Ɓafilipo 4 - Agɔmɔ ngia wʉ Ɨtakɨ-takɨ

Pɔlɔ akunzo mapanʉ kʉ di di di

¹ Kʉ ɓwanɨ, inu ɓayoo ɓʉsɛmɛ ɓʉ ɓʉkʉnda, makʉtananɨa nadɨndɨ ɓɔ ambʉ mʉnɨna gɔ‑zʉ ɓata tʉkʉnaa, jʉ inu na ɨgyagya ngiisɛmɛ nʉ na ɨgaɨ yɨ ɓʉngama ngiisɛmɛ. Kʉ ɓwanɨ, inu ɓayoo ɓʉ ɓʉkʉnda, mʉ꞉nɨta ɓɔ ɓieni tʉkʉ ɓʉmaɨ ɓʉ ngbɔmʉ amati jubunio ngiindɛnʉ nʉ ɔɔ Makʉʉɓɨɨ.

² Ɔwɛ Ewodia nʉ ɔwɛ Sitike, maninu kukikilikio ɓɔ ɓieni tʉkʉ 'ʉtʉma mungono apɛɛ ʉ Makʉʉɓɨɨ.

³ Abana ɔwɛ adii asɛmɛ ɔɔ bayanɨɛ iya wakʉkyɨa kuu ɨzɔ nɛmɛ, manɔwɛ kʉta ɓɔ salɨa ɓoi ngiɓa, jʉ ɛɓɔ ɓa꞉mana ɗite izi mɨngana nɛmɛ aka ekoo ɓɨakɨa Ɨsaʉ yɛɛ Iɗo. Abana kʉndʉ Kelema nʉ ɓombi nga ɓɔmɔ iɓa ɓa꞉kyɨa kuu ɨzɔ nɛmɛ iɓa muno kʉndaɓʉ ka amati ʉ ɨtaɓʉ yɨ ʉɓɨɨ.

⁴ Ɓieni tʉkʉ nʉ ɨgyagya makwaa kʉ muɓomu amati ʉ jubunio ngiindɛnʉ nʉ ɔɔ Makʉʉɓɨɨ, mutuisio ɓata kusigo ɓɔ ɓieni tʉkʉ nʉ ɨgyagya.

⁵ Ɓʉkatanɛ ngiɓʉndɛnʉ ɓʉmbɨanɨa nʉ ɓombi kʉ ɓuɓomu. Makʉʉɓɨɨ a꞊tʉa kʉ ɨtakɨ‑takɨ.

⁶ Nɔɔdyakɔmʉ ɓatanga ekoo ʉ ɨngbaa yɨ moni gʉkʉ mɨngana, ɨkyɛmɨngana akʉ lɨngbaa lʉ moni kʉ liɓomu teni Asʉɓɨɨ kumbo ngia nanʉ taa yengo, nʉ kikilikio nʉ nayɔ kutuisio ɨbɨba.

⁷ Nʉ majɨɔ kʉ Asʉɓɨɨ ika kʉɓaa mbɨmbanaka yɨ ɓombi kʉ ɓuɓomu, ka꞊pɨmakɨa mɨtʉma ngiindɛnʉ nʉ itungwio ngiindɛnʉ amati ʉ Yeso Klisito.

⁸ Tiga kupipio, inu ɓayoo, nʉkwanana kʉnapɨa 'ʉtʉma akʉ moni kʉ muɓomu ngika kingono, kʉ ɨbɨba, kɔɔ ngbingbii, kɔɔ mʉjaɓanakɨɛ, kɔɔ mʉkataɛ, nʉ kʉbaya, moni kʉ muɓomu ngika kɔɔ muɗo ika ɓʉkwanana‑ɔɔ nɔwɛ kʉbɨba ekoo ɔngɔ.

⁹ Kyɨeni tʉkʉ moni ngika ma꞉nɨpanɨa, moni kʉ muɓomu ngika na꞉nyɨa na꞉kɔ kʉʉngwa andɛmɛ, nʉ ika na꞉kɔ nɛmɛ, nʉ na꞉na amati asɛmɛ. Nʉ kija Asʉɓɨɨ ngia aanzo majɨɔ aɓio tiga ɨzɔ ninu.

Pɔlɔ akutuisio ɨbɨba ekoo ʉ ɓakiɓio

¹⁰ Ma꞉kwa pongo ɨgyagya nadɨndɨ amati ʉ Makʉʉɓɨɨ, jʉ ɨtakɨ‑takɨ ngiakɛ na ɓata tʉkʉ nɛmɛ kutunguo kʉndʉ ni꞉nye natunguo pongo pɛɛ, ɨkyɛmɨngana chʉkɔmʉ nambʉnyɨa nɨngbaa ngia napananiso‑ɔɔ ɓɔ nanɛmɛ kuwununikio.

