Ɓaɛfɛsɔ 3 - Agɔmɔ ngia wʉ Ɨtakɨ-takɨ

Pɔlɔ akʉɓɨakɨa moni kʉ ɓaɗi ngika kʉ Asʉɓɨɨ

¹ Aka ekoo moni ngikʉnanɨ Asʉɓɨɨ a꞉kyɨa, iiya ɛmɛ Pɔlɔ ma‑ɔɔ ninu kʉtɨa Asʉɓɨɨ. Ma꞉ʉnganɨɛ akʉ boloko jʉ maakyananakɨa Yeso Klisito ninu kʉɓɨakɨa ɨsaʉ yɨ Asʉɓɨɨ, inu ɓombi ngiɓa nambʉkɔmʉ Ɓayuda.

² Inu na꞉kɔ pongo tʉkʉ kɔnɨ ɨsaʉ yɨ kuu ngia yɨ Asʉɓɨɨ, aka ekoo ʉ ɨjɨɔ ngiangɔ a꞉pananiso pongo ekoo ʉndɛnʉ.

³ Asʉɓɨɨ a꞉napanzakɨa kʉpɛɛ ɨsaʉ yɨ ɓaɗi ngiangɔ iya mʉkpanga nʉ tɨndakɨa ɨsaʉ yɛngɔ amati ʉ ʉbalʉa nguakɛ.

⁴ Nʉ ati ngia naɓio‑ɔɔ kupopoko engo, nakwanana kupimiso moni kʉ ɓaɗi ngika maambɨa aka ekoo ʉ Klisito.

⁵ Jɛnɛ pɛɛ, ɨsaʉ yɨ ɓaɗi ngiinanɨ Asʉɓɨɨ a꞉mbikinye mbiiso ɓombi. Ɨkyɛmɨngana, tiga ɨtakɨ‑takɨ ngiakɛ Asʉɓɨɨ a tiga nayɔ kumbiiso ɓatitima ngiɓangɔ ɓɔɔ tu, nʉ lɨgbɛ ngilangɔ 'upi akʉ 'Ʉtʉma.

⁶ Moni kʉ ɓaɗi ngikʉnanɨ ka ɓɔ, ɨngbaa akʉ Ɨsaʉ yɛɛ Iɗo, ɓombi ngiɓa ɓambʉkɔmʉ Ɓayuda ɓa꞊kwanana kʉnyɨa nʉ ɓuɗo ɓʉ Asʉɓɨɨ ɨzɔ nʉ Ɓayuda akʉ lɨkyɛmɛ ngila Asʉɓɨɨ a꞉ɓusio ɓombi ngiɓangɔ. Ɓombi ngiɓʉnanɨ ɓa ndʉtʉ mɨngana nʉ ɓaanyɨa nʉ ɓuɗo ngiɓa Asʉɓɨɨ a꞉panaka 'upi akʉ Yeso Klisito.

⁷ Ɛmɛ ma꞉nɨtanaka tiga bayo ɔɔ ɓɨakɨɛ Ɨsaʉ yɛɛ Iɗo tʉkʉ aka ekoo ʉ apɛpɛ ngia Asʉɓɨɨ a꞉nanzo akʉ ɓuɗo ngiɓangɔ nʉ kʉpananiso angu ngiangɔ.

⁸ Ɛmɛ ma tʉkʉ ɨkyɛmɛ yɛɛ ɗɛkɛkɛ ati ʉ ɓombi ngiɓa ɓa꞉baya. Ʉna tɔ, Asʉɓɨɨ a꞉nakyɨa iɗo nɛmɛ kunzo kuu yɛɛ ɓɨakɨɛ ɓombi ngiɓa ɓambʉkɔmʉ Ɓayuda Ɨsaʉ yɨ ɨjangɨa ngia yɨ Yeso Klisito iya yambʉkɔmʉ nʉ 'upipio.

⁹ Mʉkwanana kʉɓɨakɨa ɓombi kʉ ɓuɓomu moni kʉ ɓaɗi ngikʉnanɨ ɓʉ ngbɛlɛ ngbɛlɛ aka Asʉɓɨɨ a꞉kʉkwananakiso‑ɔɔ. Ɛyɔ ngia a꞉kyɨa kumbo kʉ uɓomu, a꞉naya moni kʉ ɓaɗi ngikangɔ kʉʉngwa kʉ jɛnɛ.

