MATIUS 24 - Pustaka Si Badia

Ituriken Jesus kerna keruntuhen Rumah Pertoton

¹ Ndarat Jesus i bas Rumah Pertoton nari. Asum IA lawes nadingken Rumah Pertoton e, ideheri ajar-ajarNa IA, jenari ituduhken ajar-ajar e man baNa Rumah Pertoton.

² Nina Jesus man ajar-ajarNa, “Ma idahndu kin kerina enda? Kukataken man bandu: Kerina nge pagi runtuh, lanai sada batu pe pagi tading i bas inganna.”

Kiniseran ras peniksaan

³ Kenca kundul Jesus i Uruk Seton, reh ajar-ajarNa ndeheri IA jenari ercakap-cakap ia ras. Nina ajar-ajarNa man baNa, “Kataken min man kami: Ndigan kin kerina enda jadi? Kai nge pagi tanda-tanda kerehenNdu dingen kai nge pagi tanda-tanda kedungen jaman enda?”

⁴ Erjabap Jesus, “Jagalah gelah ola kam papak ibahan kalak.

⁵ Nterem pagi kalak reh i bas gelarKu nina, ‘Aku kap Mesias si ipadanken Dibata,’ janah nterem ibahanna jelma papak.

⁶ Ibegindu pagi sora perang ras berita kerna perang i bas ingan si ndauh. Amin bage gia ola aru atendu, sabap kerina si enda arus jadi, tapi e pe langa bo seh ku kedungenna.

⁷ Bangsa pagi ngelawan bangsa, kerajan ngelawan kerajan. I jah-i je terjadi kelihen ras taneh pe linuren.

⁸ Tapi kerina enda permulan denga nge, seri ras penggejapen mesui sanga kalak nandangi mupus.

⁹ I bas paksa e pagi kerina kalak rate segat man bandu erkiteken Aku. Isiksana me kam jenari ibunuhna.

¹⁰ Nterem pagi kalak murtad; si adun ras si cian-cianen.

¹¹ Rehen pe nabi perguak erbahanca nterem kalak papak.

¹² Perbahan reh buena kejahaten e maka nterem kalak reh kurangna kekelengenna.

¹³ Tapi kalak si megenggeng seh ku kedungenna terkelin kap.

¹⁴ Janah kenca Berita Si Meriah kerna Kinirajan e iberitaken man manusia i belang-belang doni enda, jadi saksi man kerina bangsa, kenca bage maka seh me kedungenna e.”

Perbahanen ngelawan Dibata

¹⁵ “Idahndu pagi kejahaten si ciga ate encedai tedis i bas Ingan si Badia, bagi enggo ikataken Nabi Daniel. (Iantusi si ngogesa min kai erti kata enda!)

¹⁶ Paksa si e pagi kalak si ringan i Judea arus kiam ku uruk-uruk.

¹⁷ Kalak si kundul-kundul i darat pekesahken olanai bengket ku rumah ngelegi barang-barangna.

¹⁸ Kalak si sangana i juma olanai ku rumah ngelegi uisna.

¹⁹ O, andiko kuahna ate pernanden si sangana mehuli kulana bage pe pernanden si sangana pepinemken i bas paksa si e!

²⁰ Ertotolah man Dibata gelah si enda kerina ola jadi i bas paksa-paksa perudan tah pe wari Sabat!

²¹ Sabap kiniseran si jadi paksa si e pagi ndauh keleken asa si enggo pernah jadi, mulai kin tembe doni seh ku wari enda, janah kenca si e lanai bo pagi lit kejadin si bage.

²² Tapi beligan warina enggo ipegendeki Dibata; adi la kin enggo ipegendekiNa ise pe la bo lit terus nggeluh. Ipegendeki Dibata me wari kiniseran e nginget kalak si enggo ipilihNa.

²³ Paksa si e pagi adi lit kalak si ngataken man bandu, ‘I jenda kap Mesias si ipadanken Dibata’ ntah nina, ‘I jah kap IA’, ola kam tek.

²⁴ Sabap reh me Mesias palsu ras nabi-nabi perguak; ibahanna me tanda-tanda sengget si mbelin, sabap atena, adi banci, gelah papak kalak si enggo ipilih Dibata.

²⁵ Ingetlah! Kerina enda enggo leben Kukataken man bandu ope denga jadi.

