Luka 11 - Agɔmɔ ngia wʉ Ɨtakɨ-takɨYeso ʉpanɨa ɓakpataka ngiɓangɔ kʉta Asʉɓɨɨ ( Mat 6:9-13 ; 7:7-11 ) 1 Ɓisi mʉngana, Yeso i꞉nye kʉta akʉ mʉa mungono ɓɔ. Iya a꞉pipo kʉta, 'ʉkpataka wangɔ mungono wambumusigio ɓɔ: « Makʉʉɓɨɨ, tɨpanɨa‑zʉ isu nɨta kʉ panɨaa, kʉndʉ iya Yʉanɨ ngia aaɓatiso ɓombi a꞉panɨa ɓakpataka nga ɓangɔ. » 2 Kija Yeso a꞉mutisio ɓɔ: « Ndʉ naɓio kʉta Asʉɓɨɨ, sigeni ɓɔ: ‹ Tidoo, ino ngiisɔɔ yiɓio tu, Ɓʉngama ngiɓʉsɔɔ ɓʉka. 3 Tinzo idyo ngiindɛsʉ ɓʉɓʉnɨ, kʉndʉ waatinzo makwaa kʉ muɓomu. 4 Tɨpɨa ɓʉɓɨɓɨ ngiɓʉndɛsʉ, kʉndʉ isu kaapɨa ɓiga ngiɓa ɓaatɨkyɨa ɓʉɓɨɓɨ. Wɔɔtɨsɨakɔmʉ kukumunio amati ʉ kanyo. › » 5 Yeso ambuɓusigio ɓata ɓɔ: « Kʉchɨkeni‑zʉ ɓɔ mombi mʉngana ati ʉndɛnʉ anʉ adii angɔ, ambʉsa ɔɔ adii ngiinanɨ nʉgʉndʉ nayɔ kusigio ɓɔ: ‹ Adii, nanzo ɓaka‑zʉ mikati ɓeetu akʉ mabɨngɨa. 6 Adii asɛmɛ mʉngana ʉ꞉ka andɛmɛ, mambʉkɔmʉ nʉ ɨkyɛmɛ ngia mamunzo. › 7 Kʉchɨkeni ɓata ɓɔ gwa ngia a ambɛnɨ umutisio ɓɔ: ‹ Sɨa nɛmɛ kʉbʉmbaniso! Mʉdɨkpa umongu dɨkpaa, isu nʉ ɓana ɓʉsɛmɛ kʉkwaa kwaa. Mambʉkɔmʉ tii kʉʉngwa ɨkʉʉ nɔwɛ kunzo mikati. › 8 Maninu kʉɓɨa ɓɔ, abana ʉngwenikɔmʉ ɨkʉʉ tʉkʉ jʉ a adii angɔ, ɨkyɛmɨngana a꞊ʉngwa ɨkʉʉ tʉkʉ ʉngwanɨ. Kija a꞊munzo kʉ iɓomu ngia aɓio nʉ taa yengo, jʉ adii ngiinanɨ aɓio ɓɔ ʉmʉkpakpeni tʉkʉ ɓʉ ndi nayɔ kʉta chʉkɔmʉ nʉ ndokono. 9 Kʉ ɓwanɨ, ɛmɛ maninu kʉɓɨa ɓɔ: Teni ɨkyɛmɛ ngia nanʉ taa yengo, Asʉɓɨɨ a꞊ninzo ɛyɔ nzoni, hateni ɨkyɛmɛ, na꞊na naa, ɓɛndeni umongu, ɓa꞊nɨganɨa ganɨaa. 10 Jʉ mombi kʉ 'uɓomu ngia akʉta, a꞊nyɨa nʉ ɨkyɛmɛ nyɨaa. Mombi ngia akʉhata a꞊na ɨkyɛmɛ naa. Nʉ mombi ngia akʉɓɨnda umongu ɓa꞊mʉganɨa ganɨaa. 