Ɓaɛfɛsɔ 4 - Agɔmɔ ngia wʉ Ɨtakɨ-takɨ

Ɓieni ndʉtʉ mɨngana amati ʉ Klisito

¹ Ɛmɛ ngia ma'ʉnganɨɛ akʉ boloko jʉ maakyananakɨa Makʉʉɓɨɨ, maninu kʉta ɓɔ, kɨndakeni akʉ ɓingono ndʉ aka ya‑ɔɔ kʉtanɨa nʉ soko ngia yɨ Asʉɓɨɨ.

² Ɓieni tʉkʉ nʉ 'ʉtʉma wɔɔ ijisinise nɨsɨ, 'ʉtʉma uɗo, nʉ 'ʉtʉma wɔɔ ʉta. Fuɓuneni ɓuɓuto ɓʉ ɓamoni ati ʉndɛnʉ amati ʉ ɓʉkʉnda.

³ Kyɨeni angu kʉpɨmakɨa ɓɨzɔ ngiɓa 'Ʉtʉma wɔɔ Tu waninu kunzo, ninu kujobo kuɓio ɨkyɛmɛ mɨngana ati ʉndɛnʉ amati ʉ majɨɔ.

⁴ Ndʉtʉ ya tʉkʉ mɨngana nʉ 'Ʉtʉma wɔɔ Tu wa kʉ mungono, kʉ ɓwanɨ itungwio yɛɛ nyɨɛ nʉ ɨkyɛmɛ ya kʉ mɨngana iya Asʉɓɨɨ a꞉nisukio.

⁵ Makʉʉɓɨɨ a tʉkʉ mʉngana, baya ya kʉ mɨngana, uɓatiso wa kʉ mungono.

⁶ Asʉɓɨɨ a tʉkʉ mʉngana, Ɨsɛ ʉ ɓombi kʉ ɓuɓomu iya anʉ ʉpanʉ ekoo ʉ kumbo kʉ uɓomu nʉ aakyɨa kuu mʉa kʉ uɓomu nʉ akʉ izi kʉ iɓomu.

⁷ Ʉna tɔ, mombi kʉ nangana nangana ati ʉndɛsʉ a꞉nyɨa nʉ mbɨmbanaka yɨ 'Ʉtʉma wɔɔ Tu iya yangɔ makʉɔngɔ kʉkpatanakɨa tʉkʉ nʉ iya Klisito a꞉munzo.

⁸ Kʉndʉ Mubio kakʉyaka moni ekoo ɔngɔ ɓɔ: « Ati ngia a꞉ɗito‑ɔɔ ekoo, a꞉sa nʉ ɓombi ɓɔɔ ɓʉnganɨɛ akʉ boloko ɨzɔ nayɔ, ambunzo ɓombi mbɨmbanaka yɨ 'Ʉtʉma wɔɔ Tu. »

⁹ Kʉ ɓwanɨ, kusigo ɓɔ: « A꞉ɗito ekoo. » Yakʉkʉnda kusigo tanɨ? Ya tʉkʉ kʉkʉnda kusigo ɓɔ pɛɛ ɔɔ ɗite ekoo, a꞉ijo jɛnɛ akʉ ɨtaka, kʉɓʉya kʉ akʉ lizi lɔɔ ɗu ɗu ɗu lɔngɔ.

¹⁰ Mombi mʉngana ngia a꞉ijo jɛnɛ ya ɨsɨ ʉ ɨtaka, kʉ ɛyɔ ɓata iya a꞉ɗito ekoo ʉ ɓisi nɨkʉʉ nadɨndɨ, aka ekoo ngia ɓɔ ɨkyɛmɛ kʉ iɓomu ngia ya akʉ ɨtaka akʉ lizi kʉ liɓomu luɓio tʉkʉ ndʉ aka yɨkwananaka‑ɔɔ.

¹¹ Ɛyɔ kʉ a꞉nzo ɓombi kʉ nangana nangana mbɨmbanaka yɨ 'Ʉtʉma wɔɔ Tu. A꞉napɨa ɓombi ɓɔmɔ kuɓio ɓatitima, ambʉnapɨa ɓombi ɓɔmɔ kuɓio lɨgbɛ, ɓombi ɓɔmɔ kuɓio ɓapananakɨa ɓʉ Ɨsaʉ yɛɛ Iɗo, ɓombi ɓɔmɔ kuɓio ɓapasɨtɛlɛ, nʉ ɓɔmɔ ɓapananakɨa.

