Luka 4 - Agɔmɔ ngia wʉ Ɨtakɨ-takɨ

Abɨa uɓaiso Yeso amati ʉ kanyo

¹ Ati ngia Yeso a꞉huo‑ɔɔ nʉ 'Ʉtʉma wɔɔ Tu, a꞉ʉngwa anʉ ɨtɛtɛtɛ yɨ ɗei ʉ Yɔlɔdanɨ, kija 'Ʉtʉma wɔɔ Tu wa꞉mutito kʉsa akʉ 'ukengu.

² Nani Abɨa ambumukanyo amati ʉ makwaa makumi ɓʉgɨna. Ambikinye dya ɨkyɛmɛ amati ʉ makwaa ngikʉnanɨ. Tiga ndʉ makwaa makumi ɓʉgɨna ngikʉnanɨ ka꞉ɓaa, ambʉkɔnɔ taa.

³ Kija Abɨa a꞉ka ɓata ambumusigio ɓɔ: « Ndʉ waɓio Mwana ʉ Asʉɓɨɨ, titio‑zʉ ikopi ngiakɛ ɓɔ yɨnɨtanaka mukati. »

⁴ Yeso ambumutisio ɓɔ: « Ʉpanʉ wʉ Asʉɓɨɨ wa꞉sigo ɓɔ: ‹ Ʉɓɨɨ wʉ mombi wambʉkɔmʉ tʉkʉ akʉ moni kʉ mukati. › »

⁵ Abɨa ambʉsa nayɔ akʉ mʉa wɔɔ ikongo, ambʉmʉpana akʉ wati mungono ɓʉngama kʉ ɓuɓomu ngiɓa ɓʉ ɨtaka.

⁶ Ambumusigio ɓɔ: « Ma꞊nanzo angu nʉ ɨbɨba nʉ lɨkyɛmɛ lʉ ɓʉngama kʉ liɓomu ngilakɛ, jʉ Asʉɓɨɨ a꞉nanzo ɛlɔ ɛmɛ. Nʉ makwanana kunzo mombi kʉ 'uɓomu ngia makʉnda nayɔ kunzo.

⁷ Ndʉ wagbʉkʉmɨa nʉ muwuu apɛɛ asɛmɛ nɛmɛ kubibiso, kʉ iɓomu yaɓio yɨsɔɔ. »

⁸ Yeso ambumutisio ɓɔ: « Mubio kʉ Asʉɓɨɨ ka꞉sigo ɓɔ: ‹ Bibiso Makʉʉɓɨɨ, Asʉɓɨɨ ngiasɔɔ nʉ mʉkyananakɨa tʉkʉ ɛyɔ kʉ nangana. › »

⁹ Mbise ngiinanɨ, Abɨa ambʉsa nayɔ anʉ Yelusalɛma, ambumuɗitiso ekoo ʉ 'ʉtʉ wʉ ʉpaʉ wɔɔ ikongo wʉ ɨkáa yɨ Asʉɓɨɨ, ambumusigio ɓɔ: « Ndʉ waɓio Mwana ʉ Asʉɓɨɨ, bʉmbʉa‑zʉ wambijo ɛsɨ,

¹⁰ jʉ ɓa꞉tɨndakɨa amati ʉ mubio ɓɔ: ‹ Asʉɓɨɨ a꞊titio ɓamalaika ngiɓangɔ ɓɔ ɓʉnapɨmakɨa. ›.

¹¹ Mubio ka꞉sigo ɓata kʉ ɓɔ: ‹ Ɓamalaika ngiɓa ɓangɔ ɓa꞊nafuɓuo akʉ lɨkɔndɔ ngilʉndaɓʉ, ambʉ mɨtɨndɨ ngiisɔɔ yɛɛdʉanakɔmʉ akʉ ikopi. › »

¹² Yeso ambumutisio ɓɔ: « Mubio kʉ Asʉɓɨɨ ka꞉sigo ɓɔ: ‹ Wɔɔkanyokɔmʉ Makʉʉɓɨɨ, Asʉɓɨɨ ngiasɔɔ. › »

¹³ Iya Abɨa a꞉pipo kanyo Yeso 'upi akʉ lɨngbaa kʉ liɓomu ɓʉ gba, ambʉmʉsɨa‑zʉ akʉ wati.

