kyɛɛ kyɛɛ. 21 Ɓombi ngiɓa ɓa꞉dyakaka ɓi꞉nye ɓugue tine tine ndʉ ɛlɛfʉ ɓɔkɔ, chʉkɔmʉ‑zʉ kupoo ɓoi nʉ ɓana. Yeso ʉkɨndaka ekoo ʉ yapuu yɛɛ ɨja ( Mak 6:45-52 ; Yʉa 6:15-21 ) 22 Mbise ɔngɔ, Yeso ambunzo ɓakpataka ngiɓangɔ ʉpanʉ ɓɔ ɓuɗito akʉ ɨngbɔɔ, ʉɓʉgbʉka amondu ʉ yapuu yɛɛ ɨja. Ɛyɔ ambutukuo kʉ ananɨ, kunzo ungbutu wʉ ɓombi kɨnda. 23 Iya Yeso a꞉ɓunzo nayɔ kɨnda, ambuɗito ekoo ʉ ɨkpangba kʉta Asʉɓɨɨ. Ɓisi ɓa꞉wo inyeni tii tʉkʉ nani ɛyɔ kʉ nangana na ekoo ʉ ɨkpangba. 24 Ɨngbɔɔ yi꞉nye ananɨ tiga danga nʉ ɨtaka, yambufaniso dimba nʉ mahuo uwa wi꞉nye kʉka mesu akʉ ɓi꞉nye‑ɛɛ kʉsa. 25 Tiga ɓisi tinene kʉya, Yeso ambufaniso nɨsa mesu akʉ ɓi꞉nye‑ɛɛ, inyeni kʉkɨndaka tii tʉkʉ ekoo ʉ mepo ɓʉ paa paa. 26 Ati ngia ɓakpataka ngiɓangɔ ɓa꞉mʉna‑ɔɔ kʉkɨndaka ekoo ʉ mepo, ɓambʉkwa ʉɓa nadɨndɨ ɓambusigo ɓɔ: « Huu! Mabɨa ʉwa wʉɓwanɨa akɛ! » Ɓambufaniso huɓoko. 27 Tʉkʉ nɨma ngiinanɨ, gʉ Yeso naɓɔ ɓɔ: « Ijiseni‑zʉ mɨtʉma nɨsɨ! Tʉkʉ ɛmɛ iinanɨ! Nɔɔkumokɔmʉ! » 28 Gʉ Pɛtɛlɔ nayɔ aka ɓɔ: « Huu Makʉʉɓɨɨ! Ndʉ yaɓio tʉkʉ ɔwɛ kingono, natitio‑zʉ ɓɔ mʉsa na akʉ wa‑ɛɛ, minyeni kʉkɨndaka ekoo ʉ mepo. » 29 Yeso ambutisio ɓɔ: « Ɨka tɔ! » Kija Pɛtɛlɔ a꞉ɓʉa akʉ ɨngbɔɔ, ambʉsa kɨndaka ekoo ɔɔ mepo ɓʉ paa paa, kʉsa akʉ Yeso i꞉nye‑ɛɛ. 30 Ɨkyɛmɨngana, iya a꞉na ɓɔ ɨbʉbʉ ya tiga ɓʉmʉ, ambʉkwa ʉɓa. Ambufaniso indio, ambuhuɓo ɓɔ: « Huu! Makʉʉɓɨɨ, nahiiso hiisoni! » 31 Tʉkʉ nɨma ngiinanɨ, Yeso ambuyumo ɨkɔndɔ, ambumuɓoto. Gʉ ɛyɔ nayɔ ɓɔ: « Baya yɛɛ ɗɛkɛkɛ tɨmanɨ iya wanayɔ ɓɔmʉ! Wi꞉nye‑zʉ kujatuoko jʉtanɨ? » 32 Ɔɔ Yeso nʉ Pɛtɛlɔ ɓambuɗito akʉ ɨngbɔɔ, gʉ ɨbʉbʉ tʉkʉ ɓʉ nyɛ. 33 Kija ɓakpataka ngiɓa ɓi꞉nye amati ʉ ɨngbɔɔ ɓa꞉gbʉkʉmɨa nʉ muwuu apɛɛ ʉ Yeso nayɔ kubibiso, ɓambusigo ɓɔ: « Wa tʉkʉ Mwana ʉ Asʉɓɨɨ kingono! » Yeso uhiiso ɓombi ɓʉ ɓakwisikiso akʉ gɨpa ʉ Gɛnɛjalɛtɨ ( Mak 6:53-56 ) 34 Ati ngia ɔɔ Yeso nʉ ɓakpataka ngiɓangɔ ɓa꞉tapʉa tiga‑ɔɔ yapuu yɛɛ ɨja, ɓambʉsa akʉ gɨpa ʉ Gɛnɛjalɛtɨ. 35 Iya ɓombi ɓʉ ɨkʉmbʉ ɓambɨa nayɔ ɓɔ tʉkʉ Yeso iinanɨ, ɓambʉnanzaniso ɨsaʉ yɛngɔ amati ʉ ɓagɨpa kʉ ɓuɓomu. Kija ɓa꞉faniso nɨka nʉ ɓombi ɓʉ ɓakwisikiso kʉ ɓuɓomu apɛɛ angɔ. 36 Ɓambʉta Yeso ɓɔ ɓumuɓoto gʉ tʉkʉ 'ʉtʉ wʉ ɨpʉkʉ nguangɔ. Ɓombi kuɓuɓomu ngiɓa ɓi꞉nye muɓoto, ɓi꞉nye hɨa tʉkʉ hɨaa. |
© 2021, Wycliffe Bible Translators, Inc.
Wycliffe Bible Translators, Inc.