Luka 3 - Agɔmɔ ngia wʉ Ɨtakɨ-takɨ

Yʉanɨ ngia i꞉nye ɓatiso ɓombi akʉɓɨakɨa Ɨsaʉ yɛɛ Iɗo

¹ Tibelio, ngama ɔɔ ʉja wʉ Ɓalɔma, ambʉndaniso mugo kumi nʉ ɓɔkɔ akʉ ɓʉngama. Kʉ ati ngiinanɨ Pɔtiɔ Pilato i꞉nye ngama ʉ gɨpa wʉ Yudɛa, Ɛlɔdɛ i꞉nye ngama anʉ Galilaya. Manye Filipo i꞉nye ngama ʉ gɨpa wʉ Ɨtʉlɛa nʉ Talakoniti, nʉ Lisania i꞉nye ngama ʉ Abɨlɛnɛ.

² Ɔɔ Anasɨ nʉ Kayafa ɓi꞉nye ɓangama ɓʉ ɓakumu‑kumu anʉ Yelusalɛma. Kʉ ati ngiinanɨ Ɨsaʉ yɨ Asʉɓɨɨ yambijio Yʉanɨ, mwana ʉ Jakalɨa akʉ 'ukengu.

³ Kija Yʉanɨ ngia i꞉nye ɓatiso ɓombi a꞉faniso ɓɨakɨa Ɨsaʉ yɨ Asʉɓɨɨ akʉ gɨpa ngia wʉ ɨtɛtɛtɛ yɨ ɗei ʉ Yɔlɔdanɨ kusigo ɓɔ: « Nicheni mɨtʉma ngiindɛnʉ, ɓambuniɓatiso, ambʉ Asʉɓɨɨ ʉnɨpɨa ɓʉɓɨɓɨ ngiɓʉndɛnʉ pɨaa. »

⁴ Kʉndʉ ɓa꞉tɨndakɨa amati ʉ ɨtaɓʉ ngia yɨ ɨgbɛ Ɨsaya ɓɔ: « Mombi akʉtʉɓɨa nani akʉ 'ukengu ɓɔ: ‹ Tambanakeni ɨngbaa ngia yɨ Makʉʉɓɨɨ, yumokeni lɨngbaa ngila lɔɔ lipinginikie,

⁵ Kutokeni libadu kʉ liɓomu, kwaiseni lɨkpangba ngila lɔɔ lɨkpɔkpɔ, nʉ ila lɔɔ ɗɛ ɗɛ ɗɛ kʉ liɓomu kʉ ngbanga. Yumokeni lɨngbaa ngila lɔɔ lipinginikie, yɨndanakiseni lɨngbaa ngila lanʉ mapɨa.

⁶ Kija ɓombi kʉ ɓuɓomu ɓa꞊na sina aka Asʉɓɨɨ a꞊hiiso‑ɔɔ ɓombi. › »

⁷ Ɓombi ɓaja ɓi꞉nye kʉka ɔɔ Yʉanɨ ɓɔ uɓuɓatiso. Kija a꞉ɓusigio ɓɔ: « Inu ɓazɨɨ ngiɓa! Anɨ ʉnɨpanɨa kʉchwɨa 'ʉnganga ngua wʉ Asʉɓɨɨ bangʉ, uwa wakʉka?

⁸ Pananiseni tɔ ɨkyananakɨa ngia yambiiso kingono ɓɔ na꞉nicho mɨtʉma ngiindɛnʉ nichoo. Nɔɔɓiokɔmʉ kutunguo amati ʉ mɨtʉma ngiindɛnʉ ɓɔ isu ka yɨndɛsʉ ɓanɔnɔ ɓʉ Abalama. Jʉ maninu kʉɓɨa ɓɔ, Asʉɓɨɨ a tʉkʉ ikanzi ngia akwanana kʉnɨtanakiso mukopi ngikakɛ kʉka ɓanɔnɔ ɓʉ Abalama!

