Ɓakɔlɔsai 3 - Agɔmɔ ngia wʉ Ɨtakɨ-takɨ

¹ Jʉ na꞉jʉkana akʉ ingyo ɨzɔ nʉ ɔɔ Klisito, hateni tɔ tiga kumbo ngia a ekoo ʉ ɓisi, akʉ Klisito a‑ɛɛ 'uwei akʉ ɨkɔndɔ yɨ guɔngɔ ngia yɨ Asʉɓɨɨ.

² Napɨeni mɨtʉma ngiindɛnʉ ekoo ʉ kumbo ngia a ekoo ʉ ɓisi, chʉkɔmʉ ekoo ʉ kumbo ngia a ya akʉ ɨtaka.

³ Jʉ na꞉wu woo nʉ ʉɓɨɨ nguʉndɛnʉ wa tiga ʉnayɛ ɨzɔ nʉ ɔɔ Klisito amati ʉ Asʉɓɨɨ.

⁴ Ati ngia Klisito a꞊ɓwanɨa‑ɔɔ ɛyɔ ngia a ʉɓɨɨ wʉndɛsʉ gbagba, inu na꞊ɓwanɨa tiga ɨzɔ nayɔ amati ʉ imbangumba ngiangɔ kʉ ɓwanɨaa.

Ʉɓɨɨ wʉ ɨtakɨ‑takɨ ɨzɔ nʉ ɔɔ Klisito

⁵ Tiga kʉ ɓwanɨ, weni taa yɨ ndʉtʉ yɨ ɨtaka ngia ya amati ʉndɛnʉ, ndʉ kɨnda nʉ ɓoi gʉ ɓɔ nʉ ɓugue kʉ gbaɨ, moni kʉ 'ʉsʉgʉ, taa yɨ ndʉtʉ yɛɛ ɓɨɓɨ, imi yɛɛ ɓɨɓɨ, iya ya ngbanga ndʉ bibiso ɓamʉngʉ ɓʉ yakanaka.

⁶ Ya aka ekoo ikanzi yɨ ɓamoni ngiɓʉnanɨ iya 'ʉnganga wʉ Asʉɓɨɨ wa꞊ka‑ɔɔ ekoo ʉ ɓombi ngiɓa ɓaaɗɨa ʉpanʉ nguangɔ.

⁷ Jɛnɛ pɛɛ inu ni꞉nye kyɨa kʉkpata ɓamoni ngiɓʉnanɨ kʉ ɓwanɨ ati ngia ni꞉nye‑ɔɔ amati ʉ ɓʉɓɨɓɨ ngiɓʉnaa.

⁸ Tiga ɨtakɨ‑takɨ ngia, sieni lɨngbaa lʉ moni ngilakɛ kʉ liɓomu, ndʉ 'ʉnganga, punonoko, ɓʉkaɨ, zɨzanaka, nʉ yaka moni kʉ soni ngika kakwanana kʉɓʉa akʉ moni ngikʉndɛnʉ.

⁹ Nɔɔɓio nʉ pɨtanaka ati ʉndɛnʉ, jʉ na꞉ungwiso mombi ngia wʉ jɛnɛ ungwisoo nʉ ɨkyananakɨa ngiangɔ kʉtaa.

¹⁰ Na꞉pɨnya tiga mombi ʉ ɨtakɨ‑takɨ, jʉ na tiga ɓombi ɓʉ ɨtakɨ‑takɨ, iɓa Asʉɓɨɨ wati kʉ uɓomu aninu kunicho kuɓio isisinio ngiangɔ aka ekoo ngia ɓɔ mupimiseni kingono.

¹¹ Kʉ ɓwanɨ, yambʉkʉ tii nʉ 'Ugiliki, gʉ ɓɔ 'Uyuda, gʉ ɓɔ mombi ngia ɓa꞉mʉtɨna ganza gʉ ɓɔ ɓa꞉mʉtɨnakɔmʉ, mubika gʉ ɓɔ ɓasenzi, gʉ ɓɔ bayo, gʉ ɓɔ mombi ɔɔ 'uɓununikie, ɨkyɛmɨngana Klisito ʉ꞉mʉma moni kʉ muɓomu, nʉ a amati ʉ ɓombi kʉ ɓuɓomu.

¹² Kʉ ɓwanɨ, inu ɓombi ngiɓa Asʉɓɨɨ a꞉nɨchwa, nʉ ɓombi ɓɔɔ ɓʉjaɓanakɨɛ nʉ ɓɔɔ ɓʉkʉndanise, ɓieni nʉ 'ʉtʉma wɔɔ nɨɛ ɓangɛ ikoko, 'ʉtʉma wɔɔ uɗo, 'ʉtʉma wɔɔ ijisinise nɨsɨ, 'ʉtʉma wʉ ɨjɨɔ, nʉ 'ʉtʉma wɔɔ ʉta.

