Ɓafilipo 1 - Agɔmɔ ngia wʉ Ɨtakɨ-takɨ

Ɓukuo

¹ Ɛmɛ Pɔlɔ nʉ Timɔtɛɔ, isu ɓabayo ɓʉ Yeso Klisito, kakʉtɨndakɨa ɓombi ɓɔɔ ɓʉjaɓanakɨɛ amati ʉ Yeso Klisito iɓa ɓa anʉ Filipi ʉbalʉa nguakɛ ɨzɔ nʉ ɓʉkʉʉ ɓʉ kanisa nʉ ɓadiakɛlɛ.

² Asʉɓɨɨ Tidoo ngiʉndɛsʉ nʉ Makʉʉɓɨɨ Yeso Klisito uninzo ɨjɨɔ nʉ majɨɔ.

Pɔlɔ akʉtɨa Ɓaklisito ɓʉ Filipi

³ Maatiisio Asʉɓɨɨ ngiasɛmɛ ɨbɨba ati kʉ 'uɓomu iya maanitunguo‑ɔɔ.

⁴ Ati kʉ 'uɓomu iya maakyɨa‑ɔɔ kʉta Asʉɓɨɨ, maanɨtɨa inu kʉ ɓuɓomu tʉkʉ nʉ ɨgyagya,

⁵ aka ekoo ngia na꞉natʉngbʉa‑ɔɔ akʉ kuu yɛɛ ɓɨakɨɛ Ɨsaʉ yɛɛ Iɗo kʉʉngwa tʉkʉ isiya ka꞉kpanga‑ɔɔ kʉɓʉya kʉndʉ ɓʉɓʉnɨ.

⁶ Makʉmbɨa iɗo ɓɔ Asʉɓɨɨ ngia a꞉faniso kuu yɛɛ iɗo ngiinanɨ amati ʉndɛnʉ, a꞊sɨnganaka nayɔ kʉɓʉya tʉkʉ akʉ miɓo isiya Yeso Klisito a꞊tʉa‑ɔɔ.

⁷ Mʉkwanana ɓɔ munitunguo inu kʉ ɓuɓomu tʉkʉ ndʉ ananɨ, jʉ na tʉkʉ akʉ 'ʉtʉma nguʉsɛmɛ. Inu kʉ ɓuɓomu kʉndʉ ɛmɛ ka꞉nyɨa nʉ ɨjɨɔ tʉkʉ mɨngana ngia Asʉɓɨɨ a꞉tinzo kʉkyɨa kuu yɛɛ ɓɨakɨɛ Ɨsaʉ yɛɛ Iɗo, nʉ nayɔ kʉmaya, abana kʉndʉ ati ngia ma‑ɔɔ ɨtakɨ‑takɨ ngiakɛ akʉ boloko, kʉndʉ ati ngia mi꞉nye‑ɔɔ 'uɓununikie.

⁸ Asʉɓɨɨ a tɛmʉ asɛmɛ kusigo ɓɔ maanɨkʉnda inu kʉ ɓuɓomu nʉ 'ʉtʉma nguʉsɛmɛ kʉ uɓomu nʉ ɓʉkʉnda ngiɓa ɓʉ Yeso Klisito.

⁹ Nɨta ngiisɛmɛ ya ɓɔ ɓʉkʉnda ngiɓʉndɛnʉ ɓʉsɨnganaka tʉkʉ nʉpɛɛ amati ʉ mbɨmbanaka ngia yɨ ingono nʉ pimiso moni muɗo,

¹⁰ ambʉ ɓieni tʉkʉ ɓombi ɓɔɔ ɓʉkanganakɨɛ moni ngika kɔɔ muɗo. Kʉ ɓwanɨ, naɓio ɓombi ɓɔɔ ɓʉjaɓanakɨɛ, chʉkɔmʉ nambuɓio nʉ ɓʉɓɨɓɨ gʉkʉ mʉngana akʉ ɓisi ngiɓa Klisito a꞊tʉa sina‑ɔɔ.

