Ɓaɛfɛsɔ 5 - Agɔmɔ ngia wʉ Ɨtakɨ-takɨ

Yɨkwanana kʉkɨndaka amati wanga

¹ Inu na ɓana ɓʉ Asʉɓɨɨ iɓa aanɨkʉnda nadɨndɨ. Kʉ ɓwanɨ, ɓieni nʉ ɨkyananakɨa kʉndʉ iya yangɔ.

² Ɓieni nʉ ɓʉkʉnda amati ʉ ʉɓɨɨ nguʉndɛnʉ kʉndʉ iya Klisito a꞉tɨkʉnda isu. Ɛyɔ a꞉nzo ʉɓɨɨ nguangɔ aka ekoo ʉndɛsʉ kuɓio apɛpɛ nʉ 'ʉtʉmbɨa wɔɔ mve tɨpɨ uwa waakataa Asʉɓɨɨ.

³ Inu na ɓombi ɓɔɔ tu ɓʉ Asʉɓɨɨ. Kʉ ɓwanɨ, yɨkwananakɔmʉ tii ɓata ɓɔ ɨndambʉ, mɨgbʉ yɨ ɓamoni yɨ 'ʉsʉgʉ kʉ iɓomu, nʉ imi yɛɛ ɓɨɓɨ yiɓio ɓata kʉɓʉa amati ʉndɛnʉ.

⁴ Yɨkwananakɔmʉ naɓio ɓata kʉyaka moni kɔɔ ɓɨɓɨ, kʉ ɓʉdada nʉ moni kʉ 'ʉsʉgʉ. Ɨkyɛmɨngana, ɓieni tʉkʉ kutuisio Asʉɓɨɨ ɨbɨba.

⁵ Pimiseni ɓɔ mombi ngia aakyɨa ɨndambʉ, mombi ngia aakyɨa moni kʉ soni, nʉ mombi ngia aakʉnda tʉkʉ kʉnyɨa nʉ kumbo 'ʉja, iya ya bibiso ɓamʉngʉ ɓʉ yakanaka, ikanzi yɨ mombi ngiinanɨ gʉkʉ mʉngana ambʉkʉkwanana kʉnyɨa nʉ ɨjangɨa amati ʉ Ɓʉngama ɓʉ Klisito nʉ iɓa ɓʉ Asʉɓɨɨ.

⁶ Mombi ɔɔnɨpɨta ɓata nʉ moni kʉ ɓʉdada. 'Ʉnganga wʉ Asʉɓɨɨ waakyɨa akʉ ikanzi yɨ moni ngikʉnanɨ ekoo ʉ ɓombi ngiɓa ɓambakamʉkɔ.

⁷ Nʉkwananakɔmʉ najubunio nʉ ikanzi yɨ ɓombi ngiɓʉnaa.

⁸ Jɛnɛ pɛɛ ni꞉nye amati ʉ umomo, ɨkyɛmɨngana ɨtakɨ‑takɨ ngiakɛ na tiga amati ʉ ɓisi ɓɔɔ ɓʉyɛ aka ekoo ʉ jubunio ngiindɛnʉ nʉ ɔɔ Makʉʉɓɨɨ. Kʉ ɓwanɨ, ɓieni kʉkɨndaka ndʉ ɓombi ngiɓa ɓa amati ʉ wanga.

⁹ Jʉ wanga waanzo masɔɔ kɔɔ muɗo kʉ muɓomu, iya yakusigo ɓɔ moni kɔɔ ngbingbii, nʉ ingono.

¹⁰ Kyɨeni angu kupimiso moni ngika kaakataa Makʉʉɓɨɨ.

¹¹ Nɔɔkumunikio lɨngbaa lʉ moni lɔɔ ɓɨɓɨ ila ɓaalɨkyɨa amati ʉ umomo, ila lambʉkɔmʉ nʉ dada, ɨkyɛmɨngana nʉkwanana nakɔ kʉpanzaka akʉ ɓʉmba.

¹² Moni ngika ɓombi ngiɓʉnanɨ ɓaakʉkyɨa akʉ ɓaɗi kaanzo soni nakɔ kʉngaka.

¹³ Ɨkyɛmɨngana, ndʉ ɓaapanzaka moni kʉ ɓaɗi, kaaɓʉa tiga akʉ ɓʉmba ɓʉ ngbanganya.

¹⁴ Kʉ ɓwanɨ, moni ngika kaapananɨa akʉ ɓʉmba kaaka tiga wanga. Iikwa ɓaasigo‑ɔɔ ɓɔ: « Ɔwɛ gwa ngia wakʉkwaa tɔɔ akɛ, jʉkana. Jʉkana akʉ ingyo ati ʉ mɨnda, Klisito a꞊napʉya wanga pʉyaa. »

¹⁵ Kanganakɨeni ɨkɨndakɨa ngiindɛnʉ iɗo. Nɔɔkɨndakakɔmʉ ndʉ ɓombi ngiɓa ɓambʉkɔmʉ nʉ mbɨmbanaka, ɨkyɛmɨngana ɓieni tʉkʉ nʉ 'ʉtʉma wɔɔ pimise moni muɗo.

¹⁶ Pɨmakɨeni wati ngua Asʉɓɨɨ aninu kunzo kʉkyɨa kuu, nɔɔʉsɨakɔmʉ kʉɓaa ɨsʉkʉɓwanɨ jʉ ka akʉ wati wɔɔ ɓɨɓɨ.