¹² Klisito a꞉kyɨa ɓwanɨ tʉkʉ aka ekoo ʉ tambanaka ɓombi ɓʉ Asʉɓɨɨ. Kʉ ɓwanɨ, ɓʉkwananakiso kuu ngiindaɓʉ ambʉ ɓuyukukiso ndʉtʉ ngia yɨ Klisito.

¹³ Nɨngbaa ngiinanɨ, ka꞊kwanana isu kʉ ɓuɓomu kuɓio amati ɓizɔ akʉ baya nʉ mbɨa Mwana ʉ Asʉɓɨɨ iɗo. Iiya ka꞊kwanana tiga‑ɔɔ kʉka ɓombi ɓɔɔ ɓusie nʉ yukukiso ndʉtʉ ngiindɛsʉ ndʉ akʉ yɨkwananaka‑ɔɔ, ngbanga ndʉ iya yɨ Klisito.

¹⁴ Kʉ ɓwanɨ, kambukuɓio tii ɓata ɓana, kʉmbambania kʉ gbaɨ ndʉ iya ɨbʉbʉ yaapɨka‑ɔɔ ɨngbɔɔ, nʉ ndʉ iya mahuo waaɨyɨnganakiso‑ɔɔ kʉ gbaɨ. Isu kʉkwananakɔmʉ tii ɓata kʉyɨnganaka ɓwanɨ kʉkpata mapanʉ kʉ yakanaka, ika ɓafili ɓakʉpanɨa engo, kusingo ɓombi nga ɓɔmɔ amati ʉ pɨtanaka.

¹⁵ Ɨkyɛmɨngana, aka ekoo ʉ ɓɨakɨa ɨsaʉ yɨ ingono nʉ ɓʉkʉnda, ka꞊kwanana kuyokoko amati ʉ Klisito iya a 'ʉtʉ.

¹⁶ Ya aka ekoo angɔ iya ndʉtʉ ngiindɛsʉ ya‑ɔɔ ɨnganakise izi mɨngana nʉ kʉfanaka kʉsalɨa manganakɨa kʉ muɓomu. Kʉ ɓwanɨ, ati ngia lizi lʉ ndʉtʉ kʉ nangana nangana la‑ɔɔ kʉkyɨa kuu ndʉ aka yɨkwanana‑ɔɔ, ndʉtʉ kʉ iɓomu yaayokoko tiga ɨngbaa akʉ ɓʉkʉnda.

Ɓieni nʉ ʉɓɨɨ wʉ ɨtakɨ‑takɨ amati ʉ Klisito

¹⁷ Kʉ ɓwanɨ, makʉyaka moni ngikakɛ nʉ kʉkpataka engo nʉ kɛkɛɛ akʉ ino yɨ Makʉʉɓɨɨ ɓɔ nɔɔkɨndaka tii ɓata ngbanga ndʉ ɓombi ngiɓa ɓambakambɨa Asʉɓɨɨ, iɓa ɓaakpataka tʉkʉ itungwio ngiindaɓʉ yɨ ɓʉdada,

¹⁸ nʉ iɓa mbɨmbanaka ngiindaɓʉ yanʉ umomo. Ɛɓɔ ɓambʉkɔmʉ gʉkʉ nʉ izi amati ʉ ʉɓɨɨ ngua Asʉɓɨɨ aanzo, jʉ ɓambakambɨa gʉkʉ ɨkyɛmɛ nʉ ɓa kʉ 'ʉtʉ ɓʉmʉ.

¹⁹ Ɛɓɔ ɓambʉkɔmʉ gʉkʉ nʉ soni, ɓaanzono kʉkyɨa ɨndambʉ nʉ kʉkyɨa mɨgbʉ yɨ ɓamoni ɓʉ 'ʉsʉgʉ kʉɓaana tʉkʉ ɓʉchɨla chɨla.

²⁰ Ɓa꞉nɨpanɨakɔmʉ ekoo ʉ Klisito ɓwanɨ!

