MATIUS 23 - Pustaka Si Badia

Yesus ncakapken kalak Parisi bage pe Guru-guru Undang-undang

¹ Jenari ngerana Jesus man kalak si nterem bage pe man ajar-ajarNa,

² nina, “Guru-guru agama ras kalak Parisi e, si nerusken ajar-ajaren Musa kap.

³ E maka ikutkenlah kai si ikatakenna man bandu. Tapi ola usih si ibahanna, sabap kai si iajarkenna la idalankenna.

⁴ Baban si mberat iampekenna ku bara kalak tapi ia sitik pe la nggit mabasa.

⁵ Ntah kai gia ibahanna, tujunna e me gelah ia idah kalak. Perdiatekenlah tulisen ayat-ayat Pustaka Si Badia si ililetken i perdempakenna ras i bas pergelangen tanna! Bage pe perdiatekenlah ambu-ambu uisna si nggedang!

⁶ Lit kenca kerja-kerja kundul ia arah ingan si mehamat, janah i bas rumah pertoton pe arah lebe ia kundul;

⁷ atena gelah mehamat kalak man bana i tiga janah atena ikataken kalak ia ‘Guru’.

⁸ Tapi kam, ola kam nggit ikataken kalak ‘Guru’, sabap sada ngenca Gurundu, janah kam kerina ersenina.

⁹ Ola ise pe i doni enda ikatakenndu ‘Bapa’, sabap sada ngenca Bapandu e me Dibata.

¹⁰ Bage pe ola kam nggit ikataken kalak ‘Peminpin’, sabap sada ngenca Peminpinndu, e me Mesias si ipadanken Dibata.

¹¹ Ise si mbelinna i bas kam, ialah si ngelai kam kerina.

¹² Ise si peganjangken bana, ipeteruk Dibata me, janah ise si peteruk bana, ipeganjangken Dibata me IA.”

Ipandang Jesus kalak si pekulah-kulah

¹³ “Andiko, cilaka kal kam o, guru-guru agama, janah kam pe o, kalak Parisi! O, kalak pekulah-kulah! Iolang-olangindu kalak gelah ola bengket ku bas Kinirajan Surga. Kam jine la nggit jadi rayat Kinirajan Surga, janah kalak si deban pe iolang-olangindu. [

¹⁴ Andiko, cilaka kal kam o, guru-guru agama, janah kam pe o kalak Parisi! O, kalak pekulah-kulah! Ibuatndu erta-erta diberu si enggo mbalu jenari ibahanndu pertoton si nggedang i lebe-lebe jelma si nterem. Perbahan si enda, kugapa pe reh beratna ukumenndu.]

¹⁵ Andiko, cilaka kal kam o guru-guru agama, janah kam pe o, kalak Parisi! O, kalak pekulah-kulah! Isiarindu lawit ras daraten si mbelang guna ndatken sekalak jelma gelah ikutkenna agamandu; tapi kenca idatndu, ijadikenndu ia jadi calon naraka si dua kali lipat jahaten asangken kam.

¹⁶ Andiko, cilaka kal kam, o peminpin-peminpin si pentang! Sabap nindu, ‘Adi lit kalak ersumpah i bas gelar Rumah Pertoton, sumpahna e la esah; tapi adi ersumpah i bas gelar emas si lit i bas Rumah Pertoton, sumpahna e esah.’

¹⁷ Kam kalak motu dingen pentang! Apai kin pentingen, emas ntah Rumah Pertoton si erbahanca emas e badia?

¹⁸ Bage pe nindu, ‘Adi lit kalak ersumpah i bas gelar batar-batar ingan ersembah, sumpahna e la esah; tapi adi ersumpah kalak i bas gelar persembahen si lit i datas batar-batar e, sumpahna e esah.’

¹⁹ Kam kalak pentang! Apai kin pentingen, persembahen ntah batar-batar si erbahanca persembahen e badia?

²⁰ Dage ise ersumpah i bas batar-batar, ia ersumpah i bas gelar batar-batar ras i bas gelar persembahen si lit i datas batar-batar e.

