2 Timɔtɛɔ 2 - Agɔmɔ ngia wʉ Ɨtakɨ-takɨ

Sʉda gbagba wʉ Yeso Klisito

¹ Ɔwɛ mwana asɛmɛ Timɔtɛɔ, ɓio ʉndanɛ nʉ angu ngia wʉ ɨjɨɔ ngia yɨ Yeso Klisito.

² Ɨsaʉ ngia wa꞉nakɔ kʉpanɨa engo apɛɛ ʉ ɓatɛmʉ ɓaja, panɨa ɓombi ɓʉ baya iɓa ɓaɓio kʉ ikanzi ngia ɓakwanana kʉ kʉpanɨa ɓangɛ.

³ Ɓaa akʉ ɓʉka‑ɓʉkaɨ ɨzɔ nɛmɛ ndʉ sʉda gbagba wʉ Yeso Klisito.

⁴ Sʉda ambakakyɨa nʉ ɓatanga ekoo moni kʉ ɓombi ngiɓa ɓambʉkɔmʉ ɓasʉda, aka ekoo ngia ɓɔ ʉkataa ngama angɔ.

⁵ Mombi ngia aachwa bangʉ akʉ magbii, aanyɨa nʉ ʉkʉa wɔngɔ tʉkʉ ambʉ ʉ꞉chwa bangʉ nʉ kpata mapanʉ kɔngɔ.

⁶ Mombi ʉ kuu ngia aakyɨa kuu akʉ matɨnɨ, tʉkʉ ɛyɔ‑zʉ aakpanga sʉsa idyo yɛngɔ.

⁷ Timɔtɛɔ, tunguo moni ngika manɔwɛ kusigio akɛ, jʉ Makʉʉɓɨɨ a꞊nanzo mbɨmbanaka nakɔ kupimiso engo kʉ muɓomu.

⁸ Tunguo Yeso Klisito iya a꞉jʉkana akʉ ingyo, iya i꞉nye akʉ ɨɓwanakɨa yɨ Daudi. Ya kʉkpatanakɨa nʉ Ɨsaʉ yɛɛ Iɗo ngia makʉpanɨa engo.

⁹ Ya aka ekoo ʉ Ɨsaʉ yɛɛ Iɗo ngiinanɨ iya ma‑ɔɔ kʉkɨnganaka, kʉɓʉya kʉ nɛmɛ kʉsanga nʉ likpenze ndʉ mombi ɔɔ ɓɨɓɨ. Tɔ, Ɨsaʉ yɨ Asʉɓɨɨ yambʉkɔmʉ ɨsangɛ.

¹⁰ Iikwa ma‑ɔɔ kʉpɨa ɓʉka‑ɓʉkaɨ kʉ ɓuɓomu aka ekoo iɗo yɨ ɓombi ngiɓa Asʉɓɨɨ a꞉ɓʉchwa kuɓio ɓaandɔngɔ, ambʉ ɛɓɔ ɓʉnyɨa nʉ ɓʉhɨa akʉ Yeso Klisito nʉ ɨbɨba yɨ mɨtʉ yɨ ɨpá nʉ mɨtʉ yɨ ɨpá.

¹¹ Moni ngikakɛ ka kingono ɓɔ, ndʉ kaɓio kuweni ɨzɔ nʉ ɔɔ Klisito, isu kuɓioni kaɓio kʉkʉʉ ɨzɔ nayɔ,

¹² Ndʉ kapɨa lɨngbaa lʉ moni kʉ liɓomu, ka꞊dya ɓʉngama kʉ ɨzɔ nayɔ. Ndʉ kamʉtata, ɛyɔ a꞊tɨtata isu kʉ tataa.

¹³ Ndʉ isu kambʉkʉbaya moni kʉ muɓomu ngika a꞉sigo ɓɔ kʉkyɨa, ɛyɔ aɓio yangɔ tʉkʉ kʉkyɨa moni ngika a꞉sigo a꞊kyɨa, jʉ ɛyɔ ambʉkʉkwanana kʉkyɨa moni kʉ di nʉ ika ɛyɔ makʉɔngɔ a꞉yaka.

Mombi ʉ kuu ɔɔ 'ʉkwananakɛ

¹⁴ Timɔtɛɔ, tungwiso ɓombi moni ngikʉnanɨ. Ɓu꞊sigio nʉ angu ɓɔ, akʉ ino yɨ Asʉɓɨɨ ɓɔɔɓiokɔmʉ nʉ mangoi aka ekoo ʉ muno. Mangoi ikanzi ngikʉnanɨ ka tʉkʉ ɓʉdada ɨsʉkʉɓwanɨ, ɨkyɛmɨngana kakwanana kukwisiso ɓombi ngiɓa ɓakʉkɔ engo.

¹⁵ Kyɨa angu kuɓio 'ʉkwananakɛ apɛɛ ʉ Asʉɓɨɨ, ɓio mombi ʉ kuu ɔɔ uɗo iya ambʉkʉkwa soni ati ngia Asʉɓɨɨ a꞊kanga‑ɔɔ kuu ngiangɔ. Ɓio mombi ɔɔ ɓɨakɨɛ Ɨsaʉ yɨ ingono iɗo.

