MARKUS 3 - Pustaka Si Badia

Ipepalem Jesus sekalak si tanna mate serapen

¹ E maka bengket ka Jesus ku rumah pertoton kalak Jahudi. I je lit sekalak si sembelah tanna enggo kesip perban mate serapen.

² I bas si pulung e lit piga-piga kalak si ndaram-ndarami kesalahen Jesus gelah banci iaduken. E maka terus iperdiatekenna Jesus ntah ipepalemNa kin kalak i bas wari Sabat.

³ Nina Jesus man si mate serapen tanna ndai, “Mari tedis kam i lebe enda!”

⁴ E maka isungkun Jesus kalak ndai nina, “Rikutken agama, kai kin banci ibahan i bas wari Sabat? Erbahan si mehuli ntah si jahat? Nampati geluh manusia ntah munuhsa?” Tapi sinik saja kalak ndai.

⁵ Merawa Jesus, ipernehenNa jelma sekelewetNa. Tapi ceda ka ateNa ngidah perukuren kalak Parisi ndai. E maka nina man si mate serapen tanna ndai, “Pepinter tanndu.” Ipepinterna tanna janah minter malem.

⁶ Jenari lawes kalak Parisi, ijumpaina piga-piga kalak Herodiani. Arih-arih ia guna munuh Jesus.

Jelma si nterem i tepi dano

⁷ Jesus ras ajar-ajarNa lawes ku Dano Galilea janah nterem jelma ngikutken IA.

⁸ Jelma si nterem enda ndai reh i Galilea nari, i Judea nari, i Jerusalem nari, i Idumea nari, i lepar Lau Jordan nari ras kuta-kuta deherken Tirus ras Sidon nari. Kalak si nterem e reh ndahi Jesus sabap ibegina berita kerna perbahanen Jesus.

⁹ Perbahan seh kal teremna jelma si reh e, e maka isuruh Jesus ajar-ajarNa nikapken sada perahu guna IA. Alu bage jelma si nterem lanai ngasak-ngasak ku IA.

¹⁰ Sabap enggo nterem jelma ipepalemNa, e maka kerina kalak si penakiten siasak-asaken ndahi Jesus, atena njemak Jesus gelah malem penakitna.

¹¹ Bage pe adi lit kalak si setanen ngidah Jesus, minter ia reh, iguling-gulingna bana i lebe-lebe Jesus janahna serko nina, “Kam kap Anak Dibata!”

¹² Tapi alu mesangat ilarang Jesus kalak nuriken ise kin IA.

Jesus milih Rasul si sepuluh dua kalak

¹³ E maka lawes Jesus ku das uruk-uruk, janah idiloNa kalak rikutken si payo iakapNa. Kalak enda ndai reh ndahi Jesus.

¹⁴ E maka itetapken Jesus sepuluh dua kalak jadi Rasul. Nina Jesus man si sepuluh dua kalak ndai, “Kam enggo Kupilih gelah ras Aku. Kusuruh kam ngajar,

¹⁵ janah lit kuasandu mpelawes setan-setan.”

¹⁶ Enda me gelarna si sepuluh dua kalak si ipilih Jesus; Simon (igelari Petrus),

¹⁷ Jakup ras seninana Johanes anak Sebedeus (duana ia igelari Jesus si Boanergis, ertina, “Anak lenggur”).

¹⁸ Andreas, Pilipus, Bartolomeus, Matius, Tomas, Jakup anak Alpeus, Tadius, Simon Pejuang,

¹⁹ janah Judas Iskariot, si ndayaken Jesus.

Jesus ikataken kalak Balsebul

²⁰ Kenca Jesus mulih ku rumah, minter ka pulung jelma si nterem, seh maka lanai sempat Jesus ras ajar-ajarNa man.

²¹ Sanga ibegi keluarga cakap maka IA lanai sehsa, e maka reh ia ngelegi Jesus.

²² Guru-guru agama si reh i Jerusalem nari ngatakenca maka i bas IA lit Balsebul. “Pengulu setan e nge si mereken kuasa man baNa maka terpelawesNa setan-setan,” nina.

²³ E maka idilo Jesus kalak ndai, jenari iturikenNa piga-piga perumpaman nina, “Kuga banci setan pelawesken setan?

²⁴ Adi i bas sada negara lit perubaten ras perpecahen tentu la ndekah umur negara ndai.

²⁵ Bage pe adi i bas sada jabu turah rusur perubaten, tentu la ndekah umur jabu e.

²⁶ Jadi adi kerajan setan erbelah-belah tentu lanai ia erkuasa, janah enggo seh pe kedungenna.

²⁷ Ise pe labo ngasup bengket ku bas rumah kalak si megegeh guna ngerampasi erta-ertana, pala iketna lebe kalak si megegeh ndai, e maka banci irampasina.

²⁸ Ingetlah! Kerina dosa-dosa ras cakap si ncekuraki Dibata banci ialemi Dibata.

²⁹ Tapi kalak si nimbak Kesah Si Badia asa ndigan pe la ialemi. Sabap enggo ibahanna dosa si rasa lalap.”

³⁰ Enda ikataken Jesus sabap piga-piga enggo ngatakenca maka IA keseluken setan.

Nande Jesus ras senina-seninaNa

³¹ E maka reh nande Jesus ras senina-seninaNa. Isuruhna kalak ku rumah ndilo Jesus, janah ia kerina nimai i darat.

³² Ikataken kalak si nterem si kundul i kelewet Jesus e man baNa nina, “Ah nandeNdu ras senina-seninaNdu i darat, Kam atena.”

³³ Erjabap Jesus nina, “Ise kin nandengKu? Ise kin seninangKu?”

³⁴ Ipernehen Jesus kerina kalak si kundul i kelewetNa jenari nina, “Nehenlah! Enda me nandengKu ras seninangKu!

³⁵ Ise si nehken peraten Dibata, ia me seninangKu, turangKu ras nandengKu.”