2 Timɔtɛɔ 4 - Agɔmɔ ngia wʉ Ɨtakɨ-takɨ

Mapanʉ kʉ 'upipio ngika kʉ Pɔlɔ

¹ Manɔwɛ kusigio moni ngikakɛ nʉ kɛkɛɛ, mʉchɨkeni ɔɔ Asʉɓɨɨ nʉ Yeso Klisito ndʉ ɓatɛmʉ ɓʉsɛmɛ. Ɛyɔ Yeso a꞊tɨna sina 'ʉkɔmbɔ wʉ ɓombi ngiɓa ɓa kʉkʉʉ nʉ iɓa ɓa꞉wo, ati ngia a꞊tʉa‑ɔɔ kʉdya ɓʉngama ya akʉ ɨtaka. Iiya mu꞉nasigio ɓɔ:

² ɓɨakɨa Ɨsaʉ yɛɛ Iɗo, yiɓio akʉ wati wɔɔ ʉkwananakɛ, kʉndʉ akʉ wati ngua wambʉkɔmʉ 'ʉkwananakɛ. Mɨnya ɓombi ngiɓa ɓakʉkpata mapanʉ kʉ yakanaka, nʉ ɓɔ ɓʉsɨa ɓʉɓɨɓɨ. Ɓunzo igue‑gue, nʉ ɓʉpanɨa nʉ 'ʉtʉma wɔɔ ʉta kingono.

³ Jʉ wati mungono wa꞊ka ɓisi ongo uwa ɓombi ɓambukuɓio‑ɔɔ kʉkʉnda kʉkɔ ʉpanʉ wɔɔ ngbingbii. Ɨkyɛmɨngana, ɓaɓio kʉkʉnda kʉkyɨa tʉkʉ ɓʉkʉnda ɓʉndaɓʉ, kuɓio nʉ ɓapananakɨa ɓaja anambamba ʉndaɓʉ, iɓa ɓaɓio naɓɔ kʉpanɨa moni ngika ɓaɓio kʉkʉnda kʉkɔ engo.

⁴ Ɓambukuɓio tii ɓata kʉkɔ moni kingono. Ɓaɓio kʉkpata tʉkʉ muduɓa kʉ yakanaka.

⁵ Ɔwɛ pɛpɛ, ɓio kʉpɨmanakɨa amati ʉ lɨngbaa lʉ moni kʉ liɓomu. Pɨa ɓʉka‑ɓʉkaɨ, ɓɨakɨa Ɨsaʉ yɛɛ Iɗo nʉ kyɨa kuu ngia Asʉɓɨɨ a꞉nanzo tʉkʉ iɗo.

⁶ Jʉ ɛmɛ pɛpɛ, ʉɓɨɨ nguʉsɛmɛ akʉ kuu yɨ Asʉɓɨɨ wa tiga kʉsa kunzunio ndʉ 'ʉtʉmbɨa. Ingyo ngiisɛmɛ ya tiga kʉ tinene

⁷ Ngbanga ndʉ sʉda, ma꞉mana ɗite lʉ baya liɗo. Ngbanga ndʉ mombi ngia aachwa bangʉ akʉ magbii, ma꞉chwa bangʉ kʉɓʉya tʉkʉ akʉ miɓo. Ma꞉pɨmakɨa baya ngiisɛmɛ pɨmakɨaa.

⁸ Tiga ɨtakɨ‑takɨ ngiakɛ, ɨgaɨ yɨ ɓʉngama ngia yɨ ingono ngiisɛmɛ ya tii tʉkʉ ɨnapɨɛ. Makʉʉɓɨɨ ngia aatɨna mɨkɔmbɔ ngbingbii a꞊nanzo ɛyɔ isiya a꞊tʉa sina‑ɔɔ. Ambukunanzo sina tʉkʉ ɛmɛ, ɨkyɛmɨngana a꞊nzo ɓombi kʉ ɓuɓomu ngiɓa ɓakusiɓo tʉa ngiangɔ nʉ taa yengo kʉ nzoo.

Nɨta ngia yɨ Pɔlɔ yɨ 'upipio

⁹ Kyɨa angu kʉka nɛmɛ kʉgbʉka kʉngba.

¹⁰ Dɛma a꞉nasɨa pongo sɨaa, jʉ aakʉnda kʉkpata moni kʉ ɨtaka ngia yɨ ɓʉɓʉnɨ, ambʉsa pongo tiga anʉ Tesalonika. Kɨlɨsasɨ ambʉsa anʉ Galatia, Tito ambʉsa yangɔ anʉ Dalamatia.