²⁶ Ntah pe, adi lit kalak ngatakenca man bandu, ‘Mesias si ipadanken Dibata e genduari i taneh si melungun,’ ola dahi ku je; ntah pe adi nina, ‘I jenda IA cebuni,’ ola kam tek.

²⁷ Sabap Anak Manusia si isuruh Dibata e reh pagi bagi kilap erkincar i Timur nari ku Barat.

²⁸ I ja lit bangke i je pulung kuliki, si man bangke.”

Kerehen Anak Manusia si isuruh Dibata

²⁹ “Kenca lepas wari-wari kiniseran e, minter gelap matawari, bulan la nai ersinalsal, bintang-bintang nartar i langit nari janah kuasa-kuasa si lit i langit mugur-ugur.

³⁰ Jenari teridah tanda Anak Manusia si isuruh Dibata i langit janah tangis kerina bangsa manusia i doni enda. Idahna me pagi Anak Manusia si isuruh Dibata e reh i datas embun; alu kuasa ras kiniulin si mbelin.

³¹ Kenca bage terbegi me sora terompet si megang jenari isuruhNa me malekat-malekatNa ndarat ku belang-belang doni enda. Ipepulung malekat-malekat e me kalak si enggo ipilih Dibata i bas tampuk doni nari ku tampukna si deban.”

Pelajaren i bas batang ara nari

³² “Bahanlah batang ara jadi pelajaren man bandu. Adi idahndu dahanna meratah janah erbulung nguda ia, ietehndu maka musim perlego enggo ndeher.

³³ Bage me pe, adi idahndu pagi jadi kerina si Kukataken enda ndai, ietehndu me maka enggo ndeher kedungen doni enda.

³⁴ Ingetlah! Si enda pagi kerina jadi ope denga keri mate kalak si genduari enda.

³⁵ Langit ras doni masap kap pagi; tapi KatangKu tetap rasa lalap.”

Ise pe la meteh warina ntah jamna

³⁶ “Kerna warina ntah jamna kejadin e la lit kalak si metehsa. Malekat-malekat si i Surga pe lang, janah Anak e pe lang; Bapa ngenca metehsa.

³⁷ Kerehen Anak Manusia si isuruh e pagi bali kap ras kai si jadi i bas paksa Nuah nai.

³⁸ Bagi nai ope denga reh lau mbelin kerina kalak si nggeluh paksa si e man dingen minem, sereh dingen empo seh ku warina Nuah bengket ku bas perahu;

³⁹ sitik pe la ietehna kai nandangi jadi man bana ope denga reh lau mbelin si erbahanca ia mombak kerina. Bage ka me pagi jadi asum reh Anak Manusia si isuruh Dibata e.

⁴⁰ Paksa si e pagi lit dua kalak dilaki erdahin i juma: sekalak pagi ibuat, janah si sekalak nari itadingken.

⁴¹ Dua kalak diberu sangana nutu: sekalak pagi ibuat, sekalak nari itadingken.

⁴² E maka erjaga dingen ersikaplah, sabap la ietehndu ndigan Tuhanndu reh.

⁴³ Ingetlah! Adi ieteh tuan rumah katawari reh pinangko, tentu erjaga-jaga ia dingen la ipelepasna rumahna e ibongkar pinangko.

⁴⁴ E maka kam pe erjaga-jagalah, sabap Anak Manusia si isuruh Dibata e reh i bas paksa si la iarapndu.”

Perumpaman kerna juak-juak si tutus ras juak-juak si la tutus

⁴⁵ “Adi bage, ise dage juak-juak si tutus dingen pentar? IA me si ipercayaken tuanna jadi kepala juak-juak si deban guna mbagiken pangan man juak-juak e i bas paksana.

⁴⁶ Malem me ate juak-juak e adi idapeti tuanna ia sangana ndahiken dahinna.

⁴⁷ Kukataken man bandu: Tuhu-tuhu iangkat tuan e me ia jadi pengawas i bas kerina erta-ertana.

⁴⁸ Tapi adi la mehuli ukur juak-juak e tentu nina i bas ukurna, ‘Tuanku ndekah denga nge maka mulih,’

⁴⁹ jenari ipekpekina juak-juak si deban, mangani dingen minem ia seh mabuk.

⁵⁰ Jenari reh me tuan e i bas paksa si la ietehna dingen la isangka-sangkana.

⁵¹ Ibunuh tuan e me ia janah bali ia ibahanna ras kalak pekulah-kulah. I je tangis dingen mesui kal atena.”