²¹ Ya kingono kusigo ɓɔ inu na꞉kɔ moni ekoo angɔ kɔɔ, ɓambʉnɨpanɨa moni ekoo angɔ kʉkpatanakɨa nʉ ɓingono ngiɓa ɓa amati ʉ Yeso.

²² Kʉ ɓwanɨ, nʉkwanana kʉsɨana nʉ ɨkyananakɨa yɨ jɛnɛ ngiindɛnʉ, iya yakʉpana aka ni꞉nye kɨndaka‑ɔɔ pɛɛ. Ɨkyananakɨa ngiinanɨ, nʉ pɨtanaka yɛngɔ kʉ iɓomu yaatito mombi akʉ ingyo.

²³ Sɨeni 'Ʉtʉma wɔɔ Tu kunicho mbɨmbanaka ngiindɛnʉ nʉ itungwio ngiindɛnʉ.

²⁴ Ɓieni nʉ ʉɓɨɨ wʉ ɨtakɨ‑takɨ uwa Asʉɓɨɨ a꞉kyɨa, uwa waanyɨa amati ʉ ʉɓɨɨ wɔɔ ngbingbii nʉ wɔɔ tu, uwa wanʉ ingono.

²⁵ Iikwa ɓɔ sɨeni pɨtanaka! Mombi kʉ uɓomu ʉyakɨa mangɛ tʉkʉ moni kingono jʉ isu kʉ ɓuɓomu ka manganakɨa kʉ ndʉtʉ mɨngana.

²⁶ Ndʉ nakwa 'ʉnganga, kyɨeni angu ɓɔ nɔɔkumuniokɔmʉ akʉ ɓʉɓɨɓɨ, nʉ 'ʉnganga nguʉndɛnʉ wɔɔɓʉyakɔmʉ nɨpasɨ.

²⁷ Nɔɔsɨakɔmʉ Abɨa ɨngbaa kuɓio nʉ ʉpanʉ ekoo ʉndɛnʉ.

²⁸ Mombi ʉ ndiɓo ʉsɨa ndiɓo, ɨkyɛmɨngana ʉkyɨa kuu nʉ lɨkɔndɔ ngilangɔ makʉɔngɔ akʉ ɨngbaa yɛɛ iɗo, ambʉ ʉnyɨa nʉ ɨkyɛmɛ ngia akwanana nayɔ kʉsalɨa ɓombi ngiɓa ɓa amati ʉ ɓanangyɨa.

²⁹ Moni kɔɔ ɓɨɓɨ kɔɔɓʉakɔmʉ amati ʉ moni ngikʉndɛnʉ, ɨkyɛmɨngana yakeni tʉkʉ moni kɔɔ muɗo ika ka꞊kwanana kʉsalɨa ɓombi nga ɓɔmɔ kʉkpatanakɨa nʉ moni ngika ɓakusiɓo nʉ taa yengo. Ambʉ moni ngikʉnanɨ kʉkwa ɓombi ngiɓa ɓaninu kʉkɔ muɗo.

³⁰ Nɔɔdyisokɔmʉ 'Ʉtʉma wɔɔ Tu ikoko uwa wa ɨɗa yɨ Asʉɓɨɨ amati ʉndɛnʉ, iya ya꞊nimbiiso ɓɔ ɓisi mʉngana Asʉɓɨɨ a꞊nɨɓwanakiso sina akʉ ɓʉɓɨɓɨ tʉkʉ ɓwanakisoo.

³¹ Nɔɔɓio tii ɓata nʉ 'ʉtʉma wʉ uchongi, nʉ chakanaka, 'ʉnganga, mangoi, zɨzanaka nʉ mɨgbʉ yɨ ɓʉɓɨɓɨ nga yɛmɔ kʉ iɓomu yeeɓiokɔmʉ ati ʉndɛnʉ.

³² Pananiseni tʉkʉ ɓuɗo ati ʉndɛnʉ, ɓieni ɓombi ɓɔɔ ɓʉnɨɛ ɓangɛ ikoko, ɓombi ɓɔɔ ɓʉpɨanɛ ɓʉɓɨɓɨ kʉndʉ Asʉɓɨɨ a꞉nɨpɨa jɛnɛ inu amati ʉ Klisito.