¹⁰ Kʉ ɓwanɨ, ɨngbaa akʉ kanisa, ɓangama ɓʉ angu nʉ ɓombi ngiɓa ɓanʉ ʉpanʉ ekoo ʉ ɓisi ɓʉkwanana kʉmbɨa moni kʉ 'ʉtʉma wɔɔ pimise moni ngua wʉ Asʉɓɨɨ. 'Ʉtʉma wɔɔ pimise moni nguʉnanɨ, Asʉɓɨɨ aaʉpananiso akʉ lɨngbaa kʉ di di di.

¹¹ Asʉɓɨɨ a꞉kyɨa ɓwanɨ tʉkʉ kʉkpatanakɨa nʉ itungwio ngiangɔ yɨ mɨtʉ yɨ ɨpá nʉ mɨtʉ yɨ ɨpá, iya a꞉ɨkwananakiso 'upi akʉ Yeso Klisito Makʉʉndɛsʉ.

¹² Amati ʉ jubunio ngiindɛsʉ nʉ ɔɔ Klisito nʉ akʉ baya ngiindɛsʉ ekoo angɔ, ka kingono ɓuɓununikie kʉmaa apɛɛ ʉ Asʉɓɨɨ chʉkɔmʉ nʉ ʉɓa.

¹³ Kʉ ɓwanɨ, maninu kʉta ɓɔ nɔɔkwakɔmʉ ɓayadʉɓa aka ekoo ʉ ɓʉka‑ɓʉkaɨ ngiɓa ma꞉dya amati ʉ kuu ngiisɛmɛ ekoo ʉndɛnʉ, iinanɨ kʉ iɓomu ya tʉkʉ ɨbɨba yɨndɛnʉ.

Kʉmbɨa ɓʉkʉnda ɓʉ Klisito

¹⁴ Ya aka ekoo ʉ moni ngikʉnanɨ iya ma‑ɔɔ 'ʉgbʉkʉmɨɛ muwuu akɛsɨ apɛɛ ʉ Asʉɓɨɨ Tidoo,

¹⁵ iya ɓombi kʉ ɓuɓomu ngiɓa ɓa ekoo ʉ ɓisi nʉ iɓa ɓa akʉ ɨtaka ɓaanyɨa‑ɔɔ nʉ ʉɓɨɨ aka ekoo angɔ.

¹⁶ Manayɔ kʉta ɓɔ, kʉkpatanakɨa nʉ ɨjangɨa yɨ ɨbɨba ngiangɔ, 'Ʉtʉma nguangɔ wuninzo angu amati ʉ mɨtʉma ngiindɛnʉ.

¹⁷ Klisito uwulo amati ʉ mɨtʉma ngiindɛnʉ akʉ baya. Ɓʉkʉnda ɓuninzo angu kʉndʉ iya mii yaamaiso‑ɔɔ ɓʉtɨ, nʉ kʉndʉ iya 'ʉkʉpa wʉ mukopi waamaiso‑ɔɔ ɨkáa,

¹⁸ aka ekoo ngia ɓɔ inu, ɨzɔ nʉ ɓombi ɓʉ Asʉɓɨɨ ngiɓa ɓɔmɔ kʉ ɓuɓomu pimiseni ɓʉja ɓʉ ɓʉkʉnda ngiɓa ɓʉ Klisito iɓa ɓambʉkɔmʉ nʉ 'upipio.

¹⁹ Kingono, na꞊kwanana kʉmbɨa ɓʉkʉnda ngiɓangɔ, iɓa ɓʉɓaa mbɨmbanaka kʉ iɓomu, nambuɓio ɓuhue nʉ ʉɓɨɨ wʉ Asʉɓɨɨ kʉ uɓomu.

²⁰ Asʉɓɨɨ akʉkyɨa kuu amati ʉndɛsʉ nʉ angu ngiangɔ, ikanzi ngia ɓɔ ndʉ kaamʉta ɨkyɛmɛ aakwanana tiga kunzo ɨja nadɨndɨ, jʉ angu ngiangɔ ʉɓaa moni kʉ muɓomu ngika kaakyɨa kutunguo engo.

²¹ Asʉɓɨɨ ʉchɨka ɨbɨba amati ʉ kanisa 'upi akʉ Yeso Klisito, wati kʉ uɓomu nʉ akʉ mɨtʉ yɨ ɨpá nʉ mɨtʉ yɨ ɨpá! Ya ɓwanɨ.