11 Ɨsɛ ʉ mwana tɨmanɨ iya ndʉ mwana angɔ amʉta 'usipe, a꞊munzo tiga chulu? 12 Yɛmɔ ɓata ɓɔ ndʉ amʉta 'ʉkyɨɨ, a꞊munzo tiga nakwavanɨ? 13 Ndʉ inu ngiɓa na‑zʉ ɓombi ɓɔɔ ɓɨɓɨ naambɨa kunzo ɓana ɓʉndɛnʉ kumbo ɔɔ manzanza, ya꞊ɓaana tiga nadɨndɨ iya Atɔ ʉndɛnʉ ngia a ekoo ʉ ɓisi a꞊nzo‑ɔɔ ɓombi ngiɓa ɓanayɔ kʉta 'Ʉtʉma wɔɔ Tu. » Ɓusigo ɓɔ Yeso anʉ angu ʉ Belejebuli ( Mat 12:22-29 ; Mak 3:23-27 ) 14 Ɓisi mʉngana, Yeso i꞉nye kiso mombi mʉngana 'ʉtʉma wʉ abɨa ngua wa꞉mikiso ijangi, ambikinye yaka tii ɓata. Iya 'ʉtʉma wʉ abɨa nguʉnanɨ wa꞉mʉɓʉa, mombi ngiinanɨ ambufaniso yaka. Yambʉmbangɨa ungbutu wʉ ɓombi ngiɓa ɓi꞉nye ananɨ tʉkʉ nadɨndɨ. 15 Ɨkyɛmɨngana, ɓombi ngana ngana nga ɓɔmɔ ɓambusigo ɓɔ: « Akiso mɨtʉma yɨ ɓabɨa tʉkʉ nʉ angu ʉ Belejebuli ngia a ngama ʉ ɓabɨa. » 16 Ɓombi nga ɓɔmɔ ɓi꞉nye kʉkʉnda nayɔ kʉpɨndɨa kusigio ɓɔ: « Tɨpana‑zʉ kɔkɔ ɔɔ ʉmbangɛ kʉpananiso ɓɔ wa꞉ʉngwa ekoo ʉ ɓisi. » 17 Ɨkyɛmɨngana, Yeso i꞉nye kʉmbɨa moni ngika ɓi꞉nye nakɔ akʉ 'ʉtʉma kʉtaa, kija a꞉ɓusigio ɓɔ: « Ɓaangama ɓufaniseni dyokono ati ʉndaɓʉ, ambʉ ɓʉngama ngiɓʉndaɓʉ ɓʉ꞉kwa tʉkʉ kwaa, kija lɨkáa lɔngɔ laachichio ekoo ʉ ila lɔmɔ. 18 Nʉ Sɨtanɨ ufaniseni kʉmana kʉ nʉ ɛyɔ mambɨnyɔngɔ, ajʉ ɓʉngama ngiɓangɔ ɓa꞊maa maanɨ ɓiɛ? Chʉkɔɔ, ɓambʉkʉmaa gʉkʉ ɗɛkɛkɛ. Jʉ nakusigo ɓɔ makiso mɨtʉma yɨ ɓabɨa nʉ angu ʉ Belejebuli. 19 Ndʉ yaɓio‑zʉ ɓɔ ɛmɛ makiso mɨtʉma yɨ ɓabɨa nʉ angu ʉ Belejebuli, ɓakpataka ngiɓʉndɛnʉ ɓa tiga nayɔ kiso nʉ angu anɨ? Kʉ ɓwanɨ, tʉkʉ ɛɓɔ ɓakʉɓɔngɔ ɓakʉpananiso ɓɔ nambʉkɔmʉ akʉ ɓungbingbii! 20 Ɨkyɛmɨngana, ndʉ yaɓio ɓɔ ɛmɛ makiso mɨtʉma yɨ ɓabɨa nʉ angu wʉ Asʉɓɨɨ, iinanɨ yakʉpananiso ɓɔ Ɓʉngama ɓʉ Asʉɓɨɨ ɓa tiga ɓʉkɛ ati ʉndɛnʉ. 