Ɓakɔlɔsai 2 - Agɔmɔ ngia wʉ Ɨtakɨ-takɨ

¹ Makʉkʉnda ɓɔ pimiseni kusigo ɓɔ makʉmana ɗite ɓʉmʉ ekoo ʉndɛnʉ, ekoo ɓombi ɓʉ baya ngiɓa ɓa anʉ Laodikia, nʉ ekoo ɓombi kʉ ɓuɓomu ngiɓa ɓambʉnanakɔmʉ sina.

² Makʉmana tʉkʉ aka ekoo ngia ɓɔ ɓuɓio nʉ 'ʉtʉma wʉ igue‑gue, ɓambuɓio ɨkyɛmɛ mɨngana amati ʉ ɓʉkʉnda. Nʉ nadɨndɨ, ɓambuɓio ɓuhue nʉ mbɨmbanaka yɛɛ pimise moni kingono. Kʉ ɓwanɨ, ɓakwanana kupimiso moni kʉ ɓaɗi kʉ Asʉɓɨɨ ika ka Klisito makʉɔngɔ.

³ Jʉ ɨjangɨa kʉ iɓomu yɨ 'ʉtʉma wɔɔ pimise moni kʉ uɓomu, nʉ mbɨmbanaka kʉ iɓomu ya ɨɓatanɨɛ amati angɔ.

⁴ Mʉ꞉nɨɓɨa moni ngikʉnanɨ aka ekoo ngia ɓɔ mombi gʉkʉ mʉngana ɔɔnɨpɨtakɔmʉ ninu kʉngakɨa moni ngika kaakwisiso ɓombi.

⁵ Abana ndʉ mambʉkɔmʉ ɨzɔ ninu akʉ ndʉtʉ, ɨkyɛmɨngana akʉ 'ʉtʉma ma tʉkʉ ɨzɔ ninu. Manʉ ɨgyagya ninu kʉna kʉkɨndaka akʉ ɓungbingbii, nʉ kuɓio ɓʉmaɨ ɓʉ ngbɔmʉ amati ʉ baya akʉ Klisito.

Kuɓio nʉ ʉɓɨɨ ekoo Yeso Klisito

⁶ Kʉ ɓwanɨ, jʉ nʉbaya Yeso Klisito kuɓio Makʉʉndɛnʉ, sɨnganakeni kuɓio ɓujubunie ɨzɔ nayɔ.

⁷ Faneni mii amati angɔ, ʉɓɨɨ nguʉndɛnʉ kʉ uɓomu wambuɓio tʉkʉ amati angɔ. Ɓieni tʉkʉ ɓʉmaɨ ɓʉ ngbɔmʉ akʉ baya, kʉkpatanakɨa nʉ mapanʉ ngika na꞉nyɨa nakɔ, nʉ ɓieni nʉ 'ʉtʉma wɔɔ tuisie ɨbɨba kingono.

⁸ Kanganɨeni ɓɔ mombi ɔɔnisingokɔmʉ amati ʉ mbɨmbanaka yangɔ yɛɛ pɨtakɛ ɓombi iya ya tʉkʉ ɨsʉkʉɓwanɨ, iya ya ɓamoni ɓʉ ɓombi ɓʉ ɨtaka. Moni ngikʉnanɨ kakʉʉngwanakɨa nʉ ɨkyananakɨa yɨ ɓombi, nʉ mapanʉ ngika ɓombi ɓʉ ɨtaka ɓa꞉kʉnapɨa, chʉkɔmʉ nʉ Klisito.

⁹ Jʉ ɛyɔ Asʉɓɨɨ mambɨnyɔngɔ a꞉nɨtanaka mombi amati ʉ Klisito, nʉ a 'uhue amati angɔ.

¹⁰ Nʉ na꞉nyɨa nʉ moni kʉ muɓomu amati angɔ, ɛyɔ ngia a ngama ʉ ɓangama ekoo kumbo kʉ uɓomu.

¹¹ Tiga ɓata, ya aka ekoo ɓio nʉ ɓayo nayɔ iya na꞉tiniso‑ɔɔ ganza. Chʉkɔmʉ ganza ngia ɓombi ɓaatɨna. Ɨkyɛmɨngana, ya ganza ngia akʉʉngwa akʉ Klisito, iya aatiɓwanakiso akʉ ndʉtʉ ngiindɛsʉ yɨ ɓʉɓɨɓɨ.

¹² Kʉ ɓwanɨ, ati ngia ɓa꞉niɓatiso‑ɔɔ, yi꞉nye kʉpananiso ɓɔ ɓa꞉nɨhʉna ɨzɔ nʉ ɔɔ Klisito, nambʉɓʉa akʉ ɓʉnzaʉ kʉ ɨzɔ nayɔ, jʉ na꞉baya akʉ angu wʉ Asʉɓɨɨ ngia a꞉mʉjʉkaniso ati ʉ mɨnda.

¹³ Aka ekoo ɓʉɓɨɓɨ ngiɓʉndɛnʉ, mɨtʉma ngiindɛnʉ yi꞉nye yiweni woo, jʉ ni꞉nye nambutinisenikɔmʉ ganza, nʉ ni꞉nye‑zʉ kʉ ɓombi ngiɓa nambikinye Ɓayuda. Ɨkyɛmɨngana, ɨtakɨ‑takɨ ngiakɛ Asʉɓɨɨ a꞉tuiso ʉɓɨɨ amati ʉndɛnʉ kʉtɔ kuɓio kʉkʉʉ ɨzɔ nʉ ɔɔ Klisito. A꞉tɨpɨa ɓʉɓɨɓɨ ngiɓʉndɛsʉ kʉ ɓuɓomu.

