1 Pɛtɛlɔ 5 - Agɔmɔ ngia wʉ Ɨtakɨ-takɨ

Napɨeni mesu ekoo ʉ ndiba wʉ Asʉɓɨɨ

¹ Ɨtakɨ‑takɨ ngiakɛ, makunzo ɓʉkʉʉ ɓʉ kanisa ngiɓa ɓa ati ʉndɛnʉ, iɓa ɓa ɓʉkʉʉ kʉndʉ ɛmɛ, ʉpanʉ. Manaɓɔ kusigio ɓɔ, ma tɛmʉ wʉ ɓʉka‑ɓʉkaɨ ngiɓa Klisito a꞉dya. Nʉ maɓio kʉ ati ʉ ɓombi ngiɓa ɓa꞊nyɨa ɓisi ongo nʉ ɨbɨba ngia ya꞊ɓwanɨa. Manaɓɔ kusigio ɓɔ:

² Ɓieni mesu ekoo ʉ ndiba ngia Asʉɓɨɨ a꞉napɨa akʉ lɨkɔndɔ lʉndɛnʉ, ngbanga ndʉ iya mombi aanapɨa‑ɔɔ mesu ekoo ʉ ɓakɔndɔlɔ ngiɓangɔ. Nɔɔkyɨakɔmʉ moni ngikʉnanɨ ndʉ ɓunititio akʉ angu, ɨkyɛmɨngana kyɨeni tʉkʉ nʉ 'ʉtʉma wʉndɛnʉ. Nɔɔkyɨakɔmʉ jʉ na꞊nyɨa nʉ falanga, ɨkyɛmɨngana kyɨeni tʉkʉ nʉ kɛkɛɛ.

³ Nɔɔhatakɔmʉ kuɓio nʉ ʉpanʉ kʉkʉkʉmɨa ɓombi ngiɓa Asʉɓɨɨ a꞉ninzo. Ɨkyɛmɨngana, ɓieni isisinio yɛɛ iɗo akʉ ndiba ngiinanɨ.

⁴ Ɓisi ngiɓa mʉpɨmakɨa wɔɔ ʉja wʉ ɓakɔndɔlɔ wa꞊ka sina‑ɔɔ, na꞊nyɨa nʉ ɨbɨba ngia yambʉkʉsio sina.

Maeni ɓʉ ngbɔmʉ amati ʉ baya

⁵ Abana kʉndʉ inu ɓandambʉ, nʉ inu ɓasaɓakyɛ, kwaɨeni ɓʉkʉʉ akɛsɨ! Nʉ inu kʉ ɓuɓomu ɓieni nʉ 'ʉtʉma wɔɔ ijisinise nɛsɨ ati ʉndɛnʉ. Jʉ Mubio ka꞉sigo ɓɔ: « Asʉɓɨɨ ambakakɔnɔ nʉ ɓombi ɓʉ 'ʉtʉma wɔɔ ʉja, ɨkyɛmɨngana aapananiso 'ʉtʉma wʉ ikoko ekoo ɓombi ngiɓa ɓaaijisiniso nɨsɨ. »

⁶ Gbʉkʉmɨeni ɛsɨ wʉ ɨkɔndɔ yɨ angu yɨ Asʉɓɨɨ jʉ Asʉɓɨɨ a꞊nimaiso maisoo akʉ ɓisi ngiɓa ɛyɔ makʉɔngɔ a꞉napɨa.

⁷ Napɨeni ɓatanga ngiɓʉndɛnʉ kʉ ɓuɓomu akʉ lɨkɔndɔ lʉ Asʉɓɨɨ jʉ aɓio mesu ekoo ʉndɛnʉ.

⁸ Ɓieni mesu tʉkʉ ɓʉ gbɛ nambuɓio kʉkanga! Jʉ makwa wʉndɛnʉ abɨa aninu kutalio ngbanga ndʉ simba ngia akʉgʉa, kʉhata ɓɔ ʉnyɨa nʉ mombi ngia amʉdya.

⁹ Chɨngbɨeni abɨa ɓʉ ngbɔmʉ, nambuɓio tʉkʉ ɓʉndanɛ amati ʉ baya, jʉ nakʉmbɨa iɗo ɓɔ ɓayoo ɓʉndɛnʉ iɓa ɓʉnadaa akʉ ɨtaka kʉ iɓomu ɓakʉdya ɓʉka‑ɓʉkaɨ ngbanga kʉ ɓwanɨ.

¹⁰ Ɓʉka‑ɓʉkaɨ ngiɓʉndɛnʉ ɓaɓio tʉkʉ akʉ wati ɗɛkɛkɛ. Asʉɓɨɨ ngia wʉ ɨjɨɔ kingono iya a꞉nisoko 'upi akʉ Yeso Klisito kukumunio amati ʉ ɨbɨba ngiangɔ yɨ mɨtʉ yɨ ɨpá nʉ mɨtʉ yɨ ɨpá, a꞊nimaiso maisoo, kija a꞊nɨ'ʉtandakiso, ambuninzo angu kʉmáa ɓʉmʉ.

¹¹ Angu ngiangɔ uɓio akʉ mɨtʉ yɨ ɨpá nʉ mɨtʉ yɨ ɨpá! Ya ɓwanɨ.

Ɓukuo ngia yɨ 'upipio

¹² Silivano, ayoo ngiasɛmɛ ɔɔ ngbingbii kʉ a꞉nasalɨa pongo ɛmɛ nɔwɛ kʉtɨndɨakɨa igbiti yɨ ʉɓalʉa nguakɛ. Mʉ꞉natɨndakɨa ʉbalʉa nguakɛ nɔwɛ kunzo igue‑gue, nɔwɛ kʉɓɨa ɓɔ naɓuɓotone nʉ 'ʉtʉma wʉ ɨjɨɔ wʉ ingono ngua wʉ Asʉɓɨɨ.

¹³ Kanisa ngia a anʉ Babɨlɔna, iya Asʉɓɨɨ a꞉'ʉchwa kʉndʉ a꞉nɨchwa inu, ɨzɔ nʉ Malɨkɔ, mwana asɛmɛ amati ʉ baya, ɓuniɓukuo kʉ ɓuɓomu.

¹⁴ Nzoneni majɨkanatanɨ ati ʉndɛnʉ, nambunaputono akʉ ɓʉkʉnda. Majɨɔ kuɓio ɨzɔ ninu kʉ ɓuɓomu ngiɓa na amati ʉ Klisito.