Yeso ʉtʉa anʉ Galilaya

¹⁴ Kija Yeso a꞉tʉa anʉ Galilaya, uhueni nʉ angu wʉ 'Ʉtʉma wɔɔ Tu. Uduɓa wangɔ wambʉndanaka gɨpa ngiinanɨ kʉ 'uɓomu.

¹⁵ I꞉nye kyɨa kʉpanɨa akʉ lɨkáa lʉ nɨta ngilʉndaɓʉ, kija ɓombi kʉ ɓuɓomu ɓi꞉nye nayɔ kʉbɨba.

Ɓʉtata Yeso anʉ Najalɛtɛ

¹⁶ Ambʉsa anʉ Najalɛtɛ akʉ a꞉yokoko‑ɛɛ. Ambukumunio akʉ ɨkáa yɨ nɨta yɨ Ɓayuda akʉ ɓisi ɓʉ humuo, kʉndʉ i꞉nye kyɨa kʉ gomu. Kija a꞉maa, ambufaniso popoko Mubio kʉ Asʉɓɨɨ.

¹⁷ Ɓambumunzo ɨtaɓʉ ngia yɨ ɨgbɛ Ɨsaya, ambuiɓono ambuchwio izi ngia ɓa꞉tɨndakɨa‑ɔɔ ɓɔ:

¹⁸ « 'Ʉtʉma ngua wʉ Makʉʉɓɨɨ wa ekoo asɛmɛ, ɛyɔ a꞉nachwa ɛmɛ kʉsa kʉɓɨakɨa ɓombi ɓʉ ɓanangyɨa Ɨsaʉ yɛɛ Iɗo. A꞉natʉma ɛmɛ kʉɓɨakɨa ɓombi ngiɓa ɓa akʉ lɨkáa lʉ boloko ɨsaʉ yɨ ɓununikio, nʉ kʉɓiakɨa ɨsaʉ yɛɛ ɓone ɓata mesu kʉ ɓombi ngiɓa ɓambakana, kuɓono ɓombi ngiɓa ɓa naɓɔ kʉkyananaka,

¹⁹ kʉɓɨakɨa ɓombi wati ngua ɨjɨɔ ngia yɨ Makʉʉɓɨɨ ya꞊ka‑ɔɔ. »

²⁰ Kija Yeso a꞉guɓoko ɨtaɓʉ ngiinanɨ, ambutuisio mombi ʉ kuu, ambuwulo ɨsɨ. Ɓombi kʉ ɓuɓomu ngiɓa ɓi꞉nye amati ʉ ɨkáa yɨ nɨta yɨ Ɓayuda ngiinanɨ, ɓi꞉nye nayɔ tii tʉkʉ kʉkanga ɓʉ gbɔɔ.

²¹ Kija a꞉faniso tiga naɓɔ ngakɨa ɓɔ: « Ɓʉɓʉnɨ moni ngika Mubio kʉ Asʉɓɨɨ ka꞉ngaka kʉkyananakɨa kyananakɨaa, aka ekoo ʉndɛnʉ, inu ngiɓa nanɛmɛ kʉkɔ. »

²² Ɓombi kʉ ɓuɓomu ɓi꞉nye mʉchwa uduɓa uɗo, nʉ yambʉɓʉmbangɨa kʉkɔ moni kʉ ɨjɨɔ ngika ki꞉nye kʉɓʉa akʉ moni ngikangɔ. Kija ɓi꞉nye tiga kuɓukuono ɓɔ: « Chʉkɔmʉ‑zʉ mwana ʉ Yɨjɛfʉ iyakɛ biɛ? »

²³ Yeso ambuɓusigio ɓɔ: « Kingono na꞊nasigio ɓisi ongo ungbagu ngua: ‹ Mʉnganga hɨana‑zʉ kʉ ɔwɛ mambɨnyɔngɔ. › Na꞊nasigio ɓisi ongo ɓata kʉ ɓɔ: ‹ Moni kɔɔ mʉmbangɛ ngika ka꞉kɔ pongo wa꞉kyɨa anʉ Kapelenaumu, kyɨa‑zʉ akʉ ɨkʉmbʉ ngiisɔɔ aka kʉ kyɨaa. › »

²⁴ Ambʉɓʉɓɨa ɓata ɓɔ: « Maninu kusigio ɓɔ, tʉkʉ kingono, ɓambakajananɨa ɨgbɛ akʉ ɨkʉmbʉ ngia aanʉtanɨa‑ɔɔ.

