Matayɔ 11 - Agɔmɔ ngia wʉ Ɨtakɨ-takɨ

Yʉanɨ ngia i꞉nye ɓatiso ɓombi ʉ꞉tʉma ɓombi kʉsa kʉna Yeso

¹ Ati ngia Yeso a꞉pipo‑ɔɔ ɓɨakɨa ɓakpataka ngiɓangɔ kumi nʉ ɓapɨnɨ moni ngika yi꞉nye kʉta ɓɔ ɓʉkyɨa, ambʉʉngwa nanɨ, ambʉsa kʉpanɨa nʉ kʉɓɨakɨa ɓombi Ɨsaʉ yɛɛ Iɗo amati ʉ ɓagʉlʉ ngiɓa ɓʉ gɨpa ʉ Galilaya.

² Ati ngia Yʉanɨ ngia i꞉nye ɓatiso ɓombi i꞉nye‑ɔɔ akʉ boloko, ambʉkɔ uduɓa wʉ moni ngika Klisito i꞉nye kʉkyɨa engo. Ambʉtʉma ɓakpataka ngiɓangɔ ngana ngana kʉsa kuɓukuo Yeso ɓɔ:

³ « Ajʉ ɔwɛ kʉ wa Masɨa ngia ʉkwanana kʉka, gʉ ɓɔ kasiɓo ɓata‑zʉ kʉ mombi wɔmɔ ɓiɛ? »

⁴ Yeso ambutisio ɓɔ: « Seni kʉɓɨa Yʉanɨ moni ngika nakʉna engo nʉ ika nakʉkɔ engo.

⁵ Ɓombi ɓɔɔ ɓuchwiye mesu ɓakʉna, nʉ ɓombi ɓɔɔ jʉnganakɛ ɓakʉkɨndaka, nʉ ɓakeɓu‑keɓu ɓakʉjaɓanakɨa, ɓombi ngiɓa ɓambakakɔ ɓakʉkɔ, mɨnda yakʉjʉkana akʉ ingyo, nʉ ɓombi ɓʉ ɓanangyɨa akʉ 'ʉtʉma ɓakʉkɔ Ɨsaʉ yɛɛ Iɗo.

⁶ Ɨgyagya nʉ mombi ngia moni ngika kʉsɛmɛ kambʉkɔmʉ kʉwa baya ngiangɔ! »

⁷ Iya ɓakpataka ngiɓa ɓʉ Yʉanɨ ɓa꞉sa nayɔ, Yeso ambufaniso ngakɨa ungbutu wʉ ɓombi moni ekoo ʉ Yʉanɨ kusigo ɓɔ: « Nʉ꞉sa‑zʉ kʉna ɨmanɨ akʉ 'ukengu? Ajʉ nʉ꞉sa kʉna ʉmbamba ngua mahuo wakudimbiso engo ɓiɛ? Chʉkɔɔ!

⁸ Nʉ꞉sa tiga kʉna ɨmanɨ? Ajʉ n꞉ʉsa kʉna mombi ɔɔ pinyonoke manzanza ɓiɛ? Chʉkɔɔ! Mɛɛ‑zʉ ɓombi ngiɓa ɓaapinyonoko manzanza, ɓaakyɨa akʉ lɨkáa lʉ ɓangama!

⁹ Nʉsa tɔ tiga kʉna ɨmanɨ? Ɨgbɛ tɔ? Ya ɓwanɨ, ɛmɛ maninu kusigio ɓɔ ɛyɔ a ɨgbɛ yɨ Asʉɓɨɨ, nʉ ʉɓaa ɨgbɛ kʉ ɓaa.

¹⁰ Ɛyɔ Yʉanɨ ngiinanɨ, iiya ɓa꞉tɨndakɨa jɛnɛ moni ekoo angɔ, ɓɔ: ‹ Ma꞊tʉma titima ngiasɛmɛ pɛɛ asɔɔ, ambʉ ʉnatambanakɨa ɔwɛ ɨngbaa. ›

¹¹ Maninu kʉɓɨa tʉkʉ kingono ɓɔ, ati ʉ ɓombi kʉ ɓuɓomu ngiɓa ɓa꞉ɓʉnʉta akʉ ʉɓɨɨ, yambʉkɔmʉ nʉ iya a 'ʉja nadɨndɨ kʉɓaa Yʉanɨ ngia i꞉nye ɓatiso ɓombi. Ɨkyɛmɨngana, mombi ɔɔ ɗɛkɛkɛ amati ʉ Ɓʉngama ngiɓa ɓa ekoo ʉ ɓisi, a mombi ɔɔ 'ʉja nadɨndɨ kʉɓaa Yʉanɨ.

