MATIUS 12 - Pustaka Si Badia

Penungkunen kerna wari Sabat

¹ La ndekahsa kenca si e, tupung wari Sabat kalak Jahudi, mentas Jesus arah perjuman gandum. Iputikken ajar-ajarNa gandum e, jenari igugutna sabap melihe ia.

² Ngidah si e nina kalak Parisi man Jesus, “Nehenlah, ajar-ajarNdu erbahan kai si la banci ibahan i bas wari Sabat rikutken Undang-undang Agama.”

³ Ngaloi Jesus, “Langa kin pernah iogendu i bas Pustaka Si Badia kai ibahan Daud asum melihe ia ras teman-temanna?

⁴ Bengket ia ku rumah Dibata, ibuatna roti si enggo ipersembahken man Dibata, jenari ipanna ras teman-temanna. Rikutken Undang-undang Agama, imam-imam ngenca banci man roti e.

⁵ Langa kin iogendu i bas Undang-undang si isuratken Musa maka i bas tep-tep wari Sabat si tuhuna imam-imam ngelanggar Undang-undang wari Sabat i bas Rumah Pertoton, tapi la ia ersalah?

⁶ Tapi ingetlah, maka i jenda lit si lebihen asa Rumah Pertoton.

⁷ Lit kap tersurat i bas Pustaka Si Badia, ‘Ate keleng nge si Kuperluken, labo asuh-asuhen si ipersembahkenndu.’ Adi tuhu-tuhu kin iertindu kata enda, labo iukumndu kalak si la ersalah.

⁸ Sabap Anak Manusia si isuruh Dibata, IA kap Tuhan si engkuasai wari Sabat e.”

Sekalak mate serapen tanna sembelah

⁹ Kenca bage, lawes Jesus ku rumah pertoton kalak Jahudi.

¹⁰ I rumah pertoton e lit sekalak sembelah tanna enggo kesip perban mate serapen. Piga-piga kalak si i je ersura-sura ndarami kesalahen Jesus. E maka isungkunna Jesus nina, “Rikutken Undang-undangta, banci kin ipepalem kalak sakit i bas wari Sabat?”

¹¹ Ngaloi Jesus nina, “Adi lit sekalak i bas kam ndabuh biri-birina ku bas lubang si mbages i bas wari Sabat, tentu itangkapna dingen ipedaratna biri-birina e.

¹² Manusia ergan nge asa biri-biri! E maka rikutken Undang-undangta mehuli nge nampati kalak i bas wari Sabat.”

¹³ Jenari nina Jesus man si mate serapen tanna e, “Pepinter tanndu.” Ipepinterna tanna, jenari minter malem bagi tanna si sembelah nari.

¹⁴ Ndarat kalak Parisi e, arih-arih ia guna munuh Jesus.

Persuruhen pilihen Dibata

¹⁵ Kenca ieteh Jesus sura-sura kalak Parisi e, lawes IA i bas rumah pertoton kalak Jahudi e nari. Nterem kalak ngikutken IA. IpepalemNa kerina kalak si penakiten,

¹⁶ jenari ipersingetiNa gelah man ise pe ola ituriken kerna IA.

¹⁷ Si enda jadi gelah seh kai si enggo ikataken Dibata arah Nabi Jesaya nina,

¹⁸ “Enda me persuruhenKu si enggo Kupilih, IA me si Kukelengi dingen si ngena ateKu. Kubereken me KesahKu man baNa, janah IA me si meritaken kebujurenKu man kerina bangsa.

¹⁹ Tapi labo IA pagi rubat ntah serko bage pe labo IA ngerana alu sora megang i pasar si meriah.

²⁰ Buluh si enggo mbeltuk la ipenggelkenNa, lampu si milep-ilep la inimpetiNa, la IA erngadi-ngadi seh menang ibahanNa keadilen e.

²¹ Janah i bas IA me kerina bangsa-bangsa erpengarapen.”

Jesus ras Balsebul

²² Jenari itaruhken kalak man Jesus sekalak pentang dingen lanai beluh ngerana perbahan iseluki setan. Kenca Jesus mpelawes setan e, beluh ia ngerana dingen erpengidah.

²³ Mamang ate kalak si nterem nina sapih-sapih ia, “Banci jadi IA nge Anak Daud si ipadanken e.”

²⁴ Asum ibegi kalak Parisi kata enda ngaloi ia nina, “Balsebul pengulu setan nge mereken kuasa man baNa mpelawes setan e.”

²⁵ Ieteh Jesus perukuren kalak Parisi enda e maka nina, “Kerajan si erbelah-belah kugapa pe sontar nge. Janah kuta ntah rumah tangga si erbelah-belah kugapa pe sontar nge.

²⁶ Bage pe adi Iblis pelawes Iblis, erbelah-belah kap ia. Adi bage ma sontar kerajanna?

