MASMUR 6 - Pustaka Si Badia

Ertoto mindo penampat tupung i bas kiniseran

¹ Masmur Daud.

² O TUHAN, ola tembehi dingen ola salahi aku! Ola ukum aku alu pernembehNdu!

³ O TUHAN, enggo latih kal kuakap mekuah ateNdu min kempak aku! Bereken gegeh man bangku. Aku tuhu-tuhu enggo latih,

⁴ dingen enggo labuh kal tendingku. O TUHAN asakai nari dekahna maka isampatiNdu aku?

⁵ Mari TUHAN, kelini aku, pulahilah aku, perban keleng ateNdu.

⁶ I bas doni kematen labo Kam iinget, la ise pe muji Kam i je.

⁷ Latih kal kuakap i bas kelsehen, tep-tep berngi, lembab inganku medem ibahan tangisku; bantalku litap perban iluhku.

⁸ Menam lanai aku erpengidah; matangku enggo besar kal perban ngandung erkiteken musuh-musuhku.

⁹ O kam kalak jahat, laweslah i bas aku nari! Ibegiken TUHAN kap sorangku tangis

¹⁰ ibegikenNa sorangku erlebuh mindo penampat jenari ialoiNa pertotonku.

¹¹ Ieteh imbang-imbangku me uga melana italuken; rempet bene ukurna, surut ia kerina.