¹² Kʉʉngwa akʉ wati ngua wʉ Yʉanɨ ngia i꞉nye ɓatiso ɓombi, kʉɓʉya kʉndʉ ɓʉɓʉnɨ, ɓombi ɓakʉmaniso Ɓʉngama ngiɓa ɓa ekoo ʉ ɓisi, kingono. Nʉ ɓombi ɓɔɔ ɓʉmbʉmʉ ɓakʉhata naɓɔ kʉhɨnɨa engo akʉ angu.

¹³ Pɛɛ ngia Yʉanɨ a꞉kɔ‑ɔɔ mubio kʉ muɓomu amati ʉ mapanʉ ngika kʉ Mʉsa, nʉ amati ʉ lɨtaɓʉ kʉ liɓomu ngila lʉ lɨgbɛ, ki꞉nye kʉpanɨa ekoo ʉ wati ngua Asʉɓɨɨ a꞊maiso sina‑ɔɔ Ɓʉngama ngiɓangɔ.

¹⁴ Nʉ ndʉ nakʉnda nabaya, Yʉanɨ a kingono Ɛlɨa ngia a꞉kwanana jɛnɛ kʉka!

¹⁵ Mombi ngia anʉ muchwei kɔɔ mʉkɛ, ʉkɔ moni ngikʉnanɨ!

¹⁶ Masisinio ti‑zʉ ɓombi ngiɓa ɓʉ ɓʉɓʉnɨ nʉ ɨmanɨ? Ɓa ngbanga ndʉ ɓana ngiɓa ɓaɓuwuloke akʉ ɨmbaa ɓi꞉nyeni kʉtʉɓɨa ɓangɛ ɓɔ:

¹⁷ ‹ Kʉ꞉nɨmbɨa mbáa, chʉkɔmʉ nambuɓuno ʉmbɔ gʉkʉ ɗɛkɛkɛ! Kʉnɨsʉɨa mʉmbɔ kʉ didima, chʉkɔmʉ nambʉndɨa kʉ ɓwanɨ! ›

¹⁸ Jʉ ati ngia Yʉanɨ a꞉ka‑ɔɔ, ambikinye dya idyo, nʉ ambikinye mwa vinyo kʉ ɓwanɨ. Ɓombi ɓambufaniso nayɔ kusigio tiga ɓɔ: ‹ Anʉ 'ʉtʉma wʉ abɨa! ›

¹⁹ Ati ngia Mwana ngia ʉ Mombi a꞉ka‑ɔɔ, i꞉nye dya idyo nʉ mwakanaka. Ɓambufaniso nayɔ sigio ɓɔ: ‹ Uneni mombi wʉ 'ʉhʉmʉ, nʉ mombi ɔɔ mwakanakɛ ngia! Adii wʉ ɓandɔmbɛ ɓɔɔ ɓulipise manzanza, nʉ ɓombi ɓʉ ɓʉɓɨɓɨ! › Ɨkyɛmɨngana, moni ngika akʉkyɨa engo kakupananiso 'ʉtʉma wɔɔ pimise moni ngua wʉ Asʉɓɨɨ. »

Yeso ʉʉga ɓagʉlʉ ngiɓa ɓa꞉tata baya

²⁰ Tiga nanɨ, Yeso ambufaniso gʉmʉa ɓagʉlʉ ngiɓa ɓa akʉ a꞉kyɨa‑ɛɛ ɓʉja ɓʉ moni kɔɔ mʉmbangɛ ngikangɔ. Jʉ kingono ɓombi ɓɔngɔ ɓa꞉kʉndakɔmʉ kunicho mɨtʉma. Kʉ ɓwanɨ, gʉ ɛyɔ ɓɔ:

²¹ « Ya ikoko nɔwɛ gʉlʉ ʉ Kolajini! Ya ikoko nɔwɛ gʉlʉ ʉ Betesaida! Jʉ ɓamoni ɓɔɔ ɓʉmbangɛ ngiɓa ma꞉kyɨa andɛnʉ, mʉ꞉ɓʉkyɨeni jɛnɛ akʉ gʉlʉ ʉ Tilo, nʉ wʉ Sɨdɔna, ambʉ́ ɓombi ɓʉ ɓagʉlʉ ngiɓʉnanɨ ɓa꞉pɨnya jɛnɛ ɓagunia pɨnyaa nʉ tono isupu nʉ ndʉtʉ, kupananiso ɓɔ ɓa꞉nicho mɨtʉma nichoo.