²⁷ Dage, adi Balsebul kin mereken kuasa man bangKu, ise dage mereken kuasa man teman-temanndu mpelawes setan-setan e? Teman-temanndu e lah ertimbang kerna cakapndu e.

²⁸ Erkiteken Kupelawes setan-setan alu kuasa Kesah Dibata, e tandana maka Kinirajan Dibata enggo reh man bandu.

²⁹ Ise pe labo banci bengket ku rumah si mbisa ngerampasi erta-ertana, pala iketna lebe kalak si mbisa e. Kenca bage maka banci irampasina erta-erta si lit i bas rumah e.

³⁰ Ise si la mihak Aku ngelawan Aku kap; ise la ras Aku pepulungken, ia engkerapi kap.

³¹ E maka Kukataken man bandu: Kerina dosa ras cakap si encekuraki Dibata banci ialemi; tapi kalak si encekuraki Kesah Si Badia la ialemi Dibata ndigan pe.

³² Kalak si encekuraki Anak Manusia si isuruh Dibata banci ialemi Dibata; tapi kalak si encekuraki Kesah Si Badia asa ndigan pe la ialemi Dibata, subuk i bas kegeluhen si gundari, bage pe ibas kegeluhen si pagin.”

Kerna batang ras buahna

³³ “Guna ndatken buah si mehuli arus lit batang si mehuli; adi batang la mehuli tentu buahna pe la mehuli. Sabap arah buahna itandai kap batangna.

³⁴ O, kesusuren nipe si jahat! Kuga nindu ngataken si mehuli adi ukurndu pe jahat nge? Sabap kai si ibelasken, e me si erburak i bas pusuh nari.

³⁵ Kalak bujur tentu teridah i bas ia nari si mehuli, ndarat i bas pusuh peratenna si mehuli nari; janah kalak jahat ndarat me si jahat i bas pusuh peratenna si jahat nari.”

³⁶ “Tapi ingetlah! I bas wari pendungi pagi kerina si la mehuli si enggo ibelaskenndu arus ipertanggung-jawabken.

³⁷ Sabap arah kai si enggo ibelaskenndu me kam iadili.”

Pemindon tanda sengget

³⁸ Jenari ngerana piga-piga guru agama ras kalak Parisi man Jesus nina, “O Guru, merincuh kal kami ngidah tanda sengget i bas Kam nari.”

³⁹ Ngaloi Jesus, “Andiko, jahatna jelma si genduari enda! Kam kalak jahat mindo maka Kubahan tanda sengget? Labo Kubahan! La ibereken sada tanda sengget pe man bandu seakatan tanda sengget Nabi Juna ngenca.

⁴⁰ Sabap bagi Nabi Juna telu wari telu berngi dekahna i bas beltek nurung galang, bage ka me pagi Anak Manusia si isuruh Dibata e telu wari telu berngi dekahna i bas beltek taneh enda.

⁴¹ I bas wari pendungi pagi i lebe-lebe Pengadilen Dibata tedis kalak Niniwe ngaduken kam, sabap ia jera i bas dosana nari kenca ibegina Nabi Juna ngajar; janah si tuhuna i jenda lit beliden asa Nabi Juna!

⁴² I bas wari pendungi pagi i lebe-lebe Pengadilen Dibata tedis me Kemberahen i Selatan nari ngaduken kam, sabap ia reh i bas ingan si ndauh nari guna megiken pengajaren Salomo; janah si tuhuna i jenda lit beliden asa Salomo.”

Kerehen setan mulihken

⁴³ “Adi enggo ndarat setan i bas sekalak jelma nari, lawes setan e, isiarina gurun pasir ndarami ingan ngadi. Adi la idatna ingan e,

⁴⁴ nina i bas ukurna, ‘Mulihlah aku ku rumahku si enggo kutadingken e.’ E maka mulihken ia, idapetina rumah e enggo bersih isapui dingen enggo sikap.

⁴⁵ Jenari lawes ia, idilona pitu setan si jahaten asa ia. Kerina ia bengket ku bas janah i je me ia ringan seh maka reh kelekna kalak si ibengketina e. Bage me pagi jadina kalak jahat si genduari enda.”

Nande ras senina-senina Jesus

⁴⁶ Asum Jesus ngerana denga, reh nandeNa ras senina-seninaNa. Tedis ia i darat, sabap atena njumpai Jesus.

⁴⁷ E maka nina sekalak si i je man Jesus, “I darat nandeNdu, senina-seninaNdu, jumpa atena ras Kam.”

⁴⁸ Tapi ngaloi Jesus, “Ise kin nandengKu? Ise kin seninangKu?”

⁴⁹ Jenari ituduh Jesus ajar-ajarNa janah nina, “Enda kap nandengKu ras senina-seninangKu!

⁵⁰ Ise ndalanken kai si ngena ate Dibata, BapangKu, ia kap seninangKu, turangKu, ras nandengKu.”