LUKAS 5 - Pustaka Si Badia

Jesus milih ajar-ajar si pemena

¹ Sekali jadi sanga Jesus tedis i tepi Dano Genesaret, kalak si nterem siasak-asaken ngkeleweti IA guna megiken Berita i bas Dibata nari.

² Idah Jesus lit dua perahu ngadi i tepi dano; penjala-penjala si mada perahu e enggo nusur janah sangana nikapken jalana.

³ Idatasi Jesus perahu e, e me perahu Simon; jenari isuruhNa Simon njembaken perahu e sitik ku lau nirangken tepi dano e. Kundul Jesus i bas perahu e, janah ije nari IA ngajar man jelma si nterem.

⁴ Kenca dung IA ngajar nina man Simon, “Baba perahundu tertengahen ku ingan si mbages. Amburkenlah jalandu guna nangkap nurung.”

⁵ Ngaloi Simon, “O Guru, sada berngi enda latih kal akap kami erdahin, kai pe la lit dat kami! Tapi adi Kam kal nuruhsa banci kuamburken jala e.”

⁶ E maka iamburken kalak ndai jalana janah melala kal datsa nurung seh maka merigat atena jala ndai.

⁷ E maka ikiapi kalak enda teman-temanna si lit i bas perahu si sada nari ndai gelah reh nampati. Reh kalak ndai janah isina perahu e duana seh dem, janah menam gedap pe.

⁸ Kenca idah Simon Petrus kai si enggo jadi, erjimpuh ia nembah man Jesus nina, “O Tuhan, laweslah Kam i bas aku nari! Aku kalak perdosa kap!”

⁹ Mamang ate Simon Petrus ras teman-temanna perbahan melala kal nurung si idatsa e.

¹⁰ Bagepe temanna anak-anak Sebedeus e me Jakup ras Johanes. Nina Jesus man si Simon, “Ola kam mbiar, mulai genduari nari kam jadi penjala jelma.”

¹¹ Kenca ikayuhna perahu e ku tepi, e maka itadingkenna me e kerina, jenari ikutkenna Jesus.

Ipepalem Jesus sekalak si gadamen

¹² Sekali jadi asum Jesus i bas sada kota, lit me i je sekalak dilaki si kerina dagingna gadamen. Kenca idahna Jesus, minter isembahna dingen mindo nina, “O, Tuan, bicara nggit Kam, ngasup kap Kam pepalem aku!”

¹³ E maka idudurken Jesus tanNa, idadapNa kalak si gadamen ndai, jenari nina, “Nggit nge Aku, malemlah kam!” Minter malem gadamna ndai janah mejelis pe dagingna.

¹⁴ Jenari nina Jesus man bana, “Ola turiken man ise pe kerna si enda, tapi laweslah, cidahken bandu man imam. Gelah tek kalak maka kam enggo malem, bahanlah persembahenndu bagi iperentahken Musa.”

¹⁵ Berita kerna Jesus reh mbarna, janah nterem kalak reh megiken IA dingen mindo gelah ipepalemNa ia i bas penakitna nari.

¹⁶ Tapi ulin iakapNa IA lawes ku ingan si melenget, janah i je IA ertoto.

Ipepalem Jesus sekalak pangpangen

¹⁷ I bas sada wari sanga Jesus ngajar, lit me i je piga-piga kalak Parisi ras guru-guru agama kundul megiken IA. Kalak enda ndai reh i bas tep-tep kuta i Galilea ras Judea nari, bage pe i Jerusalem nari. Kuasa Tuhan lit i bas Jesus guna pepalem kalak si sakit.

¹⁸ Asum si e reh piga-piga kalak si ngelanja sekalak si pangpangen i bas ingan medem. Ibabana ku bas rumah, ku lebe-lebe Jesus.

¹⁹ Perbahan nterem kal jelma i rumah, e maka la lit dalanna mabasa ku bas. E maka inangkihna rumah e, ibukana tarumna, janah arah e itantanna kalak si pangpangen ndai ras ingan medemna ku tengah-tengah jelma si nterem pas i lebe-lebe Jesus.

