MATIUS 27 - Pustaka Si Badia

Jesus ibaba ngadap man Pilatus

¹ I bas erpagi-pagi si lampas pulung kerina imam-imam si mbelin ras pertua-pertua kalak Jahudi. Enggo ersada arihna guna munuh Jesus.

² Igarikenna Jesus jenari iendeskenna man Pilatus, Gubernur Pemerentah Roma.

Si Judas mate

³ Ngidah Jesus ibaba ku pengadilen erkadiola Judas. Jenari iulihkenna duit pirak si telu puluh e man imam-imam si mbelin ras peminpin-peminpin kalak Jahudi.

⁴ Nina Judas, “Aku enggo erdosa sabap kududurken kalak si la ersalah guna ibunuh.” Ngaloi imam-imam si mbelin ras peminpin e, “Kerna si e la urusen kami. Ena urusenndu.”

⁵ Ibenterken Judas duit e ku bas Rumah Pertoton, jenari lawes ia ndelis.

⁶ Ibuat imam-imam si mbelin duit e, jenari nina, “Duit enda duit dareh, e maka rikutken Undang-undang agamanta la banci ipersembahken man Dibata.”

⁷ Kenca icakapken ras-ras itukurkenna duit e ku Taneh Pande Kudin, guna ijadiken kuburen kalak pertandang.

⁸ Perbahan si e me maka seh asa genduari taneh e igelari “Taneh Dareh”.

⁹ Alu bage enggo seh kai si ikataken Nabi Jeremia nina, “Ibuatna duit pirak telu puluh, e me erga sekalak jelma si itetapken kalak Israel,

¹⁰ jenari itukurkenna ku taneh pande kudin, bagi enggo ikataken Tuhan man bangku.”

Penungkunen Pilatus man Jesus

¹¹ Kenca e Jesus ibaba ku adep-adepen Gubernur. Jenari nungkun Gubernur e man Jesus, nina, “Kam kin Raja kalak Jahudi?” Erjabap Jesus, “Bagi katandu e me.”

¹² Tapi pengadun imam-imam si mbelin ras peminpin-peminpin e kerna IA sengkebabah ranan pe la ijabapNa.

¹³ E maka nina Pilatus man baNa, “La kin ibegindu pengadun kalak enda kerina?”

¹⁴ Tapi sengkebabah ranan pe la ijabap Jesus, e maka mamang kal ate Gubernur e.

Ukumen Jesus iputusken ukumen mate

¹⁵ Enggo jadi kebiasan maka i bas tep-tep Wari Raya Paskah ibebasken Pilatus sekalak kalak tahanen si ipilih kalak si nterem.

¹⁶ Paksa si e lit sekalak i bas penjara terberita kal kejahatenna, gelarna Barabas.

¹⁷ E maka kenca pulung jelma si nterem nungkun Pilatus nina, “Ise atendu kubebasken, Barabas ntah Jesus si igelari Mesias e?”

¹⁸ Terang ieteh Pilatus maka Jesus iendesken man bana erkite-kiteken cian ate kalak ngenehen Jesus.

¹⁹ Asum Pilatus kundul i bas ingan ersidang, isuruh ndeharana pertenahen, ndahi ia ngataken, “Ola campurindu urusen kalak si bujur e, sabap gulut kal nipingku nderbinai kerna IA.”

²⁰ Imam-imam si mbelin ras pertua-pertua kalak Jahudi ngendik-ngendik jelma si nterem guna ngataken man Pilatus gelah Barabas ibebasken janah Jesus ibunuh.

²¹ Tapi nungkun Gubernur, “Apai atendu kubebasken i bas si dua kalak enda?” Erjabap jelma si nterem e, “Barabas!”

²² Nungkun ka Pilatus, “Adi bage, kuga dage kubahan Jesus si igelari Mesias enda?” Erjabap kalak e kerina, “Pakukenlah IA ku kayu persilang!”

²³ Tapi nina Pilatus, “Kai kin salahNa?” Lanai ibegiken jelma si nterem Gubernur e ngerana. Tapi reh gangna sorana nina, “Pakukenlah IA ku kayu persilang!”

²⁴ Ngidah si e lanai akap Pilatus tersuriangi kalak si nterem sabap reh gejekna nari nge maka banci, e maka ibuatna lau, iburihina tanna i lebe-lebe kalak si nterem janah nina, “Aku la ertanggung jawab i bas kematenNa! Kamlah si ertanggung jawab!”

²⁵ Ngaloi kerina kalak si nterem nina, “I bas kematenNa kami kerina ertanggung jawab ras anak-anak kami.”

²⁶ Jenari ibebasken Pilatus si Barabas, tapi Jesus isuruhna iligasi perajurit dingen iendeskenna pe gelah ipakuken ku kayu persilang.

Jesus igombang-gombangi perajurit

²⁷ Ibaba perajurit Jesus ku istana gubernur, ije kerina perajurit engkeleweti IA.

²⁸ Itangtangina uis Jesus, jenari ipakekenna man Jesus uis si megara.

²⁹ Kenca bage ibahanna sada tengkuluk duri jenari itamakenna ku takal Jesus janah itamakenna pe ciken buluh ku tan Jesus si kemuhen. Igombang-gombangi kalak e Jesus, erjimpuh ia i lebe-lebeNa, jenari nina, “Tabi, o Raja kalak Jahudi!”

³⁰ Jenari icidurina, ibuatna buluh e, ipekpekkenna ku takal Jesus.

³¹ Kenca puas akapna nggombang-gombangi Jesus, itangtangina uis si megara e jenari ipakekenna ka mulihken uis Jesus si tangtangna ndai. Kenca bage ibabana Jesus ndarat gelah ipakuken ku kayu persilang.