²¹ Bage pe ise ersumpah i bas gelar Rumah Pertoton, ia ersumpah i bas gelar Rumah Pertoton ras i bas gelar Dibata si ringan i je.

²² Ise ersumpah i bas gelar Surga, ia ersumpah i bas gelar kursi Kinirajan Dibata ras i bas gelarNa si kundul i bas kursi e.

²³ Andiko, cilaka kal kam o, guru-guru agama, janah kam pe o, kalak Parisi! O, kalak pekulah-kulah. Ipersembahkenndu man Dibata sepersepuluh i bas ulihndu nuan-nuan nari, seh maka jera, lenga ras serei pe ipersembahkenndu. Tapi si pentingna i bas Undang-undang la iperdiatekenndu, e me kap keadilen, keleng ate, ras kinibujuren. Si enda arus idalankenndu alu la ngelupaken si debanna.

²⁴ O, peminpin-peminpin si pentang! Iaguindu laneng i bas inemenndu, tapi unta ibenndutndu.

²⁵ Andiko, cilaka kal kam, o, guru-guru agama, janah kam pe o, kalak Parisi! O, kalak pekulah-kulah! Arah darat ngenca iburihindu cangkir ras pingganndu, tapi arah bas meluat kal.

²⁶ O, kalak Parisi si pentang! Burihi lebe cangkir e arah bas gelah arah darat pe bersih.

²⁷ Andiko, cilaka kal kam o, guru-guru agama, janah kam pe o kalak Parisi! O, kalak pekulah-kulah! Bali kal kam ras kuburen si icet mbentar; arah darat tatapen mejile, tapi i bas dem tulan-tulan kalak mate ras si macik-macik.

²⁸ Bage me kam! Tatapen bujur, tapi kam pekulah-kulah janah ukurndu jahat kal kepe.”

Ituriken Jesus ukumen kalak pekulah-kulah

²⁹ “Andiko, cilaka kal kam, o guru-guru agama janah kam pe o, kalak Parisi! O, kalak pekulah-kulah! Iseminndu kuburen nabi-nabi janah ipejilendu tugu kalak bujur,

³⁰ janah nindu, ‘Adi enggo min nai kami lit asum nini-nininta nggeluh, tentu la kami nggit munuh nabi-nabi e.’

³¹ Alu bage, si tuhuna kam enggo ngaku maka kam kesusuren si munuh nabi-nabi e.

³² Dage terusken dingen dungilah kai si enggo ibenaken ninindu!

³³ O, nipe! O, kesusuren nipe upar. Arah apai nari dalanndu pulah i bas ukumen naraka nari?

³⁴ Kukataken man bandu: Kusuruh pagi reh ndahi kam piga-piga kalak nabi, kalak pentar ras guru; tapi deba pagi ibunuhndu, ipakukenndu ku kayu persilang janah deba iligasindu i bas rumah pertotonndu, janah iayak-ayakndu i bas sada kuta nari ku kuta si deban.

³⁵ E maka man bandu me ndabuhna ukumen kalak si enggo munuh kalak si la ersalah, mulai i bas pembunuhen Abil nari seh ku pembunuhen Sakaria, anak Barahia, si ibunuhndu kelang-kelang Rumah Pertoton ras batar-batar ingan persembahen.

³⁶ Kukataken man bandu: Kerina ukumen kalak si munuh e ndabuh man kalak si genduari enda.”

Kekelengen Jesus nandangi kuta Jerusalem

³⁷ “O Jerusalem, Jerusalem! Ibunuhindu nabi-nabi janah ibenterindu alu batu kalak si isuruh Dibata ndahi kam! Enggo piga-piga kali ateKu pepulung bangsandu bagi indung manuk ngkeremken anakna i teruh kabengna, tapi la kam nggit!

³⁸ Tuhu-tuhu me pagi itadingken Dibata rumahndu.

³⁹ Kukataken man bandu: Lanai bo pagi Aku idahndu seh paksana ikatakenndu, ‘Dibata kap si masu-masu IA si reh i bas gelar Tuhan.’ ”