Yakɔbɔ 3 - Agɔmɔ ngia wʉ Ɨtakɨ-takɨ

Pɨmakɨeni ʉɗaɗa

¹ Inu ɓayoo ɓʉsɛmɛ, ɓapananakɨa ɓɔɔɓiokɔmʉ ɓaja ati ʉndɛnʉ, jʉ nakʉmbɨa iɗo ɓɔ 'ʉkɔmbɔ nga wʉndɛsʉ ɓapananakɨa, waɓio sina ɓʉkaɨ nadɨndɨ kʉɓaa ʉwa wʉ ɓombi nga ɓɔmɔ.

² Isu kʉ ɓuɓomu kaakwa akʉ ɓʉɓɨɓɨ akʉ lɨngbaa kʉ di di di. Ndʉ mombi aɓio ɓɔ ambakagisoko moni kɔɔ ɓɨɓɨ, ambʉ a 'ʉkwananakɛ kingono nʉ akwanana kʉpɨmakɨa ndʉtʉ ngiangɔ kʉ iɓomu.

³ Kaasanga ɓanama ngiɓa ɓaaɓusoko ɓɔ ɓafalasɨ angbaga wʉ uko akʉ moni tʉkʉ aka ekoo ngia ɓɔ ɓʉtɨkɔ, nʉ kaaɓʉkɨndakiso tʉkʉ akʉ kaɓio‑ɛɛ kʉkʉnda kʉsa naɓɔ.

⁴ Uneni‑zʉ masʉa wʉ mepo, abana ndʉ waakyɨa ʉja kititi, mahuo wɔɔ ɓʉmʉ wakyɨa nawɔ kututuo, tʉkʉ mwana ʉ vala ɔɔ ɗɛkɛkɛ aauyumoko, wambuɓio kʉkpata tʉkʉ akʉ mombi ngia aaʉkɨndakiso aɓio‑ɔɔ kʉkʉnda kʉsa nawɔ.

⁵ Ʉɗaɗa wa ɓata ngbanga kʉ ɓwanɨ, jʉ wa tʉkʉ mwana izi yɛɛ ɗɛkɛkɛ amati ʉ ndʉtʉ, ɨkyɛmɨngana waabandana ɓɔ waakyɨa ɓamoni ɓɔɔ ɓʉkpɔkpɔ. Kangeni‑zʉ tʉkʉ anzɛɛ ʉ dyaa, iya aakwanana kusiikiso 'ututu wɔɔ ʉja tʉkʉ ɓʉ nzele!

⁶ Ʉɗaɗa wa ngbanga kʉndʉ dyaa. Ɛwɔ wa izi yɨ ndʉtʉ ngiindɛsʉ iya mɨgbʉ yɨ ɓʉɓɨɓɨ kʉ iɓomu ya꞉wulo‑ɔɔ, nʉ waatambiso ʉɓɨɨ nguʉndɛsʉ kʉ uɓomu. Waasiikiso ʉɓɨɨ nguʉndɛsʉ kʉ uɓomu, kʉza nʉ dyaa ngia yɨ mɨtʉ yɨ ɨpá nʉ mɨtʉ yɨ ɨpá.

⁷ Mombi anʉ ʉpanʉ kʉnapɨa mɨgbʉ yɨ ɓanama ɓʉ 'ututu kʉ iɓomu ɛsɨ ʉ ʉpanʉ wangɔ, yiɓio ɓunoi, yiɓio ɓanama ngiɓa ɓaaɗuɗono mamaa akɛsɨ, kʉndʉ sipe. A꞉ɓʉnapɨa tiga ɛsɨ ʉ ʉpanʉ wangɔ napɨanɨ.

⁸ Ɨkyɛmɨngana, ʉɗaɗa pɛpɛ mombi gʉkʉ mʉngana ambʉkɔmʉ ikanzi ngia aʉnapɨa ɛsɨ ʉ ʉpanʉ nguangɔ. Jʉ ʉɗaɗa wa ɨkyɛmɛ yɛɛ ɓɨɓɨ nʉ wambakakatana, nʉ wanʉ sʉmʉ ngia aawa waa.