¹⁴ A꞉imo ʉbalʉa wʉ mabɨngɨa ngua wi꞉nye nisu kʉchʉngɨa jʉ kambikinye kʉkyananakɨa mapanʉ. A꞉imo ʉbalʉa nguʉnanɨ ɨngbaa nayɔ kʉɓakaka ekoo ʉ mʉsalaba.

¹⁵ Iiya Asʉɓɨɨ a꞉pipo‑ɔɔ angu ngia wʉ ɓaginda, nʉ wʉ ɓangama, ambuɓunziso soni akʉ ɓʉmba, nʉ naɓɔ kʉkɨndakiso ndʉ ɓombi ɓʉ boloko ngiɓa ɓaaɓʉfa akʉ ɗite amati ʉ 'ʉkalamba wɔɔ ɓunde ɗite ngua wʉ Mwana angɔ.

¹⁶ Kʉ ɓwanɨ, mombi ɔɔnɨnapɨakɔmʉ nʉ 'ʉkɔmbɔ ekoo ʉ moni kʉ idyo, gʉ ɓɔ ekoo ʉ mwakanaka, yɛmɔ ɓɔ ekoo ʉ tiniso ʉmbɔ, gʉ ɓɔ tiniso ʉmbɔ aka uyi waaɓʉa‑ɔɔ, gʉ ɓɔ akʉ ɓisi ɓʉ humuo.

¹⁷ Moni ngikʉnanɨ kʉ muɓomu ka tʉkʉ isisinio yɨ moni ngika ka꞊kwanana kʉka, ɨkyɛmɨngana ingono yɨ moni kʉ muɓomu ya tʉkʉ Klisito.

¹⁸ Nɔɔbayakɔmʉ mombi gʉkʉ mʉngana iya aanana ndʉ a mombi ɔɔ ijisinise nɨsɨ, nʉ yɛmɔ ɓɔ aabibiso ɓamalaika ninu kʉhɨnɨa ɨkyɛmɛ yɨ ɨjangɨa ngia nanayɔ. Ikanzi yɨ ɓombi ngiɓʉnanɨ ɓaanapɨa 'ʉtʉma akʉ ɨkyɛmɛ ngia ɓaana ndʉ ʉtakanaka, nʉ itungwio yɨ pɨtanaka ngia yɨ ɨtaka yaaɓunzo 'ʉtʉma wɔɔ ʉja.

¹⁹ Mombi ngiinanɨ ambakaɓotono nʉ Klisito iya a 'ʉtʉ wʉ ndʉtʉ. Ʉna tɔ, ya aka ekoo ʉ Klisito iya ndʉtʉ kʉ iɓomu ya‑ɔɔ kʉdyakaka iɗo nʉ kʉngakanakɨa izi mɨngana 'upi akʉ manganakɨa nʉ lɨsɨgɨ‑sɨgɨ lɔngɔ, nʉ kuyokoko kʉkpatanakɨa nʉ ɓʉkʉnda ɓʉ Asʉɓɨɨ.

Mombi ngia ambakaɓotono nʉ Klisito

²⁰ Inu na꞉wo ɨzɔ nʉ ɔɔ Klisito nʉ ɓa꞉niɓwanakiso ɓɔ nɔɔɓio tii ɓata kʉkpata angu wʉ ɓamoni ɓʉ ɓombi ɓʉ ɨtaka. Jʉtanɨ ʉɓɨɨ nguʉndɛnʉ wa ɓata ngbanga kʉ nʉ uwa wʉ ɓombi ɓʉ ɨtaka kʉkpata ikanzi yɨ mapanʉ ngika kakusigo ɓɔ:

²¹ « Wɔɔchɨkakɔmʉ! », « Wɔɔkanakɔmʉ! », « Wɔɔɓotokɔmʉ! »

²² Mapanʉ ngikʉnanɨ ka tʉkʉ ika ndʉ ɓaakʉkyananakɨa mbise ɔngɔ kambʉɓaa tʉkʉ gagaa. Mapanʉ ngikʉnanɨ kʉ muɓomu ka tʉkʉ kʉ ɨtaka ika ɓaatitio kʉkyɨa engo nʉ mapanʉ kʉ ɓombi.

²³ Ʉpanʉ nguʉnanɨ waanyɨa ndʉ wa moni kʉ 'ʉtʉma wɔɔ pimise moni, jʉ waata moni kʉ bibiso ɨtanda yɨ ɓombi kʉkpataka ɨkyananakɨa yɨ ɓombi. Nʉ iya yaanziso 'ʉtʉma wɔɔ ijisinise nɨsɨ nguʉndaɓʉ nʉ kyananaka ndʉtʉ ngiindaɓʉ ɓakʉɓɔngɔ ɓʉmbʉmʉ. Ɨkyɛmɨngana, moni ngikʉnanɨ kʉ muɓomu ka tʉkʉ ɨsʉkʉɓwanɨ, jʉ kambʉkɔmʉ ikanzi ngia kakwanana nangyo taa yɨ ndʉtʉ.