Yakɔbɔ 5 - Agɔmɔ ngia wʉ Ɨtakɨ-takɨ

Ikoko ninu ɓombi ɓʉ lɨkyɛmɛ

¹ Ɨtakɨ‑takɨ ngia inu ɓombi ɓʉ lɨkyɛmɛ, ukeni tiga! Ndɨeni nʉ huɓokeni aka ekoo ɓʉka‑ɓʉkaɨ ngiɓa ɓakʉka ninu kʉgbʉka!

² Lɨkyɛmɛ ngilʉndɛnʉ lʉ꞉pʉa pʉaa, nʉ ɓutetu ɓʉ꞉dya lɨpʉkʉ ngilʉndɛnʉ kʉdyaa!

³ Ɔlɔ ngiʉndɛnʉ nʉ falanga ngiʉndɛnʉ ʉ꞉fa nzʉngʉma faa, nʉ nzʉngʉma yɛngɔ ya꞊nɨnapɨa nʉ 'ʉkɔmbɔ, nʉ ya꞊ya ndʉtʉ ngiindɛnʉ ndʉ dyaa. Na꞉nzɨanakiso ɨngama ɓʉ kyɔ kyɔ kyɔ, ʉɓɨɨ winyeni tiga kʉsa akʉ 'upipio!

⁴ Ɓombi ngiɓa ɓaakyɨa kuu akʉ matɨnɨ ngikʉndɛnʉ na꞉ɓulipakɔmʉ falanga wʉ uyi kpa. Ʉkeni akʉ ɓa‑ɛɛ kʉndɨana! Ndɨndanaka ngiindaɓʉ yɨ꞉ɓʉya akʉ muchwei ngika kʉ Asʉɓɨɨ Makʉʉɓɨɨ ngia wʉ Angu kʉ uɓomu ɓʉyaa!

⁵ Inu na꞉dya ʉɓɨɨ wɔɔ uɗo nʉ wʉ ɨgyagya akʉ ɨtaka dyaa. Nambupondoko ndʉ ɓanama ngiɓa ɓakusiɓo aka ɓa꞊ɓʉsɨnda‑ɔɔ.

⁶ Inu na꞉napɨa ɓombi ɓɔɔ ngbingbii nʉ 'ʉkɔmbɔ, nambʉɓʉdʉka. Ɨkyɛmɨngana, ɛɓɔ ɓambʉnɨsɨanɨa tʉkʉ ɓʉ dɛngɛlɛ.

Kuɓio 'ʉtʉma ʉta kusiɓo tʉa ngia yɨ Makʉʉɓɨɨ

⁷ Inu ɓayoo, ɓieni 'ʉtʉma ʉta kʉɓʉya akʉ ɓisi ngiɓa Makʉʉɓɨɨ a꞊ka‑ɔɔ. Uneni‑zʉ mombi wʉ ɨhʉna, ɛyɔ aakyɨa nʉ 'ʉtʉma wɔɔ ʉta kusiɓo ɓɔ ɨtaka yɨmunzo masɔɔ ngika kʉ ɨjangɨa nadɨndɨ. Aakyɨa nʉ 'ʉtʉma wɔɔ ʉta kʉɓʉya tʉkʉ ati ngia ʉgbaa ngua wʉ pɛɛ, nʉ uwa wʉ 'upipio waanyio‑ɔɔ.

⁸ Inu kuɓioni, ɓieni nʉ 'ʉtʉma wɔɔ ʉta nʉ igue‑gue, jʉ tʉa ngia yɨ Makʉʉɓɨɨ ya tiga kʉ tinene!

⁹ Inu ɓayoo ɓʉsɛmɛ, nɔɔɓiokɔmʉ kʉndʉndanakɨana ati ʉndɛnʉ, ambʉ Asʉɓɨɨ ɔɔnɨnapɨakɔmʉ nʉ 'ʉkɔmbɔ. Mombi ngia aatɨna 'ʉkɔmbɔ a tiga 'ʉmaɨ anʉ umongu!

¹⁰ Inu ɓayoo, tungueni lɨgbɛ ngila li꞉nye yaka moni akʉ ino yɨ Makʉʉɓɨɨ. Ɛɓɔ ɓi꞉nye nʉ 'ʉtʉma wɔɔ ʉta uwa wɔɔ pɨɛ ɓʉka‑ɓʉkaɨ. Kpateni isisinio ngiindaɓʉ.