⁹ Angbaka a tiga 'ʉnapɨɛ akʉ litindi‑tindi lʉ matɨ. Kʉ ɓwanɨ, ɓʉtɨ ngiɓa ɓambʉkʉmɔ lipumo lɔɔ manzanza, ɓa꞊ɓʉkwaka kwakaa ɓambuɓugiso akʉ dyaa. »

¹⁰ Kija ungbutu wʉ ɓombi wa꞉ɓukuo Yʉanɨ ɓɔ: « Kʉkwanana tiga kʉkyɨa tanɨ? »

¹¹ Ambuɓutisio ɓɔ: « Mombi ngia anʉ lɨpʉkʉ dyepini, unzo mombi ngia ambʉkɔmʉ nayɔ, nʉ mombi ngia anʉ idyo ʉkyɨa kʉ ɓwanɨ. »

¹² Ɓandɔmbɛ ɓɔɔ ɓulipise manzanza ɛɓɔ ɓa꞉ka kʉ kanɨ ɓɔ uɓuɓatiso. Ɓambumuɓukuo ɓɔ: « Mʉpananakɨa, isu kʉkwanana kʉkyɨa tanɨ? »

¹³ Ambuɓutisio ɓɔ: « Nɔɔtakɔmʉ ɓombi falanga kʉɓaa iya ʉpanʉ wakʉta engo. »

¹⁴ Ɓasʉda ɓambumuɓukuo ɓɔ: « Andʉ tiga isu, kʉkwanana kʉkyɨa tanɨ? » Kija a꞉ɓutisio ɓɔ: « Nɔɔhɨnɨakɔmʉ mombi ɨkyɛmɛ akʉ ɓukpita, nʉ nɔɔchwakɔmʉ mombi nʉ moni kʉɓʉʉ. Ɨkyɛmɨngana, kweni ɨgyagya tʉkʉ akʉ lipa ngia ɓaanilipa. »

¹⁵ Ndʉ ɓombi ɓi꞉nye kusiɓo nʉ taa yengo nadɨndɨ, nʉ ɓukuono amati ʉ mɨtʉma ɓɔ: « Atiga Yʉanɨ a Klisito. »

¹⁶ Kija Yʉanɨ a꞉ɓusigio ɛɓɔ kʉ ɓuɓomu ɓɔ: « Ɛmɛ maninu kuɓatiso nʉ mepo, ɨkyɛmɨngana mombi ngia akʉka, anʉ angu nɛmɛ kʉɓaa ɛmɛ. Mambʉkɔmʉ 'ʉkwananakɛ gʉkʉ ɗɛkɛkɛ kuɓono miki yɨ lɨkpakʉ ngilangɔ. Ɛyɔ a꞊niɓatiso ɓisi ongo nʉ 'Ʉtʉma wɔɔ Tu nʉ dyaa.

¹⁷ Anʉ lunga akʉ lɨkɔndɔ ngilangɔ kʉpɨka nganʉ. A꞊mʉma nganʉ amati ʉ ɨkáa yɨ masɔɔ ngiangɔ, kija a꞊ya lɨpapɨ lɔngɔ akʉ dyaa ngia yambakaimunio. »

¹⁸ Tiga kʉ ɓwanɨ, Yʉanɨ i꞉nye naɓɔ ɓʉngakɨa lɨngbaa lʉ moni lɨja, nʉ naɓɔ kʉɓɨakɨa Ɨsaʉ yɛɛ Iɗo.

¹⁹ Kʉ ati ngiinanɨ, Yʉanɨ ambʉgʉmʉa ngama Ɛlɔdɛ jʉ a꞉chɨka tʉkʉ moi ʉ manye ngia i꞉nye ino ɓɔ Elodia, nʉ ekoo ʉ ɓamoni ɓaja nga ɓɔmɔ ɓɔɔ ɓɨɓɨ ɓɨɓɨ ngiɓa a꞉kyɨa.

²⁰ Ɨkyɛmɨngana, Ɛlɔdɛ a꞉matɨa ɓʉɓɨɓɨ ɓata kʉ aka ekoo ʉ ɓʉɓɨɓɨ, kugiso Yʉanɨ akʉ ɨkáa yɨ boloko.

Yʉanɨ uɓatiso Yeso

²¹ Ati ngia Yʉanɨ a꞉ɓatiso‑ɔɔ ɓombi kʉ ɓuɓomu ngiɓa ɓi꞉nye ananɨ, a꞉ɓatiso Yeso kʉ ɓatisoo. Iya Yeso i꞉nye kʉta, ɓisi ekoo ɓambʉgananɨa.

