2 Pɛtɛlɔ 2 - Agɔmɔ ngia wʉ Ɨtakɨ-takɨ

Ɓapananakɨa ɓʉ yakanaka

¹ Akʉ makwaa ngika ka꞉ɓaa, lɨgbɛ lʉ yakanaka li꞉nye lɨja ati ʉ ɓombi. Ngbanga kʉ ɓwanɨ, ɓapananakɨa ɓʉ yakanaka ɓaɓio sina kʉ ɓaja ati ʉndɛnʉ. Ɓa꞊ɓʉkyɨa kusingio mapanʉ kʉ yakanaka nʉ ɓakɛɛ‑ɓakɛɛ, kʉɓʉya kʉ kʉtata Mʉpananakɨa ngia a꞉ɓuhiiso akʉ ɓʉɓɨɓɨ. Iinanɨ yakusigo ɓɔ ɓakʉhata ingyo ngiindaɓʉ kʉ ɛɓɔ ɓakʉɓɔngɔ, iya ya꞊ka tʉkʉ gagaa.

² Ɓombi ɓaja ɓa꞊kpata ɨkyananakɨa yɛɛ ɓɨɓɨ ngiindaɓʉ, nʉ aka ekoo ʉ ɨkyananakɨa yɛɛ ɓɨɓɨ ngiinanɨ, ɓa꞊kwanana kʉna ɨngbaa yɨ ingono ndʉ ya ɓɨɓɨ.

³ Aka ekoo ʉ taa yɨ falanga, ɓaɓio ninu kʉdyɨa kumbo, 'upi ninu kʉchwɨa muduɓa kʉ yakanaka. Ɨkyɛmɨngana, kʉʉngwa kʉ jɛnɛ, yitukuo wati ɗɛkɛkɛ aka ɓa꞊tɨna‑ɔɔ 'ʉkɔmbɔ nguʉndaɓʉ nʉ ingyo ngiindaɓʉ ya꞊ka tʉkʉ gagaa.

⁴ Kʉ ɓwanɨ, Asʉɓɨɨ a꞉sɨakɔmʉ ɓamalaika ngiɓa ɓa꞉kyɨa ɓʉɓɨɓɨ ɨsʉkʉɓwanɨ, a꞉ɓugiso akʉ mʉa wʉ ɓʉka‑ɓʉkaɨ, ambʉɓʉnga nʉ likpenze akʉ boloko amati ʉ umomo kusiɓo ɓisi ɓɔɔ ɓʉtɨnɛ 'ʉkɔmbɔ.

⁵ Abana ɓombi ngiɓa ɓʉ pɛɛ, Asʉɓɨɨ a꞉ɓʉsɨakɔmʉ ɨsʉkʉɓwanɨ, a꞉huukiso mepo akʉ ɨtaka kʉ iɓomu, kija ɓombi ɓɔɔ ɓɨɓɨ kʉ ɓuɓomu ɓa꞉dʉka. Ɨkyɛmɨngana, jʉ Nʉa i꞉nye kyɨa tʉkʉ kʉɓɨakɨa ɨsaʉ yɨ ingono ngia yɨ Asʉɓɨɨ, a꞉muhiiso tʉkʉ ɛyɔ ɨzɔ nʉ ɓombi nga ɓɔmɔ ʉmalɨanɨka.

⁶ Asʉɓɨɨ a꞉tɨna 'ʉkɔmbɔ ngua wʉ gʉlʉ ʉ Sɔdɔmɔ nʉ wʉ Gɔmɔla ɨngbaa naɓɔ kʉya nʉ dyaa. Asʉɓɨɨ a꞉kyɨa ɓwanɨ kʉpana isisinio yɨ moni ngika ka꞊kyɨa sina ɓombi ɓʉ ɓʉɓɨɓɨ kʉ ɓuɓomu.

⁷ Ɨkyɛmɨngana, a꞉hiiso Lɔtɨ ngia i꞉nye mombi ɔɔ ngbingbii akʉ ikoko ngia i꞉nye amati ɔngɔ ekoo ʉ ɨkyananakɨa yɛɛ ɓɨɓɨ yɨ ɓombi ngiɓa ɓi꞉nye ɓundo ʉpanʉ akʉ ɓɔndɔ ɓangɔ.

