MIHA 2 - Pustaka Si Badia

Ukumen man kalak si nindas kalak musil

¹ Cilaka me kalak si la tunduh-tunduh i bas inganna medem taren ngukurken kejahaten. Enggo kenca matawari pultak erpagi-pagi, adi lit kenca kesempaten, idalankenna minter kejahaten si enggo irencanakenna.

² Mengga atena juma kalak, irampasna; mengga atena rumah kalak, ibuatna. La lit ibahanna aman jabu ras erta kalak.

³ Erkiteken si e nina TUHAN, “Aku ersura-sura maba cilaka man bandu, dingen la ngasup kam pulah i je nari. Reh me man bandu paksa keguluten, janah kenca bage lanai bo kam erdalan alu ukur meganjang.

⁴ Kenca paksa si e enggo seh, ibahan kalak me kam jadi kuan-kuan penguru-ngurun, janah iendekenna me ende-enden aru ate kerna kai si jadi man bandu nina: Enggo keri kal kami radas! TUHAN enggo muat taneh kami, janah iberekenNa taneh e man kalak si naban kami.”

⁵ Erkiteken si e, kenca seh pagi paksana iberekenNa ka taneh e man bangsa TUHAN, la lit sada pe kam si dat bagin i je.

⁶ Erkhotbah kalak ndai man bangku nina, “Ola kam erkhotbah man kami. Ola inubuatkenndu kerna si ndai kerina. Dibata labo nggit njuruken kami.

⁷ Akapndu kin kalak Israel kena sumpah? Enggo kin bene kesabaren TUHAN? Tuhu-tuhu kin ateNa ngelakoken si e? Ma mehuli kin cakapNa man kalak si ngelakoken si benar?”

⁸ Nina TUHAN njabapsa, “Tapi bagi musuh perbahanenndu man bangsangKu. Kalak si mulih i bas perang nari, iakapna aman i kuta; tapi i je me kam nimai, janah nangko jubahna i bas gurungna nari.

⁹ Diberu bangsangKu ipelawesndu i bas rumahna nari si ngena atena, dingen i bas anak-anakna nari irampasndu kemulianKu seh rasa lalap.

¹⁰ Kekeken, je nari laweslah! Lanai lit ketenengen i jenda. Dosa-dosandu enggo maba cilaka man ingan enda gelah ikernepken.

¹¹ Bangsa enda ngena atena man nabi si lawes ku jah ku jenda nuriken kata guak dingen penipu alu ngataken, “Kunubuatken anggur ras inemen keras maler man bandu.”

¹² Tapi Kupepulung me kam kerina, o kam kalak Israel si tading denga. Kupersada kam kerina desken biri-biri mulih ku rarasenna. Desken mbalmbal dem alu biri-biri, tanehndu enda pe dem pagi mulihi alu jelma.”

¹³ Italangi Dibata me dalan man bana janah ibabaiNa ia mulih i bas pembuangen nari. Ndarat ia arah pintu gerbang kuta, je nari bebas. Rajana, e me TUHAN, Ia jine me si naruhkenca.