Ɓakɔlɔsai 4 - Agɔmɔ ngia wʉ Ɨtakɨ-takɨ

Ɓio nʉ ʉɓɨɨ ngua waanzo Asʉɓɨɨ ɨgyagya

¹ Inu ɓakʉ ɓʉ ɓabayo, kyɨeni ɓabayo ɓʉndɛnʉ moni tʉkʉ akʉ ɓʉngbingbii nʉ ngbanga ngbanga. Pimiseni kusigo ɓɔ inu na kʉ nʉ Makʉʉndɛnʉ iya a ekoo ʉ ɓisi.

² Ati ngia naɓio‑ɔɔ kʉta Asʉɓɨɨ, teni akʉ ɓʉngbingbii, nʉ ɓieni mesu ɓʉ gbɛ ekoo ɔngɔ, nambuɓio tʉkʉ kutuisio Asʉɓɨɨ ɨbɨba.

³ Ɓieni nisu kʉtɨa Asʉɓɨɨ ambʉ ʉtɨganɨa ɨngbaa akʉ kakwanana‑ɔɔ kʉɓɨakɨa ididi yɨ Ɨsaʉ ngiangɔ, nʉ kʉngakɨa ɓombi moni kɔɔ mʉmbangɛ ngika kʉ Klisito. Ya aka ekoo ʉ moni ngikʉnanɨ iya ma‑ɔɔ 'ʉfanɨɛ akʉ boloko.

⁴ Natɨeni tɨaa ambʉ mʉɓɨakɨa inyi yengo yambʉkɔnɨɔ iɗo tʉkʉ ndʉ akʉ yɨkwanana‑ɔɔ.

⁵ Ɓieni nʉ 'ʉtʉma wɔɔ pimise moni ati ngia naɓio‑ɔɔ nʉ ɓombi ngiɓa ɓambʉbayakɔmʉ. Wati kʉ uɓomu akʉ nanyɨa‑ɔɔ nʉ mwanʉ ɨhɔɨ, nambʉɓɨakɨa ɨsaʉ ngiinanɨ tʉkʉ ndʉ akʉ yɨkwanana‑ɔɔ.

⁶ Moni ngika na꞊yaka kuɓio wati kʉ uɓomu muɗo nʉ tɨpɨ, ambʉ tuisieni mombi kʉ uɓomu moni tʉkʉ ndʉ akʉ yɨkwanana‑ɔɔ.

⁷ Masaʉ nga kʉsɛmɛ kʉ muɓomu na꞊kʉkɔ tii tʉkʉ nʉ Tikiko. Ɛyɔ a ayoo ʉndɛsʉ wʉ ɓʉkʉnda iya kaakyɨa naɓɔ kuu, nʉ a mombi ɔɔ ngbingbii amati ʉ kyananakɨa Makʉʉɓɨɨ.

⁸ Mʉnɨtʉmɨa ɛyɔ na andɛnʉ aka ekoo ngia ɓɔ keni masaʉ kʉndɛsʉ nayɔ kʉmbɨa ɓɔ ka tanɨ, nʉ ninu kunzo igue‑gue.

⁹ Mʉ꞉ɓʉtʉma ɨzɔ nʉ Onisimo iya a ayoo ʉndɛsʉ wʉ ɓʉkʉnda iya aakyɨa kuu ngbingbii, nʉ a kʉ mʉngana ʉndɛnʉ. Ɛɓɔ ɓa꞊nɨɓɨa masaʉ kʉ muɓomu ngika ka yeni.

¹⁰ Alɨsɨtalakɔ iya kanayɔ ya akʉ boloko u꞉niɓukuo kʉ ɓukuoo, nʉ Malɨkɔ mwana ʉ manye ʉ Balanaba, iya ɓa꞉nititio ɨsaʉ ekoo angɔ ɓɔ ndʉ abi na andɛnʉ mujananieni jananɨaa.

¹¹ Yeso ngia ɓaamusoko yɛmɔ ɓɔ Yusito u꞉niɓukuo kʉ ɓukuoo. Tʉkʉ ɓugue ɓaatʉ ngiɓʉnanɨ ati ʉ ɓaklisito ngiɓa ɓa Ɓayuda ɓɔngɔ ɓakʉkyɨa kuu izi mɨngana nɛmɛ kʉɓɨakɨa Ɨsaʉ yɨ Ɓʉngama ɓʉ Asʉɓɨɨ. Ɛɓɔ ɓa꞉natʉngbʉa pongo nadɨndɨ.

¹² Epafala iya akʉ mʉngana ʉndɛnʉ u꞉niɓukuo kʉ ɓukuoo. Ɛyɔ ngia a mombi ʉ kuu wʉ Yeso Klisito aninu tʉkʉ kʉtɨa Asʉɓɨɨ nʉ kɛkɛɛ, kusigo ɓɔ sɨnganakeni kuɓio ɓʉmaɨ ɓʉ ngbɔmʉ, nʉ ɓieni ɓʉkwananakɛ amati ʉ baya. Ɓieni ɓʉndanɛ kʉkyɨa ɓʉkʉnda ɓʉ Asʉɓɨɨ amati ʉ lɨngbaa lʉ moni kʉ liɓomu.

¹³ Mʉkwanana nayɔ kʉchwa uduɓa wɔɔ uɗo ɓɔ akunzono angu kingono ekoo ʉndɛnʉ nʉ ɓakpataka ngiɓa ɓa anʉ Laodikia nʉ Eyelapoli.

¹⁴ Luka, adii ʉndɛsʉ wʉ ɓʉkʉnda, iya a mʉnganga uniɓukuo kʉ ɓukuoo, nʉ Dɛma kʉtaa.

¹⁵ Mu꞉ɓukuo ɓayoo ngiɓa ɓa anʉ Laodikia nʉ ayoo ʉndɛsʉ Nifa kʉ ɓukuoo, nʉ kanisa ngia a andɔngɔ ambɛnɨ kʉtaa.

¹⁶ Ndʉ ɓa꞊popoko ʉbalʉa nguʉsɛmɛ akɛ, ɓaisieni ɓombi ɓʉ kanisa ʉ Laodikia kʉ ɓaisioo. Inu popokeni ʉbalʉa ngua wa꞉ʉngwa anʉ Laodikia kʉ popokoo.

¹⁷ Sigio Alakipo ɓɔ: « Ɓoto kuu ngia Makʉʉɓɨɨ a꞉nanzo ɓʉmʉ nʉ ʉɨkyananakɨa iɗo nadɨndɨ. »

¹⁸ Ɛmɛ Pɔlɔ muniɓukuo kʉ ɓukuoo. Mʉ꞉tɨndakɨa ʉbalʉa nguakɛ tʉkʉ nʉ likɔndɔ ngilʉsɛmɛ. Nɔɔpaakɔmʉ ɓɔ ma tʉkʉ akʉ boloko. Ɨjɨɔ ngia yɨ Makʉʉɓɨɨ yiɓio ɨzɔ ninu.