²⁰ Kenca idah Jesus maka tek kal kalak e, e maka nina man kalak si pangpangen e, “O senina, dosandu enggo ialemi.”

²¹ Guru-guru agama ras kalak Parisi mulai sisungkun-sungkunen, nina, “Ise kin IA maka bagenda kal pengeranaNa ngelawan Dibata? La kap ise pe ngasup ngalemi dosa seakatan Dibata!”

²² Ieteh Jesus kai si lit i bas ukur kalak enda ndai, e maka nina man kalak e, “Kai nge si lit i bas ukurndu e?

²³ Apai kin sukahen, ‘Dosandu enggo ialemi,’ asa ngataken, ‘Kekeken, erdalanken!’?

²⁴ Genduari Kucidahken man bandu maka lit nge kuasa i bas Anak Manusia si isuruh Dibata guna ngalemi dosa manusia i doni enda.” E maka nina Jesus man kalak si pangpangen e, “Kukataken man bandu: Kekeken, angkat ingan medemndu, dingen mulihlah ku rumahndu.”

²⁵ Minter keke si pangpangen ndai i lebe-lebe jelma si nterem, iangkatna ingan medemna, jenari mulih ia ku rumah janah ipujina Dibata.

²⁶ Mamang kal ate kalak si nterem, alu dem kebiaren ipujina Dibata nina, “I bas wari enda enggo idah kami kejadin si luar biasa.”

Idilo Jesus Lewi

²⁷ Kenca si e, lawes Jesus nadingken kuta ndai, jenari idahNa sekalak pengalo cuke, gelarna Lewi, kundul i bas kantorna. Nina Jesus man bana, “Ikutken Aku.”

²⁸ Tedis Lewi, itadingkenna kerina, jenari ikutkenna Jesus.

²⁹ Kenca bage, ibahan Lewi i bas rumahna kerja man-man si mbelin guna Jesus. Nterem pe pengalo cuke bage pe kalak si deban ikut man ras kalak enda ndai i je.

³⁰ Perbahan si e, piga-piga kalak Parisi ras guru-guru agama jungut-jungut man ajar-ajar Jesus nina, “Engkai maka kam man dingen minem ras kalak pengalo cuke, kalak perdosa?”

³¹ Megi penungkunen e, erjabap Jesus, “Kalak si sehat labo iperlukenna dokter, tapi kalak si sakit nge.

³² Aku reh labo guna ndilo kalak si bujur akapna bana, tapi guna ndilo kalak perdosa gelah ia jera.”

Kerna erpuasa

³³ E maka nina kalak nungkun man Jesus, “Ajar-ajar si Johanes megati kal erpuasa dingen melasken pertoton, bage pe ajar-ajar kalak Parisi; tapi ajar-ajarNdu tetap ia man ras minem.”

³⁴ Ngaloi Jesus, “Metunggung kin iakapndu adi temue i bas kerja erdemu bayu erpuasa kidekah ia ras si empo denga? Tentu lang!

³⁵ Tapi lit pagi masa sirang ia ras si empo, janah i bas paksa si e me ia erpuasa.”

³⁶ Ituriken Jesus pe sada perumpaman nina, “Labo lit kalak ngerigatken baju si mbaru guna ngerangkapi baju si enggo buruk. Sabap adi bage ibahanna, baju si mbaru ndai pe enggo merigat, janah uis si mbaru e la kabo tengteng jadi pengerangkapi baju si enggo buruk.

³⁷ Bage pe labo itamaken kalak lau anggur si mbaru ku bas tambe kuling-kuling si enggo metua. Sabap adi bage ibahanna, pecah me tambe ndai ibahan anggur e; jadi anggur pe mambur, tambe kuling-kuling pe pecah.

³⁸ Dage, tamakenlah anggur si mbaru kubas tambe kuling-kuling si mbaru!

³⁹ Janah ise pe labo nggit nginem anggur si mbaru adi enggo iinemna anggur si ndekah. Sabap nina, ‘Ulin anggur si ndekah.’ ”