21 Ndʉ ginda aɓio nʉ kumbo ʉ ɗite kʉpɨmakɨa ɨkáa ngiangɔ, kumbo ngiangɔ kʉ 'uɓomu aɓio tʉkʉ akʉ ɓʉkatanɛ. 22 Ɨkyɛmɨngana, ndʉ mombi ʉ angu nayɔ kʉɓaa ɛyɔ aka nʉ ɗite, ambʉmʉɓaa angu, a꞊mʉhɨnɨa kumbo ʉ ɗite ngia aanapɨa‑ɔɔ 'ʉtʉma kʉ 'uɓomu. Kija aɨpaka kumbo ngia aɓio ɓɔ ʉmʉhɨnieni. 23 Mombi ngia ambʉkɔmʉ nʉ wagba nguʉsɛmɛ, a makwa wʉsɛmɛ. Nʉ mombi ngia ambʉkɔmʉ nɛmɛ kʉgbʉka kʉmʉmakɨa Asʉɓɨɨ ɓombi, anaɓɔ kungbingo. Tʉa ngia yɨ mɨtʉma yɨ ɓabɨa ( Mat 12:43-45 ) 24 Iya 'ʉtʉma wʉ abɨa waaɓʉa amati ʉ mombi, wabi tiga kʉyɨnganaka kʉ gbaɨ akʉ mʉa ngua mepo kambʉkɔmʉ‑ɛɛ, kʉhata mʉa ngua wa꞊humuo‑ɔɔ. Iya 'ʉtʉma wʉ abɨa nguʉnanɨ wambʉkʉnyɨa nʉ mʉa nani, kija wayakanaka amati angɔ ɓɔ: ‹ Ma꞊tʉa tʉkʉ amati ʉ ɨkáa ngiisɛmɛ ma꞉ɓʉa‑ɛɛ. › 25 Iya waatʉa, wagbʉka tiga ɨkáa ɨbɨakɛ nʉ ɨtambanakɛ iɗo. 26 Kʉ ɓwanɨ, wabi tiga kʉhata mɨtʉma yɨ ɓabɨa nga yɛmɔ ʉmalɨanɨka yɛɛ ɓʉka‑ɓʉkaɨ nadɨndɨ nayɔ kʉɓaa ɛyɔ. Kija yaka, yambukumunio amati ʉ ɨkáa ngiinanɨ, yambuwulo amati ɔngɔ. Akʉ 'upipio, ʉɓɨɨ wʉ mombi ngiinanɨ wa꞊ka tiga ɓɨɓɨ nadɨndɨ kʉɓaa uwa wʉ pɛɛ. » Ɨgyagya gbagba 27 Kʉ ati ngia Yeso i꞉nye‑ɔɔ kʉyaka moni ngikʉnanɨ, moi mʉngana ati ʉ ungbutu wʉ ɓombi nguʉnanɨ ambʉmʉtʉɓɨa ɓɔ: « Ya ɨgyagya nʉ moi ngia a꞉nanʉta, ambʉnamwiso maɓɛɛ. » 28 Ɨkyɛmɨngana, Yeso ambumutisio ɓɔ: « Ya piɛ ɨgyagya nʉ ɓombi ngiɓa ɓakʉkɔ mapanʉ kʉ Asʉɓɨɨ, nʉ nakɔ kʉkyananakɨa! » Ɓombi ɓakʉta moni kɔɔ mʉmbangɛ ( Mat 12:39-42 ) 29 Ati ngia ungbutu wʉ ɓombi wi꞉nye‑ɔɔ kʉmʉmanakɨa anambamba ʉ Yeso, ambufaniso sigo ɓɔ: « Ɓombi ɓʉ ɨjɨjɨ ngia ɓa ɓɨɓɨ, ɓakʉta ɓɔ ɓʉna kɔkɔ ɔɔ ʉmbangɛ nga kɔmɔ. Kingono ɓambʉkʉɓʉpana kɔkɔ nga kɔmɔ gʉkʉ mʉngana, yambikinye tʉkʉ iya wʉ Yɔna. 30 Kʉ ɓwanɨ, ngbanga kʉndʉ Yɔna i꞉nye kɔkɔ ɔɔ ʉmbangɛ apɛɛ ʉ ɓombi ɓʉ Nɨnawɛ, ɛmɛ Mwana ngia ʉ Mombi maɓio tiga kɔkɔ ʉmbangɛ apɛɛ ʉ ɓombi ɓʉ ɨjɨjɨ ngia. 31 Akʉ ɓisi ɓʉ 'ʉkɔmbɔ, ngama moi ɔngɔ kʉʉngwa akʉ miɓo wʉ ɨtaka akʉ ɨkʉmbʉ ngia yɨ Sɛba, a꞊maa sina apɛɛ ʉ ɓombi ɓʉ ɨjɨjɨ ngia, kija a꞊ɓʉnapɨa nʉ 'ʉkɔmbɔ, jʉ ɛyɔ a꞉ʉngwa danga akʉ miɓo wʉ ɨtaka, kʉka kʉkɔ moni kʉ 'ʉtʉma wɔɔ pimise moni ngua wʉ ngama Sɔlɔmɔnɔ! Ʉna tɔ, mbɨeni iɗo ɓɔ yanʉ mombi mʉngana aka iya a 'ʉja kʉɓaa Sɔlɔmɔnɔ. 32 Ɓombi ɓʉ Nɨnawɛ ɓa꞊maa ɓisi ongo akʉ 'ʉkɔmbɔ, ɨzɔ nʉ ɓombi ɓʉ ɨjɨjɨ ngia, kija ɓa꞊ɓʉnapɨa sina nʉ 'ʉkɔmbɔ, jʉ ɛɓɔ ɓa꞉nicho mɨtʉma ngiindaɓʉ nichoo ati ngia ɓa꞉kɔ‑ɔɔ mapanʉ ngika Yɔna i꞉nye kʉɓɨakɨa! Ʉna tɔ, mombi ngia aka a tiga ʉja kʉɓaa Yɔna! » Wanga wʉ ndʉtʉ ( Mat 6:22-23 ) 33 « Yambʉkɔmʉ nʉ mombi gʉkʉ mʉngana iya ndʉ aaya wanga, ambʉʉnaya ɛsɨ ʉ ɨkyɛmɛ, gʉ ɓɔ a꞊ʉnapɨa amati ʉ ɨkɔchɔ. Ɨkyɛmɨngana, a꞊ʉnapɨa ekoo ʉ 'ʉbɨnga wɔngɔ, ambʉ ɓombi ngiɓa ɓaɓio kukumunio ambɛnɨ ngiinanɨ ɓʉna wanga nguʉnanɨ. 34 Mesu ngikʉsɔɔ ka wanga wʉ ndʉtʉ ngiisɔɔ. Mesu ngikʉsɔɔ ki꞉nye kʉna iɗo, ndʉtʉ ngiisɔɔ kʉ iɓomu yaɓio kʉjɨa ɓʉ pɛ. Ɨkyɛmɨngana, ndʉ mesu ngikʉsɔɔ kambukuɓio kʉna, ndʉtʉ ngiisɔɔ kʉ iɓomu yaɓio tʉkʉ amati ʉ umomo. 35 Tiga kʉ ɓwanɨ, kanganɨa iɗo ɓɔ wanga ngua wa amati asɔɔ wɔɔnɨtanakakɔmʉ umomo. 