LUKAS 21 - Pustaka Si Badia

Persembahen diberu si enggo mbalu

¹ I bas Rumah Pertoton iidah Jesus piga-piga kalak bayak namaken duit persembahen ku bas ingan persembahen.

² IdahNa pe sekalak diberu si enggo mbalu si musil kal, namaken dua peser.

³ Jenari nina Jesus, “Kukataken man bandu maka si tuhuna buen persembahen diberu si enggo mbalu si musil e asangken kerina persembahen kalak si deban.

⁴ Sabap kalak si deban mere alu labo kurang i bas ia, tapi diberu e seh kal musilna; tapi amin bage pe iberekenna kerina si lit i bas ia.”

Ituriken Jesus kerna keruntuhen Rumah Pertoton

⁵ Lit piga-piga kalak ncakapken kerna jilena Rumah Pertoton, si ihiasi alu batu-batu si mejile dingen erbage-bage persembahen si iendesken man Dibata. Nina Jesus,

⁶ “Kerina si iidahndu enda lit pagi masana maka lanai lit sada batu pe pagi tading i bas inganna; kerina pagi iruntuhken.”

Kiniseran ras peniksan

⁷ Nungkun ajar-ajar man Jesus nina, “O Guru, ndigan kin e jadi? Janah kai nge pagi tanda-tandana kejadin e?”

⁸ Erjabap Jesus, “Metengetlah gelah ola kam kena tipu. Sabap nterem pagi kalak reh i bas gelarKu nina, ‘Aku kap IA,’ janah, ‘Enggo ndeher waktuna.’ Tapi ola ikutken ia.

⁹ Bage pe ola kam mbiar adi ibegindu kerna perang ras pemberontaken-pemberontaken. Kerina si e arus jadi, tapi labo berarti maka enggo seh ku kedungenna.”

¹⁰ Tole nina Jesus, “Bangsa pagi ngelawan bangsa, kerajan ngelawan kerajan.

¹¹ Ijapa pe terjadi pagi taneh linuren, kelihen ras penakit cacar. Lit pe pagi kejadin si mehantu ras tanda-tanda sengget i langit nari.

¹² Ope denga jadi si enda kerina, kam pagi itangkap dingen isiksa. Kam pagi iendesken ku bas rumah pertoton guna icubai janah itamaken ku bas penjara. Kam pagi ibaba ku lebe-lebe raja ras ku lebe-lebe kalak si erkuasa erkite-kiteken Aku.

¹³ Enda pagi jadi kesempaten man bandu guna meritaken Berita Si Mehuli si i bas Dibata nari e.

¹⁴ E maka tetapkenlah i bas ukurndu, maka la atendu ndele kerna kai si man katanken guna mbela dirindu.

¹⁵ Aku pagi mereken man bandu jabapenna, ras kepentaren gelah la lit sekalak pe imbang-imbangndu ngasup ngelawan ntah nimbak kai si ikatakenndu e.

¹⁶ Kam pagi iendesken orang-tuandu, senina-seninandu, kade-kadendu ras teman-temanndu. Piga-piga i bas kam ibunuh pe pagi.

¹⁷ Kerina kalak e rate segat man bandu erkite-kiteken Aku.

¹⁸ Tapi labo bene selambar buk pe i bas takalndu nari.

¹⁹ Megenggenglah kam, sabap alu bage maka kam banci engkelini geluhndu.”

Ituriken Jesus kerna keruntuhen Jerusalem

²⁰ “Adi idahndu pagi Jerusalem ikepung tentera, tentu ietehndu maka keruntuhenna enggo ndeher.

²¹ Asum si e pagi kalak si ringan i Judea arus kiam ku deleng-deleng; kalak si i kuta arus mengongsi janah kalak si i daraten kuta olanai ia bengket ku bas kuta.

²² Sabap wari e me wari pengukumen, gelah alu bage seh me rikutken si isuratken i bas Pustaka Si Badia.

²³ Andiko, cilaka kal pernanden-pernanden si sangana mehuli kula ras si sangana pepinemken i bas paksa si e! Sabap reh me pagi kiniseran si mesangat ku doni enda janah ukumen Dibata nandangi bangsa enda.

²⁴ Lit kalak si ibunuh alu pedang. Si debanna ibaba jadi tabanen ku kerina negeri. Jerusalem italuken kalak si la nandai Dibata seh pagi genep paksa si enggo itetapken Tuhan.”

Kerehen Anak Manusia si isuruh Dibata

²⁵ “Teridah me pagi tanda-tanda i bas matawari, bulan ras bintang-bintang. Bage pe kerina bangsa i babo doni enda bene ukurna dingen mbiar ia nandangi galumbang ras lawit si merawa.

²⁶ Manusia pagi labuh perbahan biarna i bas ia nimai kai si jadi ku doni enda, sabap kuasa-kuasa langit pe mugur-ugur.

²⁷ Sanga si e me pagi teridah Anak Manusia si isuruh Dibata reh i bas embun alu kemulian si mbelin dingen erdolat.

²⁸ Adi si enda kerina enggo mulai jadi, kekekenlah janah jurgakken, sabap penebusenndu enggo ndeher.”

Pelajaren i bas batang ara nari

²⁹ Jenari ituriken Jesus man kalak e perumpaman enda, “Nehenlah batang ara bage pe batang kayu si deban.

³⁰ Adi idahndu batang kayu e enggo ertunas, ietehndu pe maka musim lego enggo ndeher.

³¹ Bage pe adi idahndu pagi jadi kerina si Kukataken ndai, ingetlah, maka Kinirajan Dibata enggo ndeher.

³² Kerina si e pagi jadi ope denga mate kerina manusia.

³³ Langit ras doni masap kap pagi tapi katangKu tetap rasa lalap.”

Erjaga-jagalah

³⁴ “Jagalah bandu, gelah pusuhndu la iberati alu barang si erbahanca kam ketagih minem si erbahanca mabuk, ntah kearun ate kerna kegeluhen enda, seh maka erkiteken si e la kam ersikap sanga wari e rempet reh.

³⁵ Sabap wari e rempet pagi reh bagi siding man kerina jelma ibelang-belang doni enda.

³⁶ Erjagalah dingen tetap ertoto gelah kam pulah i bas kerina kejadin e, janah ngasup kam tedis i lebe-lebe Anak Manusia si isuruh Dibata.”

³⁷ Suari Jesus ngajar i bas Rumah Pertoton janah berngi lawes IA ku daraten kuta, erberngi IA i datas Uruk Seton.

³⁸ Tep-tep wari lampas kerina kalak reh ndahi IA ku Rumah Pertoton guna megiken pengajarenNa.