LUKAS 20 - Pustaka Si Badia

Penungkunen kerna kuasa Jesus

¹ I bas sada wari, Jesus ngajar i bas Rumah Pertoton dingen meritaken Berita Si Meriah i bas Dibata nari man kalak si nterem. Paksa si e, reh imam-imam si mbelin, guru-guru agama Jahudi ras peminpin-peminpin Jahudi,

² jenari nina man Jesus, “Kataken man kami, kuasa kai kin si lit i bas Kam erbahan si enda kerina? Ise mereken kuasa e man Bandu?”

³ Erjabap Jesus man kalak e nina, “Kusungkun kam lebe.

⁴ Kuasa Johanes Peridiken mperidiken e reh i bas Dibata nari, ntah i bas manusia nari?”

⁵ E maka sisungkun-sungkunen ia kerina nina, “Kuga ninta? Adi ninta, ‘I bas Dibata nari,’ ugapa pe nina, ‘Adi bage ngkai maka la kam tek man Johanes Peridiken.’

⁶ Tapi adi ninta, ‘I bas manusia nari,’ merawa kari kalak si nterem enda janah ibenterina kita alu batu, sabap kalak si nterem tek maka Johanes Peridiken sekalak nabi.”

⁷ E maka erjabap ia man Jesus nina, “La ieteh kami i ja nari rehna.”

⁸ Nina Jesus man bana, “Adi bage, Aku pe la Kukataken man bandu alu kuasa kai Kubahan enda kerina.”

Perumpaman kerna si newa kebun anggur

⁹ Jenari ituriken Jesus perumpaman enda man kalak si nterem nina, “Lit me sekalak si nuan anggur i bas kebunna. Jenari lawes ia ku negeri si ndauh. Perbahan ndekah atena i bas negeri si ndauh e, e maka isewakenna kebun anggur e.

¹⁰ Kenca seh paksa peranin buah anggur, isuruhna sekalak juak-juakna ndahi si newa kebun anggur e, guna mindo sikerajangenna. Tapi ipekpeki si newa kebun anggur juak-juak ndai jenari isuruhna mulih alu la maba kai pe.

¹¹ E maka isuruh tuan si mada kebun anggur juak-juak si deban. Tapi ia pe ipekpeki si newa e, igombang-gombangi janah isuruhna mulih alu la maba kai pe.

¹² Jenari isuruh tuan si mada kebun anggur juak-juak si peteluken. Ia pe ipekpeki si newa e seh luka janah iambekkenna ku darat kebun e.

¹³ E maka rukur tuan si mada kebun anggur nina, ‘Kai nge ndia arus kubahan? Kusuruh me anakku si kukelengi enda; tentu mehangke kari ia.’

¹⁴ Tapi kenca idah si newa kebun anggur anak tuan e nina sapih-sapih ia, ‘Enda kap anak tuan si mada kebun anggur enda. Sibunuhlah ia gelah man banta kebunna enda!’

¹⁵ E maka iambekkenna anak tuan e ku darat kebun, jenari ibunuhna.” Jenari nungkun Jesus nina, “Kenca bage kuga nge ibahan tuan si mada kebun anggur nandangi si newa e?

¹⁶ Tentu reh ia, ibunuhna kerina si newa kebun anggur e, jenari isewakenna kebun e man kalak si deban.” Megi kata e nina kalak si nterem, “Mbera-mbera ola bage!”

¹⁷ Itatap Jesus ia kerina janah nina, “Adi bage, kai nge erti kata si tersurat i bas Pustaka Si Badia enda? ‘Batu si iambekken tukang, enggo jadi batu palas.’

¹⁸ Ise si ndabuh ku batu e getem me ia, janah ise si idabuhi batu e meripuk me ia.”

Penungkunen kerna nggalar pajak

¹⁹ Paksa si e pe guru-guru agama Jahudi ras imam-imam si mbelin ersura-sura nangkap Jesus. Sabap ietehna maka ia nge tujun perumpaman si ituriken Jesus ndai. Tapi mbiar ia kalak si nterem.

²⁰ E maka idaramina kesempaten si deban. Isogokna piga-piga kalak gelah ipekulah-kulahna bana bujur. Kalak enda isuruhna ncubai Jesus alu penungkunen-penungkunen, gelah alu bage banci iendeskenna Jesus man gubernur gelah itutup.

²¹ Nina kalak enda ndai man Jesus, “O Guru, ieteh kami maka kai si ikatakenndu ras si iajarkenNdu e tuhu. La erpilihen temanNdu ngerana. La ipernehenNdu pangkat manusia, tapi iajarkenNdu kerna kai si tuhu-tuhu ngena ate Dibata ibahan manusia.

