2 Pɛtɛlɔ 3 - Agɔmɔ ngia wʉ Ɨtakɨ-takɨ

Tʉa ngia yɨ Yeso Makʉʉndɛsʉ

¹ Inu ɓadii ɓʉsɛmɛ ɓʉ ɓʉkʉnda, mʉnɨtɨndakɨa ʉbalʉa nguakɛ tiga nisi kapɨnɨ. Amati ʉ ɓabalʉa ngiɓʉnanɨ kʉ ɓuɓomu, mʉkʉnda ninu kutungwiso mapanʉ kingono ngika ɓa꞉nɨpanɨa jɛnɛ,

² aka ekoo ngia ɓɔ ɓieni tʉkʉ kutunguo moni ngika lɨgbɛ lɔɔ tu la꞉yaka jɛnɛ nʉ ʉpanʉ ngua ɓatitima ɓa꞉nɨpanɨa ekoo ʉ Makʉʉɓɨɨ nʉ Muhiiso.

³ Nʉkwanana kupimiso ɓɔ akʉ ɓisi ɓʉ 'upipio ɓombi ngiɓa ɓaakyɨa tʉkʉ kʉnʉa ɓangɛ ɓa꞊ka sina, ɛɓɔ ɓa꞊ɓʉkyɨa tʉkʉ kʉkpata ɓʉkʉnda ngiɓʉndaɓʉ ɓɔɔ ɓɨɓɨ. Ɓa꞊ɓʉkyɨa ninu kʉbʉla,

⁴ kusigo ɓɔ: « Mɛɛ‑zʉ Yeso a꞉sigo ɓɔ akʉnɨka, a tiga gbanɨ? Jʉ ɓatidoo ngiɓʉndɛsʉ ɓa꞉dʉka tiga kʉ dʉkaa, ɨkyɛmɨngana moni kʉ muɓomu ka tʉkʉ ngbanga ndʉ aka ki꞉nye jɛnɛ‑ɔɔ kʉʉngwa aka ɓa꞉kyɨa‑ɔɔ ɨtaka. »

⁵ Iya ndʉ ɓaakyɨa kʉyaka ɓwanɨ, ɓaapaa ɨkyɛmɛ mɨngana, kusigo ɓɔ, ya tiga makwaa maja aka Asʉɓɨɨ a꞉kyɨa‑ɔɔ ɓisi nʉ ɨtaka uyakeni tʉkʉ nʉ moni. A꞉nahʉa ɨtaka nʉ mepo, ambʉimʉmaka kʉ ati ʉ mepo.

⁶ Nʉ Asʉɓɨɨ a꞉wa ɨtaka ngia yɨ pɛɛ ɓata kʉ nʉ mepo, ika ka꞉huoko maja nadɨndɨ.

⁷ Kʉ ɓwanɨ, tʉkʉ akʉ ʉpanʉ mungono nguʉnanɨ, Asʉɓɨɨ a꞉ɓoso ɓisi nʉ ɨtaka ngia yɨ ɓʉɓʉnɨ, kusiɓo ɓisi ngiɓa ɛyɔ makʉɔngɔ a꞊tɨna sina‑ɔɔ 'ʉkɔmbɔ wʉ ɓombi ngiɓa ɓaamʉyaa. Isiinanɨ a꞊wa sina ɓisi nʉ ɨtaka tii tʉkʉ nʉ dyaa.

⁸ Inu ɓadii ɓʉsɛmɛ ɓʉ ɓʉkʉnda, nɔɔpaa kusigo ɓɔ, ɔɔ Asʉɓɨɨ ɓisi mʉngana ɓa ngbanga ndʉ mugo ɛlɛfʉ mɨngana, nʉ mugo ɛlɛfʉ mɨngana ɓa ngbanga ndʉ ɓisi mʉngana.

⁹ Makʉʉɓɨɨ a꞊kwananakiso agɔmɔ ngiangɔ kʉ ɨtakɨ‑takɨ, ɨkyɛmɨngana ɓombi nga ɓɔmɔ ɓakuyo ɓɔ agɔmɔ ngiinanɨ a꞊gbalɨa gbalɨaa. Ʉna tɔ, ɛyɔ Makʉʉɓɨɨ a 'ʉtʉma ʉta ekoo ʉndɛnʉ, ambakakʉnda ɓɔ mombi gʉkʉ mʉngana ʉyangaa, ɨkyɛmɨngana aakʉnda ɓɔ ɓombi kʉ ɓuɓomu ɓunicho mɨtʉma.

