MASMUR 9 - Pustaka Si Badia

Pengataken bujur sabap kemulian Dibata

¹ Masmur Daud.

² O TUHAN, alu bulat ukurku, kukataken bujur baNdu. Kuturiken kerina tanda kuasa si enggo ibahanNdu,

³ Meriah ateku i bas TUHAN e maka rende aku. O Dibata si Mada Kuasa, rende aku muji Kam.

⁴ Imbang-imbangku kiam adi idahna Kam; gulingen ia kerina jenari mate.

⁵ Kam kap Hakim si bujur, ibelaNdu kinibujurenku.

⁶ IukumNdu bangsa-bangsa kalak jahat ikernepkenNdu, gelarna pe lanai iinget kalak.

⁷ Imbang-imbang kami enggo lesap rasa lalap; kuta-kutana enggo iradaskenNdu, tuhu-tuhu enggo ilupaken kalak ia.

⁸ Tapi TUHAN kap raja rasa lalap; guna ngakimi ipajekkenNdu kursi kinirajanNdu.

⁹ IperentahNa doni enda alu benar; alu adil, ihakimiNa bangsa-bangsa.

¹⁰ TUHAN kap ingan cilinggem man kalak si itindih ingan erlinggem tupung paksa kiniseran.

¹¹ O TUHAN, kerina kalak si nandai Kam, ernalem man baNdu; si ndahi Kam la kap itadingkenNdu.

¹² Rendelah muji TUHAN, si merentah i Sion! Turiken man bangsa-bangsa kerna kai si enggo ilakokenNa!

¹³ Inget Dibata kap kalak si mesera perserkona idengkehNa; si ngamburken dareh iukumNa.

¹⁴ O TUHAN, mekuah min ateNdu, nehenlah kiniseranku erkiteken imbang si ernembeh ate bangku. TUHAN, pulahi min aku i bas gerbang kematen nari,

¹⁵ maka banci aku tedis i adep-adepen kalak Jerusalem gelah kuturiken man bana perbahanenndu si terpuji ersurak-surak aku erkiteken keterkelinen si rehna i bas Kam nari.

¹⁶ Bangsa-bangsa engkali lubang, ia jine ndabuh ku bas, ia jine jertuh kena sidingna.

¹⁷ Enggo ipetangkas TUHAN diriNa arah keputusenNa si adil. Janah kalak jahat isidingi alu perbahanenna jine.

¹⁸ Kerina kalak jahat nulak TUHAN kap, kematen kap sikerajangenna.

¹⁹ Kalak si mesera iakapna labo lalap ilupaken, pengarapen kalak musil labo bene asa lalap.

²⁰ Marilah o TUHAN! Ola pediat kalak ngelawan Kam! Babalah bangsa-bangsa ku adep-adepenNdu janah hakimilah ia.

²¹ O TUHAN, bahan maka mbiar ia kerina; pebetehken man bana maka manusia si ermasap-masap nge ia.