Ɓaɛfɛsɔ 2 - Agɔmɔ ngia wʉ Ɨtakɨ-takɨ

Kʉnyɨa nʉ ɓʉhɨa

¹ Jɛnɛ pɛɛ, ni꞉nye nuweni woo aka ekoo ʉ ɨkyananakɨa yɛɛ ɓɨɓɨ ngiindɛnʉ, nʉ ekoo ʉ ɓʉɓɨɓɨ ngiɓʉndɛnʉ.

² Ʉɓɨɨ nguʉndɛnʉ wi꞉nye tii tʉkʉ kʉkpata moni kʉ ɨtaka. Ni꞉nye tii tʉkʉ kʉkpata moni kʉ ngama ɔɔ ɓɨɓɨ ngia anʉ ʉpanʉ ekoo mɨtʉma yɨ abɨa ngia ya akʉ maba kʉ ɓisi. 'Ʉtʉma nguʉnanɨ ʉwɔ uwa wakʉkyɨa kuu ɨtakɨ‑takɨ ngia amati ʉ ɓombi ngiɓa ɓambakakɔ Asʉɓɨɨ.

³ Isu kʉ ɓuɓomu ki꞉nye kʉ ngbanga naɓɔ. Jʉ ʉɓɨɨ nguʉndɛsʉ wi꞉nye tʉkʉ kʉkpata ɓʉtɨpɨ ɓʉ taa yɨ ndʉtʉ ngiindɛsʉ ɓakʉɓɔngɔ, nʉ tʉkʉ kʉkpata ɓʉkʉnda ɓʉ ndʉtʉ nʉ 'ʉtʉma nguʉndɛsʉ. Aka ekoo ɨkyananakɨa ngiindɛsʉ yɛɛ ɓɨɓɨ, ki꞉nye ɓɔ Asʉɓɨɨ atɨnapɨa nʉ 'ʉkɔmbɔ ngbanga kʉndʉ ɓombi nga ɓɔmɔ.

⁴ Ɨkyɛmɨngana, 'ʉtʉma wʉ ikoko ngua wʉ Asʉɓɨɨ nʉ ɓʉkʉnda ngiɓangɔ ekoo ʉndɛsʉ ɓa ɓaja nadɨndɨ,

⁵ jʉ ati ngia ki꞉nye‑ɔɔ kuweni woo aka ekoo ɨkyananakɨa yɛɛ ɓɨɓɨ ngiindɛsʉ, a꞉tɨjʉkaniso akʉ ingyo ɨzɔ nʉ ɔɔ Klisito. Ya tʉkʉ aka ekoo 'ʉtʉma wʉ ɨjɨɔ wʉ Asʉɓɨɨ iya na꞉nyɨa‑ɔɔ nʉ ɓʉhɨa.

⁶ Amati ʉ jubunio ngiindɛsʉ nʉ ɔɔ Yeso Klisito, Asʉɓɨɨ a꞉tɨjʉkaniso akʉ ingyo ɨzɔ nayɔ, ambutiwuliso ekoo ʉ ɓisi ɨzɔ kʉ nayɔ.

⁷ A꞉kyɨa ɓwanɨ aka ekoo ʉ pananiso akʉ wati ngua wakʉka apɛɛ, ɨjangɨa yɛɛ ɨja yɨ 'ʉtʉma wʉ ɨjɨɔ nguangɔ 'upi akʉ iɗo ngiangɔ amati ʉ Yeso Klisito.

⁸ Jʉ ya tʉkʉ aka ekoo 'ʉtʉma wʉ ɨjɨɔ ngua wʉ Asʉɓɨɨ iya na꞉nyɨa‑ɔɔ nʉ ɓʉhɨa ɨngbaa akʉ baya ngiindɛnʉ. Ɓʉhɨa ngiɓʉnanɨ ɓambʉkɔmʉ kʉʉngwanakɨa ninu, ɨkyɛmɨngana ya apɛpɛ wʉ Asʉɓɨɨ.

⁹ Ɓʉhɨa ngiɓʉnanɨ ɓambʉkɔmʉ masɔɔ kʉ angu ngiʉndɛsʉ, nʉ yambʉkɔmʉ aka mombi gʉkʉ mʉngana aɓio‑ɔɔ nʉ ɨbandanɨa.

¹⁰ Jʉ isu ka tʉkʉ kuu yɨ likɔndɔ langɔ. A꞉tɨkyɨa kuɓio ɓombi amati ʉ jubunio ngiindɛsʉ nʉ ɔɔ Yeso Klisito aka ekoo ngia ɓɔ kuɓio kʉkyɨa kuu yɛɛ manzanza ɨja. Kuu ngiinanɨ Asʉɓɨɨ a꞉ɨtambanaka jɛnɛ kʉpɛɛ aka ekoo ngia ɓɔ kuɓio kʉkyɨa engo.

Ɓayuda nʉ ɓombi ngiɓa ɓambʉkɔmʉ Ɓayuda ɓa tiga ɨbaba mɨngana amati ʉ Klisito

¹¹ Nʉkwanana kʉ kutunguo ɓɔ ni꞉nye pɛɛ tanɨ. Inu ngiɓa akʉ nʉtanɨa nambʉkɔmʉ Ɓayuda. Ɓombi ngiɓa ɓaachɨkana ndʉ ɓa ɓana ɓʉ Asʉɓɨɨ ɓaanɨna inu ndʉ gʉ nambakambɨa Asʉɓɨɨ. Ɓaakyɨa ɓwanɨ jʉ ɓi꞉nye tiniso ganza, ʉna tɔ, iinanɨ yi꞉nye tʉkʉ moni kʉ ɓombi ɨsʉkʉɓwanɨ.