¹¹ Makʉyaka ɓwanɨ chʉkɔmʉ jʉ mʉnangyɨa ɨkyɛmɛ, tʉkʉ jʉ ɛmɛ maambɨana nʉ kwa ɨgyagya tʉkʉ nʉ ɨkyɛmɛ ngia maɓio nayɔ.

¹² Ɛmɛ maambɨana nʉ ʉɓɨɨ wʉ ɓanangyɨa, kʉndʉ ʉwa wʉ ɨjangɨa. Ati kʉ uɓomu nʉ akʉ lɨngbaa lʉ moni kʉ liɓomu, maambɨana kuɓio nʉ ihutu kʉndʉ kuɓio nʉ taa, maambɨana kuɓio amati ʉ ɨngama kʉndʉ kuɓio amati ʉ ɓanangyɨa.

¹³ Maakwanana kʉkyɨa moni kʉ muɓomu 'upi akʉ Klisito ngia aananzo angu.

¹⁴ Ʉna tɔ, na꞉kyɨa pongo iɗo inu kujubunio ɨzɔ nɛmɛ amati ʉ ɓʉka‑ɓʉkaɨ ngiɓʉsɛmɛ.

¹⁵ Inu Ɓafilipo, nakʉmbɨa inu ɓakʉɓɔngɔ iɗo ɓɔ ati ngia ma'ʉngwa‑ɔɔ akʉ gɨpa ʉ Makedonia akʉ wati ngua ɓa꞉faniso‑ɔɔ ɓɨakɨa Ɨsaʉ yɛɛ Iɗo, kanisa wɔmɔ gʉkʉ mʉngana a꞉nasalɨakɔmʉ, tʉkʉ inu na꞉nasalɨa akʉ nyɨanaka nʉ kʉanaka ngiisɛmɛ.

¹⁶ Kʉndʉ ati ngia mi꞉nye‑ɔɔ akʉ gʉlʉ ʉ Tesalonika, na꞉natʉmɨa ɓakiɓio nisi maja nɛmɛ kʉsalɨa amati ʉ ɓanangyɨa ngiɓʉsɛmɛ.

¹⁷ Yambʉkɔmʉ kusigo ɓɔ makʉhata kʉnyɨa nʉ apɛpɛ kʉʉngwa akʉ lɨkɔndɔ lʉndɛnʉ, ɨkyɛmɨngana makʉkʉnda ɓɔ inu nyɨeni nʉ dada aka ekoo iɗo ngiindɛnʉ.

¹⁸ Kingono ma tiga nʉ kumbo kʉ uɓomu ngia manʉ taa yengo nʉ ʉja tiga nadɨndɨ. Apɛpɛ ngia na꞉natʉmɨa pongo nʉ Epafolodito a꞉nanzo pongo ɛyɔ tʉkʉ kʉ 'uɓomu. Apɛpɛ ngiinanɨ a wʉ imbo yɛɛ tɨpɨ, nʉ a 'ʉtʉmbɨa ngua Asʉɓɨɨ aaʉbaya, nʉ uwa waamʉkataa.

¹⁹ Kʉ ɓwanɨ, Asʉɓɨɨ ngiasɛmɛ iya anʉ kumbo wʉ ɨbɨba ʉja, a꞊ninzo kumbo kʉ uɓomu ngia naɓio nʉ taa yengo upi akʉ Yeso Klisito.

²⁰ Ɨbɨba akʉ Asʉɓɨɨ Tidoo ngiʉndɛsʉ akʉ mɨtʉ yɨ ɨpá nʉ mɨtʉ yɨ ɨpá. Ya ɓwanɨ.

Ɓukuo ngia yɨ 'upipio

²¹ Muɓukuo ɓombi ɓʉ Asʉɓɨɨ kʉ ɓuɓomu ngiɓa ɓa꞉baya Yeso Klisito. Ɓayoo ngiɓa ɓa izi mɨngana nɛmɛ aka ɓɔmʉ ɓuniɓukuo kʉ ɓukuoo.

²² Ɓombi ɓʉ Asʉɓɨɨ kʉ ɓuɓomu ngiɓa ɓa yeni ɓuniɓukuo kʉ ɓukuoo, nadɨndɨ iɓa ɓa akʉ ɨkáa yɨ ngama ɔɔ ʉja wʉ Ɓalɔma.

²³ Ɨjɨɔ yɨ Makʉʉɓɨɨ Yeso Klisito yiɓio ɨzɔ ninu kʉ ɓuɓomu.