¹¹ Kakusigo ɓɔ ya ɨgyagya naɓɔ jʉ ɓi꞉nye nʉ 'ʉtʉma wɔɔ ʉta. Naakɔ uduɓa wʉ Yɔbɛ kʉtaa aka ekoo ʉ 'ʉtʉma wɔɔ ʉta nguangɔ, nʉ nakʉmbɨa moni ngika Makʉʉɓɨɨ a꞉mʉkyɨa akʉ 'upipio kʉtaa. Jʉ Makʉʉɓɨɨ anʉ 'ʉtʉma wɔɔ nɨɛ ɓombi ikoko nadɨndɨ, nʉ wʉ ikoko.

¹² Nadɨndɨ, inu ɓayoo ɓʉsɛmɛ, nɔɔtɨnakɔmʉ silika akʉ ino yɨ ekoo ɓisi, gʉ ɓɔ yɨ ɨtaka, gʉ akʉ ino yɨ ɨkyɛmɛ yɛmɔ. Ndʉ nabaya moni, bayeni tʉkʉ ɓɔ: « Oo », ndʉ natata, tateni tʉkʉ ɓɔ: « Chʉkɔɔ », ambʉ Asʉɓɨɨ ɔɔnɨnapɨakɔmʉ nʉ 'ʉkɔmbɔ.

Kʉtɨa ɓombi ɓʉ ɓakwisikiso

¹³ Ndʉ mombi ati ʉndɛnʉ aɓio amati ʉ ɓʉka‑ɓʉkaɨ, ʉta Asʉɓɨɨ. Ndʉ aɓio amati ʉ ɨgyagya, ʉsʉa mʉmbɔ kɔɔ mubibise Asʉɓɨɨ.

¹⁴ Ndʉ mombi aɓio nʉ kweso ati ʉndɛnʉ, usoko ɓʉkʉʉ ɓʉ kanisa ɓambʉmʉtɨa Asʉɓɨɨ, ɓambʉmʉɗɨa umbundo akʉ ino yɨ Makʉʉɓɨɨ.

¹⁵ Ndʉ ɓata Asʉɓɨɨ nʉ baya, nɨta ngiinanɨ yakwanana kuhiiso mombi ʉ kweso. Kija Makʉʉɓɨɨ a꞊mutuisio angu kʉtɔ, nʉ ndʉ aɓio ʉkyɨeni ɓʉɓɨɓɨ, Asʉɓɨɨ amʉpɨa ɛɓɔ pɨaa.

¹⁶ Kʉ ɓwanɨ, ɓieni kʉpɨana ɓʉɓɨɓɨ ati ʉndɛnʉ, nʉ ɓieni kʉtɨana Asʉɓɨɨ ati ʉndɛnʉ, ambʉ ɓʉnganakɨeni ɓʉnganakɨaa. Nɨta ngia yɨ mombi ɔɔ ngbingbii, yanʉ angu nadɨndɨ.

¹⁷ Ɛlɨa i꞉nye mombi ngbanga kʉndʉ isu, ɛyɔ a꞉ta Asʉɓɨɨ nʉ kɛkɛɛ ɓɔ ʉgbaa wɔɔnyiokɔmʉ, kija ʉgbaa wa꞉nyiokɔmʉ akʉ ɨtaka amati wʉ mugo kaatʉ nʉ igbiti.

¹⁸ Mbise ɔngɔ ambʉta ɓata Asʉɓɨɨ, ʉgbaa wambunyio ʉja kʉʉngwa ekoo ɓisi, kija ɨtaka ya꞉nzo masɔɔ ngikangɔ.

Kutuiso ɓombi ɓɔɔ ɓɨɓɨ akʉ ɨngbaa yɨ ingono

¹⁹ Inu ɓayoo ɓʉsɛmɛ, ndʉ mombi mʉngana ati ʉndɛnʉ aɓio ʉsɨeni ɨngbaa yɨ ingono, mombi nga kɔmɔ ambumutuiso akʉ ɨngbaa,

²⁰ pimiseni kusigo ɓɔ mombi ngia aatuiso mombi ɔɔ ɓɨɓɨ kʉʉngwa akʉ ɨngbaa yɛɛ yangaɛ, ɛyɔ akwanana kuhiiso ʉɓɨɨ wʉ mombi ngiinanɨ akʉ ingyo. Aka ekoo ʉ moni ngikʉnanɨ Asʉɓɨɨ a꞊pɨa ɓʉɓɨɓɨ ɓaja.