Kyananaka 1 - Agɔmɔ ngia wʉ Ɨtakɨ-takɨ

Yeso uzununio kʉsa ekoo ʉ ɓisi

¹ Ayoo Tiofilo, amati ʉ ɨtaɓʉ ngiisɛmɛ yɨ pɛɛ, ma꞉yaka moni kʉ muɓomu ngika Yeso a꞉kpanga kyɨa kʉʉngwa tʉkʉ akʉ 'ʉkpanganɨa,

² kʉɓʉya isiya a꞉zununio‑ɔɔ kʉsa ekoo ʉ ɓisi. Pɛɛ ngiinanɨ, 'upi akʉ angu ʉ 'Ʉtʉma wɔɔ Tu, Yeso a꞉nzo ɓombi ngiɓa a꞉ɓʉchwa kuɓio ɓatitima mapanʉ ngikangɔ.

³ Mbise ʉ ingyo ngiangɔ a꞉ɓupananiso nʉ lɨngbaa kʉ di di di ɓɔ a kʉkʉʉ. Amati ʉ makwaa makumi ɓʉgɨna i꞉nye naɓɔ kʉɓwanakɨa nʉ naɓɔ kʉngakɨa lɨngbaa lʉ moni ekoo ʉ Ɓʉngama ɓʉ Asʉɓɨɨ.

⁴ Ɓisi mʉngana ati ngia ɓi꞉nye tiga‑ɔɔ kʉdyakaka ɨzɔ naɓɔ, Yeso ambuɓunzo ʉpanʉ ɓɔ: « Nɔɔngwakɔmʉ‑zʉ anʉ Yelusalɛma, ɨkyɛmɨngana siɓeni apɛpɛ ngia Tidoo a꞉nɨpanaka jɛnɛ, nʉ iya ma꞉nɨngakɨa moni ekoo ɔngɔ.

⁵ Jʉ Yʉanɨ a꞉ɓatiso yangɔ nʉ mepo, ɨkyɛmɨngana yitukuo makwaa ɗɛkɛkɛ ɓa꞊niɓatiso uɓatiso ngua wʉ angu ʉ 'Ʉtʉma wɔɔ Tu. »

⁶ Iya ɓatitima ɓa꞉mʉmanɨa nayɔ anambamba ʉ Yeso, ɓambumuɓukuo ɓɔ: « Makʉʉɓɨɨ! Ajʉ wʉmaiso ɓʉngama ngiɓa ɓʉ Ɨsalaɛlɛ tiga akʉ wati nguakɛ ɓiɛ? »

⁷ Yeso ambuɓutisio ɓɔ: « Yambʉkɔmʉ moni kʉndɛnʉ kʉmbɨa saa gʉ ɓɔ wati wɔngɔ, jʉ Tidoo a꞉ʉmaiso akʉ ʉpanʉ nguangɔ makʉɔngɔ.

⁸ Ɨkyɛmɨngana, na꞊nyɨa ɓisi nʉ angu wʉ ɨtakɨ‑takɨ, ati ngia 'Ʉtʉma wɔɔ Tu wa꞊nijio‑ɔɔ. Kija naɓio ɓatɛmʉ ɓʉsɛmɛ anʉ Yelusalɛma, amati ʉ Yudɛa kʉ uɓomu nʉ Samalɨa kʉ uɓomu, nʉ kʉɓʉya akʉ miɓo wʉ ɨtaka. »

⁹ Mbise ngia a꞉yaka‑ɔɔ moni ngikʉnanɨ, tʉkʉ ati ngiinanɨ ɓi꞉nye‑zʉ‑ɔɔ nayɔ tʉkʉ kʉkanga, ambuzununio kʉsa ekoo ʉ ɓisi. Kija ɨkʉɓa yɨ ɓisi mɨngana ya꞉mungwiso, chʉkɔmʉ ɓambʉmʉna tii.

¹⁰ Zʉ kʉ ati ngia ɓatitima ɓi꞉nye‑ɔɔ kʉkanga mesu ekoo ʉ ɓisi akʉ Yeso asa‑ɛɛ, kʉ nɨma ngiinanɨ ɓugue ɓapɨnɨ nʉ lɨpʉkʉ lɔɔ tu, ɓambʉɓwanɨa anambamba ʉndaɓʉ,

¹¹ ɓambuɓusigio ɓɔ: « Inu ɓombi ɓʉ Galilaya ngiɓa, jʉtanɨ na ɓʉmaɨ kʉkanga waja ekoo ʉ ɓisi? Yeso ngiinanɨ u꞉zununio kʉsa ekoo ʉ ɓisi, a꞊tʉa ɓisi ongo ngbanga kʉndʉ iya nʉmʉna‑ɔɔ kʉsa ekoo ʉ ɓisi akɛ. »

Matɨasɨ ʉ꞉chɨka izi ngia yɨ Yuda

¹² Kija ɓatitima ɓa꞉ʉngwa akʉ ɨkpangba ngia ɓaaisoko ɓɔ Mijeituni, ɓambʉtʉa anʉ Yelusalɛma. Ɨkpangba ngiinanɨ yi꞉nye tinene nʉ gʉlʉ, nʉ kʉɓʉya nanɨ yi꞉nye ndʉ kɨnda yɨ kilɔmɛtɛlɛ mʉngana.

¹³ Iya ɓa꞉ɓʉya anʉ Yelusalɛma, ɓambuɗito tiga ambɛnɨ ʉ ɨkáa ngia yi꞉nye ekoo akʉ ɓi꞉nye kwaa‑ɛɛ. Ɓombi ngiɓa ɓi꞉nye nanɨ ɓi꞉nye ɓɔ Pɛtɛlɔ, Yʉanɨ, Yakɔbɔ, Andelea, Filipo, Tʉma, Balatʉmayɔ, Matayɔ, Yakɔbɔ ngia i꞉nye mwana ʉ Alʉfayɔ, Simoni ngia i꞉nye hata ɨndɨpandasɨ akʉ gɨpa ngiangɔ, nʉ Yuda mwana ʉ Yakɔbɔ.