¹³ Fuɓuoneni lɨngbaa lʉ moni ati ʉndɛnʉ. Mombi inyeni nʉ 'ʉkɔmbɔ nʉ mangɛ, pɨaneni ati ʉndɛnʉ kʉndʉ Makʉʉɓɨɨ a꞉nɨpɨa inu.

¹⁴ Nadɨndɨ aka ekoo moni ngikʉnanɨ, ɓieni nʉ ɓʉkʉnda, iɓa ɓaanijubuniso kuɓio ɨzɔ nʉ kuɓio 'ʉtʉma mungono.

¹⁵ Majɨɔ kʉ Klisito kuɓio amati ʉndɛnʉ jʉ ya aka ekoo majɨɔ ngikʉnanɨ iya Asʉɓɨɨ a꞉nisoko‑ɔɔ, jʉ na ɨkyɛmɛ mɨngana. Ɓieni ɓombi ɓɔɔ ɓutuise ɨbɨba wati kʉ uɓomu.

¹⁶ Ɨsaʉ yɨ Klisito yiɓio ɨja amati wʉ ʉɓɨɨ nguʉndɛnʉ nʉ ɨjangɨa yɛngɔ kʉ iɓomu. Ɓieni kʉpanɨana ati ʉndɛnʉ nʉ nzono igue‑gue nʉ 'ʉtʉma wɔɔ pimise moni kʉ uɓomu. Ɓieni kʉsʉsanakɨa Asʉɓɨɨ nʉ mʉmbɔ, nʉ sʉa lɨta amati ʉ mɨtʉma ngiindɛnʉ ila 'Ʉtʉma wɔɔ Tu wakutitio nayɔ kutuisio ɨbɨba.

¹⁷ Amati ʉ lɨngbaa lʉ moni kʉ liɓomu ngila naɓio kʉkyɨa engo, amati ʉ yaka nʉ ɨkyananakɨa, kyɨeni tʉkʉ akʉ ino yɨ Makʉʉɓɨɨ Yeso. Aka ekoo ʉ angɔ na꞊kwanana kutuisio Asʉɓɨɨ Tidoo ɨbɨba.

Ʉɓɨɨ wʉ ɨtakɨ‑takɨ ngua wʉ ɓombi ɓʉ Asʉɓɨɨ

¹⁸ Inu ɓoi, keni ɓugue ɓʉndɛnʉ kʉndʉ yɨkwanana kʉkyɨa apɛɛ ʉ Makʉʉɓɨɨ.

¹⁹ Inu ɓugue, kʉndeni ɓoi ɓʉndɛnʉ, chʉkɔmʉ naɓio naɓɔ kʉnyakɨa.

²⁰ Inu ɓana, keni ɓatɔ nʉ ɓanʉ ɓʉndɛnʉ akʉ lɨngbaa lʉ moni kʉ liɓomu, jʉ iinanɨ ya iɗo akʉ mesu kʉ Makʉʉɓɨɨ.

²¹ Inu ɓatidoo, nɔɔjijokokɔmʉ ɓana ɓʉndɛnʉ ambʉ ɓɔɔtɨnakɔmʉ ngandai.

²² Inu ɓabayo, keni ɓakɔɓʉndɛnʉ ɓʉ ɨtaka, amati ʉ lɨngbaa lʉ moni kʉ liɓomu. Ɓʉkyananakɨeni kyananakɨaa, chʉkɔmʉ jʉ ɓaninu kʉkpɨma kʉ tine tine ndʉgʉ nakʉhata ɓɔ nʉkataa ɓombi, ɨkyɛmɨngana ɓieni naɓɔ kʉkyananakɨa tʉkʉ nʉ 'ʉtʉma wɔɔ ijisinise nɨsɨ ndʉ nakʉkyananakɨa Makʉʉɓɨɨ.

²³ Ɓieni kʉkyɨa kuu nʉ 'ʉtʉma wɔɔ uɗo ndʉ nakʉkyɨa Makʉʉɓɨɨ chʉkɔmʉ ndʉ nakʉkyɨa mombi ʉ ɨtaka. Mombi ngia nanayɔ kʉkyananakɨa ya Makʉʉndɛsʉ Klisito.

²⁴ Ɓieni kʉmbɨa iɗo ɓɔ na꞊nyɨa nʉ ɨjangɨa ngia ya ʉkʉa nguʉndɛnʉ ekoo ʉ ɓisi. Makʉʉɓɨɨ ngia nanayɔ kʉkyananakɨa ɛyɔ a Klisito.

²⁵ Mombi ngia akʉkyɨa ɓɨɓɨ, a꞊nyɨa kʉ nʉ ʉkʉa wʉ ɓʉɓɨɓɨ, jʉ Asʉɓɨɨ ambakakambomboko ɓombi.