⁹ Tʉkʉ ʉɗaɗa mungono ngua kaabibiso nawɔ Makʉʉɓɨɨ Tidoo ʉndɛsʉ, kʉ ʉwɔ ɓata uwa kaagboso nawɔ ɓombi ngiɓa Asʉɓɨɨ a꞉ɓʉkyɨa akʉ isisinio ngiangɔ.

¹⁰ Inu ɓayoo ɓʉsɛmɛ, tʉkʉ moni mʉngana ngika naambuiso nakɔ ɓombi, kʉ moni mʉngana ngikʉnanɨ ika naagboso nakɔ ɓombi. Ʉna tɔ, yɨkwananakɔmʉ piɛ yaɓio ɓwanɨ.

¹¹ Ajʉ ɨkɔ mɨngana yaakwanana kiso mepo ngika kɔɔ muɗo, nʉ ika kɔɔ kɔɨ kwananɨ ɓiɛ?

¹² Ayoo asɛmɛ, ajʉ ɓʉtɨ ngiɓa ɓaaɓusoko ɓɔ mutini ɓakwanana‑zʉ kʉ kʉmɔ lipumo lʉ ɓʉtɨ ɓʉ mijeituni ɓiɛ? Nʉ ajʉ ɓʉtɨ ɓʉ mujabibo ɓakwanana‑zʉ kʉ kʉmɔ lipumo lʉ ɓʉtɨ ngiɓa ɓaaɓusoko ɓɔ mutini ɓiɛ? Chʉkɔɔ! Kʉndʉ ɨkɔ yɨ mepo kʉ 'ukwe yambʉkwanana kiso mepo kɔɔ muɗo.

'Ʉtʉma wɔɔ pimise moni ngua waaʉngwa ekoo ʉ ɓisi

¹³ Anɨ iya anʉ 'ʉtʉma wɔɔ pimise moni nʉ wʉ mbɨmbanaka ati ʉndɛnʉ? Mombi ɔngɔ ʉpananiso iɗo ngiangɔ 'upi akʉ ɨkyananakɨa ngiangɔ, kʉkyɨa engo nʉ 'ʉtʉma wɔɔ ijisinise nɨsɨ, nʉ wɔɔ pimise moni.

¹⁴ Ɨkyɛmɨngana, ndʉ naɓio nʉ imi yɛɛ ɓɨɓɨ, nʉ 'ʉtʉma wʉ uchongi, nʉ 'ʉtʉma wɔɔ nanganise ɓangɛ, nɔɔɓiokɔmʉ nʉ 'ʉtʉma wɔɔ ʉja nʉ nɔɔnichokɔmʉ moni kingono kʉka moni kʉ yakanaka.

¹⁵ Ikanzi yɨ 'ʉtʉma wɔɔ pimise moni nguʉnanɨ wa꞉ʉngwakɔmʉ ekoo ʉ ɓisi, ɨkyɛmɨngana wa 'ʉtʉma wʉ ɨtaka, uwa wʉ iɓombi nʉ wʉ abɨa.

¹⁶ Jʉ aka imi yɛɛ ɓɨɓɨ nʉ ɨwaɨ yaakyɨa‑ɔɔ, tʉkʉ mangoi, nʉ kyananaka yɛɛ ɓɨɓɨ nga yɛmɔ kʉ iɓomu yaakyɨa‑ɔɔ.

¹⁷ Ɨkyɛmɨngana, 'ʉtʉma wɔɔ pimise moni ngua waaʉngwa ekoo ɓisi, pɛɛ ʉ moni kʉ muɓomu waakyɨa uɗo, wa 'ʉtʉma wʉ majɨɔ, wɔɔ katanɛ, wɔɔ nzise kɔnɔ ati ʉ ɓombi, wɔɔ nɨɛ ikoko, nʉ wɔɔ kyɨɛ ɓamoni ɓɔɔ manzanza. Chʉkɔmʉ 'ʉtʉma wɔɔ mbomboke ɓombi, chʉkɔmʉ 'ʉtʉma wʉ ɓufili kʉ ɓwanɨ.

¹⁸ Ɓombi ngiɓa ɓaakʉnda majɨɔ, ɓaahʉna kʉ majɨɔ ati ʉndaɓʉ, nʉ masɔɔ ngika ɓa꞊kʉbʉa ya ʉɓɨɨ wɔɔ ngbingbii.