MATIUS 21 - Pustaka Si Badia

Surak-surak si meriah i bas pintu gerbang kuta Jerusalem

¹ Kenca Jesus ras ajar-ajarNa seh i Betpage, i uruk Seton, enggo ndeher ku Jerusalem, isuruh Jesus dua kalak ajar-ajarNa leben.

² Nina, “To lawes ku kuta si arah lebendu ah; kenca seh kam ku bas kuta e, idapetindu kari sada kelede tambat dingen anakna deherken ia. Osari nalina jenari tegu duana ku jenda.

³ Adi lit kalak nungkun nindulah, ‘Perlu Tuhan’; kenca bage nindu minter nge kari ipelepasna kelede e ibabandu.”

⁴ Si enda jadi gelah seh kai si enggo ikataken Dibata arah nabi nina,

⁵ “Katakenlah man Kuta Sion, genduari reh Rajandu ndahi kam, meteruk ukurNa iersakNa kelede, anak kelede singuda denga.”

⁶ Jenari lawes ajar-ajar ndai, idalankenna kai si enggo ikataken Jesus man bana.

⁷ Iteguna kelede e ras anakna. Kenca ikimbangken ajar-ajar e uisna i gurung kelede ndai, kenca bage maka iersak Jesus.

⁸ Kalak si nterem ngkimbangken uisna i dalan. Lit ka deba itektekna lambe jenari iamparkenna i dalan.

⁹ Kalak si nterem si erdalan arah lebe Jesus ras arah pudiNa ersurak-surak nina, “Pujin man Anak Daud! Ipasu-pasu Dibata IA si reh i bas gelar Tuhan! Pujilah Dibata!”

¹⁰ Kenca bengket Jesus ku bas kuta Jerusalem guntar belang-belang kota e. Nungkun anak kuta e nina, “Ise kin IA?”

¹¹ Erjabap kalak si nterem e, “Enda kap Jesus, Nabi i kuta Nasaret daerah Galilea nari.”

Jesus bengket ku Rumah Pertoton kalak Jahudi

¹² Bengket Jesus ku Rumah Pertoton ipelawesNa kerina kalak si erbinaga ras si nukur i je. ItunggalingkenNa meja-meja kalak si nukari duit bage pe bangku-bangku kalak si erbinaga nderapati.

¹³ Jenari nina man kalak e, “Lit kap tersurat i bas Pustaka Si Badia maka nina Dibata, ‘RumahKu igelari me pagi Rumah Pertoton.’ Tapi ijadikenndu Rumah e jadi asar penamun.”

¹⁴ Jenari reh kalak pentang ras kalak mate serapen ndahi Jesus i bas Rumah Pertoton e; ipepalem Jesus ia.

¹⁵ Ngidah tanda sengget si ibahan Jesus e, ngilas ate imam-imam si mbelin ras guru-guru agama. Bage pe ngilas atena anak-anak si ersurak-surak i bas Rumah Pertoton si ngataken, “Pujin man Anak Daud!”

¹⁶ E maka isungkun kalak enda Jesus nina, “IbegiNdu nge kai si ikataken anak-anak enda?” Erjabap Jesus, “Kubegi! Langa kin pernah iogendu i bas Pustaka Si Badia kerna si e? I je lit kap tersurat, ‘Enggo iajariNdu danak-danak ras anak si minem denga guna nehken puji-pujin si serta.’ ”

¹⁷ Jenari itadingken Jesus kalak e, lawes IA ku Betani janah i je IA erberngi.

Isumpahi Jesus batang ara

¹⁸ Pepagina lampas erpagi-pagi, asum Jesus ibas perdalanen mulih ku Jerusalem, melihe IA.

¹⁹ I tepi dalan idahNa batang ara. IdeheriNa batang ara e, tapi la lit buahna, bulungna ngenca mbur. E maka nina Jesus man batang ara e, “Asa ndigan pe kam lanai erbuah!” Jenari minter kerah batang ara ndai.

²⁰ Ngidah si e mamang kal ate ajar-ajarNa. E maka nina ajar-ajar e man Jesus, “Kuga maka bage kal pedasna batang ara e kerah?”

²¹ Erjabap Jesus, “Ingetlah! Adi tek kam man Dibata dingen la monce-once ukurndu, ngasup kap kam erbahanca bagi si enggo Kubahan nandangi batang ara enda; janah labo terjeng si e saja, tapi ngasup pe kam ngataken man uruk enda, ‘Angkatken bandu jenari benterken bandu ku lawit,’ e maka jadi me bage!

²² Adi tek kam, ialokenndu kap i bas Dibata nari kai saja si ipindondu man baNa arah pertotonndu.”

Penungkunen kerna kuasa Jesus

²³ Jenari bengket ka Jesus ku Rumah Pertoton kalak Jahudi; asum IA ngajar reh piga-piga imam si mbelin ras peminpin-peminpin kalak Jahudi njumpai IA nina, “Kuasa kai lit i bas Kam erbahan si enda kerina? Ise mereken Kuasa e man baNdu?”

