Ɓaɛfɛsɔ 6 - Agɔmɔ ngia wʉ Ɨtakɨ-takɨ

Ɓana nʉ ɓɨsɛ nʉ ɓinye ɓʉndaɓʉ

¹ Inu ɓana, nʉkwanana kukumo ɓatɔ ɓʉndɛnʉ ndʉ aka Makʉʉɓɨɨ aakʉkʉnda‑ɔɔ, jʉ iinanɨ ya moni kɔɔ ngbingbii.

² « Kumo ɔɔ atɔ nʉ anʉ » iinanɨ ya ʉpanʉ ngua wʉ pɛɛ uwa wanʉ agɔmɔ mbise ɔngɔ.

³ « Aka ekoo ngia ɓɔ kyɨanɨa iɗo wambuɓio nʉ ʉɓɨɨ wɔɔ ʉta akʉ ɨtaka. »

⁴ Nʉ inu ɓatidoo, nɔɔjijokokɔmʉ ɓana ɓʉndɛnʉ. Ɨkyɛmɨngana, ɓuhueni nambuɓuyumoko naɓɔ kʉpanɨa mapanʉ kʉ Makʉʉɓɨɨ.

Ɓabayo nʉ ɓakɔɓʉndaɓʉ

⁵ Inu ɓabayo, kumeni ɓakɔɓʉndɛnʉ ngiɓa ɓa akʉ ɨtaka kumoni, nʉ ʉɓa, nʉ naɓɔ kʉkɔ nʉ 'ʉtʉma mungono ngbanga tʉkʉ ndʉ nakʉkyananakɨa Klisito.

⁶ Nɔɔkyɨakɔmʉ kuu iɗo tʉkʉ jʉ ɓaninu kʉkpɨma naɓɔ kʉkataa, ɨkyɛmɨngana kyɨeni tʉkʉ ɓʉkʉnda ɓʉ Asʉɓɨɨ nʉ 'ʉtʉma nguʉndɛnʉ kʉ uɓomu ndʉ ɓabayo ɓʉ Klisito.

⁷ Kyɨeni kuu yɨ ɓubayo ngiɓʉndɛnʉ iɗo ngbanga tʉkʉ ndʉ nakʉkyananakɨa Makʉʉɓɨɨ, chʉkɔmʉ ɓombi.

⁸ Pimiseni kusigo ɓɔ mombi kʉ uɓomu, yiɓio bayo kʉndʉ mombi ngia ambʉkɔmʉ bayo a꞊kwanana kʉnyɨa nʉ ɨkyɛmɛ kʉʉngwa ɔɔ Makʉʉɓɨɨ, kʉkpatanakɨa tʉkʉ nʉ iɗo ngia aɓio ʉkyɨeni.

⁹ Inu ɓangama, kɨndakeni ndʉ akʉ yɨkwananaka‑ɔɔ akʉ mesu kʉ ɓabayo ɓʉndɛnʉ. Nɔɔɓiokɔmʉ naɓɔ kʉkyananaka ɓɨɓɨ. Pimiseni kusigo ɓɔ inu nʉ ɓabayo ɓʉndɛnʉ, Ngama ʉndɛnʉ a tʉkʉ mʉngana iya a ekoo ʉ ɓisi, iya ambʉkɔmʉ nʉ 'ʉtʉma wɔɔ mbomboke ɓombi.

Kumbo ʉ ɗite ngia Asʉɓɨɨ aanzo

¹⁰ Kʉ ɓwanɨ, inu ɓayoo hateni angu ngiʉndɛnʉ amati ʉ jubunio ngiindɛnʉ nʉ ɔɔ Makʉʉɓɨɨ, nʉ amati ʉ angu ngiangɔ ɔɔ 'ʉja nadɨndɨ.

¹¹ Chɨkeni kumbo ʉ ɗite kʉ uɓomu ngia Asʉɓɨɨ aaninzo, aka ekoo ngia ɓɔ maeni ɓʉ ngbɔmʉ kʉmana ɗite ngila lʉ Abɨa.

¹² Jʉ kambʉkɔmʉ kʉmana ɗite nʉ ɓombi, ɨkyɛmɨngana kakʉmana ɗite nʉ ɓangama ngiɓa ɓanʉ angu wʉ ɓabɨa, nʉ ɓanʉ ʉpanʉ wʉ mɨtʉma yɨ ɓabɨa, nʉ ɓʉkʉʉ ɓʉ ɨtaka ɓʉ angu wʉ umomo, nʉ mɨtʉma yɛɛ ɓɨɓɨ ngia ya akʉ maba kʉ ɓisi.