Jesus ipakuken ku kayu persilang

³² Asum rombongen e erdalan ku darat kuta, jumpa ia ras Simon kalak Kireni. Simon enda me ipaksa perajurit-perajurit maba kayu persilang Jesus.

³³ Jenari seh me ia kerina ku sada ingan si igelari Golgota, ertina: “Ingan takal-takal”.

³⁴ I je ibereken kalak ndai inem Jesus anggur si enggo icampur ras pegu; tapi kenca icecap Jesus, la IA nggit nginemsa.

³⁵ Kenca Jesus ipakuken perajurit-perajurit e, itikam-tandukkenna uis Jesus.

³⁶ Jenari kundul ia njagai Jesus.

³⁷ Arah babo takal Jesus isuratkenna kesalahen si erbahanca IA iukum mate: “Enda Jesus, Raja kalak Jahudi”.

³⁸ Jenari ipakukenna ka dua kalak jahat, sekalak arah kemuhen Jesus, janah sekalak nari arah kawesNa.

³⁹ Kalak si mentas arah ingan e ngupir, janah icekurakina Jesus nina,

⁴⁰ “IruntuhkenNdu ateNdu Rumah Pertoton dingen majekkenca i bas telu wari! Adi Kam kin Anak Dibata, pulahilah baNdu. Nusurlah i kayu persilang e nari!”

⁴¹ Imam-imam si mbelin pe ras guru-guru agama bage pe peminpin-peminpin kalak Jahudi nggombang-gombangi Jesus nina,

⁴² “Kalak si deban ipulahiNa tapi IA jine la terpulahiNa baNa. Ma IA kin Raja kalak Israel? Adi nusur IA genduari, tek kami man baNa!

⁴³ IA tek man Dibata janah ikatakenNa maka IA me Anak Dibata. Sinehenlah ntah nggit kin Dibata mulahi IA genduari.”

⁴⁴ Kalak jahat si ipakuken ras IA e pe nggombang-gombangi IA.

Jesus mate

⁴⁵ Mulai ciger gelap kerina negeri e, telu jam dekahna.

⁴⁶ Kira-kira jam telu karaben serko Jesus alu sora megang, nina, “Eli, Eli, lama sabakhtani?” ertina: “O, DibatangKu, o, DibatangKu, ngkai maka itadingkenNdu Aku?”

⁴⁷ Piga-piga kalak si tedis i je megi sora Jesus, e maka nina, “IlebuhNa Elia!”

⁴⁸ Minter kiam sekalak muat bunga karang. Icelupkenna bunga karang e ku bas anggur si macem, jenari idudurkenna ku babah Jesus alu galah.

⁴⁹ Tapi nina kalak si deban, “Timai lebe, sinehen ntah reh kin Elia e mulahi IA!”

⁵⁰ Sekali nari serko Jesus jenari keri kesahNa.

⁵¹ Paksa si e merigat kire-kire Rumah Pertoton idas nari seh ku teruh. Taneh linuren, uruk-uruk batu pecah,

⁵² kuburen-kuburen talang, janah nterem kalak si badia si enggo mate ipekeke Dibata i bas si mate nari.

⁵³ Itadingkenna kuburen e; janah kenca keke Jesus i bas si mate nari bengket ia ku Jerusalem; i je nterem kalak ngidah ia kerina.

⁵⁴ Asum perwira ras perajurit-perajurit si erjaga ngidah kejadin e kerina, mbiar kal ia, janah nina, “Tuhu-tuhu me IA Anak Dibata.”

⁵⁵ I dauh-dauh nari nterem diberu ngenehenca. Diberu e, e me si ngikutken Jesus i Galilea nari dingen si enggo nampati Jesus.

⁵⁶ Piga-piga i bas si e, e me Maria Magdalena, Maria nande Jakup ras Jusup bage pe ndehara Sebedeus.

Jesus ikuburken

⁵⁷ Kenca ben wari, reh sekalak kalak bayak; ia kalak Arimatea, gelarna Jusup. Ia enggo tek man Jesus.

⁵⁸ Ngadap ia man Pilatus guna mindo mait Jesus. Isuruh Pilatus perajurit-perajurit mereken mait e man Jusup.

⁵⁹ Ibuat Jusup mait Jesus e, ibalutina alu kain dagangen mbaru,

⁶⁰ jenari itamakenna ku bas kuburenna jine. Kuburen e mbaru denga itukakna i bas lingling batu. Kenca igulingkenna batu si mbelin guna nutupi kuburen e lawes ia.

⁶¹ Maria Magdalena ras Maria si deban kundul ngalaken kuburen e.

Kuburen Jesus ijaga

⁶² Pepagina kenca wari persikapen wari Sabat ngadap imam-imam si mbelin ras kalak Parisi man Pilatus.

⁶³ Nina man Pilatus, “O tuan, inget kami maka nina penipu e asum IA nggeluh denga, ‘Kenca telu wari ipekeke me Aku.’

⁶⁴ E maka suruhlah perajurit-perajurit erjaga i kuburen seh wari peteluken. Adi lang, banci reh ajar-ajarNa nangkosa jenari ikatakenna man kalak si nterem, ‘IA enggo ipekeke ibas si mate nari.’ Adi bage penipun si peduaken enda keleken asa si arah lebe.”

⁶⁵ Ngaloi Pilatus, “Babalah perajurit-perajurit, to lawes janah jagailah kuburen e asa ngasupndu.”

⁶⁶ E maka lawes ia ku kuburen, ibahanna cap ibas batu kuburen e jenari isuruhna perajurit-perajurit njagaisa.