²⁵ Nʉ ɓata, maninu kusigio kingono ɓɔ akʉ ɓɔndɔ ɓʉ ɨgbɛ Ɛlɨa, ɓawoko ɓi꞉nye ɓaja akʉ gɨpa ʉ Ɨsalaɛlɛ, ati ngia ʉgbaa wambikinye nyio‑ɔɔ amati ʉ mugo kaatʉ nʉ muyi ʉmalɨa. Taa yɛɛ ɨja yambʉkwa amati ʉ gɨpa kʉ 'uɓomu.

²⁶ Asʉɓɨɨ a꞉tʉmakɔmʉ Ɛlɨa ɔɔ mombi nga kɔmɔ, a꞉mʉtʉma tʉkʉ ɔɔ moi mʉngana woko ɔngɔ, iya ambikinye 'ʉtʉ Ɓayuda, anʉ Jɛlɛpata akʉ gɨpa ʉ Sɨdɔna.

²⁷ Nʉ ɓata, ɓakeɓu‑keɓu ɓi꞉nye ɓaja akʉ gɨpa ʉ Ɨsalaɛlɛ akʉ ɓɔndɔ ɓʉ ɨgbɛ Elisa. Mombi a꞉hɨakɔmʉ keɓu‑keɓu ati ʉndaɓʉ gʉkʉ mʉngana, tʉkʉ Namanɨ, mombi ʉ gɨpa ʉ Sulia a꞉hɨa. »

²⁸ Iya ɓombi kʉ ɓuɓomu ngiɓa ɓi꞉nye amati ʉ ɨkáa yɨ nɨta yɨ Ɓayuda ɓa꞉kɔ moni ngikʉnanɨ, kambʉɓʉjʉka ɓʉkaɨ nadɨndɨ.

²⁹ Kija ɓa꞉ʉngwa ɨkʉʉ, ɓambiso Yeso aɓei ʉ ɨkʉmbʉ, ɓambʉsa nayɔ akʉ 'ʉɓaa wʉ ɨkpangba ngua ɓa꞉tɨa‑ɔɔ ɨkʉmbʉ ngiindaɓʉ, jʉ ɓi꞉nye kʉkʉnda ɓɔ ɓamutito ɛsɨ.

³⁰ Ɨkyɛmɨngana, a꞉ɓaa tʉkʉ na ati ʉndaɓʉ ambʉsa yangɔ.

Yeso uhiiso mombi ʉ 'ʉtʉma wʉ abɨa

³¹ Kija Yeso a꞉sa anʉ Kapelenaumu, ɨkʉmbʉ yɨ gɨpa ʉ Galilaya. I꞉nye kyɨa kʉpanɨa ɓombi akʉ ɓisi ɓʉ humuo.

³² Panɨa ngiangɔ ya꞉mbangɨa ɓombi mbangɨaa, jʉ i꞉nye kʉpanɨa nʉ ʉpanʉ kingono.

³³ Amati ʉ ɨkáa yɨ nɨta ngia yɨ Ɓayuda, mombi mʉngana i꞉nye ananɨ nʉ 'ʉtʉma wʉ abɨa. Mombi ngiinanɨ ambʉnatɨa nʉ iyo yɛɛ ɓʉmʉ kusigo ɓɔ:

³⁴ « Huu, Yeso ʉ Najalɛtɛ, wakʉkʉnda watɨkyɨa tanɨ? Ajʉ wʉka nisu kukpinyo ɓiɛ? Makʉmbɨa iɗo ɓɔ ɔwɛ wa anɨ. Ɔwɛ wa Mombi ɔɔ Tu ngia Asʉɓɨɨ a꞉mʉtʉma. »

³⁵ Yeso ambʉngbaa nʉ 'ʉtʉma wʉ abɨa nguʉnanɨ kusigo ɓɔ: « Ɔwɛ! Kata! Ɓʉa amati ʉ mombi ngia! » Kija 'ʉtʉma wʉ abɨa nguʉnanɨ wa꞉gboso mombi ngiinanɨ akɛsɨ, apɛɛ ʉ ɓombi kʉ ɓuɓomu. Wambʉmʉɓʉa, chʉkɔmʉ wambʉmʉkyɨa ɨkyɛmɛ gʉkʉ ɗɛkɛkɛ.

