MATIUS 2 - Pustaka Si Badia

Guru-guru i Timur nari

¹ Jesus tubuh i kuta Betlehem i taneh Judea asum Herodes jadi raja. La ndekahsa kenca si e reh me ku Jerusalem piga-piga kalak guru i Timur nari.

² Nungkun guru-guru Timur e nina, “I ja kin raja kalak Jahudi si mbaru tubuh e? Sabap idah kami bintangna i Timur, janah kami enggo reh guna nembah man baNa.”

³ Megi kata e sengget kal Raja Herodes ras kerina anak kuta Jerusalem.

⁴ E maka ipepulung Raja Herodes kerina imam-imam si mbelin ras guru-guru agama Jahudi. Jenari nungkun ia nina, “I ja kin Mesias e tubuh?”

⁵ Ngaloi kalak e nina, “I kuta Betlehem i taneh Judea, sabap enggo isuratken nabi:

⁶ ‘O kam Betlehem i taneh Juda, labo kam kuta si kitikna i daerah Juda; sabap i bas kam nari reh me sekalak peminpin si mpermakani bangsaNgku bangsa Israel.’ ”

⁷ Kenca megi kai si ikataken e, idilo Herodes guru-guru i Timur nari e alu erbuni-buni. Jenari isungkunina ndiganai bintang e mulai teridah.

⁸ Kenca bage isuruhna guru-guru e lawes ku Betlehem. Nina, “Berkatlah janah pepayo alu mehuli i ja ingan anak e, janah adi enggo kam jumpa, beritaken man bangku, gelah aku pe ku jah nembah man baNa.”

^9-10 Kenca bage berkat guru-guru Timur e. Idahna ka bintang si enggo idahna mbarenda i Timur. La tanggung riahna ukurna ngidahsa. Bintang e erdalan arah lebena jenari ngadi tepat i babo ingan anak e.

¹¹ E maka bengket ia ku bas idahna Anak ndai ras Maria, nandeNa. Jenari erjimpuh ia nembah man Anak e. Ibuatna erta-erta si ibabana e, jenari ipersembahkenna man Anak si mbaru tubuh e. Erta-erta si ipersembahkenna e, e me: emas, kumenen ras mur.

¹² Perbahan ikataken Dibata man guru-guru e arah nipina gelah ola ia mulihken ndahi Herodes, e maka mulih ia arah dalan si deban ku negerina.

Mengongsi ku Mesir

¹³ Kenca berkat guru-guru Timur e, teridah malekat Tuhan man Jusup i bas nipina. Nina malekat e man bana, “Kekeken, baba Anak e ras nandena mengongsi ku Mesir. I jahlah kam lebe seh aku erkata man bandu, sabap idarami Herodes anak enda janah ibunuhna pe atena.”

¹⁴ E maka keke Jusup, janah i bas berngi e ibabana Anak e ras nandena ku Mesir.

¹⁵ I Mesir ia ringan seh Herodes mate. Kerina si enda jadi gelah seh kai si ikataken Tuhan arah nabi nina, “Enggo Kudilo AnakKu i taneh Mesir nari.”

Anak-anak ibunuhi

¹⁶ Asum ieteh Raja Herodes ia enggo itipu guru-guru si reh i Timur nari e, merawa-rawa kal ia. Isuruhna perajurit-perajurit munuhi anak-anak dilaki si lit i Betlehem ras sekelewetna. Anak-anak si ibunuhi umur dua tahun kuteruh. Enda icocokkenna ras dekahna bintang e enggo teridah bagi si ituriken guru Timur man bana.

¹⁷ Alu bage seh me kata si ikataken Nabi Jeremia nina,

¹⁸ “Lit sora terbegi i Rama, sora nderkuh dingen tangis ceda ate. Itangisi Rahel anakna, tangis ia janah lanai terapuli, sabap kerina anakna mate.”

I Mesir nari mulihken ku Nasaret

¹⁹ Kenca mate Herodes, teridah malekat Tuhan man Jusup i bas nipina asum ia i Mesir denga.

²⁰ Nina malekat e man bana, “Kekeken, baba Anak e ras nandena mulih ku taneh Israel, sabap kalak si ersura-sura munuh Anak e enggo mate.”

²¹ E maka keke Jusup, ibabana Anak e ras nandena mulihken ku negeri Israel.

²² Tapi kenca ibegi Jusup berita maka Arkelaus enggo jadi raja i negeri Judea, mbiar ia ku Judea sabap Arkelaus anak Herodes. Tole perbahan enggo ka ipersingeti Dibata ia kerna si e arah nipina, e maka lawes ia ku daerah Galilea.

²³ Kenca seh ia i Galilea ibahanna jabuna i kuta Nasaret. Kerina enda jadi gelah seh kai si ikataken nabi-nabi nina, “IA pagi igelari kalak Nasaret.”