MATIUS 18 - Pustaka Si Badia

Ise si mbelinna?

¹ Paksa si e reh ajar-ajar Jesus ndeheri IA, jenari nina, “Ise si mbelinna i bas Kinirajan Surga?”

² Idilo Jesus sekalak danak-danak, isuruhNa tedis i lebe-lebe ajar-ajar,

³ jenari nina, “Ingetlah! Adi la kin kam tuhu-tuhu robah dingen bali ras danak-danak, asa ndigan pe kam labo banci bengket ku bas Kinirajan Surga.

⁴ Si mbelinna i bas Kinirajan Surga e me kalak si peteruk bana bali ras anak-anak enda.

⁵ Bage pe ise ngaloken danak-danak si bagenda i bas gelarKu, ialokenna kap Aku pe.”

Si erbahanca dosa

⁶ “Ise erbahanca maka sekalak i bas si kitik enda tondel ukurna erkiniteken man bangKu, ulin irakutken batu penggilingen ku kerahungna, jenari igedapken ia ku bas lawit.

⁷ Cilaka kal doni enda sabap erbage-bage i je si erbahanca kalak erdosa! Tuhu la tersilahken si enda kerina tapi cilaka kal kalak si erbahanca dosa e jadi!

⁸ Adi tanndu ntah nahendu erbahanca kam erdosa, tekteklah e jenari ambekken! Ulin kam nggeluh sada tan ntah sada nahe asangken dua tanndu ras dua nahendu tapi iambekken kam ku bas api naraka si la ernimpet-nimpet.

⁹ Bage pe adi matandu erbahanca kam erdosa, pulditken ras ambekkenlah matandu e. Ulin kam nggeluh sada mata asangken dua matandu tapi kam iambekken ku bas api naraka.”

Perumpaman kerna biri-biri si bene

¹⁰ “Ingetlah, ola la meherga iakapndu kalak si kitik enda. Sabap lit kap malekatna si katawari pe natap ku ayo BapangKu si i Surga. [

¹¹ Sabap Anak Manusia si isuruh Dibata reh engkelini si enggo papak!]

¹² Kuga kin pengakapndu? Adi lit sekalak lit biri-birina seratus, jenari bene sada, kuga nge ibahanna? Tentu itadingkenna biri-birina si siwah puluh siwah e i mbalmbal, jenari lawes ia ndarami biri-biri si bene e.

¹³ Kenca idatna, tentu riahen ukurna kerna biri-biri si sada e asangken biri-biri si siwah puluh siwah si la papak.

¹⁴ Bage pe Dibata, Bapandu, labo ateNa sekalak pe danak-danak enda papak.”

Kerna ngajarken senina

¹⁵ “Adi ersalah seninandu man bandu, katakenlah man bana salahna e, asum kam dua-dua. Adi erkadiola ia, enggo kap idatndu ia mulihi.

¹⁶ Tapi adi la kam ibegikenna, babalah temanndu sekalak ntah dua kalak gelah bagi tersurat i bas Pustaka Si Badia: ‘Tep-tep pengadun enggo sah adi lit dua ntah telu kalak saksi.’

¹⁷ Tapi adi teman-temanndu e pe la ibegikenna, sehkenlah persoalen e man perpulungen. Adi perpulungen e pe la ibegikenna anggap sajalah ia bali ras kalak perbegu ntah pe kalak si muat cuke.

¹⁸ E maka Kukataken man bandu kerina: Kai si irakutindu i doni enda, enggo kap irakuti i Surga; kai si iosarindu i doni enda enggo kap mosar i Surga.

¹⁹ Tole Kukataken man bandu: Adi lit i bas kam dua kalak i doni enda ersada ukur kerna kai si ipindondu i bas pertotonndu man Dibata, tentu ibereken BapangKu si i Surga nge pemindonndu e.

²⁰ Sabap i ja lit dua ntah telu kalak pulung i bas gelarKu, Aku lit i tengah-tengahna.”

Perumpaman kerna ngalemi kalak si ersalah

²¹ Jenari reh Petrus ndeheri Jesus nina, “O Tuhan, piga kali banci kualemi seninangku si ersalah man bangku? Cukup pitu kali?”

²² Erjabap Jesus, “Lang, labo cukup pitu kali, tapi pitu puluh kali pitu kali.

²³ Sabap Kinirajan Surga bali kap ras sekalak raja si erkira atena ras juak-juakna.

²⁴ Kenca ibenakenna perkiran e, isuruhna ngadap sekalak juak-juak si rutang erjuta-juta.

²⁵ Tapi perbahan la ia ngasup nggalari utangna e, e maka isuruh raja gelah ia ndayaken dirina ras ndeharana bage pe anak-anakna bage ka pe kerina erta-ertana guna nggalari utangna e.

²⁶ Tapi erjimpuh juak-juak e i lebe-lebe raja, jenari nina, ‘Sabar kam nimaisa tuan, kugalari nge pagi utangku e kerina.’

²⁷ Mekuah ate raja e, e maka isasapkenna utang juak-juak e jenari isuruhna mulih.

²⁸ Asum juak-juak e erdalan mulih, jumpa ia ras sekalak juak-juak si deban si rutang man bana piga-piga ribu. Itangkapna dingen icekakna temanna e, jenari nina, ‘Galari utangndu.’

²⁹ Erjimpuh temanna e i lebe-lebena, jenari nina, ‘Sabar kam nimaisa teman, kugalari nge pagi utangku e kerina.’

³⁰ Tapi la ia sabar; itamakenna temanna e ku bas penjara seh bali utangna.

³¹ Ngidah si enda ceda ate teman-temanna si deban, e maka ipesehna man tuanna.

³² E maka isuruh raja me juak-juak ndai ngadap, jenari nina, ‘Kam kalak jahat! Erkiteken pemindonndu, utangndu si bage buena enggo kusasapken.

³³ Kam pe aturna mekuah atendu temanndu sapih juak-juak bagi mekuah ateku kam.’

³⁴ Merawa-rawa kal raja e, jenari itamakenna juak-juak e ku bas penjara seh igalarina kerina utangna.”

³⁵ Tole nina, “Bage ka nge ibahan BapangKu si i Surga man bandu kerina adi la kin ialemindu seninandu terus ku bas pusuhndu.”