¹¹ Kutukuo aka tʉkʉ nʉ Luka. Chɨka Malɨkɔ nambʉka nayɔ, jʉ a mombi ngia akwanana nɛmɛ kʉsalɨa akʉ kuu yɨ Asʉɓɨɨ.

¹² Ma꞉tʉma pongo Tikiko anʉ Ɛfɛsɔ.

¹³ Ati ngia waɓio‑ɔɔ kʉka nachɨkɨa kɔtɨ ngia ma꞉sɨa anʉ Tɔlɔa ɔɔ gue mʉngana ngia ʉnʉ ɓɔ Kalapɔ. Nachɨkɨa lɨtaɓʉ kʉ chɨkɨaa, nadɨndɨ ila lʉ ɨjangɨa ɓa꞉lɨkyɨa nʉ mamba kʉ ɓanama.

¹⁴ Alɛkɨjandɛlɛ iya aakyɨa kuu yɨ abʉgʉʉ, a꞉nakyɨa pongo ɓɨɓɨ nadɨndɨ. Makʉʉɓɨɨ a꞊mutuisio moni ngikʉnanɨ kʉkpatatanakɨa tʉkʉ nʉ ɨkyananakɨa ngiangɔ.

¹⁵ Nɔɔɓiokɔmʉ nayɔ akʉ ɨbʉmba, jʉ ɛyɔ i꞉nye kyɨa pongo kuningunio moni kʉ muɓomu ngika ka꞉panɨa.

¹⁶ Iya ma꞉sa‑ɔɔ kɨnda ngia yɨ pɛɛ kʉmáa apɛɛ ʉ ɓombi ngiɓa ɓaatɨna mɨkɔmbɔ, mombi gʉkʉ mʉngana a꞉sakɔmʉ nɛmɛ kʉmaya apɛɛ ʉ ndaɓʉ. Ɓa꞉nasɨa tʉkʉ ɛmɛ kʉ nangana ɓʉ vu. Asʉɓɨɨ ɔɔɓʉnapɨa nʉ 'ʉkɔmbɔ ekoo ʉ moni ngikʉnanɨ!

¹⁷ Ɨkyɛmɨngana, Makʉʉɓɨɨ a꞉nasalɨa ambʉnanzo angu, iya ma꞉ɓɨakɨa nayɔ Ɨsaʉ yɛɛ Iɗo tʉkʉ ndʉ aka yɨkwanana‑ɔɔ, ikanzi ngia ɓɔ mababa kʉ ɓombi kʉ di di di ɓʉɨkɔ. Kija Makʉʉɓɨɨ a꞉naɓwanakiso akʉ ingyo.

¹⁸ Makʉʉɓɨɨ a꞊naɓwanakiso akʉ ɓʉka‑ɓʉkaɨ kʉ ɓuɓomu, kija a꞊nahiiso ambunawuliso amati ʉ Ɓʉngama ngiɓangɔ ɓa ekoo ʉ ɓisi. Makʉʉɓɨɨ Yeso ʉchɨka ɨbɨba akʉ mɨtʉ yɨ ɨpá nʉ mɨtʉ yɨ ɨpá! Ya ɓwanɨ.

Ɓukuo ngia yɨ Pɔlɔ yɨ 'upipio

¹⁹ Muɓukuo ɔɔ Pelesila nʉ Akila kʉ ɓukuoo, nʉ 'ufini ngua wʉ Ɔnɛsɨfɔlɔ kʉtaa.

²⁰ Ɛlasɨtɔ u꞉tukuo kʉ anʉ Kolito. Mʉ꞉sɨa Tolofimo anʉ Mɨlɛtɔ jʉ i꞉nye bɛ 'ukwese.

²¹ Kyɨa angu kʉka pɛɛ ʉ wati wʉ vɛvʉ yɛɛ ɨja. Ɔɔ Ebulusi, Pudɛna nʉ Linusi, nʉ Kolodia nʉ ɓayoo kʉ ɓuɓomu ɓu꞉naɓukuo kʉ ɓukuoo.

²² Makʉʉɓɨɨ uɓio ɨzɔ nɔwɛ. Nʉ ɨjɨɔ ngiangɔ yiɓio ɨzɔ ninu kʉ ɓuɓomu.