¹⁶ Ɔɔkumunikiokɔmʉ wai yɨ ɓʉdada, nʉ moni ngika kambʉkɔmʉ nʉ 'ʉtʉ, ika kambakanziso Asʉɓɨɨ ɨbɨba. Jʉ ɓombi ngiɓa ɓaakyɨa ikanzi yɨ moni ngikʉnanɨ ɓabi tiga danga nʉ Asʉɓɨɨ.

¹⁷ Moni ngika ɓakʉpanɨa engo ka ndʉ andamba ngia aadya ndʉtʉ kʉ iɓomu. Ati ʉ ɓombi ngiɓʉnanɨ ya Imene nʉ Fɨlɛtɛ.

¹⁸ Ɓombi ɓapɨnɨ ngiɓaɓɛ ɓa꞉sɨa ɨsaʉ yɨ ingono sɨaa, ɓambukwisiso baya yɨ ɓombi ɓaja kusigo wati wʉ jʉkana akʉ ingyo ngia yɨ ɓombi wa꞉ɓaa jɛnɛ ɓaa.

¹⁹ Ɨkyɛmɨngana, baya ngia Asʉɓɨɨ a꞉tinzo ya ɓʉ ngbɔmʉ ndʉ 'ʉkʉpa wʉ mukopi ngua ɓaatɨa ɨkáa ekoo ɔngɔ. Ɨsaʉ ngia ya꞉ɨtɨndakɨɛ ekoo ʉ ɔngɔ yakusigo ɓɔ, « Makʉʉɓɨɨ aambɨa ɓaandɔngɔ mbɨaa, » nʉ « Mombi kʉ uɓomu ngia akusigo ɓɔ a mombi wʉ Asʉɓɨɨ ʉkwanana kʉsɨa ɓʉɓɨɓɨ. »

²⁰ Amati ʉ ɨkáa yɨ mombi ʉ lɨkyɛmɛ, ɓazanɨ ɓaakyɨa akʉ limbi lɨja. Ɓaatuo ɓɔmɔ nʉ ɔlɔ, nʉ muko nga kɔmɔ kʉ ɨjangɨa. Ɓaatuo ɓɔmɔ nʉ mɨkakaʉ, ɓɔmɔ nʉ tʉmʉ. Ɓazanɨ ngɨɓʉnanɨ ɓanʉ kuu kʉ di di di. Iɓa ɓaaɓutuo nʉ muko kʉ ɨjangɨa ɓaadyakaka amati ɔngɔ akʉ ʉmbɔ wɔɔ ʉja, ɨkyɛmɨngana iɓa ɓaaɓutuo nʉ kumbo nga wɔmɔ wʉ ɨsɨsɨsɨ ɓaadyakaka amati ɔngɔ makwaa kʉ muɓomu.

²¹ Ya kʉ ɓwanɨ akʉ ɓombi ɓʉ baya. Mombi ngia a꞊jaɓanakɨa nʉ ɓʉɓɨɓɨ kʉ ɓuɓomu ngiɓa musigo akɛ, a ngbanga ndʉ zanɨ ngia ɓaadyakaka amati ɔngɔ akʉ ʉmbɔ wɔɔ ʉja. Ɛyɔ aɓio mombi wʉ ɨbɨba, ɔɔ jaɓanakɨɛ, iya akataa makʉangɔ, nʉ aɓio ʉndanɛ kʉkyɨa ɓamoni ɓɔɔ manzanza.

²² Timɔtɛɔ, kumo ɓamoni ɓɔɔ ɓɨɓɨ ngiɓa ɓaakataa ɓandambʉ. Kpata tʉkʉ moni kɔɔ ngbingbii kʉ baya, kʉ ɓʉkʉnda, nʉ ika kʉ majɨɔ ɨzɔ nʉ ɓombi ɓʉ 'ʉtʉma wɔɔ ʉjaɓanakɨɛ ngiɓa ɓaata Makʉʉɓɨɨ.

²³ Wɔɔkumunikiokɔmʉ muduɓa kʉ yakanaka ngika kambʉkɔmʉ nʉ 'ʉtʉ. Jʉ kaapipio tʉkʉ nʉ mangoi.

²⁴ Ʉna tɔ, bayo ʉ Makʉʉɓɨɨ ʉkwananakɔmʉ kuɓio mombi ʉ mangoi. Ʉkwanana kuɓio nʉ ɓʉkʉnda nʉ ɓombi kʉ ɓuɓomu, ʉkwanana ambɨa kʉpanɨa ɓombi, nʉ kuɓio mombi ʉ 'ʉtʉma wɔɔ ʉta kʉpɨa ɓʉka‑ɓʉkaɨ.

²⁵ Bayo wʉ Asʉɓɨɨ ʉkwanana kʉpanɨa ɓombi ngiɓa ɓaatata mapanʉ ngikangɔ tʉkʉ nʉ 'ʉtʉma wʉ ɨsɨsɨsɨ. Asʉɓɨɨ a꞊ɓunzo yɛmɔ ɨngbaa yɛɛ niche itungwio yɛɛ ɓɨɓɨ ngiindaɓʉ, nʉ kupimiso ingono.

²⁶ Kija 'ʉtʉma wʉ iɓombi wa꞊ɓʉtʉɨya, ɓambʉɓwanaka akʉ lipindi lʉ Abɨa ngia a꞉ɓʉfa, iya aaɓutitio ɓɔ ɓʉkyɨa tʉkʉ ɓʉkʉnda ngiɓangɔ.