1 Timɔtɛɔ 1 - Agɔmɔ ngia wʉ Ɨtakɨ-takɨ

Pɔlɔ uɓukuo Timɔtɛɔ

¹ Ɛmɛ Pɔlɔ, titima wʉ Yeso Klisito 'upi akʉ ʉpanʉ wʉ Asʉɓɨɨ Muhiiso wʉndɛsʉ nʉ Yeso Klisito iya kaanapɨa itungwio ekoo angɔ.

² Ɔwɛ Timɔtɛɔ, mʉ꞉natɨndakɨa ʉbalʉa nguakɛ, ɔwɛ ngia maanachɨka ndʉ mwana asɛmɛ ɔɔ nʉtɛ, jʉ isu nɔwɛ ka꞉napɨa baya ngiindɛsʉ ekoo ʉ Yeso Klisito. Asʉɓɨɨ Tidoo ʉndɛsʉ nʉ Yeso Klisito ɓʉpananiso ɨjɨɔ ekoo asɔɔ, nʉ nɔwɛ kʉnɨa ikoko, ɓambunanzo majɨɔ.

Kʉgbʉma panɨa mapanʉ kʉ yakanaka

³ Ati ngia mi꞉nyɛ‑ɔɔ kʉsa anʉ Makedonia, ma꞉naɓɨa ɓɔ tukuo tʉkʉ anʉ Ɛfɛsɔ, wambuɓio kʉ kʉgbʉma ɓombi ngiɓa ɓakʉpanɨa mapanʉ kʉ yakanaka ɓɔ ɓʉsɨa nakɔ kʉpanɨa.

⁴ Nʉ ɓʉɓɨa ɓata kʉ ɓɔ ɓʉsɨa muduɓa kʉ yakanaka, nʉ chwio lɨɓwanakɨa lʉ ɓakuku ngila lambʉkɔmʉ nʉ 'upipio. Moni ngikʉnanɨ ɨkɔ ika kaakwiso wai, nʉ kambʉkɔmʉ kʉsɨnganakiso kuu ngia Asʉɓɨɨ akʉkyɨa engo amati ʉ ʉɓɨɨ wʉ ɓombi, aka ekoo ngia ɓɔ ɓʉnyɨa nʉ ɓʉhɨa iɓa ɓaanyɨa naɓɔ tʉkʉ 'upi akʉ baya.

⁵ Inyi yɨ moni ngia mʉnangakɨa akɛ, ya tʉkʉ kusigo ɓɔ ɓombi ɓuɓio nʉ ɓʉkʉnda nʉ ɓangɛ. Ɓʉkʉnda ngiɓʉnanɨ ɓaaʉngwa akʉ 'ʉtʉma wɔɔ uɗo, akʉ iyo yɨ 'ʉtʉma yɛɛ katanɛ ɓʉ dɨɨ, nʉ akʉ baya ngia yambʉkɔmʉ nʉ ɓufili.

⁶ Ɓombi nga ɓɔmɔ ɓa꞉paa ɨngbaa paa. Kuu nga yɨndaɓʉ tii tʉkʉ kʉchwa muduɓa ngika kambʉkɔmʉ nʉ 'ʉtʉ.

⁷ Ɛɓɔ ɓaakʉnda kuɓio ɓabʉbʉma ɓɔɔ ɓʉpanɨɛ mapanʉ ngika Asʉɓɨɨ a꞉nzo Mʉsa. Ʉna tɔ, ɓambʉkɔmʉ kupimiso moni ngika ɓakʉpanɨa engo. Nʉ ɓambʉkɔmʉ kʉmbɨa moni ngika ɓakʉpanɨa engo, nʉ baya nʉ angu ɓɔ ka kingono.

⁸ Kakʉmbɨa ɓɔ mapanʉ ngika Asʉɓɨɨ a꞉nzo Mʉsa ka muɗo ati ngia ɓa‑ɔɔ nakɔ kʉkpata akʉ ɓingono.

⁹ Nʉ yɨkwanana kʉmbɨeni iɗo ɓɔ Asʉɓɨɨ a꞉napɨakɔmʉ mapanʉ ngika a꞉nzo Mʉsa ekoo ʉ ɓombi ɓɔɔ ngbingbii. Ɨkyɛmɨngana, akʉnapɨa aka ekoo ɓombi ngiɓa ɓaaɗɨa ʉpanʉ, ɓombi ɓʉ ambɛlɛ‑mbɛlɛ, ɓombi ɓɔɔ ɓʉtatɛ baya, nʉ ɓombi ɓɔɔ ɓʉkyɨɛ ɓʉɓɨɓɨ. Nʉ ekoo ɓombi ngiɓa ɓa꞉yaa Asʉɓɨɨ, nʉ iɓa mbambakakumo ɓamoni ɓɔɔ tu ngiɓa ɓʉ Asʉɓɨɨ. Ɓombi ngiɓa ɓaamaa ɓɨsɛ ɓʉndaɓʉ nʉ ɓinye ɓʉndaɓʉ, nʉ iɓa ɓaadʉka ɓombi.

¹⁰ Nʉ mapanʉ ngikʉnanɨ ka aka ekoo ɓombi ɓʉ ɨndambʉ, nʉ ɓugue ngiɓa ɓaakwaa nʉ ɓugue nga ɓɔmɔ, ɓombi ngiɓa ɓaagaba ɓombi akʉ falanga, ɓombi ɓʉ yakanaka, ɓombi ɓɔɔ ɓusimie moni nʉ yakanaka, nʉ ɓombi kʉ ɓuɓomu ngiɓa ɓaayaa mapanʉ kɔɔ ngbingbii ngika kʉ Asʉɓɨɨ.

