1 Pɛtɛlɔ 1 - Agɔmɔ ngia wʉ Ɨtakɨ-takɨ

Ɓukuo

¹ Ɛmɛ Pɛtɛlɔ, titima wʉ Yeso Klisito, mʉnɨtɨndakɨa inu ɓombi ngiɓa Asʉɓɨɨ a꞉nɨchwa ʉbalʉa nguakɛ. Ʉɓɨɨ nguʉndɛnʉ wa ndʉ uwa wʉ ɓɛɛka ngiɓa ɓa꞉nanzana ɔɔ ɓangɛ akʉ gɨpa ʉ Pɔtɔ, iya wʉ Galatia, iya wʉ Kapadokia, iya wʉ Azia nʉ iya wʉ Bitinia.

² Asʉɓɨɨ Tidoo a꞉nɨchwa jɛnɛ kʉpɛɛ kuɓio tu 'upi akʉ 'Ʉtʉma wɔɔ Tu. A꞉kyɨa ɓwanɨ, kʉkpatanakɨa nʉ moni ngika a꞉tambanaka jɛnɛ kʉpɛɛ, aka ekoo ngia ɓɔ keni Yeso Klisito kɔnɨ, nambʉjaɓanakɨa nʉ miniki ngikangɔ ka꞉chichio. Ɨjɨɔ yɨ Asʉɓɨɨ nʉ majɨɔ kangɔ kuɓio aka ekoo ʉndɛnʉ nadɨndɨ!

Tuisio Asʉɓɨɨ ɨbɨba aka ekoo ɓʉhɨa

³ Kubibiseni Asʉɓɨɨ, ɨsɛ ʉ Makʉʉndɛsʉ Yeso Klisito! Aka ekoo ʉ 'ʉtʉma wʉ ikoko nguangɔ, jʉ ɛyɔ a꞉tinzo ʉɓɨɨ wʉ ɨtakɨ‑takɨ 'upi akʉ jʉkaniso Yeso Klisito akʉ ingyo ati ʉ ɓombi ngiɓa ɓa꞉dʉka. Kʉ ɓwanɨ, kakʉnapɨa itungwio ɓɔ ka꞊nyɨa nʉ ɓʉhɨa nyɨaa,

⁴ nʉ ka꞊kwanana kusiɓo nʉ ɨgyagya ɨjangɨa ngia Asʉɓɨɨ akʉpɨmakɨa ekoo ʉndɛsʉ ekoo ʉ ɓisi akʉ yambʉkʉtambɨa‑ɛɛ, gʉ ɓɔ kʉfa ikoki, nʉ akʉ yambʉkʉyangaa‑ɛɛ, jʉ Asʉɓɨɨ a꞉niɓusio ɛyɔ ɓusioo.

⁵ Asʉɓɨɨ ngia anʉ angu aanɨpɨmakɨa pɨmakɨaa, 'upi akʉ baya ngiindɛnʉ aka ekoo ngia ɓɔ nyɨeni nʉ ɓʉhɨa iɓa ɓa꞊pananɨa akʉ ɓisi ɓʉ 'upipio.

⁶ Kʉ ɓwanɨ, na ɓuhue nʉ ɨgyagya, abana ndʉ yɨkwanana ɓɔ na꞊ɓaa amati ʉ mɨgbʉ yɨ kanyo kʉ di di di iya ya꞊nɨnapɨa amati ʉ ikoko akʉ wati ɗɛkɛkɛ.

⁷ Ɓʉka‑ɓʉkaɨ ngiɓʉnanɨ ɓa aka ekoo kanyo baya ngiindɛnʉ. Ɔlɔ aatambɨa tambɨaa. Ɨkyɛmɨngana, kʉmbɨa ɓɔ a uɗo ɓaamʉya‑zʉ tʉkʉ akʉ dyaa. Ngbanga kʉndʉ iya ɓaaya‑ɔɔ ɔlɔ akʉ dyaa, baya ngiindɛnʉ, iya yɨɓaa ɔlɔ nʉ ɨjangɨa, yaaɓaa akʉ mɨgbʉ yɨ ɓʉka‑ɓʉkaɨ kʉ di di di kʉmbɨa ɓɔ ajʉ ya ɓʉmʉ gʉ chʉkɔɔ. Kʉ ɓwanɨ, Asʉɓɨɨ a꞊nibibiso sina, nʉ ninu kunzo imbangumba, nʉ ninu kʉtʉkʉa ati ngia Yeso Klisito a꞊ɓwanɨa sina‑ɔɔ.

