MATIUS 4 - Pustaka Si Badia

Percuban man Jesus

¹ Kenca bage Kesah Dibata mabai Jesus ku gurun pasir guna icubai Iblis.

² Kenca empat puluh wari empat puluh berngi Jesus la man igejapNa melihe.

³ E maka reh Iblis ncubai IA nina, “Erkiteken Kam Anak Dibata salihken dage batu enda jadi roti.”

⁴ Ngaloi Jesus nina, “Lit kap tersurat i bas Pustaka Si Badia: Labo alu roti saja manusia enggeluh, tapi arah tep-tep kata si ibelasken Dibata.”

⁵ Jenari ibabai Iblis me Jesus ku Jerusalem janah isuruhna IA tedis i babo anjung-anjung Rumah Pertoton.

⁶ Jenari nina man Jesus, “Adi Anak Dibata kin kam, dabuhken man baNdu ku teruh, sabap lit tersurat i bas Pustaka Si Badia bagenda: ‘Isuruh Dibata kap malekat-malekatNa reh njagai Kam, itatangna nge Kam alu tanna gelah naheNdu pe la terantuk ku batu.’ ”

⁷ Ngaloi Jesus, “Tapi lit tersurat i bas Pustaka Si Badia ‘Ola cubai Tuhan Dibatandu.’ ”

⁸ Ibabai Iblis e ka Jesus ku deleng si seh kal ganjangna. Jenari ituduhkenna man Jesus kerina kerajan doni enda ras kinibayakenna.

⁹ Nina Iblis e man Jesus, “Kerina kerajan doni enda ras kiniulinna kubereken man baNdu, adi nggit Kam erjimpuh nembah man bangku.”

¹⁰ E maka ngaloi Jesus nina, “Laweslah Iblis! Lit kap tersurat i bas Pustaka Si Badia: ‘Sembahlah Tuhan Dibatandu, janah IA saja ngenca patut man sembahen!’ ”

¹¹ Kedungenna itadingken Iblis e Jesus; e maka reh malekat-malekat nampati IA.

Jesus menaken dahinNa i Galilea

¹² Kenca ibegi Jesus berita maka Johanes Peridiken enggo ipenjaraken, lawes IA ku Galilea.

¹³ ItadingkenNa Nasaret e maka lawes IA ringan i Kapernaum. Kapernaum e me sada kuta i tepi Dano Galilea, daerah Sebulon ras Naptali.

¹⁴ Alu bage seh me kai si ikataken Nabi Jesaya nina,

¹⁵ “Taneh Sebulon ras taneh Naptali, dalan kempak lawit, i lepar Lau Jordan, daerah Galilea si ni ingani kalak si labo bangsa Jahudi!

¹⁶ Kalak si ringan i bas gelap, enggo ngidah terang si mbelin e! Man kalak si ringan i bas taneh si ikuasai kematen enggo mbincar terang e!”

¹⁷ I bas paksa si e nari me ibenaken Jesus ngajar nina, “Jeralah kam i bas dosandu nari, sabap Kinirajan Surga enggo reh deherna.”

Jesus ndilo empat kalak penjala nurung

¹⁸ Asum Jesus erdalan-dalan i tepi Dano Galilea, idahNa dua kalak si sembuyak sangana njala nurung. Si dua kalak e, e me Simon (igelari Petrus) ras Andereas.

¹⁹ Nina Jesus man bana, “Mari, ikutken Aku, maka Kuajari kam ndilo kalak si deban jadi ajar-ajarKu.”

²⁰ Minter itadingken kalak e jalana jenari ikutkenNa Jesus.

²¹ Asum iterusken Jesus erdalan, idahNa ka dua kalak si sembuyak. Si dua kalak e, e me anak Sebedeus, gelarna Jakup ras Johanes. Kalak enda i datas perahu ras bapana sangana pesikap jala. Asum idilo Jesus ia duana,

²² minter itadingkenna perahu e bage pe itadingkenna bapana. Jenari ikutkenna Jesus.

Jesus ngajar, erkhotbah dingen pepalem kalak si penakiten

²³ Isiari Jesus kerina daerah Galilea. Ngajar IA i bas rumah-rumah pertoton dingen iberitakenNa Berita Si Meriah kerna Kinirajan Surga. IpepalemNa kerina penakit bage pe si mesui i bas daging kalak e nari.

²⁴ Perbahanen Jesus e mbar beritana ku belang-belang negeri Siria seh maka nterem kalak ndahi Jesus. Itaruhken kalak man baNa kerina si penakiten. Erbage-bage penakit kalak si reh e; lit si setanen, lit si tabun, janah lit si pangpangen. Kerina ipepalem Jesus.

²⁵ E maka nterem kal kalak si ngikut-ngikut Jesus; lit i Galilea nari, i Dekapolis nari, i Jerusalem nari; i Judea nari bage pe i daerah lepar Lau Jordan nari.