36 Ndʉtʉ ngiisɔɔ yinyeni kʉ iɓomu ɨpʉyɛ nʉ wanga, chʉkɔmʉ nʉ izi ngia ya amati ʉ umomo, yaɓio tiga kʉnyɨa kʉ iɓomu ɓʉ ngbanganya, tʉkʉ ndʉ iya wanga wakyɨa‑ɔɔ nɔwɛ kʉpʉya. » Ya ikoko nʉ Ɓafalisayɔ nʉ ɓapananakɨa ɓʉ mapanʉ ( Mat 23:1-36 ; Mak 12:38-40 ) 37 Iya Yeso a꞉pipo nayɔ ngaka moni ngikʉnanɨ ɓʉ gba, kija 'Ufalisayɔ mungono wa꞉musoko ɓɔ ʉsa kʉdyakaka andɔngɔ, Yeso ambʉsa, ɓambufaniso dyakaka. 38 'Ufalisayɔ nguʉnanɨ kʉna ɓɔ Yeso ʉjaɓanakɔmʉ lɨkɔndɔ pɛɛ ɔɔ dyakakɛ, ya꞉mʉmbangɨa nadɨndɨ. 39 Kija Yeso a꞉musigio ɓɔ: « Inu Ɓafalisayɔ naajaɓa ʉkɔpɔ tʉkʉ ɓei ɔngɔ, nʉ zanɨ kʉ ɓei ɔngɔ, ɨkyɛmɨngana amati ʉ ndɛnʉ naɓuhue nʉ taa yɛɛ hinyoe kumbo, nʉ 'ʉnganga. 40 Inu ɓombi ngiɓa nʉya mbɨmbanaka! Asʉɓɨɨ ngia a꞉kyɨa ɓei ʉ kumbo, ajʉ chʉkɔmʉ‑zʉ kʉ ɛyɔ a꞉kyɨa mati ɔngɔ ɓiɛ? 41 Ambʉ́ nunzo gʉ ɓombi ɓʉ ɓanangyɨa kumbo ngia a amati ʉ ɓakɔpɔ nʉ ɓazanɨ ngiɓʉndɛnʉ. Kʉ ɓwanɨ, lɨngbaa lʉ moni ngilʉndɛnʉ kʉ liɓomu laɓio tiga kʉ lɨjaɓanakɨɛ. 42 Ya ikoko ninu Ɓafalisayɔ, jʉ naanzo akʉ Asʉɓɨɨ mungono ʉ kumi wʉ ɓana ɓʉ mudyo ndʉ atanga ʉ lɨpʉɛ, abʉnɨ, nʉ ɓana ɓʉ lɨgbɛɛ kʉ liɓomu ngila ɓaazɨa nalɔ idyo. Ɨkyɛmɨngana, nambakakʉnda kyɨa ɓombi moni akʉ ɓungbingbii, nambʉpaa kʉkʉnda Asʉɓɨɨ. Ʉna tɔ, moni ngika nʉkwanana kʉkyɨa engo ɨkɔ ɨkʉnanɨ, chʉkɔmʉ nambʉpaa kʉkyɨa moni nga kɔmɔ. 43 Ya ikoko ninu Ɓafalisayɔ, jʉ naakʉnda wulo akʉ muweikie kʉ ɨbɨba amati ʉ lɨkáa lʉ nɨta ngila lʉ Ɓayuda, nʉ naakʉnda ɓɔ ɓombi ɓuɓio ninu kuɓukuo nʉ ɨbɨba akʉ mʉa wɔɔ nyɨɛ. 44 Ya ikoko ninu, jʉ na ngbanga ndʉ manzaʉ ngika kambakanyɨa tii ɓata, ika ɓombi ɓaakyɨa kʉkɨndaka ekoo ɔngɔ ɓambikinye kʉmbɨa! » 45 Mʉpananakɨa wʉ mapanʉ mungono wambumusigio ɓɔ: « Mʉpananakɨa, iinanɨ wa‑ɔɔ kʉyaka ɓwanɨ, wa tiga nisu kʉ kʉzɨaka isu! » 46 Kija Yeso a꞉mutisio ɓɔ: « Ya ikoko ninu ɓapananakɨa ɓʉ mapanʉ, jʉ naafuɓukiso ɓombi kumbo ɔɔ ɓuto ɓuto, inu pɛpɛ nambikinye kʉnapɨa ɨkɔndɔ gʉkʉ ɗɛkɛkɛ naɓɔ kufuɓiso kumbo ɔɔ ɓuto ɓuto ngiinanɨ. 