2 Timɔtɛɔ 3 - Agɔmɔ ngia wʉ Ɨtakɨ-takɨ

Kuu yɨ Abɨa akʉ makwaa kʉ 'upipio wʉ ɨtaka

¹ Timɔtɛɔ, wʉkwanana kʉmbɨa iɗo kusigo ɓɔ wati ngua wʉ 'upipio waɓio wati wʉ ɓʉka‑ɓʉkaɨ.

² Jʉ itungwio yɨ ɓombi yaɓio tʉkʉ akʉ ɓamoni ɓʉndaɓʉ ɓakʉɓɔngɔ, nʉ kʉkʉnda falanga. Ɓaɓio ɓombi ɓɔɔ ɓʉbɨbanɛ, ɓombi ɓʉ 'ʉtʉma wɔɔ ʉja, ɓombi ɓɔɔ ɓʉ bʉlɛ ino yɨ Asʉɓɨɨ. Ɓambukuɓio kʉkʉnda kʉkɔ ɓɨsɛ nʉ ɓinye ɓʉndaɓʉ, ɓambukuɓio kutuisio ɓombi ngiɓa ɓaaɓʉkyɨa iɗo ɨbɨba. Ɓambukuɓio tii ɓata kukumo kumbo ɔɔ tu ngia wʉ Asʉɓɨɨ.

³ Ɓambukuɓio nʉ ɓʉkʉnda nʉ mombi, ɓambukuɓio nʉ ikoko nʉ ɓangɛ, ɓaɓio ɓombi ɓɔɔ ɓʉyakanakɨɛ ɓangɛ ɓɨɓɨ, ɓombi ɓʉ ɓʉdada, ɓombi ɓɔɔ ɓʉka‑ɓʉkaɨ, ɓɔɔ ɓʉyaɛ moni kɔɔ muɗo.

⁴ Ɓaɓio ɓafili, ɓombi ɓɔɔ ɗaka ɗaka, ɓombi ɓɔɔ ɓuhue nʉ 'ʉtʉma wɔɔ ʉja, ɓa꞊ɓʉkʉnda kyɨa ɓamoni ngiɓa ɓaaɓʉkataa ɛɓɔ ɓakʉɓɔngɔ, chʉkɔmʉ ɓambuɓio kʉkyɨa ika kaakataa Asʉɓɨɨ

⁵ Ɓa꞊ɓʉnyɨa ndʉ ɓaakumo Asʉɓɨɨ, ɨkyɛmɨngana ɓugiseni angu ʉ baya gisoni. Ɗʉkana nʉ ikanzi yɨ ɓombi ngiɓʉnanɨ ɗʉkanaa!

⁶ Ati ʉ ɓombi ngiɓʉnanɨ, yanʉ iɓa ɓaakumunikio mifini yɨ ɓombi nga ɓɔmɔ, nʉ kupitikio ɓoi ngiɓa ɓaɓuhue nʉ ɓʉɓɨɓɨ ɨzɔ nʉ mɨgbʉ yɨ taa yɨ ndʉtʉ kʉ iɓomu.

⁷ Ɓoi ngiɓʉnanɨ ɓaahata makwaa kʉ muɓomu kʉkpata mapanʉ kʉ ɨtakɨ‑takɨ, chʉkɔmʉ ɓambuɓio ikanzi ngia ɓapimiso moni kingono.

⁸ Ngbanga kʉndʉ iya ɔɔ Yanɛ nʉ Yambɛlɛ ɓa꞉tata jɛnɛ‑ɔɔ moni kɔɔ mʉmbangɛ ngika Mʉsa a꞉kyɨa, ɓombi ngiɓʉnanɨ ɓakʉtata mapanʉ kingono kʉ ɓwanɨ. Ɛɓɔ ɓanʉ itungwio yɛɛ ɓɨɓɨ, nʉ baya ngiindaɓʉ ya tii tʉkʉ ɨkwɛ.