¹² Tungueni ɓɔ ati ngiinanɨ nambikinye mbɨa ɓɔ Klisito a anɨ amati ʉ ʉɓɨɨ nguʉndɛnʉ. Ni꞉nye ɓɛɛka nʉ nambikinye akʉ anza wʉ Ɓaɨsalaɛlɛ. Inu ni꞉nye aɓei ʉ agɔmɔ ngia Asʉɓɨɨ a꞉panaka ɓombi ɓangɔ. Ʉɓɨɨ nguʉndɛnʉ akʉ ɨtaka wambikinye uwa wɔɔ napɨɛ itungwio, nʉ wambikinye nʉ Asʉɓɨɨ kʉ ɓwanɨ.

¹³ Ɨkyɛmɨngana, ɨtakɨ‑takɨ ngiakɛ amati ʉ jubunio ngia nanayɔ nʉ ɔɔ Yeso Klisito, inu ngiɓa ni꞉nye danga, na꞉ɗʉana tiga kʉ tinene nayɔ 'upi akʉ miniki ngikangɔ ka꞉nzɨlaka.

¹⁴ Jʉ kʉ Klisito ɛyɔ makʉɔngɔ kʉ a꞉tinzo majɨɔ. A꞉jobo ɓombi ngiɓa ɓa꞉mbikinye Ɓayuda nʉ iɓa ɓa Ɓayuda kuɓio ndiba ʉ ɓombi mʉngana. Ɓʉyaa ngiɓa ɓi꞉nye ati ʉndaɓʉ ɓi꞉nye ndʉ aga ngia a꞉ɓʉɗʉkwa. Ɛyɔ a꞉panza tiga aga ngiinanɨ ati ngia a꞉wo‑ɔɔ ekoo ʉ mʉsalaba.

¹⁵ Ɛyɔ a꞉wa ʉpanʉ wʉ Ɓayuda nʉ ɓakɛkɛɛ ɓɔngɔ kʉtaa, nʉ angu ɔngɔ kʉ uɓomu aka ekoo ʉ nicho mababa kʉ ɓombi kapɨnɨ ngikʉnanɨ, kʉnɨka tiga ndiba mʉngana amati ʉ jubunio nayɔ. Nɨngbaa ngiinanɨ a꞉napɨa tiga majɨɔ ati ʉndaɓʉ.

¹⁶ Ɨngbaa akʉ ingyo ekoo ʉ mʉsalaba, Klisito ambujubuniso ɓombi kʉ ɓuɓomu kuɓio ndʉtʉ mɨngana, ambʉɓʉnapɨa nʉ ɓayo nʉ ɔɔ Asʉɓɨɨ, 'upi kuwo ekoo ʉ mʉsalaba ambuungwiso ɓʉyaa.

¹⁷ Kʉ ɓwanɨ, Klisito a꞉ka ninu kʉɓɨakɨa Ɨsaʉ yɛɛ Iɗo yɨ majɨɔ, inu ɓombi ngiɓa ni꞉nye danga nadɨndɨ nʉ Asʉɓɨɨ, nʉ inu ngiɓa ni꞉nye tinene nayɔ nadɨndɨ.

¹⁸ Ʉna tɔ, ya tʉkʉ aka ekoo Klisito iya isu kʉ ɓuɓomu, yiɓio Ɓayuda kʉndʉ ɓombi ngiɓa ɓambʉkɔmʉ Ɓayuda, ka꞊kwanana kʉmaa apɛɛ ʉ Asʉɓɨɨ Tidoo tʉkʉ 'upi akʉ 'Ʉtʉma mungono nguʉnanɨ.

¹⁹ Kʉ ɓwanɨ, inu ɓombi ngiɓa nambʉkɔmʉ Ɓayuda, nambʉkɔmʉ tii ɓata ɓɛɛka gʉ ɓɔ na ɓombi ngiɓa ɓa꞉ʉngwa akʉ ɨkʉmbʉ yɛmɔ. Ɨkyɛmɨngana, ɨtakɨ‑takɨ ngiakɛ na tiga ɓana ɓʉ Asʉɓɨɨ nʉ na tiga ɓombi ɓʉ ndiba wʉ Asʉɓɨɨ.

²⁰ Inu na kʉndʉ ɨkáa ngia ɓa꞉ɨtɨa ekoo 'ʉkʉpa wʉ mukopi ngua wa ɓatitima nʉ lɨgbɛ. Nʉ Yeso Klisito ɛyɔ makʉɔngɔ a ikopi ngia yɛɛ ɨja yɛngɔ iya yɨ ambamba.

²¹ Kingono, ya aka ekoo jubunio nʉ ɔɔ Klisito iya ɨkáa kʉ iɓomu ya‑ɔɔ ɨmaɨ iɗo nʉ kʉnɨtanaka tiga kuɓio ɨkáa yɛɛ tu yɨ Makʉʉɓɨɨ.

²² Amati ʉ jubunio nʉ ɔɔ Klisito, inu ɨzɔ nʉ ɓombi nga ɓɔmɔ kʉ ɓuɓomu na꞉ka tiga ɨkyɛmɛ yɨ kuu yɛɛ tɨɛ ɨkáa ngiinanɨ. Ɨkáa yɛngɔ iiya Asʉɓɨɨ aakyɨa amati ɔngɔ 'upi akʉ 'Ʉtʉma.