MARKUS 1 - Pustaka Si Badia

Dahin Johanes Peridiken

¹ Enda me Berita Si Meriah kerna Jesus Kristus Anak Dibata.

² Ibenaken sue ras si isuratken Nabi Jesaya, “Nina Dibata, ‘Nehenlah, Kusuruh persuruhenKu leben asa Kam, ia me si nikapken dalan man baNdu.’

³ Lit sekalak si erlebuh i taneh si mesawang, ‘Pesikaplah dalan man Tuhan; pepinter dalanNa!’ ”

⁴ Sue ras si tersurat e, reh me Johanes Peridiken ku taneh si mesawang. Iperidikenna kalak janah ipesehna berita ibas Dibata nari nina, “Jeralah, maka kam iperidiken, gelah dosa-dosandu ialemi Dibata.”

⁵ E maka kerina jelma i taneh Judea ras i kota Jerusalem reh megiken Johanes. Iakukenna dosana janah iperidiken Johanes ia i bas Lau Jordan.

⁶ Paken Johanes e me kap: jubahna ibas mbulu unta nari, genditna ibas kuling-kuling nari, nakanna labang ras tengguli kerangen.

⁷ Ikatakenna pe man kalak ndai nina, “Reh me sekalak si lebih erkuasa asangken aku. Mungkuk ngosari tinali sepatuna pe aku la metunggung.

⁸ Aku, mperidiken kam alu lau, tapi IA pagi, mperidiken kam alu Kesah Si Badia.”

Jesus iperidiken ras icubai si Iblis IA

⁹ La ndekahsa kenca si e, reh Jesus i Nasaret taneh Galilea nari. IA pe iperidiken Johanes i bas Lau Jordan.

¹⁰ Ndarat kenca Jesus ibas lau nari, rempet idahNa langit talang, janah Kesah Si Badia nusur ku baboNa bagi nderapati.

¹¹ Terbegi pe sora i Surga nari, “Kam kap AnakKu si Kukelengi, Kam kap si ngena ateKu.”

¹² Kenca si e minter IA ibabai Kesah Si Badia ku taneh si mesawang.

¹³ Dekahna IA i je lit empat puluh wari. I je me IA icubai si Iblis. I bas ingan e, melala pe rubia-rubia si meliar. Tapi malekat-malekat reh nampati IA.

Jesus ndilo empat kalak penjala nurung

¹⁴ Kenca Johanes Peridiken ipenjaraken, lawes Jesus ku Galilea. IberitakenNa Berita Si Meriah si rehna ibas Dibata nari nina,

¹⁵ “Enggo seh paksana maka reh me Kinirajan Dibata! Jeralah, janah teklah nandangi Berita Si Meriah!”

¹⁶ Sanga Jesus erdalan arah tepi Dano Galilea, idahNa dua kalak penjala nurung sangana njala. Gelarna Simon ras Andreas; duana ia sembuyak.

¹⁷ Nina Jesus man si dua kalak e, “Mari ikutken Aku, maka Kuajari kam jadi penjala jelma.”

¹⁸ Minter itadingkenna jalana janah ikutkenna Jesus.

¹⁹ La ndauhsa Jesus erdalan idahNa ka dua kalak si ersembuyak, e me Jakup ras Johanes anak Sebedeus, sanga nikapken jalana i bas perahuna.

²⁰ Minter idilo Jesus duana. E maka itadingkenna bapana Sebedeus ras kalak upahen i bas perahuna jenari ikutkenna Jesus.

Sekalak si setanen

²¹ Seh ia kerina i kota Kapernaum. Asum wari Sabat kalak Jahudi minter lawes Jesus ku rumah pertoton jenari ibenakenNa ngajar.

²² IA ngajar la bali ras guru-guru agama. IA ngajar alu kuasa. E maka mamang ate kalak si megi pengajarenNa.

