MASMUR 3 - Pustaka Si Badia

Pertoton erpagi-pagi mindo penampat

¹ Masmur Daud kenca ia lompat i bas anakna Absalom.

² O TUHAN, nterem kal musuh-musuhku, nterem kal si ngelawan aku!

³ Icakapkenna aku nina, “Labo isampati Dibata ia.”

⁴ Tapi Kam o TUHAN, Kam kap ampang-ampangku iberekenNdu kemenangen man bangku; janah ipetetapNdu ukurku.

⁵ Erlebuh aku mindo penampat man TUHAN, janah ialoiNa aku i datas delengNa si badia nari.

⁶ Medem aku, jenari tertunduh, janah gedang-gedang berngi ikawali TUHAN aku.

⁷ La aku mbiar musuhku meribu-ribu si arah japa pe ngepung aku.

⁸ Mari o TUHAN, pulahi aku o Dibatangku! IukumNdu kerina musuh-musuhku seh maka lanai ia ergegeh ngelawan aku.

⁹ Kemenangen rehna i bas TUHAN nari kap; ipasu-pasu Dibatalah bangsaNa.