Yakɔbɔ 2 - Agɔmɔ ngia wʉ Ɨtakɨ-takɨ

Chʉkɔmʉ kumbomboko ɓombi

¹ Inu ɓayoo ɓʉsɛmɛ, jʉ baya ngiindɛnʉ ya akʉ Makʉʉɓɨɨ Yeso Klisito iya anʉ ɨbɨba, nɔɔɓiokɔmʉ nʉ 'ʉtʉma wɔɔ mbomboke ɓombi.

² Kʉchɨkeni‑zʉ ɓɔ, na akʉ majunikio, mombi ʉ lɨkyɛmɛ iya ʉpɨnya pɛtɛ wʉ ɔlɔ nʉ lɨpʉkʉ lɔɔ manzanza ʉka kukumunio na ati ʉndɛnʉ. Kija mombi ʉ ɓanangyɨa iya anʉ lɨpʉkʉ lɔɔ lɨyanakɛ ambukumunio kʉ ananɨ.

³ Kija nanzo mombi ʉ lɨkyɛmɛ ɨbɨba yɛɛ ɨja nayɔ kusigio ɓɔ: « Ɨka kuwulo akʉ mʉa wʉ ɨbɨba nguakɛ. » Ɨkyɛmɨngana, nambusigio mombi ʉ ɓanangyɨa ɓɔ: « Ɔwɛ, ɓio ʉmaɨ nanɨ », yɛmɔ ɓɔ: « Sa kuwulo na akɛsɨ akʉ maanapɨa‑ɔɔ mɨtɨndɨ. »

⁴ Nʉkyɨeni ɓwanɨ, yakusigo ɓɔ nakumbomboko ɓombi, nʉ nakʉtɨna 'ʉkɔmbɔ nʉ itungwio yɛɛ ɓɨɓɨ.

⁵ Ukeni tɔ, inu ɓayoo ɓʉsɛmɛ ɓʉ ɓʉkʉnda, Asʉɓɨɨ a꞉chwa ɓombi ɓʉ ɓanangyɨa ɓʉ ɨtaka ngia, aka ekoo ngia ɓɔ ɓʉnɨtanaka tiga ɓombi ɓʉ lɨkyɛmɛ amati ʉ baya, nʉ ɓʉnyɨa tiga nʉ ɓʉngama ngiɓa a꞉panaka ɓombi ngiɓa ɓaamʉkʉnda.

⁶ Ɨkyɛmɨngana, inu nakʉna ɓombi ɓʉ ɓanangyɨa ɨsʉkʉɓwanɨ! Chʉkɔmʉ‑zʉ tʉkʉ ɓombi ɓʉ lɨkyɛmɛ iɓa ɓaakyɨa ninu kʉkyananaka, nʉ ɓaasa ninu akʉ ɓabasa ɓɔɔ ɓʉtɨnɛ mɨkɔmbɔ ɓiɛ?

⁷ Tʉkʉ ɛɓɔ kʉ ɓaabʉla ino yɛɛ iɗo ngia Asʉɓɨɨ a꞉ninzo.

⁸ Kingono ndʉ naɓio kʉkpata ʉpanʉ wʉ Ɓʉngama ɓʉ Asʉɓɨɨ tʉkʉ ndʉ aka Mubio ka‑ɔɔ kusigo ɓɔ: « Kʉnda mangɛ kʉndʉ ɔwɛ waakʉndana makʉɔngɔ. » Nʉkyɨeni ɓwanɨ ambʉ nakʉkyɨa iɗo.

⁹ Ɨkyɛmɨngana, ndʉ naɓio kumbomboko ɓombi, iinanɨ yakusigo ɓɔ nakʉkyɨa ɓʉɓɨɓɨ nʉ ʉpanʉ ngua wʉ Mʉsa wa꞊niɓoto ɓotoo jʉ nanawɔ kuɓundo.

¹⁰ Jʉ ndʉ mombi aɓio kʉkpata mapanʉ kʉ muɓomu, ɨkyɛmɨngana ambuɓundo mungono wɔngɔ, ambʉ uɓundo ika kɔmɔ kʉ muɓomu.

¹¹ Ʉna tɔ, kʉ Asʉɓɨɨ mʉngana ngia a꞉sigo ɓɔ: « Wɔɔkyɨakɔmʉ ɨndambʉ » ɓata kʉ ɛyɔ a꞉sigo ɓɔ: « Wɔɔwakɔmʉ mombi. » Kʉ ɓwanɨ, ndʉ yaɓio ɓɔ wambakakyɨa ɨndambʉ, wambʉwa tiga mombi, ambʉ wuɓundo ʉpanʉ ngua wʉ Mʉsa ɓundoo.

¹² Kʉ ɓwanɨ, moni ngika naɓio kʉyaka, nʉ ɨkyananakɨa ngiindɛnʉ yiɓio ngbanga ndʉ ɓombi ngiɓa ɓa꞊tɨna sina 'ʉkɔmbɔ nguʉndaɓʉ nʉ ʉpanʉ ngua waanzo ɓununukio.

¹³ Jʉ Asʉɓɨɨ ambukuɓio sina nʉ ikoko ati ngia aɓio sina‑ɔɔ kʉtɨna 'ʉkɔmbɔ wʉ mombi ngia ambakanɨa ɓangɛ ikoko. Ɨkyɛmɨngana, mombi ngia aanɨa ɓangɛ ikoko, ambʉkʉkwanana tii ɓata kuɓio nʉ ʉɓa ati ngia Asʉɓɨɨ a꞊tɨna sina‑ɔɔ 'ʉkɔmbɔ ngua wʉ ɓombi.