⁸ Abana ndʉ nambakana Yeso kititi, ɨkyɛmɨngana naakyɨa nayɔ tʉkʉ kʉkʉnda. Naakyɨa nayɔ kʉbaya nambʉmʉnenikɔmʉ. Iikwa na‑ɔɔ kʉkwa ɨgyagya yɨ ɨbɨba iya mombi ambʉkwakɔmʉ sina.

⁹ Ɨgyagya ngiinanɨ na꞉nyɨa nayɔ jʉ na꞉hɨa hɨaa. Iinanɨ ya ʉkʉa ngua na꞉nyɨa nawɔ aka na꞉baya‑ɔɔ Yeso.

¹⁰ Lɨgbɛ lʉ Asʉɓɨɨ la꞉kpingbikiso nʉ hata moni maja ekoo ɓʉhɨa ngiɓʉnanɨ, kija ɛɓɔ ɓa꞉yaka kʉpɛɛ moni aka ekoo apɛpɛ ngia Asʉɓɨɨ a꞉nɨnapɨa.

¹¹ Lɨgbɛ ngilʉnanɨ la꞉hata kʉmbɨa wati, nʉ ɨngbaa ngia moni ngikʉnanɨ ka꞊kyɨanɨa‑ɔɔ kʉkpatanakɨa ndʉ aka 'Ʉtʉma wʉ Klisito wi꞉nye‑ɔɔ naɓɔ kʉpana. 'Ʉtʉma nguʉnanɨ wi꞉nye amati ʉndaɓʉ, wa꞉ɓʉɓɨa kʉpɛɛ ɓʉka‑ɓʉkaɨ ngiɓa Klisito a꞉kwanana adya nʉ ɨbɨba ngia yi꞉nye yakpata mbise ɔngɔ.

¹² Asʉɓɨɨ a꞉ɓɨa lɨgbɛ kʉpɛɛ ɓɔ ɨsaʉ ngia ɓi꞉nye kʉɓɨakɨa engo yambikinye akʉ ɛɓɔ ɓakʉɓɔngɔ, ɨkyɛmɨngana ɓi꞉nye kʉɓɨakɨa ekoo ʉndɛnʉ. Ɨtakɨ‑takɨ ngiakɛ, ɓombi ngiɓa ɓakʉɓɨakɨa Ɨsaʉ yɛɛ Iɗo ɓa꞉nɨɓɨakɨa moni ngikʉnanɨ nʉ angu wʉ 'Ʉtʉma wɔɔ Tu ngua ɓa꞉ʉtʉma kʉʉngwa ekoo ʉ ɓisi. Nʉ ɨsaʉ ngiinanɨ, ɓamalaika ɛɓɔ ɓakʉɓɔngɔ ɓakʉtananɨa nadɨndɨ ɓɔ ɓuipimiso ɔgɔ kʉ pimisoo.

Ɓieni tu apɛɛ ʉ Asʉɓɨɨ

¹³ Kʉ ɓwanɨ, ɓieni ɓʉndanɛ kʉkyɨa kuu. Ɓieni mesu ɓʉ gbɛ. Napɨeni itungwio ngiindɛnʉ kʉ iɓomu akʉ apɛpɛ ngia na꞊nyɨa nayɔ ati ngia Yeso Klisito a꞊ɓwanɨa‑ɔɔ.

¹⁴ Kumeni Asʉɓɨɨ, nɔɔɓio tii ɓata kʉkpata ɓʉtɨpɨ ɓʉ ɨtaka ngiɓa ni꞉nye kyɨa amati ɔngɔ ati ngia ni꞉nye nambʉmbɨenikɔmʉ‑ɔɔ Yeso Klisito.

¹⁵ Ɨkyɛmɨngana, kʉndʉ Asʉɓɨɨ ngia a꞉nisoko a tu, inu ɓieni kʉ tu akʉ ɨkyananakɨa ngiindɛnʉ kʉ iɓomu.