³⁶ Moni ngikʉnanɨ ka꞉kiso ɓombi kʉ ɓuɓomu ʉɓa, ɓambufaniso ɓukuono ati ʉndaɓʉ ɓɔ: « Ikanzi yɨ moni tɨmanɨ ikakɛ? Mombi tɨmanɨ iya akiso mɨtʉma yɨ ɓabɨa nʉ angu ɓɔmʉ, yambuɓio nayɔ kʉkɔ? »

³⁷ Kija uduɓa wʉ Yeso wa꞉nadaa tii mʉa kʉ uɓomu amati ʉ gɨpa ngiinanɨ.

Yeso uhiiso ɓakwisikiso kʉ di di di

³⁸ Iya Yeso a꞉ɓʉa nayɔ akʉ ɨkáa yɨ nɨta, ambʉsa ɔɔ Simoni. Inye ʉ moi ʉ Simoni i꞉nye ndʉtʉ ɨzɛ ɓʉ kasu. Ɓambʉta Yeso ɓɔ umuhiiso.

³⁹ Yeso ambʉka, ambʉmaa anambamba angɔ, ambʉngbaa nʉ kweso ngiinanɨ, kweso yambʉmʉngwa. Kʉ nɨma ngiinanɨ, ambʉʉngwa ɨkʉʉ, ambufaniso naɓɔ kyananakɨa.

⁴⁰ Tiga nɨpasɨ akʉ ɨpá yaakwa‑ɔɔ, ɓombi kʉ ɓuɓomu ngiɓa ɓi꞉nye nʉ ɓombi ɓʉ ɓakwisikiso kʉ di di di, ɓambʉka naɓɔ apɛɛ ʉ Yeso. Ambʉnapɨa lɨkɔndɔ ngilangɔ ekoo ʉ mombi kʉ nangana nangana ambuɓuhiiso.

⁴¹ Kija mɨtʉma yɨ ɓabɨa ya꞉ɓʉa ɓombi ɓaja, yi꞉nye kʉnatɨa kusigo ɓɔ: « Ɔwɛ wa Mwana ʉ Asʉɓɨɨ! ». Ɨkyɛmɨngana, Yeso ambʉɓʉgʉmʉa, ambʉɓʉgbʉma ɓɔ ɓɔɔsamʉakɔmʉ, jʉ ɓi꞉nye kʉmbɨa ɓɔ ɛyɔ a Klisito.

Yeso akʉɓɨakɨa Ɨsaʉ yɛɛ Iɗo

⁴² Iya ɓisi ɓa꞉ya nayɔ kʉɓa, Yeso ambʉʉngwa na amati ʉ ɨkʉmbʉ, ambʉsa akʉ mʉa ngua ɓombi ɓambikinye‑ɛɛ. Ungbutu wʉ ɓombi wɔɔ 'ʉja wambufaniso nayɔ hata. Iya ɓa꞉ɓʉya aka i꞉nye‑ɔɔ, ɓi꞉nye kʉhata nayɔ kunangyo, ambʉ aʉngwakɔmʉ na andaɓʉ.

⁴³ Ɨkyɛmɨngana, Yeso ambuɓusigio ɓɔ: « Mʉkwanana kʉ kʉɓɨakɨa Ɨsaʉ yɛɛ Iɗo ngia yɨ Ɓʉngama ɓʉ Asʉɓɨɨ akʉ lɨkʉmbʉ nga lɔmɔ, jʉ Asʉɓɨɨ a꞉natʉma akʉ ekoo ʉ moni ngikʉnanɨ. »

⁴⁴ Kija a꞉sɨnganaka nʉ ɓɨakɨa Ɨsaʉ yɛɛ Iɗo akʉ lɨkáa lʉ nɨta lʉ Ɓayuda, amati ʉ gɨpa wʉ Yudɛa.