²² Iiya ma‑ɔɔ ninu kusigio ɓɔ, isiya Asʉɓɨɨ aɓio sina ɔɔ kʉtɨna 'ʉkɔmbɔ wʉ ɨtaka, a꞊tɨna sina 'ʉkɔmbɔ nguʉndɛnʉ ɓʉkaɨ nadɨndɨ kʉɓaa uwa wʉ ɓombi ɓʉ Tilo nʉ Sɨdɔna!

²³ Nʉ ɔwɛ gʉlʉ ʉ Kapelenaumu, ajʉ wakuyo ɓɔ ɓa꞊nazono kʉɓʉya ekoo ʉ ɓisi ɓiɛ? Yambʉkɔmʉ ɓwanɨ. Ɨkyɛmɨngana, ɓa꞊nijiso kʉɓʉya tʉkʉ akʉ ʉpɨa wʉ ɓʉbɨa uwa wa ɛsɨ nadɨndɨ! Jʉ moni kɔɔ mʉmbangɛ ngika ma꞉kyɨa andɔɔ, mʉ꞉kʉkyɨeni jɛnɛ anʉ Sɔdɔmɔ, ambʉ́ gʉlʉ ngiinanɨ a‑zʉ ɓʉɓʉnɨ kʉ ɓioni.

²⁴ Maninu kusigio ɓɔ, isiya ɓa꞊tɨna sina‑ɔɔ 'ʉkɔmbɔ, uwa wʉndɛnʉ waɓio sina ɓʉkaɨ kʉɓaa uwa wʉ ɓombi ɓʉ ɨkʉmbʉ yɨ Sɔdɔmɔ! »

Yeso ʉpananiso Ɨsɛ

²⁵ Ati ngiinanɨ, gʉ Yeso ɓɔ: « Tidoo, Makʉʉ ʉ ekoo ʉ ɓisi nʉ ɨtaka, manɔwɛ kubibiso jʉ wa꞉nayɨa ɓombi ngiɓa ɓanʉ 'ʉtʉma wɔɔ pimise moni nʉ ɓombi ɓʉ mbɨmbanaka moni ngikʉnanɨ. Ɨkyɛmɨngana, wa꞉kʉpanzakɨa tiga ɓombi ɓɔɔ ɨsʉkʉɓwanɨ.

²⁶ Oyi Tidoo, wa꞉baya ɓɔ yɨkyananakɨa tʉkʉ ɓwanɨ, kʉkpatanakɨa nʉ ɓʉkʉnda ngiɓʉsɔɔ.

²⁷ Tidoo a꞉nanzo ɛmɛ moni tʉkʉ kʉ muɓomu. Nʉ mombi gʉkʉ mʉngana ambakambɨa ɓɔ Mwana a anɨ, tʉkʉ Tidoo kʉ nangana aambɨa. Nʉ mombi gʉkʉ mʉngana ambakambɨa ɓɔ Tidoo a anɨ, tʉkʉ Mwana aambɨa, tiga kʉ mombi ngia Mwana aakʉnda nayɔ kumbiiso.

²⁸ Ikeni andɛmɛ, inu ɓombi kʉ ɓuɓomu ngiɓa naɓundokone nʉ na ɓufuɓoke nʉ kumbo ɔɔ ɓuto ɓuto, ma꞊nihumiso humisoo.

²⁹ Bayeni ɓɔ mʉnɨkɨndakiso, nʉ ndandeni kumbo ɔɔ ɓuto ɓuto ngia maninu kufuɓiso. Kpateni mapanʉ ngikʉsɛmɛ ika maninu kʉpanɨa, jʉ ɛmɛ ma iɗo, nʉ makʉ nʉ 'ʉtʉma wʉ majɨɔ. Kʉ ɓwanɨ manihumiso humisoo.

³⁰ Jʉ yambʉkɔmʉ ɓʉkaɨ nɛmɛ kʉkyananakɨa, nʉ kumbo ngiasɛmɛ makʉkʉnda ninu kundandiso engo ambʉkɔmʉ ɓuto, ɨkyɛmɨngana a zia zia. »