MASMUR 16 - Pustaka Si Badia

Ertoto guna petetapken ukur

¹ Masmur Daud. O Dibata, kawalilah aku; kempak Kam ernalem aku.

² Ningku man TUHAN, “Kam kap Tuhanku; kerina si mehuli kualoken i bas Kam nari.”

³ Seh kal ulina bangsa TUHAN si patuh! KeriahenKu si mbelin e me kap ras ia.

⁴ Kalak si ngikutken dibata-dibata si deban, melala maba kesusahen man dirina jine. La aku nggit ikut muat bagin i bas kurban persembahenna; la aku nggit nembah man dibata-dibatana.

⁵ O TUHAN, Kam kap kebayakenku, e maka iberekenNdu kerina keperlunku, wari-waringku si pepagi lit i bas tanNdu.

⁶ Lanai tanggung buena pemereNdu man bangku, seh kal ulina pemereNdu e.

⁷ Kupuji TUHAN, erkiteken IA kap si mabai aku, dingen pusuh peratenku ngajari aku tupung berngi.

⁸ Tetap kugejap maka Dibata ndeher kap ras aku, gelah aku tetap paguh.

⁹ E maka meriah kal ukurku, pusuhku pe ersurak-surak senang tendingku.

¹⁰ IpulahiNdu aku i bas kuasa kematen nari, kalak si ikelengiNdu la itadingkenNdu i doni kematen.

¹¹ ItuduhkenNdu bangku dalan si perlawesna kempak kegeluhen. I adep-adepenNdu dem keriahen, i bas tanNdu kap kesenangen.