⁹ Ɨkyɛmɨngana, ɓambʉkʉsɨnganaka nʉ moni ngikʉnanɨ ɨngɔlɨ ɨta, jʉ ɓujangi‑jangi ngiɓʉndaɓʉ ɓa꞊pananɨa akʉ mesu kʉ ɓombi kʉ ɓuɓomu, kʉndʉ iɓa ɓɔɔ Janɛ nʉ Yambɛlɛ ɓa꞉pananɨa jɛnɛ.

Pɔlɔ akunzo Timɔtɛɔ ʉpanʉ

¹⁰ Ʉna tɔ, ɔwɛ pɛpɛ wa꞉nakpata kingono akʉ moni kʉ muɓomu. Wa꞉kɔ mapanʉ ngikʉsɛmɛ, wambʉkpata tʉkʉ ɨkyananakɨa ngiisɛmɛ, wambupimiso itungwio ngiisɛmɛ, baya ngiisɛmɛ, 'ʉtʉma wɔɔ ʉta nguʉsɛmɛ, ɓʉkʉnda ngiɓʉsɛmɛ, nʉ 'ʉtʉma wɔɔ pɨɛ ɓʉka‑ɓʉkaɨ nguʉsɛmɛ.

¹¹ Wakʉmbɨa kyananaka yɛɛ ɓʉmbʉmʉ nʉ ɓʉka‑ɓʉkaɨ ngiɓa ɓa꞉naɓaiso amati ɔngɔ anʉ Atiokia, anʉ Ikonio nʉ anʉ Lisitɛlɛ. Ɓa꞉naɓaiso amati ʉ mɨgbʉ yɨ ɓʉka‑ɓʉkaɨ ɨja, ɨkyɛmɨngana Makʉʉɓɨɨ ambʉnaɓwanakiso akʉ moni ngikʉnanɨ kʉ muɓomu.

¹² Ya kingono ɓɔ ɓombi ngiɓa ɓakʉkʉnda kuɓio nʉ ʉɓɨɨ wɔɔ ngbingbii amati ʉ Yeso Klisito ɓa꞊ɓʉkyananaka kyananakaa.

¹³ Ɨkyɛmɨngana, ɓombi nga ɓɔɔ ɓɨɓɨ, iɓa ɓa ndʉ ɓasɔdɔ ɓa꞊sanaka nʉ kyɨa ɓʉɓɨɓɨ tii tʉkʉ nʉpɛɛ nadɨndɨ, kija ɓaɓio kʉpɨtaka ɓombi, ɓombi ɓɔmɔ ɓambuɓio naɓɔ kʉ kʉpɨtaka ɛɓɔ.

¹⁴ Ɔwɛ pɛpɛ, ɓio nʉ baya yɛɛ ɓʉmʉ ekoo moni ngika ɓa꞉napanɨa nʉ ika wa꞉baya kusigo ɓɔ ka kingono. Ɓombi ngiɓa ɓa꞉napanɨa moni ngikʉnanɨ wanaɓɔ kʉmbɨa tʉkʉ iɗo.

¹⁵ Kʉ ɓwanɨ, kʉʉngwa tʉkʉ ɨɓwana ngiisɔɔ, waambɨa Mubio kʉ Asʉɓɨɨ kɔɔ Tu mbɨaa. Ɛkɔ ka mʉkwananakɛ nɔwɛ kunzo 'ʉtʉma wɔɔ pimise moni, nɔwɛ kuɓuyiso akʉ ɓʉhɨa 'upi akʉ baya Yeso Klisito.

¹⁶ Mubio kɔɔ Tu kʉ muɓomu kaaʉngwa ɔɔ Asʉɓɨɨ, nʉ kamʉkwananakɛ kʉpanɨa ingono, nʉ kʉungwiso ɓombi amati ʉ mapanʉ kʉ yakanaka, nʉ kʉmɨnya ɓʉɓɨɓɨ, nʉ kuyumo ɓombi kʉkɨndaka amati ʉ ɓungbingbii,

¹⁷ ambʉ mombi kʉ uɓomu ngia akʉkyananakɨa Asʉɓɨɨ uɓio 'ʉtambanakɨɛ nʉ 'ʉndanɛ kʉkyɨa ɓamoni ɓɔɔ manzanza kʉ ɓuɓomu.