²² Kataken dage man kami, rikutken aturen agamanta banci ntah lang galar pajak man Kepala Pemerentah Roma?”

²³ Tapi ieteh Jesus kai tujun ranan kalak si pekulah-kulah enda, e maka nina,

²⁴ “Cidahken lebe man bangKu sada duit pirak. Gambar ras gelar ise kin lit i bas duit e?” Erjabap kalak ndai, “Gambar ras gelar Kepala Pemerentah Roma.”

²⁵ E maka nina Jesus, “Adi bage, berekenlah man Kepala Pemerentah Roma kai sikerajangen Kepala Pemerentah Roma janah bereken man Dibata kai sikerajangen Dibata.”

²⁶ La ngasup kalak ndai nidingi cakap Jesus i lebe-lebe jelma si nterem. Mamang pe atena megi jabap Jesus, e maka sinik nari nge ia.

Penungkunen kerna kekeken i bas si mate nari

²⁷ Reh me piga-piga kalak Saduki ndahi Jesus. Kalak enda la tek maka kalak mate nggeluh mulihken. Isungkunna Jesus nina,

²⁸ “O Guru, man banta enggo isuratken Musa Undang-undang enda, ‘Adi sekalak dilaki mate nadingken ndeharana, janah la lit pupusna, e maka diberu si enggo mbalu ndai arus ilakomangani senina si mate e gelah ipupusna anak jadi gancih senina si enggo mate ndai.’

²⁹ Lit me pitu kalak dilaki si ersenina. Sintua enggo empo, janah mate ia, la lit pupusna.

³⁰ E maka ilakomangani seninana si nomor dua diberu e,

³¹ jenari seninana si nomor telu ngelakomanganisa. Bage me jadi man pituna si ersenina ndai – kerina ia mate, sada pe la nadingken anak.

³² Dungna diberu ndai pe mate ka.

³³ Adi bage, kenca nggeluh kerina si mate ndai i bas wari kekeken, si apai nge perbulangen diberu ndai? Sabap pituna ia enggo pernah erjabu ras diberu e.”

³⁴ Ijabap Jesus kalak ndai nina, “Kalak si nggeluh i bas paksa enda sereh dingen empo.

³⁵ Tapi kalak si metunggung ngaloken kegeluhen si mbaru kenca ipekeke i bas si mate nari lanai bo ia sereh dingen empo.

³⁶ IA enggo bali ras malekat-malekat janah lanai banci mate. Ia enggo ipegeluh i bas si mate nari, janah enda me tandana maka ia anak-anak Dibata.

³⁷ Kerna si mate nggeluh mulihi enggo tangkas ituriken Musa i bas bagin turi-turin kerna rambah si gara. I je ikataken maka Tuhan e, e me Dibata si tetap isembah Abraham. Dibata si tetap isembah Isak ras Dibata si tetap isembah Jakup.

³⁸ Enda ertina maka IA Dibata kalak si nggeluh labo Dibata si mate, sabap i bas adep-adepenNa kerina jelma nggeluh.”

³⁹ Megi si enda nina piga-piga guru-guru agama Jahudi, “Payo kal jabapNdu e Guru!”

⁴⁰ E maka lanai ia pang nungkun kai pe man Jesus.

Penungkunen kerna Mesias si ipadanken Dibata

⁴¹ Nina Jesus man kalak e, “Kuga banci ikataken kalak maka Mesias si ipadanken Dibata e, e me kesusuren Daud?

⁴² Sabap Daud jine ngatakenca i bas kitap Masmur, ‘Nina TUHAN man TuhanKu Kundulken arah kemuhenKu

⁴³ seh Kutamaken imbang-imbangNdu i teruh tapak-tapak naheNdu.’

⁴⁴ Daud jine ngatakenca maka IA Tuhan. Kuga banci maka Mesias si ipadanken e kesusuren Daud ka?”

Ipersingeti Jesus gelah metenget nandangi guru-guru agama

⁴⁵ Asum kalak si nterem pe megiken IA nina man ajar-ajarNa,

⁴⁶ “Metengetlah nandangi guru-guru agama Jahudi, si megati erdalan-dalan erbaju gedang, si atena ihamati i gedang-gedang dalan ras itiga. Ia nggit kal kundul arah lebe i bas rumah pertoton. Idaramina ingan si mehamat i bas kerja-kerja.

⁴⁷ Ibuatna keuntungenna i bas kalak si enggo mbalu nari ras ngerampasi rumah diberu balu-balu. Ibahanna pertoton si gedang alu pekulah-kulah. Kalak si bage pasti iukum alu ukumen si seh kal beratna.”