¹⁷ Iikwa nʉkwananakɔmʉ kuɓio ɓombi ngiɓa ɓambʉkɔmʉ nʉ mbɨmbanaka, ɨkyɛmɨngana pimiseni ɓɔ Makʉʉɓɨɨ akʉkʉnda nakɨndaka tanɨ.

¹⁸ Nɔɔdamʉakɔmʉ vinyo, jʉ ɨdamʉ ya꞊tito mombi amati ʉ ɓʉdangala, ɨkyɛmɨngana ɓieni tʉkʉ ɓuhue nʉ 'Ʉtʉma wɔɔ Tu.

¹⁹ Nzoneni igue‑gue ati ʉndɛnʉ nʉ mʉmbɔ, nʉ lɨta, nʉ sʉsanaka ngia 'Ʉtʉma wɔɔ Tu wakutitio engo. Sʉeni mʉmbɔ, nʉ bibiseni Makʉʉɓɨɨ nʉ 'ʉtʉma nguʉndɛnʉ kʉ uɓomu.

²⁰ Tuisieni Asʉɓɨɨ Tidoo ɨbɨba wati kʉ uɓomu, nʉ akʉ lɨngbaa lʉ moni kʉ liɓomu, akʉ ino yɨ Makʉʉndɛsʉ Yeso Klisito.

Pɔlɔ akunzo mapanʉ ekoo ʉ ɓugue nʉ ɓoi

²¹ Inu ɓombi kʉ ɓuɓomu ɓieni kukumono ati ʉndɛnʉ aka ekoo ʉ ʉɓa wʉ Klisito ngua wa amati ʉndɛnʉ.

²² Inu ɓoi, kumeni ɓugue ɓʉndɛnʉ kʉndʉ naakumo Makʉʉɓɨɨ.

²³ Jʉ gue a 'ʉtʉ wʉ moi angɔ, kʉndʉ Klisito a 'ʉtʉ wʉ kanisa. Kanisa a ndʉtʉ yɨ Klisito, nʉ ɛyɔ makʉɔngɔ a Muhiiso wʉ kanisa.

²⁴ Kʉ ɓwanɨ, ɓoi ɓʉkwanana kukumo ɓugue ɓʉndaɓʉ akʉ lɨngbaa lʉ moni kʉ liɓomu kʉndʉ iya kanisa aakumo‑ɔɔ Klisito.

²⁵ Inu ɓugue, kʉndeni ɓoi ɓʉndɛnʉ kʉndʉ iya Klisito a꞉kʉnda‑ɔɔ kanisa ambunzo ʉɓɨɨ nguangɔ aka ekoo ɔngɔ.

²⁶ A꞉kyɨa ɓwanɨ aka ekoo ngia ɓɔ kanisa uɓio 'ʉkwananakɛ akʉ mesu kʉ Asʉɓɨɨ, mbise ʉ nayɔ kʉjaɓaka nʉ mepo nʉ ɨsaʉ,

²⁷ jʉ i꞉nye kʉkʉnda ɓɔ kanisa uɓio akʉ mesu kangɔ nʉ ɨbɨba, chʉkɔmʉ nʉ ɨɗa yɛɛ ɓɨɓɨ, chʉkɔmʉ 'ʉyɨgɛ gʉɓɔ moni kɔɔ ɓɨɓɨ kɔmɔ ndʉ ɨkʉnanɨ. Ɨkyɛmɨngana, ɔɔɓiokɔmʉ nʉ ʉdɛɛ.

²⁸ Ngbanga kʉ ɓwanɨ, ɓugue ɓʉkwanana kʉkʉnda ɓoi ɓʉndaɓʉ kʉndʉ iya ɓaakʉnda‑ɔɔ ndʉtʉ ngiindaɓʉ ɓakʉɓɔngɔ. Mombi ngia aakʉnda moi angɔ, akʉkʉndana kʉ ɛyɔ makʉɔngɔ.

²⁹ Jʉ yambʉkɔmʉ nʉ mombi ngia aayaa ndʉtʉ ngiangɔ makʉɔngɔ, ɨkyɛmɨngana mombi aahuo ndʉtʉ ngiangɔ ambʉɨpɨmakɨa kʉndʉ iya Klisito aapɨmakɨa‑ɔɔ kanisa.

³⁰ Aakyɨa ɓwanɨ jʉ isu kanisa ka lizi lʉ ndʉtʉ ngiangɔ.

³¹ Mubio kʉ Asʉɓɨɨ kakusigo ɓɔ: « Aka ekoo ʉ moni ngikʉnanɨ, gue a꞊sɨa ɨsɛ nʉ inye ɓambujubunio nʉ moi angɔ, kija ɛɓɔ ɓapɨnɨ kʉ ɓuɓomu ɓa꞊ka tiga ndʉtʉ mɨngana. »

³² Moni kɔɔ maja kʉ ɓaɗi ka amati ʉ wagba wʉ ʉbalʉa nguakɛ. Moni kɔngɔ ɛmɛ musigo ɓɔ ka kʉndʉ jubunio ngia ya ati ʉ Klisito nʉ kanisa.

³³ Ɨkyɛmɨngana, ya akʉ inu kʉ ɓwanɨ, gue kʉ uɓomu ati ʉndɛnʉ ʉkʉnda moi angɔ kʉndʉ aakʉndana ɛyɔ makʉɔngɔ, nʉ moi kʉ uɓomu ʉkwanana kukumo swaɨ.