¹⁴ Ɓombi ngiɓʉnanɨ kʉ ɓuɓomu ɓi꞉nye ta Asʉɓɨɨ nʉ 'ʉtʉma mungono chʉkɔmʉ nʉ ndokono. Ɓi꞉nye kʉ ɨzɔ nʉ ɓoi nga ɓɔmɔ, nʉ ɔɔ Malɨa inye ʉ Yeso, nʉ ɓamanye ɓʉ Yeso ngiɓa ɓɔɔ gue.

¹⁵ Kʉ amati ʉ makwaa ngikʉnanɨ, tiga ɓisi mʉngana ɓombi ngiɓa ɓa꞉baya Yeso ɓi꞉nye ɓʉmʉmanɨɛ tine tine ndʉ ɓombi mɨa mʉngana nʉ makumi kapɨnɨ. Pɛtɛlɔ ambʉmaa ati ʉndaɓʉ ambusigo ɓɔ:

¹⁶ « Inu ɓayoo, yɨkwanana ɓɔ moni ngika 'Ʉtʉma wɔɔ Tu wi꞉nye wʉyakeni kʉpɛɛ amati ʉ Mubio kʉ Asʉɓɨɨ 'upi akʉ moni kʉ Daudi kʉkyananakɨa. Moni ngikʉnanɨ ka꞉yakanɨa ekoo ʉ Yuda ngia a꞉nɨtanaka ɓangapɛɛ ʉ ɓombi ngiɓa ɓa꞉fa Yeso.

¹⁷ Ɛyɔ i꞉nye kʉ mʉngana ʉndɛsʉ isu ɓatitima, iya a꞉ɓoto kuu kʉ izi mɨngana nisu. »

¹⁸ (Yuda a꞉kʉa watɨnɨ nʉ falanga ngia a꞉nyɨa nayɔ akʉ ʉkʉa wʉ ɓʉɓɨɓɨ ngiɓangɔ. Ambʉɓwana nʉ 'ʉtʉ kʉ ananɨ, ɓʉa ɓambʉmʉnatʉana ɓʉ hua, mɨa ngiangɔ kʉ iɓomu yambʉɓʉa ya ɓei.

¹⁹ Ɓombi ɓʉ Yelusalɛma kʉ ɓuɓomu ɓa꞉kɔ moni ngikʉnanɨ, iiya ɓa꞉sʉa nayɔ mʉa nguʉnanɨ ino nʉ ʉɗaɗa nguʉndaɓʉ ɓɔ: « Akɛlɛdama », inyi yɛngɔ ɓɔ: « Mʉa wʉ miniki. »)

²⁰ « Amati ʉ ɨtaɓʉ yɨ Mʉmbɔ ɓa꞉tɨndakɨa ɓɔ: ‹ Ɨkáa ngiangɔ yiɓio gɔ tʉkʉ maɓɨɨ, nʉ mombi ɔɔwulokɔmʉ gɔ amati ɔngɔ gʉkʉ mʉngana. › Nʉ ɓa꞉tɨndakɨa ɓata kʉ ɓɔ: ‹ Mombi nga kɔmɔ ʉchɨka kuu ngiangɔ. ›

^21-22 Yɨkwanana ɓɔ mombi mʉngana ukumunio amati ʉ undindo nguʉndɛsʉ kuɓio tɛmʉ ɨzɔ nisu kʉɓɨakɨa ɓɔ Makʉʉɓɨɨ Yeso a꞉jʉkana akʉ ingyo jʉkanaa. Mombi ngiinanɨ ʉkwanana kuɓio mʉngana ʉ ɓombi ngiɓa ɓi꞉nye ɨzɔ nisu ati kʉ uɓomu kʉʉngwa aka Makʉʉɓɨɨ Yeso a꞉kɨndaka‑ɔɔ ɨzɔ nisu, nʉ kʉʉngwa akʉ Yʉanɨ amuɓatiso‑ɔɔ kʉɓʉya akʉ a꞉zununio‑ɔɔ ati ʉndɛsʉ kʉsa ekoo ʉ ɓisi. »

²³ Kija ɓa꞉maiso ɓombi ɓapɨnɨ, ɔɔ Yɨjɛfʉ ngia ɓi꞉nye musoko ɓɔ Balasabasɨ iya ɓa꞉mʉsʉa ino nga yɛmɔ ɓɔ Yusito, nʉ Matɨasɨ.

²⁴ Kija ɓa꞉ta Asʉɓɨɨ kusigo ɓɔ: « Makʉʉɓɨɨ, ɔwɛ ngia waambɨa mɨtʉma yɨ ɓombi kʉ ɓuɓomu, tɨpana mombi ngia wa꞉mʉchwa bɛ ati ʉ ɓombi ɓapɨnɨ ngiɓaɓɛ.

²⁵ Mombi ngiinanɨ aɓio kʉkyɨa kuu yɨ ɓutitima akʉ izi ngia Yuda a꞉sɨa pongo, jʉ ɛyɔ a꞉sa tiga kʉ akʉ izi ngiangɔ ɓʉ kpɛ. »

²⁶ Ɓambugisio ɓugue ɓapɨnɨ ngiɓʉnanɨ gbanda. Ʉgbanda wambʉkwɨa Matɨasɨ, ɓambumusingo amati ʉ undindo ngua wʉ ɓatitima kumi nʉ mʉngana.