47 Ya ikoko ninu, jʉ naatambanaka manzaʉ kʉ lɨgbɛ lʉ Asʉɓɨɨ muɗo, lɨgbɛ ngila ɓatʉngwanɨ ɓʉndɛnʉ ɓa꞉lɨdʉka jɛnɛ! 48 Nɨngbaa ngiinanɨ na tiga kʉpana akʉ ɓʉmba ɓɔ nʉbaya ɨkyananakɨa ngia yɨ ɓatʉngwanɨ ɓʉndɛnʉ bayanɨ, jʉ ɛɓɔ kʉ ɓa꞉maa lɨgbɛ, inu na tiga kʉtambanaka manzaʉ kʉndaɓʉ! 49 Iiya kʉ ɓwanɨ, Asʉɓɨɨ amati ʉ mbɨmbanaka ngiangɔ, a꞉sigo aka ekoo ʉndɛnʉ ɓɔ: ‹ Ma꞊ɓʉtʉmɨa lɨgbɛ nʉ ɓatitima, kija ɓa꞊dʉka ɓombi ngana ngana ati ʉndaɓʉ, ɓambʉkyananaka ɓɔmɔ. › 50 Kʉ ɓwanɨ, Asʉɓɨɨ a꞊kɨnganakiso ɓombi ɓʉ ɨjɨjɨ ngia kɨnganakisoo aka ɓɨsʉngʉɛ ɓʉndaɓʉ ɓa꞉dʉka‑ɔɔ lɨgbɛ kʉʉngwa tʉkʉ aka Asʉɓɨɨ a꞉kyɨa‑ɔɔ ɨtaka. 51 Kʉʉngwa akʉ ingyo yɨ Abɛlɛ kʉɓʉya akʉ iya yɨ Jakalɨa ngia ɓa꞉mʉwa akʉ mahɔ wʉ gbɔgbɔ ɔɔ yɨɛ Asʉɓɨɨ 'ʉtʉmbɨa nʉ Mʉa ngua wɔɔ Tu, amati ʉ ɨkáa yɨ Asʉɓɨɨ. Tʉkʉ kingono, maninu kusigio ɓɔ Asʉɓɨɨ a꞊kɨnganakiso ɓombi ɓʉ ɨjɨjɨ ngia kɨnganakisoo ekoo ʉ lingyo ngilʉnanɨ kʉ liɓomu. 52 Ya ikoko ninu ɓapananakɨa ɓʉ mapanʉ, jʉ na꞉chɨka ufungua ngua ɓʉkwanana nawɔ kʉgana umongu wʉ mbɨmbanaka, ati ngia inu ɓambɨnyɨɓɔngɔ nambʉkɔmʉ kʉkʉnda kukumunio, nʉ nakunangyo ɓombi ngiɓa ɓakʉtananɨa kumunio. » 53 Iya Yeso a꞉ɓʉa ambɛnɨ ngiinanɨ, ɓapananakɨa ɓʉ mapanʉ nʉ Ɓafalisayɔ ɓambufaniso nayɔ yakɨa nʉ 'ʉnganga ɓʉkaɨ nadɨndɨ, nʉ nayɔ kuɓokoko lɨngbaa lʉ moni kʉ di di di. 54 Ɓi꞉nye nayɔ kunapiikio lipindi ɓɔ ɓʉmʉfa nɨngbaa yɨ moni yɛɛ ɓɨɓɨ ati ngia aɓio‑ɔɔ kʉyaka. |
© 2021, Wycliffe Bible Translators, Inc.
Wycliffe Bible Translators, Inc.