¹⁰ Ɨkyɛmɨngana, ɓisi ngiɓa ɓʉ Makʉʉɓɨɨ ɓa꞊ka ɓisi ongo ndʉ mombi ʉ ndiɓo. Isiinanɨ, lɨkʉɓa la꞊ngɨtɨa nʉ iyo yɛɛ ɨmbangɛ, kija kumbo ngia aajɨa ekoo ʉ ɓisi akwanana kusioko akʉ dyaa yɛɛ ɓʉkaɨ. Ɨtaka nʉ kumbo ngia a amati ɔngɔ kʉ uɓomu a꞊sioko siokoo.

¹¹ Jʉ kumbo kʉ uɓomu a꞊sioko, wʉkwanana tiga kupimiso ɓɔ ɨkyananakɨa ngiisɔɔ yaɓio tanɨ! Wʉkwanana kuɓio nʉ ɨkyananakɨa yɛɛ iɗo, iya yapananiso ɓɔ wa 'uɓotone kingono nʉ Asʉɓɨɨ,

¹² nʉ kusiɓo ɓisi ɓʉ tʉa ngiɓa ɓʉ Asʉɓɨɨ nʉ kʉtananɨa nʉ angu ɓɔ ʉka gɔ kʉ ɨtakɨ‑takɨ. Isiinanɨ ɓisi ɓa꞊sioko sina nʉ dyaa. Nʉ dyaa yɛɛ ɓʉmʉ ngiinanɨ iiya ya꞊nɨtanakiso sina kumbo ngia aajɨa ekoo ɓisi ndʉ mepo.

¹³ Asʉɓɨɨ a꞉panaka ekoo ʉ ɓisi wʉ ɨtakɨ‑takɨ, nʉ ɨtaka yɨ ɨtakɨ‑takɨ, iya ingono yaɓio‑ɛɛ. Moni ngika kakusiɓo engo ɨkɔ ɨkʉnanɨ.

¹⁴ Kʉ ɓwanɨ, inu ɓadii ɓʉsɛmɛ ɓʉ ɓʉkʉnda, ɓieni kusiɓo tʉa ngia yɨ Asʉɓɨɨ, ninyeni kʉkyɨa angu kuɓio ɓʉkwananakɛ, chʉkɔmʉ nʉ ɨɗa yɛɛ ɓɨɓɨ apɛɛ Asʉɓɨɨ, ɨkyɛmɨngana ɓieni nʉ majɨɔ nayɔ.

¹⁵ Pimiseni ɓɔ 'ʉtʉma wɔɔ ʉta ngua wʉ Makʉʉndɛsʉ, wa ɨngbaa yɨndɛnʉ yɛɛ nyɨɛ nʉ ɓʉhɨa. Ya ngbanga kʉndʉ aka Pɔlɔ, ayoo ʉndɛsʉ wʉ ɓʉkʉnda, a꞉natɨndakɨa jɛnɛ‑ɔɔ nʉ 'ʉtʉma wɔɔ pimise moni ngua Asʉɓɨɨ a꞉munzo.

¹⁶ Moni ngikakɛ ɨkɔ ika a꞉tɨndakɨa jɛnɛ amati ʉ ɓabalʉa kʉ ɓuɓomu, aka a꞉yaka‑ɔɔ ekoo moni ngikakɛ. Amati ʉ ɓabalʉa ngiɓʉnanɨ, yanʉ ɓamoni ɓɔɔ ɓʉmbʉmʉ iɓa yaɓʉkaɨ kupimiso. Iikwa ɓombi ngiɓa ɓʉya mbɨmbanaka, ɓambakapimiso ɨkyɛmɛ, ɓakunicho engo tiga kʉ di. Nʉ amati ʉ lizi nga lɔmɔ amati ʉ Mubio ɓakyɨa kʉ ɓwanɨ. Ɓakuwunono tʉkʉ ɛɓɔ ɓakʉɓɔngɔ.

¹⁷ Inu ɓadii ɓʉsɛmɛ ɓʉ ɓʉkʉnda, ɨtakɨ‑takɨ ngiakɛ munimbiiso mbiisoo. Kʉ ɓwanɨ, pɨmanakɨeni pɨmanakɨaa. Nɔɔkumuniokɔmʉ akʉ ɓʉɓɨɓɨ kʉkpata ɓombi ɓʉ ambɛlɛ‑mbɛlɛ, iɓa yakanaka yɨɓʉɓaa angu. Nɔɔkwisisokɔmʉ baya yɛɛ ɓʉmʉ ngia nanayɔ.

¹⁸ Ɨkyɛmɨngana, sɨnganakeni tʉkʉ amati wʉ ɨjɨɔ, nambupimiso Makʉʉndɛsʉ nʉ Muhiiso wʉndɛsʉ Yeso Klisito. Ɨbɨba yiɓio ekoo ʉ Asʉɓɨɨ ɓʉɓʉnɨ, nʉ akʉ mɨtʉ yɨ ɨpá nʉ mɨtʉ yɨ ɨpá! Ya ɓwanɨ.