MASMUR 4 - Pustaka Si Badia

Pertoton karaben guna mindo penampat

¹ Masmur Daud.

² O Dibatangku, adi ertoto aku, aloilah o sekawalku. Tupung aku i bas kiniseran, isampatiNdu kap aku e maka genduari mekuah dage ateNdu aku, dengkehken pertotonku.

³ Asakai nari dekahna kalak nggombang-nggombangi aku? Asakai nari dekahna kalak erngena ate man si la lit ergana? dingen ngayak-ngayak si sea-sea?

⁴ Ingetlah maka TUHAN enggo milih si bujur jadi sikerajangenNa, dingen ibegikenNa tupung aku erlebuh man baNa.

⁵ Nggirgir dingen gentarlah i adep-adepen Dibata, olanai kam erdosa ukurkenlah mbages-mbages tupung kam tayang si sada i bas kamarndu.

⁶ Persembahkenlah persembahen si patut man TUHAN dingen ernalemlah man baNa.

⁷ Nterem kalak si ertoto bagenda nina, “O TUHAN bereken man kami tole pasu-pasu; perdiateken kami alu kiniulinNdu!”

⁸ Tapi keriahen si enggo iberekenNdu bangku, lebihen asang keriahen kalak si melala erta-ertana.

⁹ Adi medem aku, entabeh pertunduhku, o TUHAN, Kam saja ngenca si mereken ketenengen si tuhu-tuhu bangku.