²³ Paksa si e reh sekalak setanen ku bas rumah pertoton janah serko ia nina,

²⁴ “Man kadendu kin kami o, Jesus kalak Nasaret? Reh ateNdu munuh kami kin? Kueteh nge ise Kam. Kam me si Badia ibas Dibata nari!”

²⁵ Isergangi Jesus setan ndai nina, “Sinik! Ndaratlah ibas ia nari!”

²⁶ Idampes-dampesken setan e si setanen ndai, e maka ndarat setan e ibas ia nari janahna serko.

²⁷ Kerina kalak kemamangen. Si sungkun-sungkunen ia sapih-sapih ia nina, “Kai kin enda ndia? Pengajaren si mbaru? I bas IA lit kuasa. IpelawesNa setan-setan, janah setan-setan ngikutken kataNa!”

²⁸ E maka berita kerna Jesus pedas mbar ku belang-belang taneh Galilea.

Ipepalem Jesus nterem jelma

²⁹ Jesus ras ajar-ajarNa nadingken rumah pertoton, lawes ku rumah Simon ras Andreas, ikut pe Jakup ras Johanes.

³⁰ Mami Simon ampar i bas ingan medem perbahan sakit. Kenca seh Jesus i rumah, minter seh baNa berita enda.

³¹ Idahi Jesus mami Simon ndai, ijemakNa tanna, e maka ipekekeNa, janah minter malem penakitna. Jenari kuskas mami Simon ngelai Jesus ras kalak ndai kerina.

³² Kenca sundut matawari enggo, nandangi gelap, ibaba kalak man Jesus kerina si penakiten ras si setanen.

³³ Kerina anak kuta e pulung i lebe-lebe rumah ndai.

³⁴ Erbage-bage penakit jelma si nterem ipepalemNa, janah setan-setan pe ipelawesNa. La ipediat Jesus pe setan-setan e ngerana, sabap ieteh setan-setan ise IA.

Jesus ngajar i Galilea

³⁵ Pepagina erpagi-pagi si lampas ope denga terang wari keke Jesus lawes IA ku ingan si melenget. I je ertoto IA.

³⁶ Tapi Simon ras teman-temanna lawes ndarami IA.

³⁷ Kenca jumpa nina man Jesus, “Kerina kalak ndarami Kam.”

³⁸ Erjabap Jesus, “Kita arus berkat ku kuta-kuta si deban, i taneh Galilea enda, gelah i je pe Kuberitaken ka Berita Si Meriah. Sabap guna si e kap maka Aku reh.”

³⁹ E maka isiari Jesus kerina kuta-kuta i Galilea. Ngajar IA i bas rumah pertoton kalak Jahudi janah ipelawesNa setan-setan.

Ipepalem Jesus sekalak si gadamen

⁴⁰ Reh me sekalak gadamen ndahi Jesus, nembah erjimpuh i lebe-lebe Jesus mindo perkuah ateNa nina, “Bicara nggit Kam, ngasup kap Kam pepalem aku.”

⁴¹ Mekuah ate Jesus idudurkenNa tanNa janah ijemakNa kalak gadamen ndai jenari nina Jesus man bana, “Nggit Aku, malemlah kam.”

⁴² Minter malem gadamna janah mejelis pe dagingna.

⁴³ Jenari isuruh Jesus ia lawes janah ipedahiNa,

⁴⁴ “Jaga, ola turiken man ise pe kerna si enda. Tapi laweslah, cidahken bandu man imam. Gelah tek kalak maka kam enggo malem, bahan persembahenndu bagi isuruh Musa.”

⁴⁵ E maka lawes kalak si enggo malem ndai. Tapi la tergengkenca sinik. Ku ja ia lawes, i je iturikenna kerna Jesus si pepalem ia. Perbahan si e, lanai terang-terangen Jesus reh ku bas sada-sada kuta. E maka i bas ingan si melenget IA. Bage gia rehen nge kalak i ja nari pe ndahi IA.