¹¹ Ʉɓɨɨ nguʉndɛnʉ wa꞊huo nʉ ɨkyananakɨa yɛɛ ngbingbii ngia Yeso Klisito a꞊ninzo aka ekoo imbangumba nʉ ɨbɨba ngia yɨ Asʉɓɨɨ.

Pɔlɔ ʉsɨnganaka kʉɓɨakɨa Ɨsaʉ yɛɛ Iɗo akʉ Boloko

¹² Inu ɓayoo, makʉkʉnda ɓɔ pimiseni ɓɔ moni ngika ka꞉nagbʉka pongo ka꞉salɨa kʉsɨnganiso Ɨsaʉ yɛɛ Iɗo nʉpɛɛ.

¹³ Kʉ ɓwanɨ, ɓombi kʉ ɓuɓomu ngiɓa ɓa amati ʉ basa ngia wʉ ngama nʉ ɓombi nga ɓɔmɔ kʉ ɓuɓomu ɓakʉmbɨa ɓɔ ma꞉ʉfanɨɛ akʉ boloko tʉkʉ jʉ makʉkyananakɨa Klisito.

¹⁴ Ati ngia ɓayoo ɓa‑ɔɔ nɛmɛ kʉna 'ʉfanɨɛ akʉ boloko, yakunzo ɓombi ɓaja ati ʉndaɓʉ igue‑gue kʉɓɨakɨa Ɨsaʉ yɨ Asʉɓɨɨ chʉkɔmʉ nʉ ʉɓa.

¹⁵ Ya kingono ɓɔ ɓombi ngana ngana ɓakʉɓɨakɨa Ɨsaʉ yɨ Klisito nʉ imi nʉ ɨwaɨ. Ɨkyɛmɨngana, ɓɔmɔ ɓakʉɓɨakɨa tʉkʉ nʉ itungwio yɛɛ iɗo.

¹⁶ Ɓombi ngiɓʉnanɨ ɓakʉkyɨa kuu nʉ ɓʉkʉnda jʉ ɓakʉmbɨa ɓɔ Asʉɓɨɨ a꞉nʉnapɨa akʉ boloko kʉmaya Ɨsaʉ yɛɛ Iɗo.

¹⁷ Ɓɔmɔ ɓakʉɓɨakɨa Ɨsaʉ yɨ Klisito nʉ ɨwaɨ nʉ itungwio yɛɛ ɓɨɓɨ. Ɓakuyo ɓɔ ɓanɛmɛ kʉmatɨa ɓʉka‑ɓʉkaɨ iɓa ma‑ɔɔ akʉ boloko.

¹⁸ Itungwio ngiinɗaɓʉ yiɓio ɓɨɓɨ kʉndʉ yiɓio iɗo, iinanɨ yambʉkɔmʉ gʉkʉ ɨkyɛmɛ! Ɨsaʉ yɨ Klisito ɓanayɔ tʉkʉ kʉɓɨakɨa, iiya ma‑ɔɔ tʉkʉ kʉkwa ɨgyagya. Nʉ maɓio kʉsɨnganaka nʉ kwa ɨgyagya tʉkʉ nʉpɛɛ,

¹⁹ jʉ makʉmbɨa ɓɔ aka ekoo nɨta ngiindɛnʉ ekoo asɛmɛ, nʉ salɨa ngia yɨ 'Ʉtʉma wʉ Yeso Klisito, ma ɓununikio tiga ɓununikioo.

²⁰ Jʉ moni ngika makusiɓo engo nʉ ika ma‑ɔɔ kʉnapɨa itungwio ekoo ɔngɔ, ka ɓɔ mambʉkʉna soni akʉ ɨngbaa yɨ moni gʉkʉ mɨngana. Ɨkyɛmɨngana, yiɓio kʉndʉ ɨtakɨ‑takɨ ngiakɛ, kʉndʉ akʉ makwaa ngika ka꞊kʉka, manʉ igue‑gue kubibiso Klisito amati ʉ ʉɓɨɨ nguʉsɛmɛ kʉ uɓomu, yiɓio ɓɔ ma kʉkʉʉ, kʉndʉ muwoo.