²² 'Ʉtʉma wɔɔ Tu wambumijio ndʉ ɨvaka‑vaka, tʉkʉ ndʉ akʉ yaanyɨa‑ɔɔ. Kija iyo mɨngana ya꞉kɔnɨɔ ekoo ʉ ɓisi kusigo ɓɔ: « Ɔwɛ wa mwana ngiasɛmɛ wʉ ɓʉkʉnda, maakwa ɨgyagya ekoo asɔɔ nadɨndɨ. »

Ɨɓwanakɨa ngia yɨ Yeso

²³ Ati ngia Yeso a꞉kpanga‑ɔɔ kuu ngiangɔ, i꞉nye tiga nʉ mugo tine tine ndʉ makumi kaatʉ. Ɓombi ɓi꞉nye kuyo ɓɔ a mwana ʉ Yɨjɛfʉ, Yɨjɛfʉ i꞉nye mwana ʉ Eli,

²⁴ Eli mwana ʉ Matatɨ, Matatɨ mwana ʉ Lawi. Lawi mwana ʉ Meleki, Meleki mwana ʉ Yana, Yana mwana ʉ Yɨjɛfʉ,

²⁵ Yɨjɛfʉ mwana ʉ Matatɨa, Matatɨa mwana ʉ Amosi, Amosi mwana ʉ Naumu, Naumu mwana ʉ Esili, Esili mwana ʉ Nagai,

²⁶ Nagai mwana ʉ Matɨ, Matɨ mwana ʉ Matatɨa, Matatɨa mwana ʉ Simei, Simei mwana ʉ Yosei, Yosei mwana ʉ Yɔda,

²⁷ Yɔda mwana ʉ Yʉana, Yʉana mwana ʉ Lɛsa, Lɛsa mwana ʉ Jʉlʉbabɛlɛ, Jʉlʉbabɛlɛ mwana ʉ Salatieli, Salatieli mwana ʉ Neli,

²⁸ Neli mwana ʉ Meleki, Meleki, mwana ʉ Adi, Adi mwana ʉ Kɔsamʉ, Kɔsamʉ mwana ʉ Ɛlɨmadamʉ, Ɛlɨmadamʉ mwana ʉ Eli,

²⁹ Eli mwana ʉ Yosua, Yosua mwana ʉ Ɨlɨɛjɛlɨ, Ɨlɨɛjɛlɨ mwana ʉ Yɔlɨmʉ, Yɔlɨmʉ mwana ʉ Matatɨ, Matatɨ mwana ʉ Lawi,

³⁰ Lawi mwana ʉ Simioni, Simioni mwana ʉ Yuda, Yuda mwana ʉ Yɨjɛfʉ, Yɨjɛfʉ mwana ʉ Yɔnamʉ, Yɔnamʉ mwana ʉ Eliakimu,

³¹ Eliakimu mwana ʉ Melea, Melea mwana ʉ Mɛna, Mɛna mwana ʉ Matata, Matata mwana ʉ Natanɨ, Natanɨ mwana ʉ Daudi,

³² Daudi mwana ʉ Yɛsɛ, Yɛsɛ mwana ʉ Obedi, Obedi mwana ʉ Bɔajɨ, Bɔajɨ mwana ʉ Salamɔnɨ, Salamɔnɨ mwana ʉ Nasɔnɨ,

³³ Nasɔnɨ mwana ʉ Amɨnadabʉ, Amɨnadabʉ mwana ʉ Adimi, Adimi mwana ʉ Alini, Alini mwana ʉ Ɛsɨlɔnɨ, Ɛsɨlɔnɨ mwana ʉ Pelesi, Pelesi mwana ʉ Yuda,

³⁴ Yuda mwana ʉ Yakɔbɔ, Yakɔbɔ mwana ʉ Ɨsaka, Ɨsaka mwana ʉ Abalama, Abalama mwana ʉ Tela, Tela mwana ʉ Naoli,

³⁵ Naoli mwana ʉ Selugu, Selugu mwana ʉ Lagau, Lagau mwana ʉ Pelegi, Pelegi mwana ʉ Ɨbɛlɛ, Ɨbɛlɛ mwana ʉ Sɛla,

³⁶ Sɛla mwana ʉ Kenana, Kenana mwana ʉ Alufakisadi, Alufakisadi mwana ʉ Sɛmʉ, Sɛmʉ mwana ʉ Nʉa, Nʉa mwana ʉ Lameki,

³⁷ Lameki mwana ʉ Metusaeli, Metusaeli mwana ʉ Ɛnɔka, Ɛnɔka mwana ʉ Yaledi, Yaledi mwana ʉ Malaleli, Malaleli mwana ʉ Kenana,

³⁸ Kenana mwana ʉ Enosi, Enosi mwana ʉ Sɛtɨ, Sɛtɨ mwana ʉ Adamʉ, Adamʉ mwana ʉ Asʉɓɨɨ.