⁸ Lɔtɨ ngia i꞉nye mombi ɔɔ ngbingbii a꞉kwaa makwaa maja ati ʉ ɓombi ɓɔɔ ɓɨɓɨ ngiɓʉnanɨ, nʉ i꞉nye dya ikoko ɨja nadɨndɨ kʉna nʉ kʉkɔ makwaa kʉ muɓomu ɓamoni ɓɔɔ ɓɨɓɨ ɓɨɓɨ ngiɓa ɓombi ngiɓʉnanɨ ɓi꞉nye kyɨa.

⁹ Kʉ ɓwanɨ, Asʉɓɨɨ aakwanana kʉɓwanakiso ɓombi ngiɓa ɓaakpata mapanʉ ngikangɔ amati ʉ kanyo, kija aanapɨa ɓombi ɓʉ mapimbili anambamba, kusiɓo ɓisi ɓɔɔ ɓʉtɨnɛ 'ʉkɔmbɔ naɓɔ kusingo amati ʉ ɓʉka‑ɓʉkaɨ.

¹⁰ A꞊napɨa 'ʉkɔmbɔ nadɨndɨ ekoo ʉ ɓombi ngiɓa kuu yɨndaɓʉ ya tʉkʉ kʉkpata taa yɛɛ ɓɨɓɨ yɨ ndʉtʉ ngiindaɓʉ. Aka ekoo ɨmbʉka nʉ 'ʉtʉma wɔɔ ʉja nguʉndaɓʉ ɓaabʉla angu ngia wʉ Asʉɓɨɨ. Ɓapananakɨa ɓʉ yakanaka ngiɓʉnanɨ ɓaanana nadɨndɨ. Ɓanʉ 'ʉtʉma wɔɔ uja nʉ ɓaayaa kʉkɔ Asʉɓɨɨ.

¹¹ Abana kʉndʉ ɓamalaika iɓa ɓʉɓaa ɓapananakɨa ɓʉ yakanaka ngiɓakɛ nʉ angu nʉ ɓʉɓʉmbʉmʉ, ɓambakaɓʉzɨaka ati ngia ɓaakyɨa‑ɔɔ kunzo 'ʉkɔmbɔ nguʉndaɓʉ apɛɛ ʉ Makʉʉɓɨɨ.

¹² Ʉɓɨɨ wʉ ɓombi ngiɓʉnanɨ wa ngbanga ndʉ ʉwa wʉ ɓanama ɓʉ 'ututu jʉ ɓambakambɨa ɨkyɛmɛ. Ɓa꞉napɨanɨa kʉfana tʉkʉ akʉ ipindi, kija ɓaaɓʉwa. Kuu yɨndaɓʉ tʉkʉ kʉzɨaka ɨkyɛmɛ ngia ɓambʉkɔmʉ kʉmbɨa, kʉ ɓwanɨ ɓa꞊dʉka sina ngbanga tʉkʉ ndʉ ɓanama.

¹³ Kija ɓa꞊nyɨa nʉ ʉkʉa wʉ ɨkyananakɨa yɛɛ ɓɨɓɨ ngiindaɓʉ. Ɓaakwa ɨgyagya kʉkwananakiso taa yɨ ndʉtʉ ngiindaɓʉ akʉ ɓisi ɓɔɔ ɓʉyɛ ɓʉ ngbanganya. Ati ngia ɓaaka‑ɔɔ kʉgbʉka ɓangɛ kʉdyakaka, ɓaakwa ɨgyagya kʉyaka yakanaka. Ɓa ɓombi ɓɔɔ ɓunzise soni nʉ ɓɔɔ ɓukwisise ɓombi.

¹⁴ Mesu ngikʉndaɓʉ kaakyɨa tʉkʉ ika kʉ ɨndambʉ, nʉ taa yɛɛ kyɨɛ ɓʉɓɨɓɨ yaaɓʉkpakpa tʉkʉ ɓʉ ndi. Ɓaakwisiso ɓombi ngiɓa baya yɨndaɓʉ yaakyɨa bata bata. Ɓombi ngiɓakɛ ɓaakyɨa 'ʉtʉma nadɨndɨ tʉkʉ ɓɔ ɓʉnyɨa nʉ lɨkyɛmɛ. 'Ʉkɔmbɔ wʉ Asʉɓɨɨ wa ekoo ʉndaɓʉ.