²⁴ Erjabap Jesus, “Kusungkun kam lebe, janah adi ijabapndu kari penungkunenKu, Kukataken man bandu Kuasa kai lit i bas Aku erbahan si enda kerina.

²⁵ I ja nari rehna kuasa Johanes Peridiken, ibas Dibata nari ntah ibas manusia nari?” E maka sisungkun-sungkunen ia sapih-sapih ia nina, “Kuga ninta? Adi ninta, ‘I bas Dibata nari,’ kugapa pe niNa, ‘Adi bage, ngkai maka la kam tek man Johanes Peridiken?’

²⁶ Tapi adi ninta, ‘I bas manusia nari,’ mbiar kita jelma si nterem, sabap kerina kalak e erpengakap maka Johanes Peridiken nabi.”

²⁷ E maka erjabap kalak e man Jesus, “La ieteh kami.” Perbahan si e nina Jesus man bana, “Aku pe la Kukataken man bandu alu kuasa kai Kubahan si enda.”

Perumpaman kerna dua kalak anak

²⁸ “Tapi kuga pengakapndu kerna si enda? Lit me sekalak perbapan, anakna dua kalak dilaki. Nina man anakna sintua, ‘O anakku, to erdahin kam sekali enda i kebun anggur.’

²⁹ Erjabap anakna e, ‘Banci bapa,’ tapi la idalankenna.

³⁰ Jenari ikatakenna man anakna singuda si ikatakenna man anakna sintua ndai. Ngaloi anakna singuda e, ‘Aku lang,’ tapi dungna erkadiola ia, e maka lawes ia erdahin ku kebun anggur e.

³¹ Si apai dage i bas si dua kalak enda nehken sura-sura bapana?” Erjabap kalak e, “Anak singuda.” E maka nina Jesus man bana, “Leben nge pemungut cukai ras diberu si dahinna erlua-lua bengket Kinirajan Dibata asa kam.

³² Sabap kerehen Johanes Peridiken nuduhken man bandu dalan kegeluhen si ituduhken Dibata, janah la kam tek; tapi pengalo cuke ras diberu-diberu si pendahinna erlua-lua e, tek. Janah aminna enggo pe idahndu si e, lalap la erkusur ukurndu dingen lalap kam la tek man Tuhan.”

Perumpaman kerna si newa kebun anggur

³³ Nina Jesus, “Begiken lah perumpaman enda. Lit sekalak si nuan anggur i bas jumana. Jenari ibidena kelewet. Ikurukna lubang ingan merehi buah anggur janah ipajekkenna sada menara ingan erjaga. Kenca bage isewakenna kebun e man kalak si newa. Jenari lawes ia ku negeri si deban.

³⁴ Kenca seh peranin buah anggur, isuruh tuan e juak-juakna ngelegi sewa kebun e.

³⁵ Tapi itangkap si newa kebun ndai juak-juak e, deba ipekpekina, deba ibunuhna janah deba ibenterina alu batu.

³⁶ Isuruh tuan e ka juak-juak si deban teremen asa si arah lebe, tapi e pe bagi si arah lebe ndai ka nge ibahanna.

³⁷ E maka dungna anakna jine isuruhna, sabap nina i bas ukurna, ‘Tentu mehangke ia ngenehen anakku.’

³⁸ Tapi asum idah si newa ndai anak tuan e nina sapih-sapih ia, ‘Enda kap anak tuan si mada kebun anggur enda. Mari si bunuh ia gelah man banta kebunna enda.’

³⁹ E maka itangkapna anak tuan e, iambekkenna ku darat kebun, jenari ibunuhna.

⁴⁰ Dage, kenca reh tuan si mada kebun e, kuga nge ibahanna si newa kebun anggur ndai?”

⁴¹ Ngaloi kalak e man Jesus, “Tentu ibunuhna si newa kebun anggur si jahat e, jenari ipesewakenna kebun e man kalak si deban si nggit mereken sewana i bas paksa peranin.”

⁴² Nina Jesus man bana, “Langa kin pernah iogendu kai si tersurat i bas Pustaka Si Badia? Nina, ‘Batu si iambekken tukang e kap jadi batu palas. Enda perbahanen Tuhan kap; janah e tuhu-tuhu sengget kita natapsa ban ulina!’ ”

⁴³ “Dage ingetlah,” nina Yesus, “kerina hakndu i bas Kerajan Dibata ibuat ibas kam nari jenari ibereken man bangsa si patuh ngikutken perentah Dibata. [

⁴⁴ Ise ndabuh ku batu enda getem me ia; janah ise idabuhi batu e meripuk me ia.”]

⁴⁵ Kenca ibegi imam-imam si mbelin ras kalak Parisi perumpaman e, ietehna maka kerna ia me si ikataken Jesus i bas perumpaman e.

⁴⁶ E maka idaramina dalan nangkap Jesus. Tapi mbiar ia man kalak si nterem sabap kalak si nterem ngakui Jesus sekalak nabi.