Yakɔbɔ 4 - Agɔmɔ ngia wʉ Ɨtakɨ-takɨ

Yambʉkɔmʉ iɗo kʉkpata ɓʉtɨpɨ ɓʉ ɨtaka

¹ Mangoi nʉ lɨbananaka ati ʉndɛnʉ lakʉʉngwa gbanɨ? Ajʉ lambʉkɔmʉ‑zʉ kʉʉngwa tʉkʉ akʉ taa yɨ ndʉtʉ yɛɛ ɓɨɓɨ iya yakʉɓɨndana amati ʉ ndʉtʉ ngiindɛnʉ ɓiɛ?

² Naatananɨa kʉnyɨa nʉ ɨkyɛmɛ, chʉkɔmʉ nambʉnyɨa nayɔ. Naadʉka ɓombi nʉ kwa imi, chʉkɔmʉ nambʉnyɨa nʉ ɨkyɛmɛ ngia naɓio nʉ taa yengo. Ya aka ekoo moni ngikʉnanɨ iya naakyɨa‑ɔɔ tʉkʉ kʉnangana nʉ kʉɓɛndana. Nambakanyɨa nʉ ɨkyɛmɛ ngia naakyɨa nʉ taa yengo jʉ nambakata Asʉɓɨɨ.

³ Abana ndʉ naata ɨkyɛmɛ, nambakanyɨa nayɔ tʉkʉ jʉ itungwio ngiindɛnʉ ya ɓɨɓɨ. Ɨkyɛmɛ ngia naata naaɨtambiso tʉkʉ aka ekoo taa yɛɛ ɓɨɓɨ yɨ ndʉtʉ ngiindɛnʉ.

⁴ Inu ɓombi ngiɓa nambakakumo Asʉɓɨɨ! Ajʉ nambakambɨa‑zʉ ɓɔ ndʉ mombi akʉnda ɓʉtɨpɨ ɓʉ ɨtaka ambʉ a makwa wʉ Asʉɓɨɨ ɓɨɛ? Kʉ ɓwanɨ, mombi ngia aakʉnda ɓʉtɨpɨ ɓʉ ɨtaka a꞊nɨtanaka tiga makwa wʉ Asʉɓɨɨ.

⁵ Nɔɔna ndʉ moni ngika Mubio kʉ Asʉɓɨɨ kakusigo ka ɨsʉkʉɓwanɨ ɓɔ: « Asʉɓɨɨ anʉ imi aka ekoo 'ʉtʉma ngua a꞉napɨa amati ʉndɛsʉ. »

⁶ Ɨkyɛmɨngana, ɨjɨɔ ngia Asʉɓɨɨ a꞉tinzo ya ɨkyɛmɛ yɛɛ ɨja nadɨndɨ. Jʉ Mubio kʉ Asʉɓɨɨ kaasigo ɓɔ: « Asʉɓɨɨ aamana nʉ ɓombi ngiɓa ɓaakyɨa nʉ 'ʉtʉma wɔɔ ʉja, ɨkyɛmɨngana aapananiso iɗo ngiangɔ akʉ ɓombi ngiɓa ɓanʉ 'ʉtʉma wɔɔ ijisinise nɨsɨ. »

⁷ Kʉ ɓwanɨ, keni Asʉɓɨɨ kɔɔ, nambʉɓaa Abɨa angu iikwa akwanana‑ɔɔ ninu kʉgʉɨa bangʉ.

⁸ Ɗʉaneni tinene nʉ Asʉɓɨɨ, kija ɛyɔ akwanana kʉ kʉɗʉana tinene ninu. Jaɓanakɨeni inu ɓombi ɓʉ ɓʉɓɨɓɨ. Jaɓanakɨeni akʉ mɨtʉma ngiindɛnʉ inu ɓombi ngiɓa nanʉ mɨtʉma ɓepini.

⁹ Ɓieni amati ʉ ikoko, nʉ ɓieni amati didima nʉ ndɨa. Nʉa ngiindɛnʉ yɨ꞊nɨtanaka gɔ ndɨa, nʉ ɨgyagya ngiindɛnʉ yɨnɨtanaka gɔ ikoko.

¹⁰ Ɓieni nʉ 'ʉtʉma wɔɔ ijisinise nɨsɨ apɛɛ ʉ Makʉʉɓɨɨ, kʉ ɓwanɨ ɛyɔ a꞊nizono tiga nɨkʉʉ.

Wɔɔtɨnakɔmʉ 'ʉkɔmbɔ wʉ gwa kɔmɔ

¹¹ Inu ɓayoo, nɔɔɓiokɔmʉ kʉyakana ɓɨɓɨ ati ʉndɛnʉ. Mombi ngia a꞊yakɨa mangɛ ɓɨɓɨ, yɛmɔ kʉtɨna 'ʉkɔmbɔ wangɔ, akʉyakɨa ʉpanʉ wʉ Mʉsa ɓɨɓɨ nʉ a kʉ kʉtɨna 'ʉkɔmbɔ wɔngɔ. Ati ngia wa‑ɔɔ kʉtɨna 'ʉkɔmbɔ wʉ ʉpanʉ wʉ Mʉsa, wambʉkɔmʉ tii kʉkyananakɨa engo, ɨkyɛmɨngana wa tiga kʉtɨna 'ʉkɔmbɔ wɔngɔ.

¹² Ʉna tɔ, tʉkʉ Asʉɓɨɨ kʉ nangana aanzo ʉpanʉ, nʉ kʉ ɛyɔ aakwanana kʉtɨna 'ʉkɔmbɔ wɔngɔ. Ɛyɔ anʉ angu ɔɔ hiise nʉ ɔɔ dʉkɛ ɓombi. Tiga ɔwɛ gwa ngia wakʉtɨna 'ʉkɔmbɔ ngua wʉ mangɛ wakʉchɨkana ndʉ anɨ?

Wɔɔsigokɔmʉ ɓɔ ma꞊kyɨa ɓisi ɓɔ

¹³ Ʉkeni tiga ɨtakɨ‑takɨ ngia, inu ɓombi ngiɓa naasigo ɓɔ: « Ɓʉɓʉnɨ, yɛmɔ ɓisi kabi akʉ gʉlʉ mʉngana ɓɔ, ka꞊kyɨa‑ɛɛ igo mɨngana kinyeni kʉgabanaka, kija ka꞊nyɨa nʉ falanga. »

¹⁴ Ʉna tɔ, nambʉkɔmʉ kʉmbɨa ɓɔ ʉɓɨɨ nguʉndɛnʉ waɓio ɓisi tanɨ. Jʉ ʉɓɨɨ nguʉndɛnʉ wa ngbanga ndʉ iya indindi yaakuto‑ɔɔ mʉa mbise ɔngɔ yambʉngaa.

¹⁵ Nʉkwanana piɛ kusigo ɓɔ: « Ndʉ Makʉʉɓɨɨ akʉnda ɓɔ kuɓio‑zʉ kʉkʉʉ, ka꞊kyɨa ɓisi ɓɔ. »

¹⁶ Ɨkyɛmɨngana, nanʉ 'ʉtʉma wɔɔ ʉja, nʉ nakʉ nʉ ɨbandanɨa. 'Ʉtʉma wɔɔ ʉja ikanzi nguʉnanɨ wambʉkɔmʉ uɗo.

¹⁷ Kʉ ɓwanɨ, ndʉ mombi ambɨa kʉkyɨa iɗo, chʉkɔmʉ ambʉɨkyɨa, ambʉ ʉkyɨa ɓʉɓɨɓɨ.