¹⁵ Ɓa꞉sɨa ɨngbaa yɛɛ ngbingbii sɨaa, nʉ ɓa tiga ɓʉyangaɛ. Kuu yɨndaɓʉ tii tʉkʉ kʉkpata ɨngbaa ngia yɨ Balamʉ, iya a mwana ʉ Bɛɔlɨ, ngia i꞉nye kʉnda falanga wʉ ɨngbaa yɨ ɓʉɓɨɓɨ.

¹⁶ Ɨkyɛmɨngana, a꞉kɔ tʉkʉ iyo nayɔ kʉnyakɨa aka ekoo ʉ ɓʉɓɨɓɨ ngiɓa a꞉kyɨa. Iyo ngiinanɨ ya꞉ɓʉa ndʉ mombi amati ʉ punda ngia ambakayaka, kʉgbʉma ɨkyananakɨa yɨ ɓaumu ngia yɨ ɨgbɛ Balamʉ.

¹⁷ Ɓombi ngiɓʉnanɨ ɓa ndʉ lɨkɔ ngila laakyɨa lʉnangakeni nangakaa, yɛmɔ lɨkʉɓa ngila mahuo wɔɔ ɓʉmʉ waakyɨa nalɔ kututuo. Asʉɓɨɨ a꞉ɓʉtambanakɨa wati wʉ nuɓutu uwa wanʉ umomo ʉja nadɨndɨ.

¹⁸ Ɓaayaka moni nʉ ɨmbʉka ika kambʉkɔmʉ nʉ 'ʉtʉ nʉ ika kʉ soni. Nʉ ɓaakyɨa tʉkʉ kʉkpata ɓʉkʉnda ngiɓʉndaɓʉ ɓakʉɓɔngɔ, nʉ kyɨa ɨndambʉ kukwisiso ɓombi ngiɓa ɓa꞉ɓwanaka akʉ lɨkɔndɔ lʉ ɓombi ngiɓa ɓa꞉paa ɨngbaa paa.

¹⁹ Ɓa꞉ɓunzo agɔmɔ ɓɔ ɓaɓio ɓuɓununukie, ʉna tɔ ɛɓɔ ɓinyeni ɓabayo ɓʉ mɨgbʉ yɨ ɓʉtɨpɨ ɓʉ ɨtaka kʉ iɓomu iya yanaɓɔ kutito akʉ ingyo. Mombi aakyɨa tʉkʉ bayo wʉ ɨkyɛmɛ ngia yaakyɨa yɨmʉɓaeni angu.

²⁰ Ɓombi ɓɔmɔ, iɓa ɓa꞉mbɨa Yeso Klisito, Makʉʉndɛsʉ nʉ Muhiiso, ɓa꞉sɨana nʉ 'ʉsʉgʉ nga wʉ ɨtaka sɨanaa. Ɨkyɛmɨngana, ndʉ ɓatʉɨa ɓata ɨkyananakɨa ngiinanɨ, ʉɓɨɨ nguʉndaɓʉ wa꞊nɨtanaka tiga kʉka ɓɨɓɨ nadɨndɨ kʉɓaa aka wakyɨa‑ɔɔ pɛɛ.

²¹ Jʉ yi꞉nye iɗo ɓɔ ɓuɓio tʉkʉ ɨsʉkʉɓwanɨ chʉkɔmʉ kupimiso ɨngbaa yɨ ingono, jʉ yambʉkɔmʉ iɗo ɓɔ ndʉ ɓaipimiso‑zʉ, mbise ɔngɔ ɓambʉsɨa ɓata ʉpanʉ wɔɔ tu nguʉnanɨ ɓa꞉ɓunzo kʉ sɨaa.

²² Moni ngika ka꞉ɓʉgbʉka ki꞉nye kingono ndʉ akʉ ungbagu nguakɛ waasigo‑ɔɔ ɓɔ: « Ɨmva a ɓata kʉdya liwei ngilangɔ kʉtɔ. » Yɛmɔ ɓɔ « Nɛmbʉ ngia ʉ꞉jaɓana ndʉtʉ a ɓata kʉ kukpulunio amati ʉ 'ukpondo kʉtɔ. »