¹³ Iikwa ɓɔ chɨkeni kumbo ʉ ɗite kʉ uɓomu ngia wʉ Asʉɓɨɨ ɨtakɨ‑takɨ ngiakɛ. Kʉ ɓwanɨ, ati ngia wati wɔɔ ɓɨɓɨ nguʉnanɨ wa꞊ka‑ɔɔ, nakwanana kʉmaa ɓʉ ngbɔmʉ kʉmana ɗite lʉ Abɨa nʉ ndʉ napipo ɗite ngilʉnanɨ ɓʉ gba nambuɓio tʉkʉ ɓʉmaɨ nʉ angu chʉkɔmʉ aka makwa wakwa‑ɔɔ ninu.

¹⁴ Kʉ ɓwanɨ, ɓieni tʉkʉ ɓʉndanɛ, nambuɓio tʉkʉ nʉ ingono amati ʉndɛnʉ ndʉ iya ɓaasanga‑ɔɔ 'ʉkaɓa akʉ ɨɓʉnɨ, ɓungbingbii ngiɓʉndɛnʉ ɓuɓio ndʉ uko wɔɔ pɨmakɨɛ ɨgʉngʉ wʉ ɓasʉda.

¹⁵ Ɓieni nʉ kɛkɛɛ kʉsa kʉɓɨakɨa Ɨsaʉ yɛɛ Iɗo yɨ majɨɔ, ndʉ iya sʉda aapɨnya‑ɔɔ lɨkpakʉ akʉ mɨtɨndɨ.

¹⁶ Chɨkeni baya ngiindɛnʉ makwaa kʉ muɓomu ndʉ kɔpɨ iya yakwanana kimo magʉsa kʉ dyaa kʉ muɓomu ngika kʉ Abɨa.

¹⁷ Chɨkeni ɓʉhɨa ndʉ ɨgaɨ yɨ ɓasʉda yɛɛ pɨmakɨɛ 'ʉtʉ, nʉ ɨsaʉ yɨ Asʉɓɨɨ yiɓio ndʉ bakanza ʉ ɗite iya 'Ʉtʉma wɔɔ Tu waanzo.

¹⁸ Ɓieni tʉkʉ amati ʉ nɨta Asʉɓɨɨ akʉ lɨngbaa lʉ moni kʉ di di di, tʉkʉ ndʉ aka 'Ʉtʉma wɔɔ Tu waɓio‑ɔɔ ninu kʉkɨndakiso. Tɨeni ɓombi ɓɔɔ tu ɓʉ Asʉɓɨɨ kʉ ɓuɓomu, ninyeni mesu ɓʉ gbɛ nʉ nzono chʉkɔmʉ nʉ ndokono.

¹⁹ Natɨeni ɛmɛ kʉ tɨaa aka ekoo ngia ɓɔ Asʉɓɨɨ unanzo ɛmɛ moni kɔɔ mʉkwananakɛ ati ngia maɓio‑ɔɔ kʉpanɨa. Ambʉ muɓio kʉɓɨakɨa moni kʉ ɓaɗi ngika kʉ Ɨsaʉ yɛɛ Iɗo chʉkɔmʉ nʉ ʉɓa.

²⁰ Abana ndʉ ma akʉ boloko kititi, ma tʉkʉ titima wʉ Ɨsaʉ yɛɛ Iɗo ngiakɛ. Natɨeni tɨaa, ambʉ muɓio kʉɓɨakɨa engo chʉkɔmʉ nʉ ʉɓa ndʉ akʉ yɨkwanana‑ɔɔ.

Ɓukuo ngia yɨ upipio

²¹ Tikiko ayoo ʉndɛnʉ wʉ ɓʉkʉnda, nʉ mombi ʉ kuu ɔɔ bayanɨɛ kʉkyananakɨa Makʉʉɓɨɨ, ɛyɔ a꞊ninzo masaʉ kʉsɛmɛ kʉ muɓomu, ambʉ pimiseni ɓɔ ʉɓɨɨ nguʉsɛmɛ wa tiga ɨtakɨ‑takɨ ngiakɛ tanɨ.

²² Mʉ꞉mʉtʉma ɛyɔ kʉ nangana ninu kʉɓɨa ɓɔ ɨtakɨ‑takɨ ngiakɛ ma tiga tanɨ, nʉ ninu kunzo igue‑gue.

²³ Asʉɓɨɨ Tidoo nʉ Makʉʉɓɨɨ Yeso Klisito ɓunzo ɓayoo kʉ ɓuɓomu majɨɔ nʉ ɓʉkʉnda, nʉ baya.

²⁴ 'Ʉtʉma wʉ ɨjɨɔ ngua wʉ Asʉɓɨɨ wuɓio ɨzɔ nʉ ɓombi ngiɓa ɓaakʉnda Makʉʉndɛsʉ Yeso Klisito nʉ ɓʉkʉnda ngiɓa ɓingono.