Baya nʉ ɨkyananakɨa yɛngɔ

¹⁴ Inu ɓayoo ɓʉsɛmɛ, ya‑zʉ nʉ dada tɨmanɨ mombi kusigo ɓɔ anʉ baya ambikinye kʉpana ɨkyananakɨa yɛngɔ? Ajʉ ikanzi yɨ baya ngiinanɨ yakwanana nayɔ kʉ kuhiiso ɓɨɛ?

¹⁵ Kʉchɨkeni‑zʉ ɓɔ ayoo asɔɔ ɔɔ gue, yɛmɔ ɔɔ moi, ɓambʉkɔmʉ nʉ lɨpʉkʉ lɔɔ lɨpɨnyɛ, nʉ ɓambʉkɔmʉ nʉ idyo ngia ɓa꞊dya makwaa kʉ muɓomu,

¹⁶ kija mombi ati ʉndɛnʉ a꞊ɓusigio tʉkʉ ɓɔ, « Seni kʉ iɗo, pɨnyeni lɨpʉkʉ lʉ vɛvʉ, nʉ kʉdyakakeni akʉ namʉta‑ɔɔ. » Ɨkyɛmɨngana, chʉkɔmʉ ambuɓunzo gʉkʉ ɨkyɛmɛ ngia yaɓʉsalɨa akʉ ʉɓɨɨ nguʉndaɓʉ, iinanɨ ya‑zʉ nʉ dada tɨmanɨ?

¹⁷ Baya ya ɓata ngbanga kʉ ɓwanɨ, ndʉ yambukuɓio kʉpananɨa akʉ ɨkyananakɨa yɛngɔ, ambʉ ya iwe.

¹⁸ Ɨkyɛmɨngana, ndʉ mombi asigo ɓɔ: « Ɔwɛ wanʉ baya, ɛmɛ manʉ ɨkyananakɨa! », ma꞊mutisio kusigo ɓɔ: « Napana‑zʉ aka baya yakwanana‑ɔɔ kuɓio chʉkɔmʉ nʉ ɨkyananakɨa, kija ma꞊napana baya ngiisɛmɛ 'upi akʉ ɨkyanakɨa ngiisɛmɛ. »

¹⁹ Ajʉ waabaya‑zʉ kʉ bayanɨ ɓɔ Asʉɓɨɨ a tʉkʉ mʉngana ɓiɛ? Iinanɨ ya iɗo. Abana ɓabɨa, ɛɓɔ ɓaabaya kʉ bayanɨ ɓɔ Asʉɓɨɨ a tʉkʉ mʉngana, ɓambuɓio kʉgʉgʉma nʉ ʉɓa.

²⁰ Ɔwɛ ijangi ngia! Ajʉ waakʉnda ɓɔ ɓʉnapananiso tʉkʉ nʉ isisinio ɓɔ baya yambikinye nʉ ɨkyananakɨa, ambʉ ya tʉkʉ ɨsʉkʉɓwanɨ ɓiɛ?

²¹ Asʉɓɨɨ a꞉chɨka kuku ngiʉndɛsʉ Abalama ɓɔ a mombi ɔɔ ngbingbii tʉkʉ akʉ ɨkyananakɨa ngiangɔ ati ngia a꞉nzo‑ɔɔ mwana angɔ Ɨsaka ekoo gbɔgbɔ ɔɔ yɛ 'ʉtʉmbɨa.

²² Wakʉna ɓɔ baya ngia yɨ Abalama ya꞉pananɨa tʉkʉ ɨngbaa akʉ ɨkyananakɨa ngiangɔ, nʉ baya ngiinanɨ yambʉka ɓʉmʉ tʉkʉ aka ekoo ɨkyananakɨa ngiangɔ.

²³ Kʉ ɓwanɨ, moni ngika Mubio kʉ Asʉɓɨɨ ka꞉sigo, ka꞉kyananakɨa kyananakɨaa ɓɔ: « Abalama a꞉baya Asʉɓɨɨ, nʉ aka ekoo baya ngiinanɨ Asʉɓɨɨ ambʉmʉchɨka kusigo ɓɔ a mombi ɔɔ ngbingbii. » Iikwa a꞉musoko‑ɔɔ ɓɔ a adii angɔ.

²⁴ Ʉna‑zʉ, Asʉɓɨɨ a꞉mʉchɨka ɓɔ a mombi ɔɔ ngbingbii, chʉkɔmʉ tʉkʉ ɨngbaa akʉ baya, ɨkyɛmɨngana ɨngbaa akʉ ɨkyananakɨa kuɓioni.

²⁵ Moni ngika ka꞉kyɨa Lahaba ngia i꞉nye moi yangaka yɛngɔ, ki꞉nye ɓata ngbanga kʉ ɓwanɨ. Asʉɓɨɨ a꞉mʉchɨka ɓɔ a mombi ɔɔ ngbingbii tʉkʉ ɨngbaa akʉ ɨkyananakɨa ngiangɔ, jʉ a꞉pʉkɨa lɨtɛlɛlɛ ila la꞉ʉngwa anʉ Ɨsalaɛlɛ ambʉɓʉhɨanakiso nɨngbaa yɛmɔ.

²⁶ Ndʉtʉ yambikinye nʉ 'ʉtʉma amati ɔngɔ, ambʉ ndʉtʉ ngiinanɨ ya iwe. Kʉndʉ baya yambikinye nʉ ɨkyananakɨa, ambʉ ya kʉ iwe.