¹⁶ Jʉ Mubio kʉ Asʉɓɨɨ kakusigo ɓɔ: « Ɓieni tu jʉ ɛmɛ ma kʉ tu. »

¹⁷ Amati ʉ nɨta ngiindɛnʉ naasoko Asʉɓɨɨ ɓɔ Tidoo, ɛyɔ ngia aatɨna 'ʉkɔmbɔ wʉ ɓombi ku ɓuɓomu chʉkɔmʉ nʉ mbomboko ɓombi, kʉkpatanakɨa tʉkʉ nʉ ɨkyananakɨa yɨ mombi kʉ nangana nangana. Kʉ ɓwanɨ, akʉ makwaa ngika na‑zʉ‑ɔɔ kʉ ya akʉ ɨtaka, nʉkwanana kʉkɨndaka nʉ ʉɓa wʉ Asʉɓɨɨ amati ʉndɛnʉ akʉ lɨngbaa lʉ moni kʉ liɓomu.

¹⁸ Naambɨa iɗo ɓɔ Asʉɓɨɨ a꞉niɓwanakiso akʉ ɨkyananakɨa yɛɛ gbaɨ ngia na꞉chɨka nʉ ɓatʉngwanɨ ɓʉndɛnʉ iya yambʉkɔmʉ nʉ dada. A꞉kyɨakɔmʉ ɓwanɨ jʉ na꞉nzo lɨkyɛmɛ lʉ ɨgabʉ ndʉ falanga, ndʉ ɔlɔ, ila laakwanana kusio dada ɔngɔ.

¹⁹ Ɨkyɛmɨngana, a꞉nɨɓwanakiso nʉ miniki kʉ ɨgabʉ ngika kʉ Klisito ika ka ndʉ mwana ʉ kɔndɔlɔ ngia ambʉkɔmʉ nʉ ʉdɛɛ, chʉkɔmʉ nʉ ɨɗa.

²⁰ Asʉɓɨɨ a꞉chwa Yeso pɛɛ ɔɔkyɨɛ ɨtaka, iinanɨ tʉkʉ akʉ iɗo yɨndɛnʉ, ambʉmʉpana tiga akʉ ɓʉmba akʉ maɓisi ngika kʉ 'upipio akɛ.

²¹ 'Upi akʉ Klisito iiya inu na꞉baya‑ɔɔ Asʉɓɨɨ ngia a꞉mʉjʉkaniso akʉ ingyo, ambumunzo ɨbɨba. Inyi yɨ moni ngia na꞉baya‑ɔɔ Asʉɓɨɨ nʉ napɨa itungwio ngiindɛnʉ ekoo ɔngɔ iinanɨ.

²² Inu na꞉jaɓanakɨa jaɓanakɨaa, aka ekoo ʉ kpata ingono, nʉ kʉkʉndana kingono ati ʉndɛnʉ ndʉ ɓayoo chʉkɔmʉ nʉ ɓufili. Kʉ ɓwanɨ, kʉndaneni ati ʉndɛnʉ nadɨndɨ nʉ 'ʉtʉma kʉ uɓomu.

²³ Na꞉nʉtanɨa kʉtɔ, chʉkɔmʉ 'upi akʉ ɓatɔ ɓʉndɛnʉ ngiɓa ɓʉ ndʉtʉ ngia yaawu woni, ɨkyɛmɨngana tʉkʉ akʉ angu wʉ ndʉtʉ ngia yambakawo. Inu na꞉nʉtanɨa akʉ angu wʉ Ɨsaʉ yɨ Asʉɓɨɨ ngia ya kʉkʉʉ, iya yaagbalɨa akʉ mɨtʉ yɨ ɨpá nʉ mɨtʉ yɨ ɨpá.

²⁴ Jʉ Mubio kʉ Asʉɓɨɨ kakusigo ɓɔ: « Ɓombi ɓʉ ɨtaka kʉ ɓuɓomu ɓa ngbanga ndʉ yanza, nʉ ɨbɨba ngiindaɓʉ ya ngbanga ndʉ ɨwʉa. Ndʉ yanza yaamɔkɔkɔ, ɨwʉa yɛngɔ yambʉɓwana akɛsɨ.

²⁵ Ɨkyɛmɨngana, Ɨsaʉ yɨ Asʉɓɨɨ yaɓio sina tʉkʉ akʉ mɨtʉ yɨ ɨpá nʉ mɨtʉ yɨ ɨpá. » Ɨsaʉ ngiinanɨ ya Ɨsaʉ yɛɛ Iɗo ngia ɓa꞉nɨɓɨakɨa.