¹¹ Ʉpanʉ nguʉnanɨ uuwa ɓa꞉nanzo ɓɔ mʉpanɨa, nʉ uwa wakʉkpatanakɨa nʉ Ɨsaʉ yɛɛ Iɗo yɨ imbangumba yɨ Asʉɓɨɨ ngia ya itindi‑tindi yɨ ʉmbʉa.

Pɔlɔ akutuisio Asʉɓɨɨ ɨbɨba ekoo ikoko ngia a꞉mʉnɨa

¹² Makutuisio Yeso Klisito Makʉʉndɛsʉ ɨbɨba, ɛyɔ ngia a꞉nanzo angu ɔɔkwananakɛ kʉkyɨa kuu yɨ Asʉɓɨɨ. Manayɔ kutuisio ɨbɨba jʉ ɛyɔ a꞉nana ɓɔ ma 'ʉbayanɨɛ kʉkyɨa kuu ngiangɔ.

¹³ Ʉna tɔ, ati ngia mi꞉nye mambʉbayenikɔmʉ‑ɔɔ Yeso Klisito, mi꞉nye mʉyakɨa tʉkʉ ɓɨɓɨ, nʉ nayɔ kʉzɨaka, nʉ kʉkyananaka ɓʉmbʉmʉ ɓombi ngiɓa ɓa꞉mʉbaya. Ɨkyɛmɨngana, Asʉɓɨɨ a꞉nanɨa ikoko, jʉ ma꞉mbikinye kupimiso ɓɔ Yeso a anɨ, nʉ jʉ mi꞉nye mambʉmʉbayenikɔmʉ.

¹⁴ Makʉʉndɛsʉ a꞉pananiso ɨjɨɔ ngiangɔ yɛɛ ɨja ekoo asɛmɛ, iiya ma꞉nyɨa‑ɔɔ nayɔ nʉ baya, nʉ kuɓio nʉ ɓʉkʉnda nʉ ɓangɛ, aka ekoo ʉ jubunio ngia kanayɔ amati ʉ Yeso Klisito.

¹⁵ Ɨsaʉ ngia makʉngaka akɛ ya kingono, nʉ yɨkwanana ɓombi kʉ ɓuɓomu ɓʉɨbaya kusigo ɓɔ: « Yeso Klisito a꞉ka ya akʉ ɨtaka kuhiiso ɓombi ɓʉ ɓʉɓɨɓɨ. » Ɛmɛ ma mombi ʉ ɓʉɓɨɓɨ naɓɔ kʉɓaa ɛɓɔ kʉ ɓuɓomu.

¹⁶ Ɨkyɛmɨngana, Asʉɓɨɨ a꞉nanɨa ikoko aka ekoo moni ngikʉnanɨ. Iiya akʉnda‑ɔɔ ɓɔ Yeso Klisito ʉpananiso 'ʉtʉma wɔɔ ʉta nguangɔ ekoo asɛmɛ, ngama ʉ ɓombi ɓʉ ɓʉɓɨɓɨ kʉ ɓuɓomu. Iinanɨ ya isisinio akʉ ɓombi ngiɓa ɓa꞊mʉbaya sina, ambʉ ɓʉnyɨa nʉ ʉɓɨɨ wʉ mɨtʉ yɨ ɨpá nʉ mɨtʉ yɨ ɨpá.

¹⁷ Asʉɓɨɨ ngia a ngama ɔɔ ʉja akʉ mɨtʉ yɨ ɨpá nʉ mɨtʉ yɨ ɨpá, iya ambakawo, iya mombi ambakamʉna, nʉ iya a kʉ nangana, ʉchɨka ɨbɨba nʉ imbangumba akʉ mɨtʉ yɨ ɨpá nʉ mɨtʉ yɨ ɨpá. Ya ɓwanɨ.

¹⁸ Timɔtɛɔ, mwana asɛmɛ, ʉpanʉ ngua manɔwɛ kunzo akɛ wakʉkpatanɨa tʉkʉ nʉ masaʉ ngika lɨgbɛ la꞉yaka jɛnɛ pɛɛ ekoo asɔɔ. Maná agbanga ɓʉmʉ winyeni tʉkʉ kʉɓɨakɨa Ɨsaʉ yɛɛ Iɗo nʉ angu, abana ndʉ ɓombi ɓaɓio kunzo 'ʉtʉ wɔɔ ɓʉmʉ kititi.

¹⁹ Pɨmakɨa baya nʉ kyɨa tʉkʉ moni ngika iyo yɨ 'ʉtʉma yɛɛ katanɛ ɓʉ dɨɨ ngiisɔɔ yaanatitio kʉkyɨa engo. Ɓombi ngana ngana ɓa꞉sɨa iyo yɨ 'ʉtʉma ngiinanɨ sɨaa, baya ngiindaɓʉ yambʉkwa.

²⁰ Ati ʉ ɓombi ngiɓʉnanɨ, ya Imene nʉ Alɛkɨjandɛlɛ. Ma꞉ɓunzo akʉ lɨkɔndɔ lʉ Sɨtanɨ ɨngbaa naɓɔ kukpinyo akʉ ɨbʉmba yɨ ɓombi ɓʉ baya, ambʉ ɓupimiso kusigo ɓɔ yambʉkɔmʉ iɗo kʉzɨaka Asʉɓɨɨ.