²¹ Jʉ akʉ ɛmɛ kuɓio kʉkʉʉ ya tʉkʉ kuɓio nʉ Klisito, nʉ ingyo ya andɛmɛ ɨkyɛmɛ yɨ ɨjangɨa.

²² Ɨkyɛmɨngana, ndʉ maɓio kʉkʉʉ, mambuɓio‑zʉ kʉ ikanzi ngia ma꞊kyɨa‑ɔɔ kuu yɨ dada, mambʉkʉmbɨa ɓɔ ma꞊chwa iikanɨ.

²³ Lɨngbaa lʉ moni dyepini la apɛɛ asɛmɛ, makʉtananɨa ɓɔ ambʉ́ mʉsɨa gɔ ʉɓɨɨ nguakɛ mambʉsa kʉgbʉka Klisito, jʉ iinanɨ ya moni kɔɔ muɗo nadɨndɨ.

²⁴ Ɨkyɛmɨngana, moni kɔɔ maja nadɨndɨ ya piɛ ɓɔ ambʉ muɓio gʉ‑zʉ tʉkʉ kʉkʉʉ, aka ekoo ʉndɛnʉ.

²⁵ Jʉ makʉmbɨa iɗo ɓɔ, ma꞊tukuo‑zʉ tʉkʉ tukuoo, nʉ ya tʉkʉ ndʉ ananɨ. Kaɓio‑zʉ tʉkʉ ɨzɔ ninu mambuɓio ninu kusalɨa ɓɔ sɨnganakeni nʉpɛɛ nʉ kuɓio nʉ ɨgyagya amati ʉ baya.

²⁶ Kʉ ɓwanɨ, ati ngia ma꞊tʉa ɓata‑ɔɔ na andɛnʉ, naɓio nʉ ɨmbʉka nadɨndɨ aka ekoo asɛmɛ, amati ʉ jubunio ngiindɛnʉ nʉ Yeso Klisito.

²⁷ Moni kɔɔ maja ka ɓɔ ɓieni kʉkɨndaka ndʉ akʉ yɨkwananaka‑ɔɔ kʉkpatanakɨa tʉkʉ nʉ Ɨsaʉ yɛɛ Iɗo ngia yɨ Klisito. Kʉ ɓwanɨ, kʉndʉ mʉsa ninu kʉna, kʉndʉ mʉsakɔmʉ, mʉkɔ tʉkʉ ɓɔ na tʉkʉ ɓʉmaɨ ɓʉ ngbɔmʉ amati ʉ ɓio 'ʉtʉma mungono, nʉ ɓɔ na tʉkʉ kʉmana agbanga ɨzɔ aka ekoo ʉ baya ngia yakʉʉngwanakɨa nʉ Ɨsaʉ yɛɛ Iɗo.

²⁸ Ɓakwa ɓʉndɛnʉ ɓɔɔ nikwisokɔmʉ ʉɓa akʉ ɨngbaa yɨ moni gʉkʉ mɨngana. Iinanɨ yakʉpana ɓɔ ɓa ɓʉyangaɛ, ɨkyɛmɨngana inu na akʉ ɨngbaa yɨ ɓʉhɨa. Nʉ moni ngikʉnanɨ kaaʉngwa ɔɔ Asʉɓɨɨ.

²⁹ Jʉ Asʉɓɨɨ a꞉ninzo ɨjɨɔ ngiangɔ kʉkyananakɨa Klisito, chʉkɔmʉ tʉkʉ nayɔ kʉbaya, ɨkyɛmɨngana kʉ kʉdya ɓʉka‑ɓʉkaɨ aka ekoo angɔ.

³⁰ Ɨtakɨ‑takɨ ngiakɛ, ka tiga kʉmana ɗite lʉ baya ɨzɔ ninu ila ni꞉nye na꞉na kʉmana engo. Nʉ ɗite ngilʉnanɨ manalɔ tʉkʉ kʉmana kʉndʉ nakʉkɔ.